Yoshua 12

Matsɛmɛ ɔmɛ nɛ Mose ye a nɔ ɔ

1 ⓣ Israel bi ɔmɛ ye matsɛmɛ enyɔ komɛ a nɔ, nɛ a ngɔ a zugba a ngɛ Yordan pa a beleku je. Zugba a ngɛ kɛ je Arnon kɔ̃ ɔ mi kɛ ya su Hermon yo ɔ he tɔɔ.

2 Matsɛmɛ nɛ ɔmɛ a ti nɔ kake ji Amor bi ɔmɛ a Matsɛ Sihon nɛ hi Heshbon ɔ. E nɔ yemi hehi ji nɛ ɔmɛ nɛ: Gilead fa a, kɛ je Aroer ngɛ Arnon kɔ̃ ɔ nya kɛ gu kɔ̃ ɔ mi, kɛ ya su Yabok pa a nya ngɛ Amon bi ɔmɛ a huzu ɔ nya.

3 E nɔ yemi he ɔmɛ ekomɛ hu ji nɛ ɔmɛ nɛ: Yordan kɔ̃ ɔ, kɛ je Galilea wo ɔ nya ngɛ omleyi je kɛ ya su Bet Yeshimot ngɛ Ngo wo ɔ beleku je hluu kɛ ya su Pisga yo ɔ sisi.

4 Matsɛ enyɔne ɔ ji Bashan matsɛ, Og. Lɛ ji Refaim nina nɛ piɛ ɔ a ti nɔ kake nɛ hi Ashtarot kɛ Edrei.

5 Matsɛ Og nɔ yemi he ɔmɛ ji nɛ ɔmɛ nɛ: kɛ je Hermon yo ɔ nɔ, Saleka, kɛ Bashan tsuo, kɛ ya su Geshur bi ɔmɛ kɛ Maaka bi ɔmɛ a huzu ɔmɛ a nya. Jehanɛ, kɛ je Gilead bi ɔmɛ a zugba a fa kɛ ya ta Heshbon huzu ɔ nya.

6 ⓤ Mose kɛ Israel bi ɔmɛ kpata matsɛmɛ enyɔ nɛ ɔmɛ a hɛ mi, nɛ Yawɛ tsɔlɔ Mose ngɔ a zugba a ngɔ ha Ruben kɛ Gad, kɛ Manase wɛtso fa a kaa a weto ní.

Matsɛmɛ ɔmɛ nɛ Yoshua ye a nɔ ɔ

7 Yoshua kɛ Israel bi ɔmɛ kpata matsɛmɛ ɔmɛ tsuo nɛ ngɛ Yordan pa a bonyoku je ɔ a hɛ mi, kɛ je Baal Gad ngɛ Lebanon kɔ̃ ɔ mi kɛ ya su Halak yo ɔ he ngɛ leneyi je ngɛ Edom kasa nya. Yoshua dla zugba nɛ ɔ ngɔ ha Israel bi ɔmɛ wɛtso nya wɛtso nya, nɛ e pee a weto ní.

8 Zugba a ngɛ yo nɔ kɛ kɔ̃ mi; Yordan kɔ̃ ɔ kɛ nga kplanaa a nɔ, kɛ yo ɔmɛ a kuɛ si, kɛ nga a nɔ, kɛ leneyi je tsuo. Nihi nɛ hi lejɛ ɔ hyɛ ji Hit bi, Amor bi, Periz bi, Hiv bi, kɛ Yebus bi.

9 Israel bi ɔmɛ gbe matsɛmɛ ɔmɛ ngɛ ma nɛ ɔmɛ a mi: Yeriko, Ai nɛ ngɛ Betel kasa nya a,

10 Yerusalem, Hebron,

11 Yarmut, Lakish,

12 Eglon, Gezer,

13 Debir, Geder,

14 Horma, Arad,

15 Libna, Adulam,

16 Makeda, Betel,

17 Tapua, Hefer,

18 Afek, Lasharon,

19 Madon, Hazor,

20 Shimron Meron, Akshaf,

21 Taanak, Megido,

22 Kedesh, Yokneam ngɛ Karmel,

23 Dor ngɛ wo ɔ nya, Goyim ngɛ Galilea,

24 kɛ Tirza; matsɛmɛ nɛ ɔmɛ tsuo a hiɛmi ji nyingmi etɛ kɛ kake.