Samuel I, 30

David kɛ Amalek bi hwu ta

1 Ligbi nɛ ji etɛ ɔ, be nɛ David kɛ e we bi ɔmɛ ke a suu Ziklag ɔ, Amalek bi ɔmɛ ba ha ní ngɛ Yuda leneyi je, nɛ a tua Ziklag. A kɛ la sã Ziklag,

2 nɛ a nuu yi ɔmɛ, kɛ nɔ tsuaa nɔ nɛ ngɛ ma a mi ɔ, jokuɛwi kɛ nikɔtɔmahi tsuo. A gbi nɔ ko nɔ ko; se mohu benɛ a yaa a, a muɔ mɛ tsuo kɛ ho.

3 Benɛ David kɛ e we bi ɔmɛ ba su ma a mi ɔ, a na kaa a sã ma a, nɛ jehanɛ hu a nuu a yi ɔmɛ, a binyumu ɔmɛ, kɛ a biyi ɔmɛ kɛ je.

4 Kɛkɛ nɛ David kɛ e we bi ɔmɛ wo yana hluu kɛ ya si a he wami ta.

5 ⓨ A nuu David yi enyɔ ɔmɛ hu kɛ ho. Mɛ ji Ahinoam, Yezreel no ɔ, kɛ Abigail, Nabal nɛ je Karmel yalɔyo ɔ.

6 David hao wawɛɛ nitsɛ; ejakaa e we bi ɔmɛ a hɛ dɔ ngɛ a bimɛ ɔmɛ nɛ a be ɔ a he. Jehanɛ hu a de ke a maa fia lɛ tɛ. Se Yawɛ, David Mawu ɔ wo lɛ he wami.

7 ⓩ David de osɔfo Abiatar, Ahimelek binyumu ɔ ke, “Ngɔɔ efɔd ɔ kɛ ba ha mi.” Nɛ Abiatar ngɔ efɔd ɔ kɛ ba ha lɛ.

8 David bi Yawɛ ke, “Ma nyɛɛ ní hali ɔmɛ a se lo? Anɛ ye nine maa su a nɔ lo?” Yawɛ he nɔ ke, “Ee, moo nyɛɛ a se; ejakaa o ma ya na mɛ, nɛ bɔ tsuaa bɔ nɛ pee ɔ, o ma kpɔ ni ɔmɛ.”

9 Lɔ ɔ he ɔ, David kɛ e we bi nɛ ji nyumuhi lafa ekpa amɛ pue blɔ. Benɛ a su Besor pa a nya a, ni komɛ tlɔ lejɛ ɔ nɛ a je a he.

10 David kɛ nyumuhi lafa eywiɛ tsa nyɛɛmi ɔ nɔ. Nyumuhi lafa enyɔ nɛ piɛ ɔ, pɔ tɔ mɛ nɛ a nyɛ we nɛ a po Besor pa a; lɔ ɔ he ɔ, mɛɛ a tlɔ pa a se.

11 David we bi ɔmɛ ya na Egipt niheyo ko ngɛ nga a nɔ, nɛ a kɛ lɛ ba David ngɔ. A ha lɛ ní nɛ e ye, nɛ a ha lɛ nyu nɛ e nu.

12 Lɔ ɔ se ɔ, a ha lɛ ngmɔkɔ kɛ wai yiblii sau enyɔ nɛ e ye, kɛkɛ nɛ e hɛ mi tsɔ lɛ; ejakaa e yi ní, nɛ e nui nyu ligbi etɛ sɔuu.

13 David bi lɛ ke, “Mɛnɔ ngɔ bi ji mo? Nɛ jije o je?” Niheyo ɔ he nɔ ke, “Egipt no ji mi, se ye nyɔmtsɛ ɔ lɛɛ Amalek no ji lɛ. Ye nyɔmtsɛ ɔ je ye he ngɛ hiɛ ɔ mwɔnɛ ɔ ji ligbi etɛ; ejakaa i be he wami.

14 Wa ya tua Keret bi a zugba a nɛ ngɛ Yuda leneyi je ɔ, kɛ Kaleb bi a zugba a, nɛ wa sã Ziklag ma a.”

15 David bi lɛ ke, “Anɛ o ma nyɛ maa tsɔɔ mi he nɛ nimli nɛ ɔmɛ ngɛ lo?” Niheyo ɔ he nɔ ke, “Ke o maa wo si ngɛ Mawu biɛ mi kaa o be mi gbee, nɛ jehanɛ hu, o be mi jee kɛ wo ye nyɔmtsɛ ɔ dɛ mi ɔ, lɛɛ i kɛ mo maa ya.”

16 Nɛ e kɛ David ho. Benɛ a su lejɛ ɔ, a na ni ɔmɛ nɛ a pueɔ si babauu ngɛ zugba. Blɔɔ a ngɛ ní yee, a ngɛ ní nue, nɛ a ngɛ doe; ejakaa ta yibu ní nɛ a nine su nɔ ngɛ Filistia kɛ Yuda a, tsa pi fiɛmi.

17 E nɔ jena makɛ ɔ, David ya tua mɛ, nɛ e kɛ mɛ hwu kɛ ya si gbɔkuɛ. Nɔ ko nɔ ko he ji mi, kaa ja nihewi lafa eywiɛ nɛ mɛɛ a hi afukpɔngɔ nɔ kɛ tu fo pɛ.

18 David kpɔ nɔ́ tsuaa nɔ́ nɛ Amalek bi ɔmɛ ba ha kɛ ho ɔ. E nine su e yihi enyɔ ɔmɛ hu a nɔ,

19 nɛ nɔ́ ko nɔ́ ko laa we. David kpɔ e we bi ɔmɛ a binyumu ɔmɛ, kɛ a biyi ɔmɛ, kɛ ta yibu ní nɛ Amalek bi ɔmɛ muɔ ɔ tsuo.

20 Jehanɛ David muɔ to ɔmɛ, kɛ na amɛ tsuo pɛpɛɛpɛ. E we bi ɔmɛ kpaka lohwe ɔmɛ kɛ nyɛɛ a hɛ mi be mi nɛ a ngɛ dee ke, “David ta yibu ní ji nɛ ɔmɛ nɛ!”

Ta yibu ní dlami

21 David ba su nyumuhi lafa enyɔ ɔmɛ a ngɔ. Mɛ ji ni nɛmɛ nɛ pɔ tɔ mɛ nɛ a nyɛ we nɛ a kɛ David nɛ ya nɛ a je a he ngɛ Besor pa a nya a nɛ. Benɛ David kɛ e we bi ɔmɛ ba su ɔ, ni ɔmɛ nya a he, nɛ lɛ hu e kɛ bua jɔmi fɔ mɛ, nɛ e bi mɛ se amaniɛ.

22 Se amimitsɛmɛ kɛ yaka nimli nɛ nyɛɛ David se ɔ de ke, “Akɛnɛ a kɛ wɔ yɛ he je ɔ, wa be mɛ ta yibu ní ɔmɛ nɛ wa ya kpɔ ɔ eko hae. A ba ngɔ a yi ɔmɛ, kɛ a bimɛ ɔmɛ kɛkɛ nɛ a ho.”

23 Se David de mɛ ke, “Ye nyɛmimɛ, nɔ́ nɛ Yawɛ ha wɔ ɔ, nyɛ ko pee lɛ ja. Yawɛ baa wa yi nɛ e je ni nɛmɛ nɛ ba tua wɔ ɔ kɛ wo wa dɛ mi.

24 Mɛnɔ maa kplɛɛ nɔ́ nɛ nyɛ de nɛ ɔ nɔ? Bɔ nɛ ta yalɔ ko ma na a, ja nɔuu nɔ nɛ buu ní ɔmɛ a he ɔ ma na; mɛ tsuo a ma na sɔsɔɛ.”

25 David pee nɔ́ nɛ ɔ mlaa, nɛ a ngɛ nɔ yee ngɛ Israel kɛ je jamɛ a be ɔ kɛ ba si mwɔnɛ ɔ.

26 Benɛ David kpale kɛ ba Ziklag ɔ, e tsɔ nɛ a kɛ ta yibu ní ɔ eko ya ha e huɛmɛ Yuda ma nimeli ɔmɛ, nɛ e de mɛ ke, “Nike ní nɛ wa ngɔ kɛ ba ha nyɛ nɛ ɔ ji ta yibu ní nɛ wa ngɔ kɛ je Yawɛ he nyɛli ɔmɛ a dɛ mi ɔ eko.”

27 David kɛ ta yibu ní ɔ eko mane nihi nɛ ngɛ Betel, nihi nɛ ngɛ Rama ngɛ Yuda leneyi je ɔ, nihi nɛ ngɛ Yatir,

28 nihi nɛ ngɛ Aroer, nihi nɛ ngɛ Sifmot, ni nɛmɛ nɛ ngɛ Eshtemoa,

29 nihi nɛ ngɛ Rakal, Yerameel bi ɔmɛ, Ken bi ɔmɛ,

30 nihi nɛ ngɛ Horma, Borashan, Atak,

31 kɛ Hebron ma amɛ a mi. He tsuaa he nɛ David kɛ e we bi ɔmɛ ya kpa a, e mane nihi nɛ ngɛ lejɛ ɔ ta yibu ní ɔ eko.