Yoshua 11

Yoshua ye Yabin kɛ e huɛmɛ ɔmɛ a nɔ

1 Benɛ Hazor matsɛ, Yabin nu Israel kunimi yemi ɔ he ɔ, e tsɔ ya de Madon matsɛ, Yobab; Shimron matsɛ, Akshaf matsɛ,

2 kɛ matsɛmɛ ɔmɛ nɛ ngɛ yo ɔmɛ a nɔ ngɛ omleyi je, kɛ Yordan kɔ̃ ɔ mi ngɛ Galilea wo ɔ leneyi je, kɛ nga kpataa a nɔ, kɛ ni nɛmɛ nɛ ngɛ wo ɔ nya ngɛ Dor kasa nya a.

3 Jehanɛ, e tsɔ ya de Kanaan bi ɔmɛ nɛ ngɛ Yordan pa a kpo he hiɛ kɛ hiɛ, kɛ Amor bi ɔmɛ, Hit bi ɔmɛ, Periz bi ɔmɛ, Yebus bi ɔmɛ nɛ a ngɛ yo ɔmɛ a nɔ ɔ, kɛ Hiv bi ɔmɛ nɛ ngɛ Hermon yo ɔ sisi ngɛ Mizpa zugba a nɔ ɔ.

4 Matsɛmɛ nɛ ɔmɛ hia ta kɛ a tabo ɔmɛ, kɛ a we okpɔngɔ ɔmɛ, kɛ a ta zugba lɛ ɔmɛ tsuo pɛpɛɛpɛ. A hiɛ babauu kaa wo nya zia.

5 Matsɛmɛ nɛ ɔmɛ tsuo bua a tabo ɔmɛ a nya ngɛ he kake, nɛ a gba ta ngɔ wo Israel he ngɛ Merom pa a nya.

6 Yawɛ de Yoshua ke, “Koo ye mɛ gbeye. Hwɔɔ be nɛ ɔ mi ɔ, i gbe mɛ tsuo pɛpɛɛpɛ kɛ ha Israel momo. O maa poo a we okpɔngɔ ɔmɛ a nane se pani, nɛ o maa sã a ta zugba lɛ ɔmɛ.”

7 Kɛkɛ nɛ Yoshua kɛ Israel tabo ɔ tsuo ya tua Yabin ta a ngɛ Merom pa a nya, be mi nɛ a hɛ be a he nɔ.

8 Yawɛ ha Israel bi ɔmɛ ye a nɔ. Israel bi ɔmɛ tua mɛ, nɛ a nyɛɛ a se kɛ ya su Sidon Ngua, kɛ Misrefot Maim ngɛ omleyi je; jehanɛ, a nyɛɛ a se kɛ gu beleku je kɛ ya su Mizpa kɔ̃ ɔ mi tɔɔ. A hwu ta a kɛ ya si be nɛ a gbe he nyɛli ɔmɛ tsuo pɛpɛɛpɛ nɛ nɔ kake po píɛ.

9 Yoshua pee bɔ nɛ Yawɛ fa lɛ ke e pee ɔ; e poo a we okpɔngɔ ɔmɛ a nane se pani, nɛ e sã a ta zugba lɛ ɔmɛ.

10 Yoshua kpale e se jamɛ a be ɔ mi nɔuu, nɛ e ya ngɔ Hazor, nɛ e gbe matsɛ ɔ. (Sa a, Hazor ji lejɛ ɔ nɔ yemi ɔmɛ tsuo a yi.)

11 A kpata nɔ tsuaa nɔ hɛ mi ngɛ lejɛ ɔ; nɔ kake po píɛ. Nɛ a sã Hazor ma a.

12 Yoshua ngɔ ma nɛ ɔmɛ tsuo nɛ e kpata a kɛ a matsɛmɛ ɔmɛ a hɛ mi pɛsɛpɛsɛ kaa bɔ nɛ Yawɛ tsɔlɔ Mose fa lɛ ke e pee ɔ.

13 Se Israel bi ɔmɛ sɛ̃ ma amɛ nɛ ngɛ kpo ɔmɛ a nɔ ɔ ekoeko, ja Hazor pɛ nɛ Yoshua sã.

14 Israel bi ɔmɛ ha ma nɛ ɔmɛ a mi ní, kɛ lohwe ɔmɛ tsuo, se nimli ɔmɛ lɛɛ a kpata mɛ tsuo a hɛ mi; nɔ kake po píɛ.

15 Bɔ nɛ Yawɛ fa e tsɔlɔ Mose ɔ, jã kɛ̃ Mose fa Yoshua, nɛ ja pɛpɛɛpɛ Yoshua pee ɔ nɛ. E si we níhi nɛ Yawɛ fa Mose ke a pee ɔ ekoeko nɛ e pee we.

Zugba nɛ Yoshua ngɔ ɔ

16 Yoshua ngɔ zugba a tsuo: yo nɔ kɛ kɔ̃ mi zugba a ngɛ leneyi je kɛ omleyi je tsuo, Goshen zugba a, Yordan kɔ̃ ɔ, kɛ Israel yo ɔmɛ kɛ a he nga kplanaa a.

17 Zugba a fia si kɛ je Halak yo ɔ he ngɛ leneyi je ngɛ Edom kasa nya, kɛ kuɔ kɛ ya si Baalgad ngɛ omleyi je, ngɛ Lebanon kɔ̃ ɔ mi, ngɛ Hermon yo ɔ leneyi je. Yoshua kɛ zugba nɛ ɔ nɔ matsɛmɛ ɔmɛ hwu ta be saii. Nyagbe ɔ, e nuu mɛ nɛ e kpata mɛ tsuo pɛpɛɛpɛ a hɛ mi.

18

19 Gibeon ma mi bi ɔmɛ, nɛ ji Hiv bi ɔmɛ pɛ nɛ a kɛ Israel bi ɔmɛ ba so, nɛ a pee huɛmɛ. Se ma amɛ tsuo pɛpɛɛpɛ nɛ piɛ ɔ lɛɛ Israel bi ɔmɛ kɛ mɛ hwu ta nɛ a ye a nɔ.

20 ⓢ Yawɛ ha a kplii a tsui kaa a kɛ Israel bi ɔmɛ maa hwu ta, bɔ nɛ pee nɛ a gbe mɛ tsuo pɛpɛɛpɛ nɛ a ko na mɛ mɔbɔ. Bɔ nɛ Yawɛ fa Mose ke e pee ji nɛ ɔ nɛ.

21 Jamɛ a be ɔ mi ɔ, Yoshua ya kpata oblaihi a nina komɛ a hɛ mi. A tsɛɛ mɛ ke Anak bi. Nimli nɛ ɔmɛ hii Hebron, Debir, Anab, Yuda, kɛ Israel yo ɔmɛ tsuo a nɔ. Yoshua kpata ni ɔmɛ kɛ a ma amɛ tsuo a hɛ mi pɛsɛpɛsɛ.

22 Anak bi ɔmɛ a ti nɔ kake po píɛ ngɛ Israel bi ɔmɛ a zugba a nɔ; ja Gaza, Gat, kɛ Ashdod pɛ nɛ ni komɛ ngɛ.

23 Yoshua ngɔ zugba mluku ɔ tsuo, kaa bɔ nɛ Yawɛ de Mose ke a pee ɔ pɛpɛɛpɛ. Yoshua dla zugba a ngɔ ha Israel bi ɔmɛ wɛtso nya wɛtso nya kaa a weto ní. Kɛkɛ nɛ ta a se po, nɛ zugba a nɔ jɔ.