Korinto Bi I, 14

Mumi mi dloomi nike ní kpahi

1 Lɔ ɔ he ɔ, nyɛɛ bɔ suɔmi he mɔde pe nɔ́ tsuaa nɔ́. Nyɛɛ di mumi mi nike níhi a se, titli ɔ, Mawu sɛ gbi ɔ fiɛmi.

2 Nɔ nɛ tuɔ gbi slɔɔtohi ɔ, pi adesa nɛ e kɛ ngɛ munyu tue, se Mawu, ejakaa nɔ ko nɔ ko nui sisi. Mumi ɔ he wami nɛ e kɛ ngɛ laami munyu ɔmɛ tue ɔ nɛ.

3 Se nɔ nɛ ngɛ Mawu sɛ gbi ɔ fiɛe ɔ lɛɛ nimli nɛ e kɛ ngɛ munyu tue; e piɛɔ a he, e woɔ mɛ he wami, nɛ e haa mɛ bua jɔmi.

4 Ke nɔ ko ngɛ gbi slɔɔtohi tue ɔ, lɛ nitsɛ e he mɔde nɛ e ngɛ bɔe, konɛ e wa ngɛ mumi mi. Se nɔ nɛ fiɛɔ Mawu sɛ gbi ɔ lɛɛ asafo ɔ tsuo nɔ yami he mɔde e ngɛ bɔe.

5 I ná nɛ nyɛ tsuo nyɛ tuɔ gbi slɔɔtohi, se nɔ́ nɛ i ko suɔ pe kulaa mohu ji kaa nyɛɛ fiɛ Mawu sɛ gbi ɔ. Nɔ nɛ fiɛɔ Mawu sɛ gbi ɔ, e he ngɛ se nami pe nɔ nɛ tuɔ gbi slɔɔtohi; lɛɛ ja nɔ ko ngɛ lejɛ ɔ, nɛ ma nyɛ tsɔɔ nɔ́ nɛ a ngɛ dee ɔ sisi, konɛ asafo ɔ tsuo nɛ na he se.

6 Lɔ ɔ he ɔ, ye nyɛmimɛ, ke i ba nyɛ ngɔ nɛ i ba ngɛ gbi slɔɔtohi tue ɔ, nyɛ ma na he se ko lo? Dɛbi! Ja i ngɔ nɔ́ ko nɛ Mawu je tsɔɔ mi ba ha nyɛ; ja i ngɔ nile, loo sɛ gbi pɔtɛɛ, loo tsɔɔmi ko ba ha nyɛ.

7 Ní komɛ kaa bɛ, aloo saku nɛ wami be a mi po ke a ngɛ pɛe ɔ, ja e mi tsɔ loko nɔ ko nɛ ngɛ tue bue ɔ maa le la a mi tso.

8 Nɛ ke titimati kpalɔ ɔ bɛ ɔ mi tsɔ we ɔ, mɛnɔ maa mia kɛ ha ta?

9 Jã nɔuu kɛ̃ nyɛ hu ke nyɛ ha sɛ gbi ngɛ gbihi nɛ a nui mi ɔ, kɛ nɔ ko maa pee kɛ nu sisi kɛɛ? Ke nyɛ pee jã a, lɛɛ kɔɔhiɔ nyɛɛ kɛ ngɛ munyu tue.

10 Gbi slɔɔtohi fuu ngɛ je ɔ mi mohu, se eko tsuaa eko ngɛ sisi numi.

11 Se ke nɔ ko ngɛ gbi tue nɛ i nui sisi ɔ, ma plɛ nubwɔ ngɛ e hɛ mi, nɛ lɛ hu e ma plɛ nubwɔ ngɛ ye hɛ mi.

12 Akɛnɛ nyɛ nitsɛmɛ hu ja nɔuu kɛ̃ nyɛ hɛ dɔɔ ngɛ mumi mi níhi a he ɔ, nyɛɛ bɔ ní nɛmɛ nɛ ma ha asafo ɔ maa ya nɔ ɔ a he mɔde wawɛ.

13 Lɔ ɔ he ɔ, nɔ nɛ tuɔ gbi slɔɔtohi ɔ, é sɔle, nɛ a ha lɛ he wami nɛ e kɛ tsɔɔ nɔ́ nɛ e ngɛ dee ɔ sisi.

14 Ejakaa ke i ngɛ sɔlee ngɛ gbi slɔɔtohi a mi ɔ, ye mumi ɔ ngɛ sɔlee mohu, se imi nitsɛ lɛɛ i li nɔ́ nɛ i ngɛ dee ɔ.

15 Ke kikɛ nɛ ɔ ji sane ɔ, lɛɛ kɛ ma pee kɛɛ? I kɛ mumi maa sɔle, se i kɛ juɛmi hu maa sɔle; i kɛ mumi ma la, se i kɛ juɛmi hu ma la.

16 Ke o ngɛ Mawu si nae ngɛ mumi mi kɛkɛ ɔ, nɔ ko nɛ hii si ngɛ lejɛ ɔ, nɛ lɛɛ e li mi eko ɔ, kɛ e maa pee kɛɛ nɛ e ma de “Amen” ngɔ si o sina sɔlemi ɔ nɔ? Blɔ ko blɔ ko be nɛ e kɛ maa le nɔ́ nɛ o ngɛ dee ɔ.

17 Moo o ngɛ Mawu si nae saminya mohu, se nɔ kpa a lɛɛ o ha we nɛ e na he se ko kulaa.

18 I naa Mawu si kaa i pe nyɛ tsuo ngɛ gbi slɔɔtohi a tumi mi.

19 Se kɛ̃ ɔ, ke asafo ɔ ba bua a, imi lɛɛ i ko suɔ nɛ ma tu munyungu kakaaka enuɔ nɛ sisi numi ngɛ he nɛ ma kɛ tsɔɔ ní pe kaa ma tu munyungu akpeakpe ngɛ gbi slɔɔtohi a mi.

20 Ye nyɛmimɛ, nyɛ ko susu nyɛ yi mi kaa jokuɛwi. Yayami peemi blɔ fa mi ɔ lɛɛ nyɛɛ pee nyɛ ní kaa jokuɛwi, se nyɛ susu nyɛ yi mi kaa nihi nɛ wa ngɛ mumi mi.

21 ⓒ A ngma ngɛ Mose mlaa a mi ke, “Ma gu nihi nɛ tuɔ gbi slɔɔtohi a nɔ, Nɛ ma tu munyu kɛ tsɔɔ ye ma a; Nyɔmtsɛ ɔ lɛ de. Ma tu munyu kɛ gu nibwɔhi a nɔ, se kɛ̃ ye ma a be mi tue bue.”

22 Lɔ ɔ he ɔ, gbi slɔɔtohi a tumi ji okadi kɛ ha nihi nɛ he we yi, pi ni nɛmɛ nɛ heɔ yeɔ. Sane kpakpa a fiɛmi lɛɛ nihi nɛ heɔ yeɔ ɔ a we okadi ji lɔ ɔ nɛ, pi ni nɛmɛ nɛ he we yi.

23 Lɔ ɔ he ɔ, ke asafo ɔ tsuo nya ba bua, nɛ nɔ tsuaa nɔ bɔni gbi slɔɔtohi tumi, nɛ ni komɛ nɛ mɛɛ a li mi eko, aloo a he we yi ba lejɛ ɔ, anɛ a be dee ke nyɛ tsuo nyɛ ngɛ godo nue lo?

24 Se ke nɔ tsuaa nɔ ngɛ Mawu sɛ gbi ɔ fiɛe, nɛ nɔ ko nɛ lɛɛ e he we yi, aloo e li mi eko ba lejɛ ɔ, níhi nɛ a ngɛ dee ɔ ma ha nɛ e maa na e he yayami. Níhi nɛ e nu ɔ tsuo maa kojo lɛ.

25 E tsui mi laami sanehi tsuo maa je kpo paa; e ma kpla si ma ja Mawu, nɛ e maa jaje ke, “Niinɛ, Mawu kɛ nyɛ ngɛ!”

Blɔ nya tomi ngɛ asafo ɔ mi

26 Ye nyɛmimɛ, nɔ́ nɛ i ngɛ tsɔɔe ɔ ji, ke nyɛ nya ba bua kɛ ha Mawu jami ɔ, nyɛ ti nɔ kake nɛ je la, nɔ ko nɛ tsɔɔ ní, nɛ nɔ ko hu nɛ ha sɛ gbi nɛ je Mawu ngɔ. Nɔ kpa nɛ tu gbi slɔɔtohi, konɛ nɔ kpa ko hu nɛ tsɔɔ sisi. Nyɛɛ pee níhi tsuo ngɛ a blɔ nɔ kɛ ha asafo ɔ nɔ yami.

27 Ke a ngɛ gbi slɔɔtohi tue ɔ, nɔ kake nɛ tu nɛ e gbe nya loko nɔ kpa hu nɛ ba. Ke munyu tuli ɔmɛ a he hiɛ hluu ɔ, e pee ni etɛ pɛ, konɛ nɔ ko nɛ je nɔ́ nɛ a ngɛ dee ɔ sisi.

28 Se ke nɔ ko be lejɛ ɔ nɛ maa tsɔɔ sisi ɔ, lɛɛ nɔ nɛ ngɛ gbi slɔɔtohi tue ɔ nɛ pee dii; e tu munyu ha lɛ nɔ kake e he, kɛ Mawu.

29 Ni enyɔ, loo etɛ nɛ ná Mawu sɛ gbi ɔ nɛ a tu munyu, konɛ ni nɛmɛ nɛ piɛ ɔ nɛ a susu he.

30 Se ke nɔ ko hii si ngɛ lejɛ ɔ nɛ Mawu je nɔ́ ko tsɔɔ lɛ ɔ, nɔ nɛ ngɛ munyu tue ɔ nɛ kpa.

31 Nyɛ tsuo nyɛ ma nyɛ maa fiɛ Mawu sɛ gbi ɔ kakaaka, konɛ nɔ tsuaa nɔ nɛ kase ní, nɛ e ya nɔ.

32 Nɔ nɛ a dloo lɛ Mawu sɛ gbi ɔ fiɛmi ɔ, e hia kaa e hyɛ e munyu tumi saminya, nɛ e le he nɛ sa kaa e tu munyu kɛ ya si.

33 Mawu sume basabasa, se mohu tue mi jɔmi e suɔ. Bɔ nɛ níhi ngɛ ngɛ Mawu we asafo ɔmɛ tsuo a mi ji nɛ ɔ nɛ.

34 Ke nyɛ kpe nɛ nyɛ ngɛ Mawu jae ɔ, yi ɔmɛ nɛ a pee dii. A ngmɛ́ mɛ blɔ nɛ a tu munyu, mohu a ba a he si kaa bɔ nɛ Mose mlaa a hu tsɔɔ ɔ.

35 Ke nɔ́ ko ngɛ nɛ a ngɛ hlae nɛ a le ɔ, a bi a hunomɛ ngɛ we mi. Ke asafo ɔ ba bua nɛ a ngɛ Mawu jae ɔ, e ji zo kaa yo maa tu munyu.

36 Mawu munyu ɔ, nyɛ ngɔ nɛ e puɛ kɛ je? Aloo nyɛ kɛkɛ nyɛ ngɔ nɛ e ba su?

37 Ke e peeɔ nɔ ko kaa gbalɔ ji lɛ, aloo kaa e ngɛ mumi mi nike ní ko ɔ, e na nɛ e le kaa níhi nɛ i ngɛ nyɛ ngmae nɛ ɔ, Nyɔmtsɛ ɔ biɛ mi i ngɛ ngmae ngɛ.

38 Ke nɔ ko bui enɛ ɔ, nyɛ hu nyɛ ko pee nɔ ɔ he akɔtaa.

39 Lɔ ɔ he ɔ, ye nyɛmimɛ, nyɛ hɛ nɛ dɔ ngɛ Mawu sɛ gbi ɔ fiɛmi he, se kɛ̃ ɔ, nyɛ ko tsi gbi slɔɔtohi a tumi nya.

40 Á pee nɔ́ tsuaa nɔ́ bɔ nɛ sa ngɛ blɔ nya tomi nya.