Korinto Bi I, 13

Suɔmi

1 Ke i nyɛɔ nɛ i tuɔ adesahi a gbihi, loo hiɔwe bɔfohi po a gbihi, se i be suɔmi ɔ, lɛɛ i ngɛ kaa gɔ̃gɔ̃, loo ngmlɛ nɛ ngɛ pɛe gegeege kɛkɛ.

2 ⓑ Ke a dloo mi he wami nɛ a kɛ fiɛɔ Mawu sɛ gbi ɔ, ke i le nɔ́ tsuaa nɔ́, nɛ i nuɔ laami sanehi tsuo a sisi, ke i ngɛ hemi kɛ yemi nɛ nya wa ngɛ Mawu mi, nɛ ma nyɛ ma hia yohi, se i be suɔmi ɔ, ye he be se nami ko kulaa.

3 Ke i ngɔ ye níhi tsuo ngɔ ke, nɛ i ngɔ ye nɔmlɔ tso tete ngɔ ha nɛ a sã mi, se i be suɔmi ɔ, i na we he se ko kulaa.

4 Suɔmi toɔ e tsui si, nɛ e mi mi hi. Suɔmi hɛ kɔɛ; e fĩɛ, nɛ e pee we pupuupu.

5 Suɔmi pee we níhi nɛ sɛ́; e fo we lɛ nɔ kake too e nɔ́ mi; e mi mi wui la, nɛ e kɛ nɔ ko tɔmi wui e mi.

6 Suɔmi nya we nɔ́ yayami he; anɔkuale mohu he nɛ e nyaa.

7 Suɔmi haa nɔ toɔ tsui si ngɛ nɔ́ tsuaa nɔ́ mi. E haa nɔ heɔ nɔ tsuaa nɔ́ yeɔ; e ngɔɔ e hɛ ngɔ fɔɔ Mawu nɔ, nɛ e miaa e hɛ mi ngɛ níhi tsuo mi.

8 Suɔmi se pui gblegbleegble. Se mumi mi nike níhi kaa Mawu munyu ɔ fiɛmi, kɛ gbi slɔɔtohi tumi, kɛ nile lɛɛ a se maa po ligbi ko.

9 Ejakaa ní nɛ wa le ɔ, wa li kɛ pi si; fiɛmi nɛ wa fiɛɔ hu, fa kɛ fa kɛkɛ.

10 Se ke nɔ́ nɛ hi kɛ pi si ɔ ba a, lɔ ɔ lɛɛ nɔ́ nɛ ji fa kɛ fa a maa laa.

11 Benɛ i ji jokuɛyo ɔ, i tuɔ munyu kaa jokuɛyo, i juɛɔ kaa jokuɛyo, nɛ i susuɔ kaa jokuɛyo. Se benɛ i ba wa a, i kpa jokuɛwi a ní peemi.

12 Amlɔ nɛ ɔ lɛɛ wa ngɛ kaa ni komɛ nɛ ngɛ nɔ́ hyɛe tsuu kɛkɛ ngɛ ahuhuɛ mi. Se hwɔɔ se ɔ, wa maa na nɔ́ tsuaa nɔ́ paa. Piɔ lɛɛ ní nɛ i le ɔ, fa kɛ fa kɛkɛ. Se jamɛ a be ɔ lɛɛ ma le ní kɛ pi si kaa bɔ nɛ Mawu le mi kɛ pi si ɔ.

13 Amlɔ nɛ ɔ, ní etɛ nɛ ɔmɛ nɛ ngɛ: hemi kɛ yemi, hɛ kɛ nɔ fɔmi, kɛ suɔmi. Se nɔ́ nɛ pe mɛ tsuo ji suɔmi.