Manyadali 6

Gideon

1 Israel bi ɔmɛ pee yayami kɛ si Yawɛ ekohu. Lɔ ɔ he ɔ, Yawɛ hu ngɔ mɛ kɛ wo Midian bi ɔmɛ a dɛ mi jeha kpaago.

2 Midian bi ɔmɛ wa Israel bi ɔmɛ yi mi. Midian bi ɔmɛ a he je ɔ, Israel bi ɔmɛ ya tsua muɔhi, tɛ puɔhi, kɛ laami he kpahi kɛ ha a he ngɛ yo ɔmɛ a nɔ.

3 Be tsuaa be nɛ Israel bi ɔmɛ ma du ní ɔ, Midian, kɛ Amalek bi, kɛ ma amɛ nɛ ngɛ beleku je ɔ ma ba tua mɛ.

4 Ke a ba kikɛ nɛ ɔ, a ma kpata zugba a nɔ niba ní tsuo hɛ mi hluu kɛ yaa si Gaza tɔɔ. A maa nuu to ɔmɛ, na amɛ, kɛ teji ɔmɛ tsuo kɛ ho; nɛ a be nɔ́ ko sie ha Israel bi ɔmɛ nɛ a ye.

5 Ke a ma a, a hɛɛɔ a lohwehi, kɛ a bo tsuhi kɛ baa, nɛ a he hiɛɛ babauu kaa baalɛhi. A kɛ a we afukpɔngɔ ɔmɛ ɔ, nɔ ko nɔ ko nyɛ we mɛ kanemi; nɛ ke a ba a, a kpataa nɔ́ tsuaa nɔ́ hɛ mi ngɛ zugba a nɔ.

6 Midian bi ɔmɛ pee Israel bi ɔmɛ posoposo; nɛ Israel bi ɔmɛ fa kue ha Yawɛ.

7 Benɛ Israel bi ɔmɛ fa kue ha Yawɛ kɛ bi yemi kɛ buami ɔ,

8 Yawɛ tsɔ gbalɔ ko kɛ ba a ngɔ, nɛ e ba de mɛ ke, “Bɔ nɛ Yawɛ, Israel Mawu ɔ de ji nɛ ɔ nɛ: Imi lɛ i kpaka nyɛ kɛ je nyɔguɛ yemi mi ngɛ Egipt kɛ ba hiɛmɛ nɛ ɔ nɛ.

9 Imi lɛ i je nyɛ kɛ je Egipt bi ɔmɛ, kɛ ni nɛmɛ nɛ wa nyɛ yi mi ɔ tsuo a dɛ mi. Imi lɛ i fie mɛ kɛ je a zugba a nɔ, nɛ i ngɔ zugba a kɛ ha nyɛ,

10 nɛ i de nyɛ ke, ‘Imi ji Yawɛ, nyɛ Mawu ɔ, lɔ ɔ he ɔ, nyɛ ko ja Amor bi ɔmɛ nɛ nyɛ ngɛ a zugba a nɔ ɔ a mawu ɔmɛ.’ Se nyɛ bui mi tue.”

Gideon tsɛmi

11 Kɛkɛ nɛ Yawɛ bɔfo ɔ ba Ofra, nɛ e ba hi si ngɛ Yoash, Abiezer no ɔ tso ngua a sisi. Jamɛ a be ɔ mi ɔ, e binyumu Gideon ya laa e he, nɛ e ngɛ ngma gbee ngɛ wai muɔ mi, bɔ nɛ pee nɛ Midian bi ɔmɛ ko na lɛ.

12 Yawɛ bɔfo ɔ je e he si tsɔɔ lɛ, nɛ e de lɛ ke, “Mo nyumu katsɛ, Yawɛ kɛ mo ngɛ!”

13 Gideon de lɛ ke, “I kpa mo pɛɛ, ke Yawɛ kɛ wɔ ngɛ niinɛ ɔ, mɛni he je lɛ ní nɛ ɔmɛ tsuo ba wa nɔ mɔ? Nyakpɛ níhi tsuo nɛ wa nɛmɛ ɔmɛ gba wɔ ke Yawɛ pee ha mɛ ɔ, jije a ngɛ? Pi lɛ nɛ e kpaka mɛ kɛ je Egipt kɛ ba a? Amlɔ nɛ ɔ lɛɛ Yawɛ sake wɔ ngɔ fɔ he; e ngɔ wɔ kɛ wo Midian bi ɔmɛ a dɛ mi.”

14 Kɛkɛ nɛ Yawɛ hyɛ lɛ, nɛ e de lɛ ke, “Yaa, nɛ o kɛ o he wami nɛ ɔ ya kpɔ Israel kɛ je Midian dɛ mi. Imi nitsɛ lɛ i tsɔ mo!”

15 Gideon de lɛ ke, “I kpa mo pɛɛ Yawɛ, kɛ ma pee kɛ kpɔ Israel kɛɛ? Weku nɛ i je mi ɔ ji weku nyafii pe kulaa ngɛ Manase wɛtso ɔ mi. Tsaatsɛ we ɔ mi hu imi ji jokuɛyo pe kulaa.”

16 Se Yawɛ de lɛ ke, “Ma piɛ o he; o maa fia Midian bi ɔmɛ nɔ nɛ o maa gbe mɛ kaa a gbeɔ nɔ kake.”

17 Gideon de lɛ ke, “Ke o ngɛ ye he suɔmi ɔ, lɛɛ moo to mi okadi ko nɛ ma kɛ na kaa mo, Yawɛ nitsɛ lɛ o kɛ mi ngɛ munyu tue ɔ nɛ.

18 I kpa mo pɛɛ, koo ya lolo; ha ma ngɔ ye nike ní kɛ ba ma o hɛ mi loko o je.” Yawɛ he nɔ ke, “Ma mlɛ kɛ yaa si o maa kpale kɛ ba.”

19 Gideon ho nɛ e ya gbe apletsi bɔbɔyoo ko, nɛ e kɛ mamu kilo nyɔngma pee abolo kplolo. Lɔ ɔ se ɔ, e kɛ lo ɔ wo kusii mi, nɛ e plɛ e he nyu ɔ kɛ wo kutu mi; nɛ e ngɔ kɛ ba ha Yawɛ bɔfo ɔ ngɛ tso ngua a sisi.

20 Se Mawu bɔfo ɔ de lɛ ke, “Ngɔɔ lo ɔ, kɛ abolo kplolo ɔ kɛ pue tɛ sa nɛ ɔ nɔ, nɛ o plɛ lo ɔ he nyu ɔ kɛ pue nɔ.” Gideon pee ja.

21 Kɛkɛ nɛ Yawɛ bɔfo ɔ kpã e nine mi, nɛ e kɛ tso ɔ nɛ e hɛɛ ɔ nya sa lo ɔ kɛ abolo kplolo ɔ he. La je tɛ sa a mi sã lo ɔ, kɛ abolo kplolo ɔ. Kɛkɛ nɛ Yawɛ bɔfo ɔ laa.

22 Benɛ Gideon na kaa Yawɛ bɔfo nɛ e na a, e de ke, “Akuanyɛ! Yawɛ Mawu! Yawɛ bɔfo pam lɛ i na hɛ mi kɛ hɛ mi paa kikɛ nɛ ɔ!”

23 Se Yawɛ de lɛ ke, “He jɔmi ha mo. Koo ye gbeye; o be gboe!”

24 Gideon pee bɔ sami la tɛ ngɛ lejɛ ɔ kɛ ha Yawɛ, nɛ e wo lɛ biɛ ke, “Yawɛ ji he jɔmi.” Bɔ sami la tɛ nɛ ɔ maa si ngɛ Abiezer bi ɔmɛ a ma a mi ngɛ Ofra kɛ ba si mwɔnɛ ɔ.

25 Jamɛ a nyɔ ɔ mi nɔuu ɔ, Yawɛ de Gideon ke, “Yaa nu o tsɛ na ku ɔ, kɛ na ku kpa nɛ ye jeha kpaago; nɛ o ya ku bɔ sami la tɛ ɔ nɛ o tsɛ pee kɛ ha Baal ɔ, kɛ yo wɔ Ashera nɛ ngɛ e kasa nya a,

26 nɛ o ma bɔ sami la tɛ ha Yawɛ, o Mawu ɔ ngɛ tɛ sa nɛ ɔ nɔ. Lɔ ɔ se ɔ, ngɔɔ Ashera he tso ɔmɛ nɛ o ku pue si ɔ kɛ pee lɛ́, nɛ o ngɔ na ku enyɔne ɔ kɛ sã sami bɔ.”

27 Gideon hla e tsɔli ɔmɛ a kpɛti ni nyɔngma, nɛ e pee kaa bɔ nɛ Yawɛ de lɛ ɔ. Akɛnɛ e ngɛ e we mi bi ɔmɛ, kɛ ma mi bi ɔmɛ gbeye yee he je ɔ, e nyɛ we nɛ e tsu ní tsumi nɛ ɔ piani, se nyɔ mi.

28 Mɔtu kpla benɛ ma mi bi ɔmɛ te si ɔ, a na kaa a ywia Baal bɔ sami la tɛ ɔ, kɛ yo wɔ Ashera nɔ́ ɔ nɛ ngɛ e kasa nya a. A na hu kaa a sã na ku enyɔne ɔ ngɛ bɔ sami la tɛ nɛ a ma a nɔ;

29 nɛ a bi a sibi ke, “Mɛnɔ po pee nɔ́ nɛ ɔ?” Se benɛ a hla mi, nɛ a bi si, nɛ a ná le kaa Gideon, Yoash binyumu ɔ ji nɔ nɛ ye jamɛ a sane ɔ,

30 ma mi bi ɔmɛ de Yoash ke, “Ngɔɔ o bi ɔ kɛ ba nɛ a gbe lɛ; ejakaa e ywia Baal bɔ sami la tɛ ɔ, kɛ yo wɔ Ashera hu nɔ́ ɔ.”

31 Se Yoash de ni ɔmɛ tsuo nɛ ba bɔle lɛ ɔ ke, “Baal he nɛ nyɛ ngɛ pɛe nɛ ɔ? Baal he nɛ nyɛ ngɛ fae nɛ ɔ? Nɔ tsuaa nɔ nɛ ngɛ Baal he pɛe ɔ, a maa gbe lɛ loko je maa na. Baal ɔ, ke mawu ji lɛ ɔ, nyɛ ha e fa lɛ nitsɛ e he; e bɔ sami la tɛ lɛ a ywia a nɛ!”

32 Lɔ ɔ he ɔ, kɛ je jamɛ a ligbi ɔ, biɛ nɛ a tsɛɔ Gideon ji Yerubaal. E sisi ji, “Ha nɛ Baal kɛ lɛ ya to ní,” ejakaa e ywia Baal bɔ sami la tɛ ɔ.

33 E kɛ we kulaa nɛ Midian bi ɔmɛ, kɛ Amalek bi ɔmɛ, kɛ ma amɛ nɛ ngɛ beleku je ɔ tsuo pɛpɛɛpɛ ba bua a he nya. A po Yordan pa a, nɛ a ya bua a he nya ekohu ngɛ Yezreel kɔ̃ ɔ mi.

34 Kɛkɛ nɛ Yawɛ mumi ɔ ba Gideon nɔ, nɛ e kpa titimati kɛ tsɛ Abiezer bi ɔmɛ ke a ba piɛ e he.

35 E tsɔ ya kpee Manase bi ɔmɛ; nɛ mɛ hu a ba piɛ e he. Jehanɛ, e tsɔ ya kpee Asher, Zebulun, kɛ Naftali wɛtso ɔmɛ; nɛ mɛ hu a ba piɛ e he.

36 Kɛkɛ nɛ Gideon de Mawu ke, “Ke o ma he Israel yi wami niinɛ kɛ gu ye nɔ ɔ,

37 lɛɛ o nɛ, i kɛ jijɔ he womi maa fɔ si ngɛ ngma mi sami he ɔ. Ke bɔ́ nɛ, nɛ to he womi ɔ pɛ pɔ, se zugba a tsuo lɛɛ e gbli ɔ, lɔ ɔ i kɛ maa le kaa o maa gu ye nɔ kɛ he Israel yi wami niinɛ kaa bɔ nɛ o de ɔ.”

38 Nɛ e ba mi ja niinɛ. E nɔ jena mɔtu kpla be nɛ Gideon te si nɛ e nga to he womi ɔ mi ɔ, nyu nɛ je mi ɔ hyi tsimi kake.

39 Gideon de Mawu ke, “O mi mi nɛ ko fu mi; ha ma tu munyu si kake nɛ ɔ pɛ! I kpa mo pɛɛ, ha ma ngɔ to he womi nɛ ɔ kɛ kpa nɔ́ si si kake nɛ ɔ pɛ! Jehanɛ lɛɛ i kpa mo pɛɛ, ha nɛ bɔ́ nɛ nɛ ngɛ zugba a tsuo nɔ, konɛ to he womi ɔ pɛ lɛɛ e gbli.”

40 Nɛ Mawu ha e ba mi ja; jamɛ a nyɔ mi ɔ, bɔ́ nɛ ngɛ zugba a nɔ tsuo, se to he womi ɔ pɛ nɛ lɛɛ e gbli.