Samuel I, 31

Saul kɛ e binyumu ɔmɛ a gbenɔ

(<x>130 10:1-12</x>)

1 Ligbi ko ɔ, Filisti bi ɔmɛ, kɛ Israel bi ɔmɛ hwu ta ngɛ Gilboa yo ɔ nɔ. A gbe Israel bi ɔmɛ babauu nitsɛ ngɛ lejɛ ɔ, nɛ Saul, kɛ e binyumu ɔmɛ, kɛ ni nɛmɛ nɛ piɛ ɔ tu fo.

2 Se Filisti bi ɔmɛ ya na mɛ, nɛ a gbe Saul binyumu etɛ ɔmɛ, Yonatan, Abinadab, kɛ Malkishua.

3 Ta nɛ nyɛɛ Saul se ɔ mi wa wawɛɛ nitsɛ. Kɛ̃ɛ̃ tsɛli ɔmɛ a nine su e nɔ, nɛ a plaa lɛ wawɛɛ.

4 Kɛkɛ nɛ Saul de e ta hwumi ní hɛɛlɔ ɔ ke, “Moo hia o klaate ɔ nɛ o kɛ gbe mi, nɛ́ mɔmlɔtɔtsɛmɛ nɛ ɔmɛ ko ba gbe mi nɛ a bɔ mi ahlua.” Se niheyo ɔ ye gbeye, nɛ e nyɛ we nɛ e pee ja. Lɔ ɔ he ɔ, Saul nitsɛ kɛ̃ e klaate ɔ, nɛ e kɛ gbe e he.

5 Benɛ Saul ta hwumi ní hɛɛlɔ ɔ na kaa Saul gbo ɔ, lɛ hu e kɛ lɛ nitsɛ e klaate ɔ gbe e he.

6 Nɛ Saul kɛ e binyumu etɛ ɔmɛ, e ta hwumi ní hɛɛlɔ ɔ, kɛ e ta buli ɔmɛ tsuo gbo ligbi kake too.

7 Benɛ Israel bi ɔmɛ nɛ ngɛ Yezreel kɔ̃ ɔ se je, kɛ ni nɛmɛ nɛ ngɛ Yordan pa a beleku je ɔ nu kaa Israel ta a gbɛ, nɛ jehanɛ hu, Saul kɛ e binyumu ɔmɛ gbo ɔ, a tu fo kɛ je a ma amɛ a mi; nɛ Filisti bi ɔmɛ ba nɛ a ba hi lejɛ ɔmɛ.

8 E nɔ jena benɛ Filisti bi ɔmɛ ba nɛ a ba ha ní ngɛ ni gbogboe ɔmɛ a he ɔ, a na Saul kɛ e binyumu etɛ ɔmɛ nɛ a gbo fɔɔ si ngɛ Gilboa yo ɔ nɔ.

9 A po Saul yi, nɛ a je ta hwumi ní ɔmɛ ngɛ e he, nɛ a kɛ tsɔ nihi ke a kɛ ya kpa Filistia tsuo, nɛ a ngɔ manye munyu ɔ ya ha amaga amɛ, kɛ ma a tsuo.

10 Lɔ ɔ se ɔ, a ngɔ e ta hwumi ní ɔmɛ ya to yo mawu ɔ nɛ a tsɛɛ Ashtarot ɔ we ɔ, nɛ a kɛ e nɔmlɔ tso ɔ ya kpla Bet Shan gbogbo ɔ he.

11 Benɛ Yabesh Gilead bi ɔmɛ nu nɔ́ nɛ Filisti bi ɔmɛ pee Saul ɔ,

12 nyumuhi katsɛmɛ ɔmɛ tsuo nyɛɛ nyɔnyɔɔnyɔ kɛ ya Bet Shan ya je Saul gbogboe ɔ, kɛ e binyumu ɔmɛ a ní ɔmɛ kɛ je gbogbo ɔ he, nɛ a ngɔ mɛ kɛ ba Yabesh, nɛ a ba sã mɛ ngɛ lejɛ ɔ.

13 Lɔ ɔ se ɔ, a muɔ wu ɔmɛ ya pu ngɛ tso nguaa ko sisi ngɛ Yabesh ma a mi, nɛ a ha hwɔ ligbi kpaago.