Korinto Bi II, 6

1 Akɛnɛ waa kɛ Mawu ngɛ ní tsue ɔ, wa kpa nyɛ pɛɛ, dloomi nɛ nyɛ na kɛ je Mawu dɛ mi ɔ, nyɛ ko ha nɛ e pee yaka.

2 ⓝ Mawu ke, “Be nɛ sa mi ɔ, i bu mo tue; Nɛ yi wami hemi ligbi nɔ i ye bua mo ngɛ.” Hyɛ, be nɛ sa saminya ji nɛ ɔ nɛ; hyɛ mwɔnɛ ɔ ji yi wami hemi ligbi ɔ nɛ.

3 Wa bɔɔ mɔde kaa wa ko ngɔ nɔ́ ko kɛ tsi nɔ ko blɔ, bɔ nɛ pee nɛ a ko gbe sɔmɔmi ní tsumi nɛ wa hɛɛ mi ɔ he guɛ.

4 Se mohu ngɛ nɔ́ tsuaa nɔ́ mi ɔ, wa bɔɔ mɔde kaa wa maa tsɔɔ kaa Mawu tsɔli ji wɔ niinɛ. Wa toɔ wa tsui si ngɛ haomi, kɛ fimi, kɛ he hiami mi.

5 ⓞ A fia wɔ ní; a wo wɔ tsu, nɛ nihi pee basabasa kɛ wo wɔ; wa gbo dengme kɛ tsu ní; wa hwɔ we mahe be komɛ, nɛ be komɛ hu hwɔ yee wɔ.

6 Waa kɛ subai kpakpa, nile nɛ mi kuɔ, tsui si tomi, mi mi himi, klɔuklɔu peemi ngɛ mumi mi, anɔkuale suɔmi,

7 anɔkuale munyu tumi, kɛ Mawu he wami nɛ ngɛ ní tsue ngɛ wa mi ɔ tsɔɔ kaa Mawu tsɔli ji wɔ. Wa peeɔ nɔ́ nɛ da, nɛ lɔ ɔ ji wa ta hwumi ní nɛ waa hɛɛ hiɔ kɛ muɔ nɛ wa kɛ faa wa he.

8 Ni komɛ woɔ wa hɛ mi nyami, se ni komɛ gbeɔ wa he guɛ; ni komɛ jɛɔ wɔ, se ni komɛ hu jeɔ wa yi. A tsɛɔ wɔ nɔ sisili, se anɔkuale wa tuɔ.

9 Wa ngɛ kaa nihi nɛ a li mɛ, se kɛ̃ ɔ, nɔ tsuaa nɔ le wɔ; wa ngɛ kaa nihi nɛ gbo, se kaa bɔ nɛ nyɛ ngɛ hyɛe ɔ, wa hɛ ngɛ. A gblaa wa tue, se wa gbo we.

10 A naa wɔ kaa kɔmɔ yeli, se daa nɛ ɔ, wa bua jɔ; wa ngɛ kaa ohiatsɛmɛ, se wa haa nɛ nihi babauu peeɔ niatsɛmɛ; wa ngɛ kaa dɛgutsɛmɛ, se wa ngɛ nɔ́ tsuaa nɔ́.

11 Wa nyɛmimɛ Korinto bi! Waa kɛ nyɛ ngɛ munyu tue kɛ je wa tsui mi faa.

12 Wɔɔ lɛɛ wa je wa suɔmi kpo ha nyɛ; nyɛ lɛ nyɛ gbo we wa nɔ.

13 Jehanɛ lɛɛ, i kɛ nyɛ maa tu munyu kaa bɔ nɛ i kɛ imi nitsɛ ye bimɛ maa tu munyu ɔ. Nyɛ hu nyɛ bli nyɛ tsui nya gbajaa ha wɔ.

Nihi nɛ li Kristo ɔ, nyɛɛ kɛ mɛ ko bɔ

14 Nyɛɛ kɛ ni nɛmɛ nɛ he we yi ɔ kó bɔ. Dami sane yemi kɛ mlaa tɔmi ɔ, mɛni kake peemi ngɛ a kpɛti? Aloo mɛni bɔmi lɛ ngɛ la kɛ diblii a kpɛti?

15 Kɛ Kristo kɛ Abosiami maa ye kɛɛ? Nɔ nɛ heɔ yeɔ, mɛni mi e kɛ nɔ nɛ he we yi ɔ ngɛ?

16 ⓟ Mɛni kake peemi ngɛ Mawu sɔlemi we ɔ kɛ amagahi a kpɛti? Ejakaa wɔɔ lɛɛ Mawu hɛ kalɔ ɔ sɔlemi we ji wɔ! Mawu de ke, “I kɛ ye ma a maa hi si; ma pee a Mawu, nɛ mɛ hu a maa pee ye ma.”

17 ⓠ Lɔ ɔ he ɔ, Nyɔmtsɛ ɔ ke, “Nyɛɛ je a kpɛti, nɛ nyɛ tsɔ nyɛ he kɛ je a he. Nyɛ ko ta nɔ́ ko nɛ he tsɔ we he; nɛ ma he nyɛ atuu.

18 ⓡ Ma pee nyɛ tsɛ, nɛ nyɛ maa pee ye binyumuhi kɛ ye biyihi. Imi, Nyɔmtsɛ Ope ɔ, lɛ i de.”