Korinto Bi II, 8

Kristo we bi a nɔ́ hami

1 ⓣ Nyɛmimɛ! Wa ngɛ hlae nɛ nyɛɛ le nɔ́ nɛ Mawu dloomi ɔ tsu ngɛ asafo ɔmɛ a mi ngɛ Makedonia.

2 Wa nyɛmimɛ ɔmɛ nɛ ngɛ Makedonia nɛ heɔ Kristo yeɔ ɔ ba na amanehlu wawɛɛ; se be tsuaa be ɔ, a bua jɔ. Jehanɛ hu, nɔ́ ko be a dɛ, se kɛ̃ ɔ, a ha nɔ́ faa kɛ je a tsui mi.

3 I ngɛ odase yee kaa a ha bɔ nɛ a ma nyɛ kɛ je a tsui mi faa; ee, a ha pe bɔ nɛ a ma nyɛ po.

4 A kɛ hɛdɔ babauu kpa wɔ pɛɛ ke wa ha nɛ mɛ hu a pee a blɔ nya kɛ ye bua ni klɔuklɔu ɔmɛ ngɛ sɔmɔmi ní tsumi nɛ ɔ mi.

5 Nɔ́ nɛ nyɛɛ se ɔ, wa hɛ be nɔ kulaa! Kekleekle ɔ, a ngɔ a he ngɔ ha kaa a ma sɔmɔ Nyɔmtsɛ Yesu ngɛ blɔ tsuaa blɔ nɔ. Jehanɛ hu, a wo wɔ si ke a maa bu wɔ tue kaa bɔ nɛ Mawu hlaa nɛ a pee ɔ.

6 Lɔ ɔ he ɔ, wa kpa Tito pɛɛ kaa tsui mi faa ní tsumi nɛ ɔ nɛ e je sisi momo ngɛ nyɛ kpɛti ɔ, e tsa nɔ kɛ yaa si e maa gbe nya.

7 Nyɛ ngɛ ni kpa amɛ a hɛ mi kulaa ngɛ nɔ́ tsuaa nɔ́ mi, hemi kɛ yemi ngɛ Kristo mi, munyu tumi, anɔkuale ɔ lemi, hɛdɔ kɛ ha sɔmɔmi, kɛ suɔmi nɛ nyɛ ngɛ kɛ ha wɔ. Lɔ ɔ he ɔ, kikɛmɛ a ní tsumi nɛ nyɛ ngɛ tsue kɛ je nyɛ tsui mi ɔ hu, nyɛɛ hyɛ konɛ nyɛɛ be ni kpa amɛ a he jã nɔuu.

8 Pi mlaa nɛ i ngɛ nyɛ woe. Dɛbi! Hɛdɔ nɛ Makedonia asafo ɔmɛ kɛ tsu ní ɔ nɛ i kɛ ngɛ nyɛ suɔmi ɔ he toe kaa e je tsui klɔuu mi lo.

9 Nyɛ le suɔmi agbo nɛ wa Nyɔmtsɛ Yesu Kristo ngɛ kɛ ha wɔ. Niatsɛ mi niatsɛ ji lɛ. Se nyɛ he ɔ, e pee e he ohiatsɛ, konɛ nyɛɛ lɛɛ nyɛɛ pee niatsɛmɛ.

10 Ga nɛ i ngɛ nyɛ woe kɛkɛ ji kaa tsumi nɛ ɔ sa nyɛ. Ejakaa nyɛ juɛmi a kɛ to he ga, nɛ nyɛ ji kekleekle nihi nɛ bɔni tsumi jeha ji nɛ.

11 Lɔ ɔ he ɔ, nyɛɛ bɔ mɔde nɛ nyɛɛ gbe tsumi ɔ nya. Hɛdɔ nɛ nyɛɛ kɛ to he ga a, nyɛɛ kɛ jamɛ a hɛdɔ ɔ nɔuu nɛ gbe nya. Nyɛ ha bɔ nɛ nyɛ ma nyɛ!

12 Ke o ha bɔ nɛ o ma nyɛ kɛ o tsui faa a, Mawu ma ná o nike ní ɔ he bua jɔmi. Mawu hyɛ we blɔ kaa o ha nɔ́ ko be mi nɛ nɔ́ ko be o dɛ.

13 I tsɔɔ we kaa ni komɛ nɛ a na gbɔjɔ, nɛ nyɛɛ lɛɛ nyɛɛ na nɔ́. Amlɔ nɛ ɔ, nyɛ he hi saii, nɛ e hia kaa nyɛɛ ye bua ni nɛmɛ nɛ e fi mɛ ɔ. Hwɔɔ se ke nyɛ yi ba fi, nɛ mɛɛ níhi a mi ba hi ha mɛ ɔ, mɛ hu a maa ye bua nyɛ jã nɔuu; kɛkɛ lɛ tsuo pee pɛ.

14

15 ⓤ Kaa bɔ nɛ ngmami ɔ deɔ ɔ, “Nɔ nɛ bua fuu nya a, pi kaa e ná nɛ e hiɛ tsɔ kɛ be nɔ. Nɔ nɛ bua bɔbɔyoo pɛ nya a hu, pi kaa e na we nɛ e hiɛ; mɛ tsuo a na bɔ nɛ sa.”

Tito kɛ e huɛmɛ ɔmɛ piɛ Korinto bi ɔmɛ a he kɛ bua sika nya

16 Wa naa Mawu si kaa e ha Tito suɔmi kɛ gɛjɛmi nɛ e kɛ maa ye bua nyɛ kaa bɔ nɛ i ngɛ pee ɔ.

17 Nɛ́ i de lɛ ke e ba slaa nyɛ ɔ, e kplɛɛ. Niinɛ, e pee e yi mi momo kaa e maa ba; ejakaa e hɛ ngɛ jae ngɛ nyɛ he, nɛ e suɔ kaa e maa na nyɛ ekohu.

18 Nyɛmi nɛ wa tsɔ piɛ e he ɔ, a buu lɛ saminya ngɛ asafo ɔmɛ tsuo a mi kaa nɔ ko nɛ bɔɔ sane kpakpa a fiɛmi he mɔde.

19 Pi kaa nyɛmi nɛ ɔ hé biɛ kɛkɛ, se asafo ɔmɛ je blɔ hla lɛ nɛ e kɛ wɔ nɛ nyɛɛ. Suɔmi ní tsumi ɔ nɛ wa ngɛ tsue kɛ ngɛ nɔ́ ko nya buae ɔ, e maa piɛ wa he kɛ tsu. Enɛ ɔ maa wo Nyɔmtsɛ ɔ hɛ mi nyami, nɛ e maa tsɔɔ wa mɔde bɔmi hulɔ.

20 Wa ngɛ mɔde bɔe nɛ wa ko pee nɔ́ ko nɛ ma ha nihi maa tu munyu yaya ngɛ nike ní nguaa nɛ ɔ nɔ hyɛmi he.

21 ⓥ Wa yi mi tomi ji kaa waa pee nɔ́ nɛ da, pi ngɛ Nyɔmtsɛ Mawu hɛ mi kɛkɛ, se ngɛ ni kpahi a hɛ mi hulɔ.

22 Lɔ ɔ he ɔ, wa tsɔ wa nyɛmi ɔ hu kɛ piɛ a he. Wa ka lɛ si abɔ ngɛ níhi fuu a mi, nɛ wa na kaa e bɔɔ mɔde saminya. Amlɔ nɛ ɔ, e ngɔ e hɛ ngɔ fɔ nyɛ nɔ wawɛɛ, nɛ e hɛ dɔ wawɛɛ pe daa.

23 Tito ɔ, ye he piɛlɔ ji lɛ, nɛ i kɛ lɛ tsuo nɛ ngɛ ní tsue konɛ e hi ha nyɛ. Nyɛmimɛ enyɔ kpa amɛ nɛ piɛ e he ɔ lɛɛ asafo ɔmɛ a tsɔli ji mɛ, nɛ a ní tsumi woɔ Kristo hɛ mi nyami.

24 Nyɛɛ tsɔɔ nimli nɛ ɔmɛ ngɛ asafo ɔmɛ a hɛ mi kaa nyɛ suɔ mɛ. Kɛkɛ ɔ, enɛ ɔ maa ye odase kaa fiami nɛ wa fĩa fɔ nyɛ nɔ ɔ pee we yaka.