Petro II, 3

A wo Nyɔmtsɛ ɔ bami ɔ he si

1 Nyɛmimɛ nɛ i suɔ, enɛ ɔ ji womi enyɔne nɛ i ngɛ nyɛ ngmae. I bɔ mɔde ngɛ womi nɛ ɔmɛ tsuo a mi kaa ma tsɛ nyɛ juɛmi se kɛ ba níhi nɛ nyɛ le momo ɔ a he.

2 Nyɛ kai munyuhi nɛ gbali klɔuklɔu ɔmɛ tu blema lokoo ɔ, kɛ wa Nyɔmtsɛ kɛ wa kpɔlɔ ɔ mlaa nɛ bɔfo ɔmɛ nɛ a tsɔ mɛ nyɛ ngɔ ɔ kɛ ba ha nyɛ ɔ.

3 ⓖ Kekleekle ɔ, nyɛ na nɛ nyɛɛ le kaa nyagbe ligbi ɔmɛ a mi ɔ, nɔ he fɛu yeli komɛ maa ba, nɛ nɔ́ nɛ a we akɔnɔ de mɛ ke a pee ɔ, lɔ ɔ a maa pee.

4 Kikɛmɛ a nimli nɛ ɔmɛ ma de ke, “E wo si kaa e maa kpale kɛ ba ekohu, pi jã lo? Jije e ngɛ? Ejakaa kɛ je be nɛ wa nɛmɛ ɔmɛ gbo nɛ ɔ, bɔ nɛ níhi ngɛ kɛ je be mi nɛ a bɔ je ɔ, jã nɔuu nɛ a ngɛ nɛ ɔ nɛ.”

5 ⓗ A jeɔ blɔ peeɔ kaa a li kaa blema lokoo ɔ, munyu kɛkɛ lɛ Mawu tu, nɛ hiɔwe kɛ zugba ba, kaa a je zugba kɛ je nyu mi, nɛ nyu a kɛ bɔ zugba a.

6 ⓘ Nɛ nyu nɔuu, nyu kpekpemi ɔ a kɛ kpata jamɛ a be ɔ mi je ɔ hɛ mi.

7 Se hiɔwe kɛ zugba a nɛ ngɛ amlɔ nɛ ɔ, munyu nɛ je Mawu nya a nɔuu lɛ hɛɛ mɛ, konɛ a kɛ la nɛ ba kpata a hɛ mi hwɔɔ se. Jamɛ a ligbi ɔ, a maa kojo nihi tsuo nɛ li Mawu, nɛ a ma kpata a hɛ mi.

8 ⓙ Se ye nyɛmimɛ nɛ i suɔ! Nɔ́ kake nɛ nyɛ hɛ ko je nɔ ji kaa ngɛ Nyɔmtsɛ ɔ hɛ mi ɔ, ligbi kake ngɛ kaa jeha akpe, nɛ jeha akpe hu ngɛ kaa ligbi kake.

9 Nɔ́ nɛ Nyɔmtsɛ ɔ wo si ke e maa pee ɔ, pi tsle nɛ e ngɛ toe ngɛ he kaa bɔ nɛ ni komɛ ngɛ susue ɔ; e tsui si kɛkɛ lɛ e ngɛ toe ha nyɛ. Ejakaa e sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui.

10 ⓚ Se Nyɔmtsɛ ɔ ligbi ɔ maa ba kaa bɔ nɛ julɔ baa a. Jamɛ a ligbi ɔ, hiɔwe maa be kɛ ho kɛ kemi nɛ nya wa. Níhi nɛ ngɛ hiɔwe ɔ tsuo maa sã, nɛ a hɛ mi ma kpata, nɛ je ɔ, kɛ e mi nɔ́ tsuaa nɔ́ maa laa.

11 Akɛnɛ ní nɛ ɔmɛ tsuo pɛpɛɛpɛ a hɛ mi ma kpata kikɛ nɛ ɔ, lɛɛ kɛ e sa kaa nyɛɛ ba nyɛ je mi kɛɛ? E sa kaa nyɛɛ pee nyɛ he klɔuklɔu, nɛ nyɛɛ ngɔ nyɛ he ngɔ ha Mawu,

12 konɛ nyɛɛ hi Mawu ligbi ɔ blɔ hyɛe, nɛ nyɛɛ hi sɔlee nɛ e su mla. Jamɛ a ligbi ɔ, hiɔwe ma mle kɛ la, nɛ e maa sã, nɛ la a ma ha níhi nɛ ngɛ hiɔwe ɔ tsuo maa sile.

13 ⓛ Se wa ngɛ hiɔwe he, kɛ zugba he blɔ hyɛe kaa bɔ nɛ Mawu wo si ɔ. Lejɛ ɔ ji he nɛ a yeɔ dami sane ngɛ.

14 Lɔ ɔ he ɔ, ye nyɛmimɛ nɛ i suɔ! Be mi nɛ nyɛ ngɛ ní nɛ ɔmɛ blɔ hyɛe ɔ, nyɛɛ bɔ mɔde nɛ Mawu ko na mu, loo piami nɔ́ ko ngɛ nyɛ he; nyɛɛ kɛ lɛ nɛ hi si ngɛ he jɔmi mi.

15 Nyɛɛ ngɔ Nyɔmtsɛ ɔ tsui si tomi ɔ kaa he blɔ nɛ Mawu ha nyɛ nɛ a kɛ he nyɛ yi wami. Enɛ ɔ nɔuu wa suɔlɔ, kɛ wa nyɛmi Paulo hu ngma nyɛ kɛ nile nɛ Mawu ha lɛ ɔ nɛ.

16 E tuɔ enɛ ɔmɛ a he munyu ngɛ womihi tsuo nɛ e ngma a a mi. Ní komɛ nɛ e de ɔ, a sisi numi yee, nɛ nihi nɛ li nɔ́ ko nɔ́ ko, kɛ ni komɛ hu nɛ a yi mi peeɔ mɛ enyɔɔnyɔ ɔ, tsɔɔ sisi ngɛ blɔ kpa nɔ kaa bɔ nɛ a peeɔ ngmami kpa amɛ ɔ. Blɔ nɔ nɛ a guu kɛ kpataa mɛ nitsɛmɛ a hɛ mi ji nɛ ɔ nɛ.

17 Se ye nyɛmimɛ nɛ i suɔ, nyɛɛ lɛɛ nyɛ le enɛ ɔ momo. Lɔ ɔ he ɔ, nyɛɛ hyɛ nɛ hi saminya, nɛ nihi nɛ bui mlaa a, a ní peemi ní yayami ɔmɛ kó gbla nyɛ se, nɛ nyɛ si nɛ nyɛ da a ko bɔ nyɛ.

18 Se nyɛɛ ya nɔ nɛ nyɛɛ wa ngɛ dloomi ɔ mi, nɛ nyɛɛ le wa Nyɔmtsɛ, kɛ wa kpɔlɔ Yesu Kristo ɔ saminya. Á wo e hɛ mi nyami kɛ je be nɛ ɔ mi kɛ ya neneene! Amen.