Samuel I, 9

Saul kɛ Samuel ya bua

1 Benyamin no niatsɛ ko hi si. E biɛ ji Kish; e tsɛ biɛ ji Abiel; e nɛ̃ ji Zeror; e nɛnɛkasowa ji Bekorat, nɛ Bekorat hu e tsɛ biɛ ji Afia.

2 Kish ngɛ binyumu ko nɛ a tsɛɛ lɛ Saul. E ji niheyo nɛ he ngɛ fɛu saminya, nɛ nyumu ko nyumu ko be Israel nɛ ka, nɛ e he hu ngɛ fɛu kɛ lɛ sɔ.

3 Ligbi ko ɔ, Saul tsɛ Kish teji komɛ laa; nɛ Kish de e bi ɔ ke, “Ngɔɔ tsɔli ɔmɛ a kpɛti nɔ kake kɛ piɛ o he nɛ o ya hla teji ɔmɛ.”

4 A ya kpa Efraim yo ɔ nɔ, kɛ Shalisha zugba a nɔ, se a nɛ teji ɔmɛ. A tsa nɔ kɛ ya gu Shaalim zugba a nɔ, se teji ɔmɛ be lejɛ ɔ hulɔ. Jehanɛ, a ya gu Benyamin zugba a nɔ, se a nɛ mɛ.

5 Benɛ a su Zuf zugba a nɔ ɔ, Saul de tsɔlɔ ɔ nɛ e kɛ lɛ ngɛ nyɛɛe ɔ ke, “Ha waa kpale wa se, ke pi ja a, tsaatsɛ hɛ maa je teji ɔmɛ a nɔ, nɛ e ma bɔni e tsui yemi ngɛ wɔ mohu wa he.”

6 Se tsɔlɔ ɔ de lɛ ke, “O nɛ, ní nalɔ ko ngɛ ma nɛ ɔ mi nɛ a buu lɛ saminya; ejakaa nɔ́ tsuaa nɔ́ nɛ e deɔ ɔ, baa mi. Ha wa ya na lɛ; eko piɔ e maa tsɔɔ wɔ he nɛ wa maa na lohwe ɔmɛ ngɛ.”

7 Saul bi tsɔlɔ ɔ ke, “Ke wa ya a, mɛni wa ma ha nyumu ɔ?” E ya nɔ nɛ e de ke, “Abolo ɔ nɛ ngɛ wa kotoku ɔmɛ a mi ɔ ta, nɛ nɔ́ ko be nɛ wa ma ha ní nalɔ ɔ.”

8 Tsɔlɔ ɔ de Saul ekohu ke, “I hɛɛ sika hiɔ nyafii ko. I kɛ lɔ ɔ ma ha ní nalɔ ɔ, konɛ e tsɔɔ wɔ he nɛ wa maa na lohwe ɔmɛ ngɛ.”

9 Saul de ke, “Mo! O le demi; ha nɛ waa ho.” Nɛ a pue nɔ kɛ ho ma a mi he nɛ Mawu nɔmlɔ ɔ ngɛ ɔ ya. Benɛ a ngɛ yoku ɔ kuɔe kɛ yaa a, a kɛ yihewi komɛ kpe nɛ a yaa yɛ nyu. A bi yihewi ɔmɛ ke, “Ní nalɔ ɔ ngɛ ma a mi lo?” (Jamɛ a be ɔ, bɔ nɛ a tsɛɔ gbalɔ ji ní nalɔ. Lɔ ɔ he ɔ, ke nɔ ko yaa bi ní ngɛ Israel ɔ, bɔ nɛ e deɔ ji, “Nyɛ ha waa ho ní nalɔ ɔ ngɔ ya.”)

10

11

12 Yiwi ɔmɛ he nɔ ke, “Ee, e ngɛ; lɛ nɛ e ngɛ nyɛ hɛ mi kɛ yaa a nɛ. Nyɛɛ nyɛɛ esɔesɔ; ke nyɛ sɛ ma a mi pɛ nyɛ maa na lɛ. Piɔ pɛ nɛ e ba ma a mi, ejakaa ni ɔmɛ ba konɛ a ba sã bɔ ngɛ jami he ɔ; nɛ ja e su lejɛ ɔ nɛ e gbaa bɔ ɔ nɔ loko ni nɛmɛ nɛ a kpee ɔ maa ye ní ɔ. Ke nyɛ he sɔ ɔ, nyɛ ma ya ná lɛ loko e maa ya jami he ɔ nɛ e ya ye ní ngɛ lejɛ ɔ.”

13

14 Saul kɛ e tsɔlɔ ɔ pue nɔ kɛ ho ma a mi ya. Benɛ a sɛ ma a mi ɔ, a na Samuel nɛ lɛɛ e je ma a mi kɛ yaa jami he ɔ.

15 Loko je na nɛ Saul ba Samuel ngɔ ɔ, Yawɛ je e he kpo tsɔɔ Samuel, nɛ e de lɛ ke,

16 “Hwɔɔ, maa pee be nɛ ɔ mi ɔ, ma tsɔ nyumu ko nɛ je Benyamin wɛtso ɔ mi kɛ ba o ngɔ. Moo pɔ lɛ nu nɛ e ba ye ganɔ ngɛ ye ma, Israel ɔ nya, nɛ e kpɔ mɛ kɛ je Filisti bi ɔmɛ a dɛ mi, ejakaa i na a nɔ nami ɔ, nɛ i nu a kue fami ɔ hulɔ.”

17 Benɛ Samuel na Saul ɔ, Yawɛ de lɛ ke, “Nyumu ɔ nɛ i gba mo e he sane ɔ ji nɛ ɔ nɛ. Lɛ ji nɔ nɛ ma ba ye ye ma a nɔ.”

18 Jehanɛ, Saul hɛ lɛ kɛ su Samuel he ngɛ agbo ɔ nya, nɛ e bi lɛ ke, “I kpa mo pɛɛ, jije ní nalɔ ɔ we mi ngɛ?”

19 Samuel de Saul ke, “Imi ji ní nalɔ ɔ nɛ; moo nyɛɛ ye hɛ mi nɛ waa ho jami he ɔ ya; ejakaa mwɔnɛ ɔ, nyɛɛ kɛ mi maa ye ní, nɛ hwɔɔ mɔtu ɔ, ma de mo níhi nɛ o ngɛ hlae nɛ o le ɔ tsuo, loko ma wo mo blɔ nɛ o ho.

20 Teji ɔmɛ nɛ laa mwɔnɛ ɔ ji ligbi etɛ ɔ, koo ye o tsui ngɛ a he; a na mɛ. Se mɛnɔ ji nɔ nɛ Israel ma a ngɛ hlae wawɛɛ kikɛ nɛ ɔ? Mo tutuutu; o kɛ o tsɛ we ɔ.”

21 Saul he nɔ ke, “I je Benyamin, Israel wɛtso nɛ ji nyafii pe kulaa a mi; nɛ ye weku ɔ hu ji weku nyafii pe kulaa ngɛ wɛtso ɔ mi. Mɛni he je mɔ nɛ o kɛ mi ngɛ munyu tue kikɛ nɛ ɔ?”

22 Kɛkɛ nɛ Samuel ngɔ Saul, kɛ e tsɔlɔ ɔ kɛ ho asa a nɔ ya, nɛ e ya ha mɛ sɛ ngɛ okplɔɔ ɔ yi, he nɛ nihi nɛ a kpee kɛ ba a hii si ngɛ ɔ. Mɛ tsuo a hiɛmi maa pee kaa nihi nyingmi etɛ.

23 Samuel de ní hoolɔ ɔ ke, “Lo kpɔ ɔ nɛ i kɛ ha mo si tomi ɔ, yaa ngɔ kɛ ba.”

24 Ní hoolɔ ɔ ngɔ lo fiɔ ɔ, kɛ bo mi fiɔ ɔ ba ma Saul hɛ mi. Nɛ Samuel de ke, “O nɛ, lo nɛ a kɛ to ha mo ji nɛ ɔ nɛ. Moo ye, ejakaa i je blɔ ngɔ to ha mo nɛ o ba ye kikɛmɛ a be nɛ ɔ kɛ nibwɔ ɔmɛ nɛ i kpee ɔ.” Lɔ ɔ he ɔ, Saul kɛ Samuel ye ní jamɛ a ligbi ɔ.

25 Benɛ a kple si kɛ je jami he ɔ kɛ ba ma a mi ɔ, a pee sa ha Saul ngɛ tsu ɔ yi mi,

26 nɛ e hwɔ lejɛ ɔ. Makɛ ɔ, Samuel tsɛ Saul ngɛ tsu ɔ yi mi nɛ e de lɛ ke, “Tee si nɛ ma wo mo blɔ nɛ o ho.” Saul te si, nɛ e kɛ Samuel tsuo je kpo.

Samuel pɔ Saul nu

27 Benɛ a maa ho ma a nya sumi ya a, Samuel de Saul ke, “De o tsɔlɔ ɔ nɛ e be kɛ sɛ wa hlami. Mo nitsɛ lɛɛ moo mlɛ ngɛ hiɛ ɔ bɔɔ nɛ ma de mo sɛ ko nɛ je Mawu ngɔ.”