Korinto Bi I, 15

Kristo si temi

1 Ye nyɛmimɛ, jehanɛ lɛɛ i suɔ kaa ma kai nyɛ sane kpakpa a nɛ i fiɛ ngɔ tsɔɔ nyɛ, nɛ nyɛ pɛtɛ he, nɛ lɔ ɔ nɔ nyɛ hemi kɛ yemi daa si ngɛ ɔ.

2 Ke nyɛ pɛtɛ sane kpakpa a he wawɛɛ kaa bɔ nɛ i fiɛ tsɔɔ nyɛ ɔ, a ma he nyɛ yi wami. Ke pi jã lɛɛ nyɛ he ye yaka gu.

3 ⓓ Sɛ gbi nɛ he hia pe kulaa nɛ imi hu i na a, i ngɔ ba ha nyɛ. Lɔ ɔ ji kaa Kristo gbo ngɛ wa he yayami ɔmɛ a he kaa bɔ nɛ ngmami ɔmɛ tsɔɔ ɔ.

4 ⓔ Ngmami ɔmɛ ke a pu lɛ, nɛ ligbi nɛ ji ligbi etɛ ɔ, a tle lɛ si kɛ ba wami mi ekohu.

5 ⓕ E jé e he kpo ngɔ tsɔɔ Petro; nɛ pee se ɔ, e jé e he kpo ngɔ tsɔɔ ni nyɔngma kɛ enyɔ ɔmɛ.

6 Jehanɛ, e jé e he kpo ngɔ tsɔɔ e se nyɛɛli maa pee lafa enuɔ kɛ se si kake. Nimli nɛ ɔmɛ a ti ni babauu ngɛ kɛ ba si mwɔnɛ ɔ, se ni komɛ hu gbo.

7 Lɔ ɔ se ɔ, e jé e he kpo ngɔ tsɔɔ Yakobo, nɛ Yakobo se ɔ, e jé e he kpo ngɔ tsɔɔ bɔfo ɔmɛ tsuo.

8 ⓖ Nyagbe kulaa a, e jé e he kpo ngɔ tsɔɔ imi hulɔ, imi nɛ i ngɛ kaa nɔ ko nɛ a kpatu fɔ lɛ ɔ!

9 ⓗ Imi ji bɔfo ɔmɛ tsuo a kpɛti nɔ nɛ sɛ́ pe kulaa; i sɛ́ kaa a tsɛɛ mi bɔfo po, ejakaa i wa Mawu we asafo ɔ yi mi.

10 Se Mawu dloomi lɛ pee mi nɔ́ nɛ i ji mwɔnɛ nɛ ɔ, nɛ dloomi nɛ e dloo mi ɔ pee we yaka. Ee, i tsu ní wawɛɛ pe bɔfo kpa amɛ tsuo kulaa, se pi imi; Mawu dloomi ɔ mohu lɛ tsu ní ɔ.

11 Lɔ ɔ he ɔ, imi jio, mɛ jio, e hia we kulaa; nɔ́ nɛ he hia kɛkɛ ji kaa wɔ tsuo wa fiɛ Mawu sɛ gbi ɔ ngɔ ha nyɛ, nɛ nyɛ he ye.

Kristo se nyɛɛli maa te si

12 Jehanɛ ɔ, akɛnɛ wa sɛ gbi ɔ ji kaa Mawu tle Kristo si kɛ je gbeje ɔ, mɛni he je nyɛ ti ni komɛ deɔ ke a be ni gbogboehi si tlee kɛ ba wami mi ɔ?

13 Ke a be ni gbogboehi si tlee kɛ ba wami mi ekohu ɔ, lɛɛ a tle we Kristo hu si mɔ.

14 Ke a tle we Kristo si kɛ bɛ wami mi ekohu ɔ, lɛɛ wa fiɛmi ɔ pee yaka; nɛ nyɛ hemi kɛ yemi ɔ hu pee yaka.

15 Pi enɛ ɔ kɛkɛ! E tsɔɔ kaa wa ye Mawu he lakpa, ejakaa wa de ke e tle Kristo si kɛ je gbeje. Se ke e ngɛ mi kaa a tle we ni gbogboehi si kɛ bɛ wami mi ekohu ɔ, lɛɛ Mawu tsa tle we Kristo si mɔ.

16 Ejakaa ke a tle we ni gbogboehi si ɔ, lɛɛ Kristo hu a tle we lɛ si.

17 Ke Mawu tle we Kristo si ɔ, lɛɛ nyɛ hemi kɛ yemi ɔ pee yaka, nɛ nyɛ ngɛ yayami he wami ɔ sisi kɛ mwɔɔ.

18 Kɛkɛ ɔ, nihi nɛ he Kristo ye nɛ a gbo ɔ, mɛ hu a hɛ mi kpata.

19 Ke wami nɛ ɔ mi kɛkɛ he nɛ wa ngɔ wa hɛ ngɔ fɔ Kristo nɔ ngɛ ɔ, lɛɛ wa ní ngɛ mɔbɔ pe nihi tsuo.

20 Se anɔkuale ɔ ji kaa Mawu tle Kristo si kɛ je gbeje nɛ e kɛ ye odase kaa e ma tle ni nɛmɛ nɛ gbo ɔ tsuo si.

21 Ejakaa kaa bɔ nɛ gbenɔ gu adesa nɔ kɛ ba a, jã nɔuu kɛ̃ adesa nɔ gbogboehi a si temi ɔ gu kɛ ba.

22 Kaa bɔ nɛ nihi tsuo ngɛ Adam mi gboɔ ɔ, jã nɔuu kɛ̃ a ma tle nihi tsuo si ngɛ Kristo mi.

23 Se Mawu ma tle nɔ tsuaa nɔ si ngɛ be nɛ sa mi. Kekleekle nɔ ji Kristo, nɛ lɔ ɔ se ke Kristo ma a, a ma tle e we bi ɔmɛ hu si.

24 Lɔ ɔ se ɔ, je mi nyagbe maa ba. Kristo maa ye mumi mi nɔ yeli, kɛ blɔ nyahi, kɛ he wami tsuo a nɔ, nɛ e maa ngɔ matsɛ yemi ɔ ngɔ ha Mawu nɛ ji Tsɛ ɔ.

25 ⓘ Ejakaa ja Kristo ye matsɛ kɛ maa su be nɛ Mawu maa ngɔ e he nyɛli tsuo ngɔ wo e nane si.

26 Nyagbe he nyɛlɔ nɛ a ma kpata e hɛ mi ji gbenɔ.

27 ⓙ Ngmami ɔ ke, “Mawu ngɔ níhi tsuo ngɔ wo e nane si.” Se e fɔɔ si paa kaa munyu “níhi tsuo” ɔ tsɔɔ we kaa lɛ Mawu ɔ nitsɛ nɛ e ngɔ níhi tsuo ngɔ wo Kristo nane si ɔ hu piɛ he.

28 Se ke a ngɔ níhi tsuo ngɔ wo Kristo nɔ yemi sisi ɔ, lɛɛ Bi ɔ nitsɛ hu maa ngɔ e he ngɔ ha Mawu, nɔ nɛ ngɔ níhi tsuo ngɔ wo e nɔ yemi sisi ɔ. Nɛ Mawu maa ye ní ɔmɛ tsuo a nɔ.

29 Jehanɛ ɔ, nihi nɛ a sɔlee mɛ ngɛ ni nɛmɛ nɛ gbo a nane mi ɔ, nyɛ ha wa susu a he kuku. Ke e ngɛ mi niinɛ kaa bɔ nɛ ni komɛ tsɔɔ ɔ, kaa a be ni gbogboehi si tlee kɛ ba wami mi ekohu ɔ, mɛni he je mɔ nɛ ni nɛ ɔmɛ ha nɛ a ngɛ mɛ sɔlee ngɛ ni nɛmɛ nɛ gbo ɔ a nane mi?

30 Ke a be ni gbogboehi si tlee kɛ ba wami mi ekohu ɔ, mɛni he je mɔ lɛ wɔ hu wa ngɛ gbenɔ nya mi ngmlɛfia tsuaa ngmlɛfia a?

31 Ye nyɛmimɛ, daa ligbi ɔ, i ngɛ gbenɔ nya mi! Fiami nɛ i fĩaa ngɔ fɔɔ nyɛ nɔ ji kaa wa le Nyɔmtsɛ Yesu Kristo.

32 ⓚ Ke je nɛ ɔ mi níhi a he lɛ i kɛ lohwe dikali ɔmɛ hwu ta ngɛ ngɛ Efeso ɔ, lɛɛ mɛni se i na mɔ? (Efeso bi a ngɛ dee ɔ nɛ). Se ke a be ni gbogboehi si tlee kɛ ba wami mi ekohu ɔ, lɛɛ kaa bɔ nɛ a pɔɔ demi ɔ, “Nyɛ ha waa ye ní nɛ wa nu ní, ejakaa hwɔɔ pɛ wa gbo.”

33 Nyɛ ko ha nɛ a sisi nyɛ. “Huɛ yaya bɔmi puɛɔ je mi bami kpakpa.”

34 Nyɛ susu nyɛ yi mi saminya nɛ nyɛ kpa yayami peemi. I ngɛ dee nɛ zo nɛ gbe nyɛ kaa nyɛ ti ni komɛ li Mawu.

Nɔmlɔ tso nɛ a kɛ maa te si

35 Se nɔ ko ma bi ke, “Kɛ a maa pee kɛ tle ni gbogboehi si kɛ ba wami mi ekohu kɛɛ? Nɛ mɛni nɔmlɔ tso nɛ a maa hɛɛ?”

36 Kuasia! Ke o du ní ɔ, ja wu ɔ gbo ngɛ zu mi loko e maa puɛ.

37 Jehanɛ ɔ hu, wu ngmelu kɛkɛ kaa ngma, loo e henɔ ko nɛ o du ɔ nɛ; pi tso nɛ maa puɛ ɔ.

38 Se Mawu haa jamɛ a wu ɔ tso nɛ lɛ Mawu ɔ suɔ; e haa wu tsuaa wu tso pɛ nɛ hi ha lɛ.

39 Níhi nɛ wami ngɛ a mi ɔ, pi he lo kake too nɛ mɛ tsuo a hɛɛ; slo adesa he lo, nɛ slo lohwe nane eywiɛtsɛ nɔ́; slo lohwe pɛlitsɛ he lo, nɛ slo lo nɔ́.

40 Hiɔwe nɔmlɔ tsohi ngɛ, nɛ zugba nɔ nɔmlɔ tsohi hu ngɛ. Se kɛ̃ ɔ, slo hiɔwe ní ɔmɛ a hɛ mi nyami, kɛ a he fɛu ngɛ zugba nɔ ní ɔmɛ a he.

41 Slo pu hɛ mi nyami kɛ afɛu, nɛ slo nyɔhiɔ hu nɔ́. Slo dodoehi hu a hɛ mi nyami kɛ afɛu; dodoe kake nɔ́ je ekpa ngɛ kake nɔ́ he.

42 E ngɛ kaa bɔ nɛ a ma tle ni gbogboehi si kɛ ba wami mi ekohu ɔ pɛpɛɛpɛ. Nɔ́ nɛ a pu kaa wu ɔ ma puɛ, se nɔ́ nɛ a ma tle si ɔ lɛɛ e be puɛe.

43 Ke a pu nɔmlɔ tso ɔ, e ngɛ tãi, nɛ e gbɔjɔ; se ke Mawu ma tle lɛ si kɛ ba wami mi ekohu ɔ, e maa hi fɛu, nɛ e he maa wa.

44 Ke a ngɔ lɛ ngɔ wo zu mi ɔ, nɔmlɔ tso nɛ a naa a, lɔ ɔ kɛkɛ a pu ɔ nɛ. Se ke a tle lɛ si kɛkɛ e pee nɔmlɔ tso nɛ mumi ɔ ha lɛ wami he. Ke nɔmlɔ tso nɛ a naa ngɛ ɔ, lɛɛ nɔmlɔ tso nɛ mumi ɔ haa lɛ wami he hu ngɛ.

45 ⓛ Ngmami ɔ ke, “A bɔ kekleekle Adam ɔ nɔmlɔ hɛngmengmletsɛ,” nɛ nyagbe Adam ɔ ba pee mumi nɛ haa nɔ wami.

46 Se he lo nɔmlɔ tso ɔ he hia we kaa mumi nɔ́ ɔ; ejakaa he lo nɔ́ ɔ ba kekle loko mumi nɔ́ ɔ nɛ he hia pe lɔ ɔ ba.

47 Kekleekle Adam ɔ, zugba zu a kɛ bɔ lɛ; Adam enyɔne ɔ lɛɛ hiɔwe nɛ e je.

48 Nimli adesahi tsuo ngɛ je nɛ ɔ mi ɔ ngɛ kaa Adam, nɔ nɛ a kɛ zu pee ɔ. Se ni nɛmɛ tsuo nɛ heɔ Kristo yeɔ ɔ, mɛɛ a maa hi kaa Kristo, nɔ nɛ je hiɔwe kɛ ba a nɔuu.

49 Nɛ wɔ nɛ a bɔ wɔ ngɛ je nɛ ɔ mi no ɔ subai nɔ ɔ, wa ma ba hɛɛ Hiɔwe No ɔ subai.

50 Ye nyɛmimɛ, nɔ́ nɛ i ngɛ tsɔɔe ji kaa he lo kɛ muɔ nine be Mawu matsɛ yemi ɔ nɔ sue; nɔ́ nɛ puɛɔ nine be nɔ́ nɛ puɛ we nɔ sue.

51 ⓜ Nyɛɛ bu tue! Anɔkuale laami sane nɛ i ngɛ nyɛ dee nɛ ɔ nɛ. Wɔ tsuo wa be gboe! Se ke nyagbe titimati ɔ pɛ ɔ, a ma tsake wɔ tsuo amlɔ kaa a fiaa hɛngmɛ. Ejakaa ke titimati ɔ pɛ ɔ, ni gbogboe ɔmɛ maa te si, nɛ a be gboe hu gblegbleegble. Nɛ a ma tsake wɔ tsuo.

52

53 Ejakaa ja nɔ́ nɛ puɛɔ nɛ ɔ tsake pee nɔ́ nɛ puɛ we; nɛ nɔ́ nɛ gboɔ nɛ ɔ tsake pee nɔ́ nɛ gbo we.

54 ⓝ Ke nɔ́ nɛ puɛɔ ɔ tsake pee nɔ́ nɛ puɛ we, nɛ nɔ́ nɛ gboɔ ɔ tsake pee nɔ́ nɛ gbo we ɔ, lɔ ɔ lɛɛ ngmami ɔ maa ba mi: “A mi gbenɔ kɛ ye kunimi!”

55 ⓞ Mo gbenɔ, jije o kɛɛ ɔ ngɛ? Mo gbeje, jije o kunimi yemi ɔ ngɛ?

56 Gbenɔ kɛɛ ɔ ji yayami, nɛ yayami he wami ɔ ji mlaa a.

57 Se sina ha Mawu, nɔ nɛ haa wa yeɔ kunimi kɛ guu wa Nyɔmtsɛ Yesu Kristo nɔ ɔ!

58 Lɔ ɔ he ɔ, ye nyɛmimɛ nɛ i suɔ! Nyɛ fi si, nɛ nyɛɛ da si kpɛii. Ní tsumi nɛ nyɛ ngɛ tsue ha Nyɔmtsɛ ɔ, nyɛ tsu nɛ e ya nɔ saminya be tsuaa be. Ejakaa nyɛ nitsɛmɛ nyɛ le kaa dengme nɛ nyɛ ngɛ gboe ha Nyɔmtsɛ ɔ be yaka pee.