Samuel I, 11 - Laravel

Saul ye Amon bi ɔmɛ a nɔ

1 Maa pee hlami kake se ɔ, Matsɛ Nahash nɛ je Amon, kɛ e ta buli ya sa Yabesh Gilead yi. Nyumu ɔmɛ tsuo ngɛ Yabesh ɔ de Nahash ke, “Ha waa kɛ mo nɛ so, konɛ wa sɔmɔ mo.”

2 Se Nahash de mɛ ke, “Loko i kɛ nyɛ maa so ɔ, ma ta nɔ tsuaa nɔ hiɔ hɛngmɛ, nɛ i kɛ nɔ́ nɛ ɔ ma pue Israel tsuo hɛ mi si.”

3 Yabesh ma nimeli ɔmɛ de lɛ ke, “Ha wɔ ligbi kpaago nɛ waa tsɔ kɛ ya Israel ma amɛ tsuo a mi. Ke wa nɛ nɔ ko nɛ ma kpɔ wɔ ɔ, lɛɛ wa ma ha yi.”

4 Tsɔli ɔmɛ ba su Gibea, he nɛ Saul ngɛ ɔ. Benɛ a bɔ ma a amaniɛ ɔ, ma a wo yana yuuyuuyuu.

5 Se benɛ a maa hyɛ ɔ, Saul ji nɛ ɔ nɛ e nyɛɛ e nahi a se kɛ je ngmɔ mi kɛ ma. Saul bi ke, “Mɛni ba loko ma a tsuo wo yana kikɛ nɛ ɔ?” A de lɛ sɛ gbi nɛ tsɔli ɔmɛ hɛɛ kɛ je Yabesh kɛ ba a.

6 Benɛ Saul nu munyu nɛ ɔ, Mawu mumi ɔ ba e nɔ, nɛ e mi mi fu wawɛɛ nitsɛ.

7 E nu na enyɔ nɛ e poo a mi kpɔ nya kpɔ nya, nɛ e ngɔ ha tsɔli ke a ya kpa Israel ma amɛ tsuo a mi nɛ a de ke, “Nɔ nɛ be bae nɛ e ba nyɛɛ Saul kɛ Samuel a se ɔ, jamɛatsɛ ɔ, bɔ nɛ a maa pee e nahi ji nɛ ɔ nɛ!” Yawɛ ha sawale nu ma a, nɛ mɛ tsuo kulaa a je kpo kɛ ba; e píɛ nɔ ko.

8 Saul bua ma a nya ngɛ Bezek, nɛ a ná nyumuhi akpe lafa etɛ nɛ je Israel, kɛ akpe nyingmi etɛ nɛ je Yuda.

9 A de tsɔli ɔmɛ nɛ je Yabesh Gilead kɛ ba a ke, “Nyɛ ya de nyɛ bi ɔmɛ ke, ‘Hwɔɔ, loko pu maa da a, a ma he nyɛ yi wami!’ ” Benɛ tsɔli ɔmɛ ya bɔ Yabesh bi ɔmɛ amaniɛ ɔ, a bua jɔ,

10 nɛ a de Nahash ke, “Hwɔɔ ɔ, wa ma ha yi, nɛ nɔ́ tsuaa nɔ́ nɛ nyɛ suɔ ɔ, nyɛɛ pee wɔ.”

11 E nɔ jena a, Saul gba ma a mi kɛ wo tabo etɛ a mi. Makɛ ɔ, a ya sɛ he nyɛli ɔmɛ a ta a mi, nɛ a tua Amon bi ɔmɛ. A gbe Amon hluu kɛ ya si be nɛ pu da. Ni nɛmɛ nɛ piɛ ɔ gbɛ fĩa, nɛ o be a ti nihi enyɔ po nae ngɛ he kake.

12 Lɔ ɔ se ɔ, ma a de Samuel ke, “Mɛnɔmɛ lɛ a de ke, ‘Anɛ Saul hu ma nyɛ wa nɔ matsɛ maa ye’ ɔ? Nyɛɛ ngɔ ni ɔmɛ ha wɔ nɛ waa gbe mɛ!”

13 Se Saul de ke, “Dɛbi, a be nɔ ko nɔ ko gbee mwɔnɛ ɔ, ejakaa mwɔnɛ ligbi nɛ ɔ, Yawɛ he Israel yi wami.”

14 Enɛ ɔ se ɔ, Samuel de ma a ke, “Nyɛ ha waa ya Gilgal nɛ wa ya ma matsɛ yemi ɔ nɔ mi ngɛ lejɛ ɔ.”

15 Ma a tsuo ho nɛ a ya wo Saul matsɛ ngɛ Gilgal ngɛ Yawɛ hɛ mi. A sã tue mi jɔmi bɔhi ngɛ Yawɛ hɛ mi ngɛ lejɛ ɔ, nɛ Saul kɛ Israel ma a tsuo nyá babauu.