Manyadali 7

Gideon ye Midian bi ɔmɛ a nɔ

1 Ligbi ko ɔ, Yerubaal nɛ ji Gideon, kɛ e we bi ɔmɛ tsuo te si mɔtu kpla, nɛ a ya bua a he nya ngɛ Harod nyu vu ɔ nya. Midian ta a ngɛ omleyi je ha mɛ ngɛ More yo ɔ kasa nya, ngɛ kɔ̃ ɔ mi.

2 Yawɛ de Gideon ke, “Ta nɛ nyɛɛ o se ɔ, a he hiɛ tsɔ. Ke i ngɔ Midian ngɔ wo a dɛ mi ɔ, Israel bi ɔmɛ ma wo a he nɔ, nɛ a ma de ke mɛ nitsɛmɛ a kɔni si wami lɛ a kɛ he a yi wami.

3 ⓖ Lɔ ɔ he ɔ, ha nɛ ma a tsuo nɛ nu kaa, ‘Nɔ tsuaa nɔ nɛ ngɛ gbeye yee nɛ e he ngɛ doe ɔ, e kpale kɛ ho we mi ya.’ ” Benɛ Gideon ka mɛ ɔ, nimli akpe nyingmi enyɔ kɛ enyɔ kpale a se; nɛ e piɛ nimli akpe nyɔngma.

4 Yawɛ de Gideon ke, “Ma nɛ piɛ ɔ, mɛ hu a he hiɛ tsɔ. Ngɔɔ mɛ kɛ kple si kɛ ya pa a nya, nɛ imi nitsɛ ma ka mɛ ha mo ngɛ lejɛ ɔ. Ke i de mo ke, ‘O kɛ nɔmlɔ nɛ ɔ nɛ ya’ a, o kɛ lɛ nɛ ya; se ke i de mo ke, ‘O kɛ nɔmlɔ nɛ ɔ ko ya’ a, o kɛ lɛ ko ya.”

5 Gideon kɛ ma a kple si kɛ ho pa a nya ya; nɛ Yawɛ de lɛ ke, “Nihi tsuo nɛ a kɛ a lilɛ maa nu nyu ɔ kaa gbe nuɔ nyu ɔ, ngɔɔ mɛ kɛ da he kake, konɛ o ngɔ ni nɛmɛ nɛ mɛɛ a kpla si ngɛ a nakutso nya kɛ nu nyu ɔ hu ngɔ da he kake.”

6 Nihi tsuo nɛ a kɛ a nine to a nya he, nɛ a nu nyu ɔ kɛ je a dɛ mi ɔ, a yibɔ ji nimli lafa etɛ; se ma nɛ piɛ ɔ, mɛɛ lɛɛ mɛ tsuo pɛpɛɛpɛ a kpla si ngɛ a nakutso nya kɛ nu nyu ɔ.

7 Yawɛ de Gideon ke, “Ma ngɔ nyumuhi lafa etɛ ɔmɛ nɛ nu nyu ɔ kaa bɔ nɛ gbe nuɔ nyu ɔ kɛ he nyɛ yi wami, nɛ ma ngɔ Midian bi ɔmɛ kɛ wo a dɛ mi. Ma a nɛ piɛ ɔ, ha nɛ nɔ tsuaa nɔ nɛ ho e we mi ya.”

8 Lɔ ɔ he ɔ, Gideon he niye ní nɛ a kɛ maa to dɛ ɔ, kɛ titimati ɔmɛ ngɛ ma a dɛ. E wo mɛ tsuo blɔ kɛ ho a wehi a mi ya, nɛ e si nimli lafa etɛ ɔmɛ pɛ. Midian bi ɔmɛ a ta a ngɛ kɔ̃ ɔ mi, ngɛ a sisi blɔ.

9 Jamɛ a nyɔ ɔ mi nɔuu ɔ, Yawɛ de Gideon ke, “Yaa nɛ o ya tua he nyɛli ɔmɛ a ta a esɔesɔ; ejakaa i ngɔ mɛ kɛ wo o dɛ mi!

10 Ke o ngɛ gbeye yee kaa mo nɔ kake too o maa ya a, lɛɛ o kɛ o tsɔlɔ Pura nɛ ya,

11 nɛ o ya bu a ní sɛɛmi ɔ tue. Lɔ ɔ se ɔ, o ma na kã ko kɛ kple si kɛ ya tua ta a.” Gideon kɛ e tsɔlɔ Pura kple si kɛ ho he nyɛli ɔmɛ a ta a nya ya haa.

12 Midian bi ɔmɛ, kɛ Amalek bi ɔmɛ, kɛ ma amɛ nɛ ngɛ beleku je ɔ pueɔ si ngɛ kɔ̃ ɔ mi babauu kaa baalɛhi. A we afukpɔngɔ ɔmɛ ɔ, nɔ ko li a nya; a he hiɛ babauu kaa wo nya zia.

13 Benɛ Gideon ya su lejɛ ɔ, nɔ ko ngɛ e nyɛmi nlami ko nɛ e nla a sɛɛe ke, “I nla nlami ko; nɛ hyɛ, abolo bɔbɔɛ ko kpɛne kɛ ba sɛ Midian bi ɔmɛ a ta a mi. Abolo nɛ ɔ ba si bo tsu ɔ, nɛ e tsɛ̃ lɛ ko si; nɛ bo tsu ɔ tsɛli ngɛ e se mi.”

14 Kɛkɛ nɛ e nyɛmi ɔ he nɔ, nɛ e de ke, “Nɔ́ nɛ ɔ, pi nɔ́ kpa ko; Yoash binyumu Gideon, Israel no ɔ klaate ɔ ji lɔ ɔ nɛ! Mawu ngɔ Midian bi ɔmɛ kɛ a tabo ɔ tsuo ngɔ wo e dɛ mi!”

15 Benɛ Gideon nu nlami ɔ nɛ a sɛɛ ɔ kɛ e sisi tsɔɔmi ɔ, e kpla si nɛ e sɔle. Lɔ ɔ se ɔ, e kpale e se kɛ ho Israel ta a mi ya, nɛ e ya de ke, “Nyɛɛ te si! Yawɛ ngɔ Midian tabo ɔ kɛ wo nyɛ dɛ mi!”

16 E dla nyumuhi lafa etɛ ɔmɛ kɛ wo kuu etɛ mi, nɛ e ha nɔ tsuaa nɔ titimati, kɛ kplu mi gu nɛ jatɛ hɔɔ si ngɛ mi.

17 Nɛ e de mɛ ke, “Nyɛɛ hyɛ mi! Ke i ya su he nyɛli ɔmɛ a ta a he ɔ, bɔ nɛ ma pee ɔ, nyɛ hu nyɛɛ pee ja nɔuu.

18 Ke i kɛ nihi tsuo nɛ piɛ ye he ɔ kpa titimati ɔ, nyɛ hu nyɛ kpa nyɛ titimati ɔmɛ kɛ bɔle ta a tsuo; nɛ nyɛ kpa ngmlaa ke, ‘Yawɛ kɛ Gideon ta ji nɛ ɔ nɛ.’ ”

19 Gideon kɛ nyumuhi lafa nɛ piɛ e he ɔ ya su ta a he nyɔ mi bumi be ɔ sisi jemi, benɛ a tsake buli ɔmɛ se pɛ. A kpa titimati ɔmɛ, nɛ a ywia kplu ɔmɛ nɛ a hɛɛ ngɛ a dɛ mi ɔ.

20 Kɛkɛ nɛ kuu etɛ ɔmɛ tsuo kpa titimati ɔmɛ, nɛ mɛ hu a ywia kplu ɔmɛ. Mɛ tsuo a hɛɛ jatɛ ɔmɛ kɛ a muɔ nine, nɛ a kɛ a hiɔ nine hɛɛ titimati ɔmɛ. A kpa titimati ɔmɛ kɛ he ose nɛ a de ke, “Yawɛ kɛ Gideon ta hwumi klaate ɔ ji nɛ ɔ nɛ!”

21 Nɔ tsuaa nɔ daa si ngɛ e blɔ he kɛ bɔle ta a kɛ kpe. Kɛkɛ nɛ he nyɛli ɔmɛ a tabo ɔ tsuo gbɛ, nɛ a kɛ bubuubui tu fo.

22 Benɛ Gideon we bi ɔmɛ ngɛ titimati lafa etɛ ɔmɛ kpae ɔ, jamɛ a be ɔ mi nɔuu ɔ, Yawɛ ha he nyɛli ɔmɛ hia klaate kɛ wo mɛ nitsɛmɛ a sibi a he. Nɛ ta buli ɔmɛ tsuo tu fo kɛ ho tsitsaa Bet Shita ya ngɛ Zerera kasa nya, kɛ ya su Abel Mehola huzu ɔ nya, ngɛ Tabat kasa nya.

23 Kɛkɛ nɛ a ya kpee nyumuhi kɛ je Israel wɛtsohi nɛ ji Naftali, Asher, kɛ Manase nɔ́ enyɔ ɔmɛ tsuo a mi kɛ ba; nɛ a wo fo kɛ nyɛɛ Midian bi ɔmɛ a se.

24 Gideon tsɔ nihi kɛ ho Efraim yoku ɔmɛ a nɔ tsuo ya, nɛ a ya de ke, “Nyɛ kple si nɛ nyɛɛ kɛ Midian bi ɔmɛ ba hwu ta. Nyɛɛ tsi mɛ blɔ ngɛ Yordan pa pomi he ɔmɛ hluu kɛ yaa si Betbara kɛ Yordan pa a nya!” A ya kpee Efraim nyumu ɔmɛ tsuo kɛ ba, nɛ a ba ngɔ Yordan pa a, kɛ pa tsɔwi ɔmɛ kɛ ya si Betbara.

25 A nu Oreb kɛ Zeeb, Midian ganɔ enyɔ ɔmɛ. A gbe Oreb ngɛ Oreb tɛ sa a he; se Zeeb lɛɛ a gbe lɛ ngɛ Zeeb wai muɔ ɔ he, be mi nɛ a nyɛɛ Midian bi ɔmɛ a se kɛ mwɔɔ. Pee se ɔ, a po Oreb kɛ Zeeb a yi, nɛ a ngɔ ba ha Gideon ngɛ Yordan pa a se.