Samuel I, 10

1 Kɛkɛ nɛ Samuel plɛ nu ngɛ tɔ ko mi kɛ pue Saul yi mi. Lɔ ɔ se ɔ, e fua lɛ atuu, nɛ e de lɛ ke, “Yawɛ hla mo kaa e ma Israel ganɔ. O maa ye e ma a nɔ, nɛ o ma kpɔ mɛ kɛ je he nyɛli nɛ bɔle mɛ ɔ a dɛ mi. Okadi nɛ o kɛ maa na kaa Yawɛ nɛ hla mo ke o ba pee e ma, Israel ganɔ ji nɛ ɔ nɛ.

2 Ke o je ye ngɔ mwɔnɛ ɔ, o kɛ nyumuhi enyɔ maa kpe ngɛ Rahel yɔkɔ ɔ kasa nya ngɛ Zelza, ngɛ Benyamin zugba a nɔ. A ma de mo ke teji ɔmɛ nɛ nyɛ ho hlami ya a, a na mɛ. Lɔ ɔ he ɔ, o tsɛ jɔɔ a he susumi, se o he mohu e ngɛ tsui yee ngɛ, nɛ e ngɛ bie kpami ke, ‘Jije ma na ye bi ɔ ngɛ?’

3 Ke nyɛ ya nyɛ hɛ mi saii nɛ nyɛ ya su Tabor tso ngua a he ɔ, nyɛɛ kɛ nyumuhi etɛ maa kpe nɛ a yaa sã bɔ ha Mawu ngɛ Betel. Nɔ kake hɛɛ apletsi ku etɛ, nɔ kake hɛɛ abolo bɔbɔɛ etɛ, nɛ nɔ kake hu hɛɛ wai lohwe he womi tɔ kake.

4 Ke nyɛɛ kɛ mɛ kpe ɔ, a ma fɔ mo, nɛ a ma ha mo abolo bɔbɔɛ enyɔ. Ke a ha mo ɔ, he ngɛ a dɛ.

5 Lɔ ɔ se ɔ, nyɛ maa ya Mawu yo ɔ nɔ ngɛ Gibea, he nɛ Filisti bi ɔmɛ a ta a pueɔ si ngɛ ɔ. Nyɛ ma a mi sɛmi pɛ nyɛɛ kɛ gbali a kuu ko maa kpe nɛ a kple si kɛ je yoku ɔ nɔ kɛ ma kɛ a dɛ mi kpa saku, miɛ, kɛ bɛ. Nyɛ maa na kaa a ngɛ doe, nɛ a ngɛ huhui kpae.

6 Yawɛ mumi ɔ maa ba o nɔ; o maa do, nɛ o ma kpa huhui kaa mɛ, nɛ o ma plɛ pee nɔmlɔ kpa.

7 Ke ní nɛ ɔmɛ tsuo ba mi ɔ, nɔ́ tsuaa nɔ́ nɛ Mawu ma de mo ke o pee ɔ, moo pee; ejakaa e kɛ mo ngɛ.

8 O maa sɛ ye hlami kɛ ho Gilgal ya. Ma ba na mo ngɛ lejɛ ɔ, nɛ ma sã sami bɔ, kɛ tue mi jɔmi bɔ. O maa mlɛ mi ngɛ lejɛ ɔ ligbi kpaago kɛ yaa si ma ba nɛ ma ba tsɔɔ mo nɔ́ nɛ o pee.”

9 Benɛ Saul kɛ Samuel ye sɛ nɛ a mi gba a, Mawu ha Saul tsui he; nɛ nɔ́ tsuaa nɔ́ nɛ Samuel de lɛ ɔ ba mi jamɛ a ligbi ɔ.

10 Benɛ Saul kɛ e tsɔlɔ ɔ ya su Gibea a, e kɛ gbali a kuu ko kpe; nɛ tlukaa a, Mawu mumi ɔ ba e nɔ, nɛ e kɛ mɛ bɔni domi, kɛ huhui kpami.

11 Benɛ nihi nɛ le lɛ saminya a na e ní peepee ngɛ gbali ɔmɛ a kpɛti ɔ, a bi a he ke, “Mɛni lɛ ba Kish binyumu ɔ nɔ? Anɛ Saul hu ba plɛ pee gbalɔ lo?”

12 ⓘ Kɛkɛ nɛ nɔ ko nɛ je lejɛ ɔ bi ke, “Gbali kpa amɛ ɔ, mɛnɔ bimɛ ji mɛ?” Nɛ nɔ́ nɛ ɔ ba pee nɔ́ ko nɛ a kɛ tuɔ munyu ke, “Anɛ Saul hu ba plɛ pee gbalɔ lo?”

13 Benɛ Saul do nɛ e kpa huhui ɔ se ɔ, e pue nɔ kɛ ho we mi[1] ya.

14 Saul tsɛ nyɛminyumu ɔ bi Saul kɛ e tsɔlɔ ɔ ke, “Jije nyɛ je?” Saul he nɔ ke, “Wa ho ya hla teji ɔmɛ, nɛ nɛ́ wa nɛ mɛ ɔ, wa ya Samuel ngɔ.”

15 Saul tsɛ nyɛminyumu ɔ bi lɛ ke, “Kɛ Samuel de nyɛ kɛɛ?”

16 Saul he nɔ ke, “E de wɔ ke a na teji ɔmɛ.” Se Saul de we e tsɛ nyɛminyumu ɔ ke Samuel de lɛ ke e ma ba ye matsɛ.

A wo Saul matsɛ

17 Jehanɛ Samuel ha Israel ma a tsuo ba bɔ gua ngɛ Mawu hɛ mi ngɛ Mizpa,

18 nɛ e de mɛ ke, “Bɔ nɛ Yawɛ, Israel Mawu ɔ de ji nɛ ɔ nɛ: ‘Imi lɛ i kpaka nyɛ kɛ je Egipt kɛ ba. Imi lɛ i kpɔ nyɛ ngɛ Egipt bi ɔmɛ, kɛ ma kpa amɛ tsuo nɛ ngɛ nyɛ yi mi wae ɔ a dɛ mi.

19 Imi ji nyɛ Mawu nɛ jeɔ nyɛ kɛ jeɔ haomi, kɛ nɔ́ nami tsuo mi. Se mwɔnɛ ɔ, nyɛ kua mi, nɛ nyɛ bi ke ma ha nyɛ matsɛ. Yoo, nyɛ ba bua nyɛ he nya wɛtso nya wɛtso nya, kɛ weku nya weku nya ngɛ Yawɛ hɛ mi.’ ”

20 Samuel tsɛ wɛtso ɔmɛ tsuo kɛ ba Yawɛ hɛ mi, nɛ a fɔ sɔ kɛ hla Benyamin wɛtso ɔ.

21 Jehanɛ Samuel ha Benyamin wɛtso ɔ ba weku nya weku nya, nɛ a fɔ sɔ kɛ hla Matri weku ɔ. Nyagbe ɔ, nyumuhi nɛ je Matri weku ɔ mi hu ba kakaaka, nɛ a fɔ sɔ kɛ hla Saul, Kish binyumu ɔ. Se benɛ a ngɛ lɛ hlae ɔ, a nɛ lɛ.

22 Lɔ ɔ he ɔ, a ya bi Yawɛ ke, “Jije nɔmlɔ ɔ ngɛ?” Nɛ Yawɛ de mɛ ke, “Saul ya laa e he ngɛ nito he ɔ.”

23 Lɔ ɔ he ɔ, a tu fo nɛ a ya nu lɛ kɛ ba. Benɛ e daa si ngɛ ni ɔmɛ a kpɛti ɔ, a na kaa e ka pe nɔ tsuaa nɔ.

24 Samuel de ma a tsuo ke, “Nyumu ɔ nɛ Yawɛ hla ji nɛ ɔ nɛ. Nɔ ko nɔ ko be kaa lɛ ngɛ ma mi bi ɔmɛ tsuo a kpɛti.” Kɛkɛ nɛ ma a tsuo hwɔ lele nɛ a de ke, “Matsɛ yi nɛ e na wa!”

25 Jehanɛ Samuel tsɔɔ ma a bɔ nɛ matsɛ yemi ɔ blɔ nya tomi ngɛ ha, matsɛ ɔ blɔ nya nɛ e hɛɛ, kɛ e ní tsumi. E ngma nɔ́ nɛ ɔ kɛ wo womi mi, nɛ e ngɔ ya fɔ Yawɛ hɛ mi. Lɔ ɔ se ɔ, Samuel ha ma a nane, nɛ nɔ tsuaa nɔ ho e we mi ya.

26 Saul hu kpale e se kɛ ho e ma mi, Gibea ya. Benɛ e yaa a, Mawu je nyumuhi oblai komɛ ha lɛ, nɛ a kɛ lɛ ho.

27 Se yaka nimli komɛ bi ke, “Kɛ nɔmlɔ nɛ ɔ maa pee kɛ he wa yi wami kɛɛ?” A gbe e he guɛ, nɛ mɛɛ a ya ki lɛ ní. Se Saul pui a nya mi.