Samuel I, 12

Samuel sɛ yemi munyu

1 Jehanɛ Samuel de Israel tsuo ke, “Nɔ́ nɛ nyɛ bi mi ɔ, i pee ha nyɛ; i wo matsɛ ha nyɛ.

2 Amlɔ nɛ ɔ, lɛ nɛ e maa nyɛɛ nyɛ hɛ mi. Imi lɛɛ i bwɔ, nɛ ye yi bwɔmi hiɛ futaa, nɛ ye binyumuhi ngɛ nyɛ kpɛti. I nyɛɛ nyɛ hɛ mi kɛ je ye nihe mi kɛ ba si mwɔnɛ ɔ.

3 Imi ji nɛ ɔ nɛ. Ke i pee nɔ́ ko nɛ dɛ ɔ, nyɛɛ po ye nya ngɛ Yawɛ, kɛ nɔ nɛ a wo lɛ matsɛ ɔ a hɛ mi. Anɛ i kpɔ nɔ ko na, loo nɔ ko teji? Anɛ i ye nɔ ko amimi, aloo i wa nɔ ko yi mi? Anɛ i he nyɔ mi ní ngɛ nɔ ko dɛ bɔ nɛ pee nɛ ma ye e sane ɔ ha lɛ lo? Nyɛ de, konɛ ma to nyɛ nane mi.”

4 Ma a he nɔ ke, “Dɛbi, o yi wɔ amimi; o wɛ wɔ yi mi, nɛ o kpɔ we nɔ́ ko ngɛ nɔ ko dɛ.”

5 Samuel de mɛ ke, “Yawɛ, kɛ nɔ nɛ e wo lɛ matsɛ ɔ ji ye we odasehi mwɔnɛ ɔ, kaa nyɛ nɛ nɔ́ ko nɔ́ ko ngɛ ye he.” A he nɔ ke, “Ee, Yawɛ ji wa we odase.”

6 ⓙ Samuel ya nɔ nɛ e de ma a ke, “Yawɛ lɛ hla Mose kɛ Aaron, nɛ lɛ ji nɔ nɛ kpaka nyɛ nɛmɛ ɔmɛ kɛ je Egipt zugba a nɔ kɛ ba.

7 Lɔ ɔ he ɔ, nyɛɛ da si dii, konɛ ma po nyɛ nya ngɛ Yawɛ hɛ mi, nɛ ma kai nyɛ ní nguahi nɛ Yawɛ pee kɛ he nyɛɛ kɛ nyɛ nɛmɛ ɔmɛ a yi wami.

8 ⓚ Benɛ Yakob kɛ e bimɛ ɔmɛ ya Egipt, nɛ Egipt bi ɔmɛ ngɛ mɛ yi mi wae ɔ, nyɛ nɛmɛ ɔmɛ fa kue ha Yawɛ, nɛ e tsɔ Mose kɛ Aaron nɛ a ya je mɛ kɛ je Egipt kɛ ba hiɛmɛ nɛ ɔ.

9 ⓛ Se a hɛ je Yawɛ, a Mawu ɔ nɔ. Enɛ ɔ he je ɔ, lɛ hu e ngɔ mɛ ngɔ wo Hazor tatsɛ Sisera, kɛ Filisti bi ɔmɛ, kɛ Moab matsɛ ɔ a dɛ mi, nɛ a kɛ mɛ hwu ta.

10 ⓜ Kɛkɛ nɛ a fa kue ha Yawɛ, nɛ a de ke, ‘Wa pee yayami, ejakaa wa je Yawɛ se nɛ wa ya ja Baal amaga amɛ, kɛ yo wɔ Ashtarot ɔ hu e we amaga amɛ. Mo kpɔ wɔ kɛ je wa he nyɛli ɔmɛ a dɛ mi, nɛ wa ma sɔmɔ mo!’

11 ⓝ Kɛkɛ nɛ Yawɛ tsɔ Gideon; Gideon se ɔ, e tsɔ Barak; Barak se ɔ, e tsɔ Yefta; nɛ pee se ɔ, e tsɔ imi Samuel. Wa ti nɔ tsuaa nɔ je nyɛ kɛ je nyɛ he nyɛli ɔmɛ nɛ bɔle nyɛ ɔ a dɛ mi, nɛ nyɛ hi si ngɛ tue mi jɔmi mi.

12 ⓞ Se benɛ nyɛ na kaa Amon matsɛ, Nahash ma nyɛ tuami ɔ, nyɛ de mi ke, ‘Dɛbi, ja wa ná matsɛ nɛ e ye wa nɔ,’ be mi nɛ Yawɛ, nyɛ Mawu ɔ ji nyɛ matsɛ.

13 “Lɔ ɔ he ɔ, ne matsɛ ɔ nɛ nyɛ hla a; nyɛ bi ke a ha nyɛ matsɛ, nɛ Yawɛ ngɔ lɛ ngɔ ha nyɛ.

14 Ke nyɛ maa ye Yawɛ, nyɛ Mawu ɔ gbeye, nɛ nyɛ ma sɔmɔ lɛ, nɛ nyɛ be e hɛ mi atuã tsɔe, se nyɛ maa ye e mlaa amɛ a nɔ, nɛ nyɛɛ kɛ nyɛ matsɛ ɔ maa nyɛɛ e se ɔ, lɛɛ e maa hi ha nyɛ.

15 Se ke nyɛ bui Yawɛ tue, nɛ nyɛ tsɔ atuã kɛ si e mlaa amɛ ɔ, nyɛɛ, kɛ nyɛ matsɛ ɔ tsuoyawɛ kɛ nyɛ maa ye saminya.

16 Lɔ ɔ he ɔ, nyɛɛ da si dii, nɛ nyɛ maa na nyakpɛ ní nguaa nɛ Yawɛ ma tsu.

17 Anɛ pi ngma kpami be ji nɛ ɔ? Se ma tsɛ Yawɛ nɛ e ma ha hiɔwe ma si, nɛ hiɔmi maa nɛ konɛ nyɛ na nyɛɛ le kaa nyɛ pee Yawɛ yayami agbo kaa nyɛ bi ke a ha nyɛ matsɛ.”

18 Kɛkɛ nɛ Samuel fa kue ha Yawɛ, nɛ Yawɛ ha hiɔwe si, nɛ hiɔmi nɛ jamɛ a ligbi ɔ. Nɛ ma a tsuo ye Yawɛ kɛ Samuel gbeye wawɛɛ nitsɛ;

19 nɛ a de Samuel ke, “Kpa Yawɛ, o Mawu ɔ pɛɛ ha wɔ, konɛ wa ko gbo; ejakaa wa na jehanɛ kaa ngɛ wa yayami kpa amɛ a se ɔ, wa pee yayami kaa wa bi ke a ha wɔ matsɛ.”

20 Se Samuel de mɛ ke, “Nyɛ ko ye gbeye. E ngɛ mi kaa nyɛ ná pee kikɛmɛ a yayami nɛ ɔmɛ tsuo lɛɛ, se kɛ̃, nyɛ ko je Yawɛ se; mohu nyɛ sɔmɔ lɛ kɛ nyɛ tsui tsuo.

21 Nyɛ ko ya nyɛɛ yaka níhi nɛ a he be se nami, nɛ a be nyɛ yi wami nyɛe ma he ɔ a se; ejakaa yaka níhi kɛkɛ ji mɛ.

22 Yawɛ be e ma nɛ e hla a he ngmɛɛe. Ke e pee ja pɛ kɛkɛ e biɛ kpetekpleenyɛ ɔ puɛ; ejakaa e sa e hɛ mi kaa e kɛ nyɛ maa pee lɛ nitsɛ e ma.

23 Imi lɛɛ ma kpa Yawɛ pɛɛ ha nyɛ daa, nɛ ma tsɔɔ nyɛ nɔ́ nɛ hi, kɛ nɔ́ nɛ da, konɛ ma ko pee yayami kɛ si Yawɛ.

24 Nɔ́ nɛ sa nyɛ peemi kɛkɛ ji nyɛɛ ye Yawɛ gbeye, nɛ nyɛ kai ní nguahi nɛ e pee ha nyɛ ɔ.

25 Se ke nyɛ tsa nɔ pee yayami ɔ, lɛɛ e ma kpata nyɛɛ kɛ nyɛ matsɛ ɔ tsuo nyɛ hɛ mi.”