Yoshua 10

A ye Amor bi ɔmɛ a nɔ

1 Yerusalem matsɛ, Adonizedek nu kaa Yoshua ngɔ Ai ma a, nɛ e kpata ma a hɛ mi pɛsɛpɛsɛ. E nu kaa Yoshua gbe matsɛ ɔ, kaa bɔ nɛ e pee Yeriko ma a, kɛ matsɛ ɔ. E nu hu kaa Gibeon bi ɔmɛ, kɛ Israel bi ɔmɛ ba pee huɛmɛ, nɛ a kɛ mɛ ngɛ.

2 Yerusalem bi ɔmɛ ye gbeye wawɛɛ, ejakaa ma ngua ji Gibeon. Gibeon ngɛ kaa matsɛ ma; e kle pe Ai, nɛ nyumuhi nɛ ngɛ ma a mi ɔ, katsɛmɛ sɔuu.

3 Lɔ ɔ he ɔ, Yerusalem matsɛ, Adonizedek tsɔ kɛ ya de Hebron matsɛ, Hoham; Yarmut matsɛ, Piram, Lakish matsɛ, Yafia; kɛ Eglon matsɛ, Debir ke,

4 “Nyɛɛ ba nɛ nyɛ ba piɛ ye he, konɛ wa ya kpata Gibeon bi ɔmɛ a hɛ mi; ejakaa a kɛ Yoshua kɛ Israel bi ɔmɛ ya tsɔ huɛ.”

5 Amor matsɛmɛ enuɔ ɔmɛ pee kake kɛ ya sá Gibeon ma a yi, nɛ a tua ma a. Matsɛmɛ nɛ ɔmɛ ji: Yerusalem matsɛ, Hebron matsɛ, Yarmut matsɛ, Lakish matsɛ, kɛ Eglon matsɛ.

6 Gibeon bi ɔmɛ tsɔ kɛ ba Yoshua ngɔ ngɛ ma sito he ɔ ngɛ Gilgal, ba de lɛ ke, “Wa kpa mo pɛɛ, koo ngmɛɛ wa he; ba esɔesɔ nɛ o ba piɛ wa he. Ba kpɔ wɔ! Amor bi ɔmɛ a matsɛmɛ ɔmɛ bua a ta amɛ a nya kɛ je yo ɔmɛ a nɔ ba tua wɔ!”

7 Kɛkɛ nɛ Yoshua kɛ e tabo ɔ tsuo, kɛ e katsɛmɛ ɔmɛ hia kɛ je Gilgal.

8 Yawɛ de Yoshua ke, “Koo ye mɛ gbeye. I ha o ye a nɔ momo. A ti nɔ ko nɔ ko be mo nyɛe.”

9 Yoshua kɛ e tabo ɔ nyɛɛ nyɔnyɔɔnyɔ kɛ je Gilgal kɛ ho Gibeon ya ya tua Amor bi ɔmɛ, be mi nɛ a hɛ be a he nɔ.

10 Yawɛ ha sawale nu Amor bi ɔmɛ benɛ a na Israel ta a. Israel bi ɔmɛ gbe mɛ ngɔ pue si ngɛ Gibeon, nɛ a nyɛɛ a se kɛ fo kɛ ya gu yo kpɛ blɔ ɔ ngɛ Bet Horon, kɛ ya su Azeka kɛ Makeda tɔɔ ngɛ leneyi je.

11 Be mi nɛ Amor bi ɔmɛ ngɛ fo tue ngɛ Israel bi ɔmɛ a ta a nya kɛ gu yo kpɛ blɔ ɔ kɛ yaa a, Yawɛ ha gbiɛ ngo ngu nguahi je hiɔwe ba nɔɔ a nɔ. Nihi nɛ gbiɛ ngo ngu ɔ gbe ɔ hiɛ kulaa pe nihi nɛ Israel bi ɔmɛ kɛ klaate gbe.

12 Jamɛ a ligbi ɔ nɛ́ Yawɛ ha Israel ye Amor bi ɔmɛ a nɔ kunimi ɔ, Yoshua kɛ Yawɛ tu munyu ngɛ Israel bi ɔmɛ a hɛ mi, nɛ e de ke, “Pu, da si ngɛ Gibeon, nɛ mo nyɔhiɔ hu, da si ngɛ Aiyalon kɔ̃ ɔ mi.”

13 ⓡ Kɛkɛ nɛ pu ɔ da si, nɛ nyɔhiɔ ɔ hu mimiɛ we e he kɛ ya su be nɛ Israel ma a ye a he nyɛli ɔmɛ a nɔ. A ngma nɔ́ nɛ ɔ ngɛ Yashar Womi ɔ mi. Pu ɔ da si ngɛ hiɔwe ligbi mluku kake, nɛ e ya nɔɛ si.

14 Nɔ́ nɛ ba nɛ ɔ, kaa Yawɛ bu nɔmlɔ kake kue fami tue, nɛ e ha pu kɛ nyɔhiɔ nyɛ da si nɛ a nyɛɛ we ɔ, eko bɛ hyɛ. Yawɛ hwu ta ha Israel!

15 Enɛ ɔ se ɔ, Yoshua kɛ e tabo ɔ tsuo kpale a se kɛ ba ma sito he ɔ ngɛ Gilgal.

Yoshua nuu Amor matsɛmɛ enuɔ ɔmɛ

16 Matsɛmɛ enuɔ nɛ ɔmɛ ma fo nɛ a ya laa a he ngɛ Makeda tɛ puɔ ɔ mi.

17 Nɔ ko ya na mɛ ngɛ lejɛ ɔ, nɛ e ba bɔ Yoshua he nɛ matsɛmɛ enuɔ ɔmɛ ya laa a he ngɛ ɔ.

18 Yoshua fa ke, “Nyɛ ya kpɛne tɛ agbo komɛ kɛ tsi tɛ puɔ ɔ nya, nɛ nyɛ ha nɛ nihi nɛ bu he;

19 nyɛ nitsɛmɛ lɛɛ nyɛ ko tlɔ lejɛ ɔ. Nyɛɛ nyɛɛ he nyɛli ɔmɛ a se, nɛ nyɛ tua mɛ kɛ je a se je; nyɛ ko ha nɛ a sɛ a ma amɛ a mi; ejakaa Yawɛ, nyɛ Mawu ɔ ngɔ mɛ ngɔ wo nyɛ dɛ mi.”

20 Yoshua kɛ Israel bi ɔmɛ gbe nihi babauu nitsɛ; nihi bɔɔ pɛ nɛ ná blɔ ya sɛ a ma amɛ nɛ a fia gbogbo kɛ wo a he ɔ mi.

21 Pee se ɔ, ma kpekpemi ɔ tsuo kpale kɛ ba Yoshua ngɔ ngɛ ma sito he ɔ ngɛ Makeda; nɔ kake po nɔɛ ngɛ ta a mi. Kɛ je enɛ ɔ se ɔ, nɔ ko nɔ ko hla we munyu ngɛ Israel bi ɔmɛ a he hu.

22 Jehanɛ, Yoshua de ke, “Nyɛ bli tɛ puɔ ɔ nya, nɛ nyɛ je jamɛ a matsɛmɛ enuɔ ɔmɛ kpo kɛ ba ha mi.”

23 Kɛkɛ nɛ a bli tɛ puɔ ɔ nya, nɛ a je matsɛmɛ ɔmɛ kɛ ba ha Yoshua. Mɛ ji: Yerusalem matsɛ, Hebron matsɛ, Yarmut matsɛ, Lakish matsɛ, kɛ Eglon matsɛ.

24 Benɛ a kɛ matsɛmɛ ɔmɛ ba Yoshua ngɔ ɔ, Yoshua kpee Israel ma a tsuo kɛ ba; nɛ e de asafoatsɛmɛ ɔmɛ nɛ a kɛ lɛ ya ta a ke, “Nyɛɛ hɛ nyɛ kɛ ba nɛ nyɛɛ kɛ nyɛ nanehi ba ma matsɛmɛ nɛ ɔmɛ a kuɛhi a nɔ!” Asafoatsɛmɛ ɔmɛ pee ja.

25 Jehanɛ, Yoshua de ma a ke, “Nyɛ ko ye gbeye, nɛ nyɛ ko nu sawale hulɔ. Nyɛ he nɛ wa, nɛ nyɛɛ pee kã; ejakaa kikɛ nɛ ɔ Yawɛ maa pee nyɛ he nyɛli ɔmɛ tsuo!”

26 Lɔ ɔ se ɔ, Yoshua gbe matsɛmɛ enuɔ ɔmɛ, nɛ e ngɔ mɛ ngɔ kpla si ngɛ tsohi a nɔ. A hi tso ɔmɛ a nɔ kɛ ya si gbɔkuɛ nya si.

27 Benɛ pu yaa nɔ si ɔ, Yoshua fa nɛ a ya je mɛ kɛ je tso ɔmɛ a nɔ. A ya hɛɛ mɛ ngɔ pue tɛ puɔ ɔ nɛ a ya laa a he ngɛ mi ɔ kɛ̃ mi. Kɛkɛ nɛ a ngɔ tɛ agboagbohi kɛ tsi tɛ puɔ ɔ nya; nɛ tɛ ɔmɛ ngɛ lejɛ ɔ kɛ ba si mwɔnɛ ɔ.

Yoshua kpɔ Amor bi ɔmɛ a zugba kpahi

28 Yoshua ye Makeda nɔ kunimi jamɛ a ligbi ɔ. E gbe ma a mi bi ɔmɛ, kɛ a matsɛ ɔ; e kpata nɔ tsuaa nɔ hɛ mi, nɛ nɔ kake po píɛ. Bɔ nɛ e pee Yeriko matsɛ ɔ, jã pɛpɛɛpɛ e pee Makeda matsɛ ɔ.

29 Jehanɛ, Yoshua kɛ Israel tabo ɔ tsuo hia kɛ je Makeda kɛ ho Libna ya, nɛ e ya tua Libna.

30 Yawɛ ngɔ ma nɛ ɔ, kɛ matsɛ ɔ ngɔ wo a dɛ nɛ a gbe mɛ tsuo pɛpɛɛpɛ; a kpata nɔ tsuaa nɔ hɛ mi, nɛ nɔ kake po píɛ. Bɔ nɛ Yoshua pee Yeriko matsɛ ɔ, jã pɛpɛɛpɛ nɛ e pee Libna matsɛ ɔ.

31 Enɛ ɔ se ɔ, Yoshua kɛ Israel tabo ɔ je Libna kɛ ho Lakish ya. A ya sá ma a yi, nɛ a tua ma a.

32 Yawɛ ngɔ Lakish ngɔ wo Israel bi ɔmɛ a dɛ, nɛ ligbi enyɔne ɔ nɔ ɔ, a ngɔ ma a. Kaa bɔ nɛ a pee ngɛ Libna a, ja nɔuu a gbe nɔ tsuaa nɔ ngɛ ma a mi, nɛ nɔ kake po píɛ ngɛ Lakish ma a mi.

33 Gezer matsɛ, Horam, kɛ e ta a ba konɛ a ba piɛ Lakish he. Se Yoshua gbe matsɛ ɔ, kɛ e ta a tsuo pɛpɛɛpɛ; nɔ kake po píɛ.

34 Enɛ ɔ se ɔ, Yoshua kɛ Israel tabo ɔ tsuo je Lakish kɛ ho Eglon ya. A ya sá ma a yi, nɛ a tua ma a.

35 A ngɔ ma a jamɛ a ligbi ɔ nɔuu, nɛ a kpata nɔ tsuaa nɔ hɛ mi pɛsɛpɛsɛ kaa bɔ nɛ a pee ngɛ Lakish ɔ.

36 Enɛ ɔ se ɔ, Yoshua kɛ Israel tabo ɔ tsuo je Eglon, nɛ a kuɔ Hebron yo ɔ. A ya tua Hebron,

37 nɛ a ngɔ ma a. A gbe matsɛ ɔ, kɛ ma mi bi ɔmɛ tsuo. Nihi nɛ ngɛ ma amɛ nɛ bɔle Hebron ɔ mi hu, a gbe mɛ tsuo pɛpɛɛpɛ. Yoshua kpata nɔ tsuaa nɔ hɛ mi pɛsɛpɛsɛ, kaa bɔ nɛ e pee ngɛ Eglon ɔ; nɔ kake po píɛ.

38 Jehanɛ, Yoshua kɛ Israel tabo ɔ tsuo kpale a se kɛ ba Debir, nɛ a ba tua ma a.

39 E ngɔ ma a, matsɛ ɔ, kɛ kɔpehi nɛ bɔle ma a. A gbe nɔ tsuaa nɔ, nɛ nɔ kake po píɛ. Bɔ nɛ Yoshua pee Hebron, kɛ Libna, kɛ a matsɛmɛ ɔmɛ ɔ, ja nɔuu e pee Debir, kɛ Debir matsɛ ɔ.

40 Yoshua ye zugba a tsuo nɔ: yo nɔ zugba a, leneyi je zugba a, nga nɔ zugba a, kɛ kɔ̃ mi zugba a, kɛ a matsɛmɛ ɔmɛ tsuo pɛpɛɛpɛ. E kpata nɔ tsuaa nɔ hɛ mi, nɛ nɔ kake po píɛ. Bɔ nɛ Yawɛ, Israel Mawu ɔ fa ke a pee ji nɛ ɔ nɛ.

41 Yoshua ye zugba a tsuo nɔ, kɛ je Kadesh Barnea kɛ ya su Gaza tɔɔ, kɛ Goshen zugba a, kɛ ya su Gibeon tɔɔ.

42 Yoshua ye matsɛmɛ nɛ ɔmɛ kɛ a zugba amɛ tsuo a nɔ ngɛ ta nɛ e gba si kake too ɔ mi; ejakaa Yawɛ, Israel Mawu ɔ hwu ta ha Israel.

43 Enɛ ɔ se ɔ, Yoshua kɛ Israel tabo ɔ tsuo kpale a se kɛ ba ma sito he ɔ ngɛ Gilgal.