Yoshua 13

Zugba nɛ Israel ngɔɛ lolo

1 Jehanɛ, benɛ Yoshua ba bwɔ kotokoto ɔ, Yawɛ de lɛ ke, “O bwɔ lɛɛ, se zugba nɛ piɛ nɛ o maa ngɔ ɔ hiɛ babauu.

2 Zugba nɛ piɛ ɔ ji Filistia kɛ Geshur zugba a,

3 kɛ Avim zugba a tsuo nɛ ngɛ leneyi je ɔ. Zugba a nɛ ngɛ kɛ je Shihor pa a he ngɛ Egipt bi ɔmɛ a huzu ɔ nya a, kɛ ba be kɛ ho Ekron ya ngɛ omleyi je ɔ, a buu jamɛ a zugba a kaa Kanaan bi a zugba. Filisti bi ɔmɛ a matsɛmɛ ɔmɛ hi ma nɛ ɔmɛ a mi: Gaza, Ashdod, Ashkelon, Gat, kɛ Ekron.

4 Enɛ ɔmɛ hu piɛ he: Kanaan bi ɔmɛ a zugba a tsuo, kɛ Meara nɛ ji Sidon bi ɔmɛ a nɔ́ ɔ, kɛ ya su Afek ngɛ Amor bi ɔmɛ a huzu ɔ nya,

5 kɛ Gebal bi ɔmɛ a zugba a, kɛ Lebanon tsuo ngɛ beleku je, kɛ je Baalgad ngɛ Hermon yo ɔ sisi kɛ ya su Hamat yo kpɛ blɔ ɔ.

6 ⓥ Sidon bi ɔmɛ a zugba a tsuo nɛ ngɛ kɛ je Lebanon yo ɔmɛ a nɔ kɛ ya su Misrefot Maim pa a nya a hu piɛ he. Imi nitsɛ ma fie nimli nɛ ɔmɛ kɛ je Israel bi ɔmɛ a blɔ ɔ mi. Moo lɛɛ moo dla zugba a ngɔ ha Israel bi ɔmɛ, nɛ e pee a weto ní, kaa bɔ nɛ i fa mo ɔ.

7 Lɔ ɔ he ɔ, dla zugba a ha wɛtso nɛɛ ɔmɛ, kɛ Manase wɛtso fa a, nɛ e pee a nɔ.”

Yordan pa a beleku je zugba a dlami

8 ⓦ Yawɛ tsɔlɔ Mose ha Manase wɛtso fa a nɛ piɛ ɔ, Ruben wɛtso ɔ, kɛ Gad wɛtso ɔ a weto ní ngɛ Yordan pa a beleku je momo.

9 A zugba a fɔ si kɛ je Aroer, ngɛ Arnon kɔ̃ ɔ nya, kɛ be ma nɛ ngɛ jamɛ a kɔ̃ ɔ mi ɔ he, kɛ muɔ zugba kpataa a nɛ ngɛ Medeba kɛ Dibon a kpɛti ɔ.

10 A kɛ Amon bi ɔmɛ wo huzu. Amor bi a matsɛ, Sihon nɛ ye tsɛ ngɛ Heshbon ɔ, e ma amɛ tsuo ngɛ zugba nɛ ɔ mi.

11 Gilead, Geshur, Maaka, Hermon yo ɔ, Bashan, kɛ Saleka tsuo piɛ a zugba a he.

12 Bashan matsɛ, Og nɔ yemi he ɔ hu piɛ zugba nɛ ɔ he. Og ye matsɛ ngɛ Ashtarot kɛ Edrei; nɛ lɛ nɔ kake pɛ ji nɔ nɛ piɛ ngɛ oblaihi a nina nɛ a tsɛɛ mɛ Refaim ɔ a kpɛti; ejakaa Mose ya tua mɛ, nɛ e fie mɛ kɛ je lejɛ ɔ.

13 Israel bi ɔmɛ fie we Geshur bi ɔmɛ kɛ Maaka bi ɔmɛ; mohu ɔ, a kɛ mɛ ngɛ kɛ mwɔɔ.

14 ⓧ Levi bi ɔmɛ pɛ ji wɛtso nɛ Mose ha we mɛ zugba a eko. Kaa bɔ nɛ Yawɛ de Mose ɔ, Levi bi ɔmɛ lɛɛ a blɔ nya ní ji bɔhi nɛ a kɛ la sãã ngɛ bɔ sami la tɛ ɔ nɔ kɛ haa Yawɛ, Israel Mawu ɔ.

Zugba nɛ a ha Ruben wɛtso ɔ

15 Mose ha Ruben wɛtso ɔ zugba kaa a weto ní we puɔ nya we puɔ nya.

16 Zugba nɛ ɔ huzu je Aroer pa a nya ngɛ Arnon kɔ̃ ɔ nya, kɛ ma nɛ ngɛ kɔ̃ ɔ kpɛti ɔ, kɛ zugba kpataa a tsuo nɛ bɔle Medeba a.

17 Mahi nɛ ngɛ zugba a nɔ ji Heshbon, kɛ ma amɛ tsuo nɛ ngɛ zugba kpataa a nɔ, nɛ ji Dibon, Bamot Baal, Bet Baalmeon,

18 Yahaz, Kedemot,

19 Mefaat, Kiriataim, Sibma, Zeretshahar ngɛ kɔ̃ ɔ nya,

20 Betpeor, Pisga yo ɔ kuɛ si, kɛ Bet Yeshimot.

21 Lɔ ɔ ji ma amɛ tsuo nɛ ngɛ zugba kpataa a nɔ, kɛ Amor bi ɔmɛ a matsɛ, Sihon nɛ ye tsɛ ngɛ Heshbon ɔ nɔ yemi he ɔmɛ tsuo. Mose ye e nɔ kunimi, kɛ Midian ma nimeli nɛ ɔmɛ hulɔ: Evi, Rekem, Zur, Hur, kɛ Reba. Heshbon matsɛ, Sihon ganɔhi ji mɛ tsuo.

22 Nihi nɛ Israel bi ɔmɛ gbe ɔ, a ti nɔ kake ji klamɔ ɔ nɛ a tsɛɛ lɛ Balaam ɔ. Beor binyumu ji lɛ.

23 Ruben bi ɔmɛ a huzu ngɛ bonyoku je ji Yordan pa a. Mahi kɛ a he kɔpehi nɛ a ha Ruben bi ɔmɛ kaa a weto ní we puɔ nya we puɔ nya ji nɛ ɔmɛ nɛ.

Zugba nɛ a ha Gad wɛtso ɔ

24 Mose ha Gad wɛtso ɔ hu zugba a eko kaa a weto ní we puɔ nya we puɔ nya.

25 A zugba ji Yazer kɛ Gilead ma amɛ tsuo, kɛ Amon bi ɔmɛ a zugba a fa, kɛ ya su Aroer ngɛ Raba beleku je.

26 Jehanɛ, a zugba a tsa nɔ kɛ je Heshbon kɛ ya su Ramat Mizpa kɛ Betonim, nɛ e je Mahanaim kɛ ya su Lodebar huzu ɔ nya.

27 Ngɛ Yordan kɔ̃ ɔ mi ɔ, mahi nɛ ngɛ lejɛ ɔ ji Bet Haram, Betnimra, Sukot, Safon, kɛ Heshbon nɛ ji Matsɛ Sihon nɔ yemi he nɛ piɛ ɔ. Bonyoku je huzu ɔ je Yordan pa a nya kɛ ya su Galilea wo ɔ nya tɔɔ ngɛ omleyi je.

28 Mahi kɛ a he kɔpehi nɛ a ha Gad wɛtso ɔ kaa a weto ní we puɔ nya we puɔ nya ji nɛ ɔmɛ nɛ.

Zugba nɛ a ha Manase wɛtso fa a

29 Manase wɛtso fa a hu Mose ha mɛ zugba kaa a weto ní, we puɔ nya we puɔ nya.

30 A zugba a je Mahanaim kɛ muɔ Bashan. Lɔ ɔ ji Bashan matsɛ, Og nɔ ye mi he ɔ tsuo, kɛ Yair kɔpehi nyingmi ekpa ngɛ Bashan,

31 Gilead ma a fa, kɛ Ashtarot kɛ Adrei ngɛ zugba nɛ a ngɔ kɛ ha Manase wɛtso fa a mi. Ma nguahi nɛ ngɛ Bashan matsɛ, Og nɔ yemi he ɔ ji ma nɛ ɔmɛ. A ngɔ ma nɛ ɔmɛ tsuo ngɔ ha Manase binyumu Makir nina fa a we puɔ nya we puɔ nya.

32 Bɔ nɛ Mose dla zugba a nɛ ngɛ Moab nga a nɔ, ngɛ Yordan se pa a ngɛ Yeriko beleku je ɔ ha ji nɛ ɔ nɛ.

33 ⓨ Levi wɛtso ɔ lɛɛ Mose ha we mɛ zugba a eko. E de mɛ ke mɛɛ a weto ní ji Yawɛ, Israel Mawu ɔ.