Manyadali 8

A ye Midian bi ɔmɛ a nɔ pɛsɛpɛsɛ

1 Kɛkɛ nɛ Efraim bi ɔmɛ bi Gideon ke, “Mɛni o pee wɔ nɛ ɔ? Mɛni he je o ba kpee we wɔ benɛ o yaa nɛ o kɛ Midian bi ɔmɛ ya hwu ta a?” Nɛ a ka e hɛ mi saminya.

2 Se e de mɛ ke, “Nɔ́ nɛ i tsu ɔ, ke a ngɔ kɛ to nyɛ nɔ́ ɔ he ɔ, e pi nɔ ko kulaa! Ní tsumi bɔbɔyoo ɔ nɛ nyɛ Efraim bi nyɛ tsu ɔ, e hiɛ hluu pe nɔ́ nɛ Abiezer bi nɛ ji ye weku li ɔmɛ tsuo tsu.

3 ⓗ Mawu nitsɛ lɛ ngɔ Oreb kɛ Zeeb, Midian ganɔ ɔmɛ kɛ wo nyɛ dɛ mi. Imi lɛɛ mɛni i nyɛ pee nɛ e kɛ nyɛ nɔ́ ɔ sɔ?” Benɛ e de ja kɛkɛ nɛ a mi mi fumi ɔ nya ba si.

4 Jamɛ a be ɔ mi ɔ, Gideon kɛ nyumuhi lafa etɛ ɔmɛ nɛ piɛ e he ɔ ya su Yordan pa a nya, nɛ a po pa a. Jamɛ a be ɔ, pɔ tɔ mɛ, nɛ hwɔ gbe mɛ.

5 Benɛ a ya su Sukot ɔ, Gideon de nyumu ɔmɛ ngɛ ma a mi ke, “I kɛ ye we bi ɔmɛ ngɛ Zeba kɛ Zalmuna, Midian matsɛmɛ ɔmɛ a se nyɛɛe; nɛ pɔ tɔ wɔ. I kpa nyɛ pɛɛ, nyɛ hla nɔ́ ko ha ye we bi ɔmɛ nɛ a ye.”

6 Se Sukot ma tsɔli ɔmɛ de ke, “Anɛ o nine su Zeba kɛ Zalmuna a nɔ momo loko o deɔ wɔ ke wa ha o ta buli ɔmɛ nɔ́ ko nɛ a ye ɔ?”

7 Gideon de mɛ ke, “Saminya! Ke Yawɛ ngɔ Zeba kɛ Zalmuna kɛ wo ye dɛ mi ɔ, ma ngɔ mio tso, kɛ ha tso kɛ maa je nga a nɔ kɛ ba ngmlã nyɛ he womi nɔ ha nyɛ.”

8 Benɛ e je lejɛ ɔ, e ho Penuel ya, nɛ e kɛ mɛ hu ya tu munyu ja nɔuu. Penuel nyumu ɔmɛ hu ha lɛ heto kaa bɔ nɛ Sukot nyumu ɔmɛ de ɔ nɔuu.

9 Lɔ ɔ he ɔ, e de Penuel nyumu ɔmɛ ke, “Ke i ya ye kunimi nɛ i ba ekohu ɔ, ma ku kikɛmɛ a mɔ nɛ ɔ kɛ pue si!”

10 Zeba kɛ Zalmuna kɛ a tabo ɔ ngɛ Karkor. A hiɛmi maa pee kaa nyumuhi akpe nyɔngma kɛ enuɔ. Ni nɛ ɔmɛ ji ma amɛ nɛ ngɛ beleku je ɔ a tabo ɔmɛ a mi nimli nɛ piɛ; ejakaa ta buli akpe lafa kɛ nyingmi enyɔ sɔuu nɔ ngɛ ta nga a nɔ.

11 Gideon gu jua yeli ɔmɛ a blɔ ɔ nɔ ngɛ Noba kɛ Yogbeha a beleku je kɛ ya tua tabo ɔ, benɛ a hɛ be a he nɔ.

12 Midian matsɛmɛ enyɔ ɔmɛ, nɛ ji Zeba kɛ Zalmuna tu fo, se Gideon nyɛɛ a se kɛ ya si e nine su a nɔ. Kɛkɛ nɛ gbeye nu tabo ɔ tsuo.

13 Benɛ Yoash binyumu Gideon kpale e se kɛ je ta nga a nɔ kɛ ma a, e ya gu Heres yo kpɛ blɔ ɔ nɔ.

14 E nu Sukot niheyo ko nɛ e ta e nya mi. Nɛ niheyo ɔ ngma Sukot ma tsɔli, kɛ nimeli nyingmi kpaago kɛ kpaago ɔmɛ a biɛ kɛ ha Gideon.

15 Kɛkɛ nɛ Gideon ho nɛ e ya de Sukot bi ɔmɛ ke, “Nyɛ nɛ! Zeba kɛ Zalmuna a, mɛ ji nɛ ɔmɛ nɛ. Ni nɛ ɔmɛ a he nyɛ bɔ mi ahlua ngɛ, nɛ nyɛ bi mi ke, ‘Anɛ o nine su Zeba kɛ Zalmuna a nɔ momo loko o deɔ wɔ ke wa ha o ta buli ɔmɛ nɔ́ ko nɛ a ye, ejakaa pɔ tɔ mɛ?’ ɔ nɛ.”

16 Nɛ́ e de ja kɛkɛ nɛ e nuu Sukot ma nimeli ɔmɛ, nɛ e kɛ mio tso, kɛ ha tso ngmlã a he womi nɔ ha mɛ.

17 Jehanɛ hu, e ku Penuel mɔ ɔ, nɛ e gbe nyumuhi nɛ ngɛ ma a mi ɔ.

18 Lɔ ɔ se ɔ, Gideon bi Zeba kɛ Zalmuna ke, “Nyumu ɔmɛ nɛ nyɛ gbe ngɛ Tabor ɔ, kɛ a ngɛ kɛɛ?” A ha lɛ heto ke, “A ngɛ kaa mo; mɛ tsuo pɛpɛɛpɛ a ngɛ kaa matsɛbimɛ.”

19 Gideon de mɛ ke, “Ye nyɛmimɛ ji mɛ; imi nitsɛ ye nyɛ muklii mi bimɛ ji mɛ. I na Mawu kaa nyɛ he a yi wami jinɛ imi hu i be nyɛ gbee!”

20 Kɛkɛ nɛ e de Yeter, e bitɛte ɔ ke, “Tee si nɛ o gbe mɛ!” Se niheyo ɔ híɛ e klaate ɔ. E ngɛ gbeye yee, ejakaa niheyo kɛkɛ ji lɛ.

21 Zeba kɛ Zalmuna de ke, “Mo nitsɛ moo te si nɛ o gbe wɔ; ejakaa bɔ nɛ nyumu ngɛ ɔ, ja e he wami ngɛ!” Kɛkɛ nɛ Gideon te si nɛ e gbe Zeba kɛ Zalmuna, nɛ e je sika ní ɔmɛ ngɛ a we afukpɔngɔ ɔmɛ a kuɛ.

22 Enɛ ɔ se ɔ, Israel ma a de Gideon ke, “Moo ye wa nɔ, o kɛ o bi ɔ, kɛ o bibi ɔ tsuo; ejakaa o je wɔ kɛ je Midian bi ɔmɛ a dɛ mi.”

23 Gideon de mɛ ke, “I be nyɛ nɔ yee, nɛ ye binyumu ko hu be nyɛ nɔ yee; Yawɛ nitsɛ ji nɔ nɛ maa ye nyɛ nɔ.”

24 Gideon ya nɔ nɛ e de mɛ ke, “Ma bi nyɛ nɔ́ ko. Nyɛ ti nɔ tsuaa nɔ nɛ ngɔ tue nya ní nɛ e ha ngɛ ta a mi ɔ kɛ ba.” (Midian bi ɔmɛ woɔ sika tsu tue nya ní; ejakaa Ishmael bi ji mɛ.)

25 A he nɔ ke, “Wa ma ha kɛ bua jɔmi!” Kɛkɛ nɛ a ngmɛ bo ngɛ zugba, nɛ nɔ tsuaa nɔ sake tue nya ní nɛ e ha a kɛ fɔ bo ɔ mi.

26 Sika tsu tue nya ní nɛ Gideon nine su nɔ ɔ tsuo jiimi ji kilo nyingmi enyɔ, slo sika ní kpahi, kuɛ gahi, tadehi nɛ a he jua wa nɛ hɛɛ alamua tu su nɛ Midian matsɛmɛ ɔmɛ woɔ ɔ, kɛ kɔsɔkɔsɔhi nɛ ngɛ a we afukpɔngɔ ɔmɛ a kuɛ ɔ.

27 Gideon ngɔ ní ɔmɛ kɛ pee amaga, nɛ e kɛ to Ofra nɛ ji e ma a mi. Israel bi ɔmɛ tsuo je Mawu se, nɛ a ya ja amaga nɛ ɔ ngɛ lejɛ ɔ; nɛ nɔ́ nɛ ɔ plɛ pee klama kɛ ha Gideon kɛ e we ɔ.

28 Bɔ nɛ Israel bi ɔmɛ pee nɛ a kɛ ye Midian bi ɔmɛ a nɔ ji nɛ ɔ nɛ; nɛ kɛ je lɔ ɔ se ɔ, Midian bi ɔmɛ doo we a nya hu. Gideon be ɔ mi ɔ, zugba a nɔ jɔ jeha nyingmi eywiɛ sɔuu.

Gideon gbenɔ

29 Yoash binyumu Gideon, nɛ a tsɛɛ lɛ Yerubaal hulɔ ɔ, je kɛ ho lɛ nitsɛ e we mi ya, nɛ e ya hi lejɛ ɔ.

30 Gideon fɔ binyumuhi nyingmi kpaago, nɛ ji lɛ nitsɛ e bimɛ, ejakaa e ngɔ yihi babauu.

31 E plã a nɛ ngɛ Shekem ɔ, e kɛ lɛ hu fɔ binyumu kake; nɛ e wo lɛ biɛ ke Abimelek.

32 Gideon, Yoash binyumu ɔ bwɔ kotokoto loko e gbo; nɛ a pu lɛ ngɛ e tsɛ Yoash yɔkɔ ɔ mi ngɛ Ofra, Abiezer bi ɔmɛ a ma a mi.

33 Benɛ Gideon gbo ɔ, Israel bi ɔmɛ kua Mawu ekohu, nɛ a ngɔ Baal Berit ngɔ pee a mawu.

34 Israel bi ɔmɛ a hɛ je Yawɛ Mawu ɔ nɛ je mɛ kɛ je a he nyɛli ɔmɛ tsuo nɛ bɔle mɛ ɔ a dɛ mi ɔ nɔ.

35 Ngɛ kpakpa babauu nɛ Yerubaal (nɛ ji Gideon) pee Israel bi ɔmɛ ɔ nane mi ɔ, Israel pee otlumu ngɛ Gideon we mi bimɛ ɔmɛ a nɔ.