Petro II, 2

Lakpa tsɔɔli

1 Lakpa gbali te si ngɛ ma a mi be ko nɛ be ɔ, nɛ ja nɔuu lakpa tsɔɔli maa te si ngɛ nyɛ hu nyɛ kpɛti. A kɛ lakpa tsɔɔmihi nɛ kpataa nɔ hɛ mi maa ba ngɛ laami mi. Tsɔɔlɔ ɔ nitsɛ nɛ kpɔ mɛ ɔ po a ma kua lɛ, nɛ nɔ́ nɛ ɔ ma ha nɛ a ma kpata mɛ nitsɛmɛ a hɛ mi si kake too.

2 Nihi babauu maa nyɛɛ a se kɛ yakayaka je mi bami, nɛ a he ɔ, nihi maa tu munyu kɛ si Kristo, kɛ e blɔ ɔ.

3 Kikɛmɛ a lakpa tsɔɔli nɛ ɔmɛ maa tu nyɛ munyuhi nɛ a po de, konɛ a kɛ sisi nyɛ nɛ a ná nyɛ he se. Se Mawu bu mɛ fɔ momo be saii ji nɛ, nɛ a hɛ mi kpatami be ɔ hu su ta.

4 Bɔfohi nɛ pee yayami ɔ, Mawu ngɔɛ a he ngɔ ki mɛ, se mohu e tsitsɛɛ mɛ ngɔ wo gbeje muɔ mi. A fi mɛ ngɔ wo diblii mi, nɛ a maa hi mlɛe ngɛ lejɛ ɔ hluu kɛ yaa si kojomi ligbi ɔ.

5 ⓑ Mawu ngɔɛ blema bi ɔmɛ a he ngɔ ki mɛ, se mohu e ngɔ nyu kpekpemi kɛ kpata yayami peeli ɔmɛ a hɛ mi. Noa nɛ fiɛ ke a ye dami sane ɔ, e kɛ ni kpaago kpa komɛ pɛ lɛ Mawu he a yi wami.

6 ⓒ Mawu gbla Sodom kɛ Gomora ma amɛ a tue. E ngɔ la kɛ kpata ma nɛ ɔmɛ a hɛ mi ngɔ to okadi kɛ tsɔɔ nɔ́ nɛ maa ba yayami peeli a nɔ.

7 ⓓ E he Lot hu yi wami. Lot nɛ ɔ, nɔmlɔ kpakpa ji lɛ, nɛ nihi nɛ bui mlaa a yakayaka je mi bami haoɔ lɛ wawɛɛ.

8 Benɛ nɔmlɔ kpakpa nɛ ɔ ngɛ a kpɛti ɔ, daa nɛ ɔ, e naa, nɛ e nuɔ ní yayamihi nɛ a ngɛ pee ɔ a he; nɛ nɔ́ nɛ ɔ hao e tsui.

9 Lɔ ɔ he ɔ, Nyɔmtsɛ ɔ le bɔ nɛ e peeɔ nɛ e jeɔ nimli kpakpahi kɛ jeɔ ka mi. E le bɔ nɛ e peeɔ kɛ hii nimli yayamihi a tue gblae hluu kɛ yaa su kojomi ligbi ɔ tɔɔ.

10 Nimli nɛ ɔmɛ a ti nihi pɔtɛɛ ji ni nɛmɛ nɛ ya nyɛɛɔ he lo mi akɔnɔ yaya se, se Mawu mlaa a lɛɛ a bui. Kikɛmɛ a lakpa tsɔɔli nɛ ɔmɛ a tsui wa; a woɔ a he nɔ, nɛ nibɔ ní kpakpahi nɛ ngɛ hiɔwe po a bui; se mohu a jɛɔ mɛ.

11 Bɔfo ɔmɛ nɛ a he wa, nɛ a hiɛ kulaa pe lakpa tsɔɔli nɛ ɔmɛ tete po pui a nya, nɛ a jɛ we mɛ hulɔ ngɛ Nyɔmtsɛ ɔ hɛ mi.

12 Se kikɛmɛ a nimli nɛ ɔmɛ ngɛ kaa pu mi lohwehi; a be juɛmi. A bɔ mɛ nɛ a nuu mɛ nɛ a gbe kɛkɛ; nɔ́ ko nɛ a nui sisi ɔ, a tuɔ he munyu yaya. A ma kpata a hɛ mi kaa pu mi lohwehi,

13 nɛ ní yayamihi nɛ a pee ɔ, a maa na nɔ́ kɛ to nya. Piani ke a ngɛ yakayaka fiɛmihi fiɛe kikɛ nɛ ɔ, kɛkɛ a bua jɔ; zotsɛmɛ kɛ ahluatsɛmɛ ji mɛ. Benɛ a futu nyɛ kɛ ngɛ ní yee ɔ, jamɛ a be ɔ tsuo a ngɛ a yakayaka nyɛɛmi ɔmɛ nyɛɛe.

14 A hɛngmɛ hyɛ we nɔ́ kpa ko kaa ja yihi yaholi pɛ. Pɔ tɔɛ mɛ kɛ yayami peemi. A sisiɔ nihi nɛ gbɔjɔ, nɛ a naa a he blɔ. A kase jiklɔɔ peemi, nɛ a le saminya. Mawu gbiɛ mɛ pɛ!

15 ⓔ A je blɔ tlɔmɔɔ ɔ nɔ, nɛ a laa blɔ kaa bɔ nɛ Beor bi Balaam pee ɔ pɛpɛɛpɛ. Balaam ya di se nami se, nɛ e kɛ pee nɔ́ nɛ dɛ;

16 se a ka e hɛ mi ngɛ yayami nɛ e pee ɔ he. Gbalɔ ɔ teji ɔ pã e nya mi, nɛ e tu munyu kaa nɔmlɔ, nɛ e tsi godo ní tsumi nɛ gbalɔ ɔ miɔ nɛ e ma tsu ɔ nya.

17 Nimli nɛ ɔmɛ ngɛ kaa nyu vuhi nɛ nyu be a mi; a ngɛ kaa bɔkuhi nɛ ahumi ngɔ kɛ yaa. Mawu dla he ko ngɔ to mɛ ngɛ diblii nɛ mi ti mi.

18 Akɛnɛ nya puu munyu nguahi jeɔ a nya he je ɔ, a guu he lo akɔnɔ níhi a nɔ nɛ a kɛ ya sisiɔ nihi nɛ je si himi yaya nɛ dɛ blɔ mi kɛ́ we.

19 A woɔ mɛ si ke a maa ye a he, be mi nɛ mɛ nitsɛmɛ a pee a he nyɔguɛhi kɛ ha níhi nɛ puɛɔ nɔ. Ejakaa nɔ́ tsuaa nɔ́ nɛ yeɔ nɔ ko nɔ ɔ, nɔ ɔ peeɔ nyɔguɛ ha jamɛ a nɔ́ ɔ.

20 Waa ngɔ lɛ kaa nihi na le wa Nyɔmtsɛ kɛ wa kpɔlɔ Yesu Kristo, nɛ lɔ ɔ he ɔ, a tu je nɛ ɔ mi mu níhi a nya fo. Pee se, ke a ngɔ a he ya wo yayami mi ekohu, nɛ yayami ɔ ye a nɔ ɔ, nimli nɛ ɔmɛ a nyagbe si himi ba peeɔ mɔbɔ kulaa pe kekle nɔ́ ɔ po.

21 Afani nɔ́ nɛ a na we nɛ a le Kristo, pe nɛ a le lɛ, nɛ pee se ɔ, a je mlaa klɔuklɔu ɔ nɛ a ha mɛ ɔ he.

22 ⓕ Nɔ́ nɛ ba a nɔ ɔ tsɔɔ kaa abɛ nɛ ɔmɛ ngɛ mi niinɛ: “Gbe kpaleɔ kɛ yaa lɛ nitsɛ e vie he,” kɛ “Kpotoo nɛ a du ha lɛ ɔ kpaleɔ ya wuɔ mɔsɔ ekohu.”