Samuel I, 13

Saul tue gbomi

1 Benɛ Saul ba bɔni matsɛ yemi ɔ,

2 e hla nyumuhi akpe etɛ kɛ je Israel bi ɔmɛ a kpɛti; e kɛ akpe enyɔ hi Mikmash kɛ Betel yo ɔ nɔ, nɛ e binyumu Yonatan hu kɛ akpe hi Gibea ngɛ Benyamin. Ni nɛmɛ nɛ piɛ ɔ, Saul wo mɛ blɔ kɛ ho a wehi a mi ya.

3 Yonatan ya gbe Filisti bi a nyatsɛ ɔ nɛ ngɛ Geba a, nɛ Filisti bi ɔmɛ tsuo nu he. Kɛkɛ nɛ Saul ha nɛ a kpa titimati kɛ kpa zugba a nɔ tsuo kɛ tsɛ Hebri bi ɔmɛ kɛ ha ta hwumi.

4 Israel tsuo nu kaa Saul gbe Filisti bi a nyatsɛ ɔ, nɛ nɔ́ nɛ ɔ ha Filisti bi ɔmɛ a hɛ dɔ wo mɛ. Lɔ ɔ he ɔ, ma a bua a he nya, nɛ a bu Saul nɔ kɛ ho Gilgal ya.

5 Filisti bi ɔmɛ bua a he nya, konɛ a kɛ Israel nɛ hwu; a hɛɛ ta zugba lɛ akpe nyingmi etɛ, okpɔngɔ ta buli akpe ekpa, kɛ tabohi babauu nɛ a li nya. A ya bua a he nya ngɛ Mikmash ngɛ Bet Aven beleku je.

6 A ya tua Israel bi ɔmɛ wawɛɛ nitsɛ, nɛ Israel bi ɔmɛ na kaa a yi fi. Lɔ ɔ he ɔ, a ya laa a he ngɛ tɛ puɔhi, muɔhi, yɔkɔhi, vuhi, kɛ tɛ sahi a mi;

7 ni komɛ hu po Yordan pa a kɛ ho Gad kɛ Gilead zugba amɛ a nɔ ya. Se Saul lɛɛ e ngɛ Gilgal jamɛ a be ɔ kɛ mwɔɔ, nɛ sawale nu nihi nɛ nyɛɛ e se ɔ tsuo.

8 ⓟ E mlɛ ligbi kpaago kaa bɔ nɛ Samuel to lɛ ɔ, se Samuel bɛ Gilgal, nɛ ma a bɔni gbɛmi ngɛ e he.

9 Kɛkɛ nɛ e de ma a ke, “Nyɛɛ ngɔ sami bɔ ɔmɛ, kɛ tue mi jɔmi bɔ ɔmɛ kɛ ba.” Nɛ e sã sami bɔ ɔ.

10 Benɛ e sã sami bɔ ɔ ta pɛ kɛkɛ nɛ Samuel ba hia si. Saul je kpo ya kpee lɛ, nɛ e fɔ lɛ.

11 Se Samuel bi lɛ ke, “Mɛni o pee nɛ ɔ?” Saul he nɔ ke, “Ma a ngɛ gbɛe kɛ ngɛ fĩae ngɛ ye he, nɛ mo hu o bɛ be nɛ o to mi ɔ. Jehanɛ se hu, Filisti bi ɔmɛ ngɛ a he nya buae ngɛ Mikmash.

12 Lɔ ɔ he ɔ, i de ke, ‘Filisti bi ɔmɛ ma mi tuami ngɛ Gilgal be mi nɛ i bi we Yawɛ yemi kɛ buami.’ Lɔ ɔ he ɔ, i kɛ he hiami sã sami bɔ ɔ.”

13 Samuel de Saul ke, “O je kuasia; o yi Yawɛ, o Mawu ɔ mlaa nɛ e wo mo ɔ nɔ; kaa o ye nɔ jinɛ o matsɛ yemi ngɛ Israel ɔ, Yawɛ ma ha nɛ e da si kɛ ya neneene.

14 ⓠ Se amlɔ nɛ ɔ lɛɛ o matsɛ yemi ɔ be si dae. Yawɛ hla lɛ nitsɛ e tsui nya nɔmlɔ, nɛ e wo lɛ ganɔ ngɛ e ma a nya; ejakaa o yi mlaa nɛ e wo mo ɔ nɔ.”

15 Samuel je Gilgal nɛ e pue nɔ kɛ ho Gibea ya ngɛ Benyamin. Benɛ Saul kane nihi nɛ kɛ lɛ ngɛ lejɛ ɔ, e ná maa pee nyumuhi lafa ekpa.

16 Saul kɛ e binyumu Yonatan, kɛ nihi nɛ piɛ a he ɔ ya bua a he nya ngɛ Geba ngɛ Benyamin; se Filisti bi ɔmɛ lɛɛ a ya bua a he nya ngɛ Mikmash.

17 Ní hali a kuu etɛ je Filisti bi ɔmɛ a sito he ɔ kɛ ya ha ní. Kuu kake ya Ofra ngɛ Shual zugba a nɔ;

18 kuu enyɔne ɔ gu Bet Horon blɔ, nɛ kuu nɛ ji etɛ ɔ hu gu Geba blɔ, ngɛ huzu ɔ nɛ ngɛ kɛ yaa Zeboim kɔ̃ ɔ mi blɔ ɔ kɛ ho nga a nɔ ya.

19 Sɔlɔ ko sɔlɔ ko be Israel zugba a nɔ tsuo; ejakaa Filisti bi ɔmɛ fia pɛɛ si kaa a be hae nɛ Hebri bi ɔmɛ nɛ a sɔ klaatehi, loo akplɔhi kɛ ha a he.

20 Lɔ ɔ he ɔ, Filisti bi ɔmɛ a ngɔ lɛ Israel bi ɔmɛ tsuo ya duɔɔ a na kpakplaahi, sɔsɔhi, gbiɛhi, kɛ hahi a nya ngɛ.

21 Ke a duɔ gbiɛ nya, loo a dla a na tsɔmi dade ɔ, a heɔ kaplɛ nyafii kake. Se na kpakplaa, loo kpakplaa nitsɛ lɛɛ a heɔ kaplɛ nyafii enyɔ.

22 Lɔ ɔ he ɔ, ta hwumi ligbi ɔ, a nɛ klaate, loo akplɔ ngɛ ta bulɔ ko dɛ; blɔɔ Saul kɛ e binyumu Yonatan pɛ ji ni nɛmɛ nɛ hɛɛ klaate, loo akplɔ.

23 Filisti bi ɔmɛ a tabo ɔmɛ ekomɛ hia kɛ ho Mikmash yo kpɛ blɔ ɔ nɔ ya, nɛ a ya bu lejɛ ɔ.