Korinto Bi II, 7

1 Siwohi nɛ wa na kɛ je Mawu dɛ mi ji nɛ ɔmɛ nɛ. Lɔ ɔ he ɔ, ye nyɛmimɛ nyɛ ha wa je níhi tsuo nɛ woɔ wa nɔmlɔ tso, kɛ mumi he mu kɛ ya se, konɛ wa he nɛ tsɔ kulaa kɛ hi si ngɛ Mawu gbeye yemi nya.

Paulo na bua jɔmi

2 Nyɛ je nyɛ suɔmi kpo kɛ tsɔɔ wɔ! Wa pee we nɔ ko yayami; wa kpataa we nɔ ko nane, nɛ wa sisi we nɔ ko hulɔ.

3 I de we enɛ ɔ nɛ ma kɛ bu nyɛ fɔ. Se kaa bɔ nɛ i de nyɛ momo ɔ, suɔmi nɛ wa ngɛ kɛ ha nyɛ ɔ nya wa bɔ nɛ nɔ́ ko nɔ́ ko be nyɛe ma gba waa kɛ nyɛ wa kpɛti, gbenɔ jio, wami nɛ ɔ mi jio.

4 I fĩaa ngɔ fɔɔ nyɛ nɔ, ejakaa i ngɛ hemi kɛ yemi babauu ngɛ nyɛ mi. Ngɛ wa haomi ɔmɛ tsuo a mi ɔ, ye nine mi ji wu; ye bua jɔmi mohu lɛ hiɛ kɛ be nɔ.

5 ⓢ Benɛ wa ba su Makedonia tete po wa nɔmlɔ tso ɔ na we he jɔmi kulaa; he tsuaa he ɔ, haomi sɔuu. Be mi nɛ ni kpahi kɛ wɔ ngɛ pɛ nɔ daa nɛ ɔ, wɔ nitsɛmɛ hu gbeye sɔuu wa ngɛ yee.

6 Se benɛ Tito ba a, Mawu, nɔ nɛ woɔ nihi nɛ a nine mi jɔ̃ he wami ɔ ha nɛ wa nɔ gbagba te.

7 Pi e bami ɔ kɛkɛ nɛ ha nɛ wa nɔ gbagba te ɔ, se amaniɛ nɛ e ba bɔ wɔ nɛ tsɔɔ bɔ nɛ nyɛ hu nyɛ wo lɛ he wami ngɛ lejɛ ɔ piɛ he. E bɔ wɔ bɔ nɛ nyɛ suɔ kaa nyɛ maa na mi ekohu, bɔ nɛ nyɛ hao ngɛ nɔ́ nɛ ba a he, kɛ bɔ nɛ nyɛ pee klaalo nɛ nyɛ ma fa ye he. Enɛ ɔ ha nɛ i na bua jɔmi kulaa pe kekle ɔ.

8 Jamɛ a womi ɔ nɛ i ngma nyɛ ɔ ha nɛ nyɛ hao mohu lɛɛ, se i pia we ye he kaa i ngma. I pia ye he kaa womi ɔ ha nɛ nyɛ hao, pohu be kpiti ko kɛkɛ.

9 Se amlɔ nɛ ɔ lɛɛ ye bua jɔ ye he kaa i ngma womi ɔ. Ye bua jɔɛ ye he kaa i ha nɛ nyɛ hao, se mohu ye bua jɔ kaa lɔ ɔ ha nɛ nyɛ tsake nyɛ blɔhi. Ejakaa e hao nyɛ bɔ nɛ sa Mawu hɛ mi. Lɔ ɔ he ɔ, wɔɔ lɛɛ wa pee we nyɛ nɔ́ ko yeyee.

10 Ejakaa ke o hao bɔ nɛ sa Mawu hɛ mi ɔ, e haa o tsakeɔ o tsui, nɛ a heɔ o yi wami. Enɛ ɔ lɛɛ he piami ko be mi! Se ke o hao ngɛ níhi nɛ sa je ɔ hɛ mi he ɔ, gbenɔ lɛ jeɔ mi.

11 Nɛ́ e pee nyɛ kaa nyɛ hao ɔ, nyɛɛ hyɛ nɔ́ nɛ je mi kɛ ba! Nyɛ nɔ gbagba te, nɛ nyɛ suɔ kaa nyɛ maa tsɔɔ kaa nyɛ pee we yayami ko. Nɔ́ nɛ ba a dɔ nyɛ, nɛ nyɛ ye gbeye kaa nɔ́ ko pa ngɛ se kɛ ma. E pee nyɛ kaa nyɛɛ na mi, konɛ nyɛ fa ye he, nɛ nyɛɛ gbla yayami peelɔ ɔ tue. Ngɛ blɔ tsuaa blɔ nɔ ɔ, nyɛ tsɔɔ kaa sane nɛ ba a, nyɛ li he nɔ́ ko.

12 Lɔ ɔ he ɔ, womi ɔ nɛ i ngma nyɛ ɔ, tsa pi nɔ ɔ, aloo nɔ nɛ a tɔ̃ e nɔ ɔ he titli nɛ e kɔɔ. I ngma womi ɔ konɛ dengme nɛ nyɛ ngɛ gboe ngɛ wa he ɔ nɛ je kpo paa ha nyɛ ngɛ Mawu hɛ mi.

13 Enɛ ɔ lɛ ha nɛ wa nɔ gbagba te ɔ nɛ. Wa nɔ gbagba te niinɛ. Se bua jɔmi nɛ Tito na a ha nɛ wɔ nitsɛmɛ hu wa bua jɔ kɛ be nɔ. Ejakaa e bɔ wɔ bɔ nɛ nyɛ ha nɛ e tsui nɔ e mi ha.

14 I je nyɛ yi ha Tito, nɛ nyɛ gbi mi zo. Wa tuɔ nyɛ anɔkuale daa. Jã kɛ̃ ɔ, fiami nɛ wa fĩa fɔ nyɛ nɔ ngɔ tsɔɔ Tito ɔ hu ya pee we lakpa.

15 Tito kaiɔ bɔ nɛ nyɛɛ kɛ he si bami, kɛ bu he lɛ atuu, kɛ bɔ nɛ nyɛ tsuo nyɛ pee klaalo nɛ ke e de nyɛ nɔ́ ko nɛ nyɛ peeɔ ɔ. Enɛ ɔ he ɔ, e na suɔmi babauu kɛ ha nyɛ pe kekle ɔ po.

16 Ye bua jɔ kaa ma nyɛ ma ngɔ ye hɛ kɛ fɔ nyɛ nɔ kulaa ngɛ nɔ́ tsuaa nɔ́ mi.