Roma Bi 9

Mawu hla e ma

1 Anɔkuale i ngɛ tue ngɛ Kristo mi, nɛ ye he nile maa nɔ mi ngɛ Mumi Klɔuklɔu ɔ mi kaa nɔ́ nɛ i ngɛ dee ɔ, i yi lakpa.

2 I yeɔ tsui, nɛ i yeɔ kɔmɔ hu babauu

3 ngɛ ye nyɛmimɛ ɔmɛ a he. Ye weku li ji mɛ ngɛ he lo nya, nɛ i ko suɔ kaa ngɛ mɛɛ a he ɔ, a bu mi musutsɛ, nɛ a po mi kɛ je Kristo he.

4 ⓞ Mɛ ji Israel bi; nɛ Mawu nitsɛ nɛ ngɔ mɛ kɛ pee e ma; e wo a hɛ mi nyami, e kɛ mɛ so, nɛ e ha mɛ mlaa a; e tsɔɔ mɛ jami blɔ nya tomi, nɛ mɛ nɔuu nɛ e wo si ɔ nɛ.

5 A mi nɛ wa nɛmɛ ɔmɛ je, nɛ Kristo ɔ tete a nina ji lɛ ngɛ he lo nya. Kristo ɔ ji Mawu Ope ɔ nɛ yeɔ nihi tsuo a nɔ ɔ nɛ. A je e yi kɛ ya neneene! Amen.

6 I tsɔɔ we kaa Mawu siwo ɔ peeɔ yaka. Ejakaa pi Israel ma a tsuo ji Israel bi anɔkuale mi.

7 ⓟ Nɛ jehanɛ hu pi Abraham nina tsuo ji Abraham bimɛ. Mohu ɔ, Mawu wo Abraham si ke, “Isak nɔ nɛ o nina maa gu kɛ ba.”

8 Enɛ ɔ tsɔɔ kaa pi Abraham bimɛ nɛ e fɔ ngɛ he lo nya a ji Mawu bimɛ. Se mohu si nɛ a wo Abraham ɔ, ni nɛmɛ nɛ heɔ yeɔ ɔ, mɛ ji Abraham nina.

9 ⓠ Mawu wo Abraham si ke, “Hiɛmɛ nɛ ɔ jeha a, ma kpale kɛ ba o ngɔ ekohu, nɛ o yo Sara ma fɔ binyumu.”

10 Pi enɛ ɔ kɛkɛ, Rebeka bimɛ enyɔ ɔmɛ ɔ, e kɛ wa tsɛ Isak kake ɔ nɔuu nɛ fɔ mɛ.

11 Se bɔ nɛ pee nɛ yi mi nɛ Mawu to kɛ hla nɔ kake ɔ nɛ ba mi ɔ, be nɛ a na we nɛ a fɔ mɛ tete, pohu a na we nɛ a pee nɔ́ kpakpa ko, loo nɔ́ yaya ko ɔ,

12 ⓡ e de Rebeka ke, “Nɔkɔtɔma a ma sɔmɔ jokuɛ ɔ,” konɛ e ko ba mi kaa nɔ́ ko nɛ e tsu he, se mohu nɔ nɛ tsɛ mɛ ɔ lɛ pee.

13 ⓢ Ngmami ɔ deɔ ke, “I je suɔmi kpo kɛ tsɔɔ Yakob, se Esau lɛɛ i nyɛ lɛ.”

14 Lɛɛ kɛ wa ma de kɛɛ? Mawu yeɔ sane kpɛkpɛɛ lo? Dɛbi!

15 ⓣ Ejakaa Mawu de Mose ke, “Nɔ nɛ sa mɔbɔ nami ɔ, ma na lɛ mɔbɔ, nɛ nɔ nɛ sa mi mi sami ɔ, ye mi mi maa sã mi ngɛ e he.”

16 Lɔ ɔ he ɔ, jehanɛ ɔ, pi nɔmlɔ ko suɔmi nya, aloo nɔ́ ko nɛ nɔ ko tsu he je, se mohu nɔ́ tsuaa nɔ́ daa si ngɛ Mawu mɔbɔ nami nɔ.

17 ⓤ Ejakaa ngmami ɔ deɔ ke Mawu de Egipt matsɛ ɔ ke, “I wo mo tsɛ, bɔ nɛ pee nɛ ma je ye he wami kpo ngɔ tsɔɔ mo, konɛ o wo ye biɛ ta ngɛ je ɔ mi tsuo.”

18 Lɔ ɔ he ɔ, nɔ nɛ Mawu suɔ kaa e maa na lɛ mɔbɔ ɔ, e naa lɛ mɔbɔ, nɛ nɔ nɛ e suɔ kaa e wa tue ɔ, e haa e waa tue.

Mawu gblaa nɔ tue, nɛ e naa nɔ mɔbɔ hulɔ

19 Nyɛ ti nɔ ko ma bi mi ke, “Mɛni he je Mawu piaa wɔ mɔ? Nɔ́ nɛ e to e yi mi kaa e maa pee ɔ, anɛ nɔ ko ma nyɛ tsi nya lo?”

20 ⓥ Se mo nɔmlɔ adesa, mɛnɔ ji mo nɛ o ma de Mawu ke nɔ́ nɛ e de ɔ dɛ? Anɛ buɛ ma de nɔ nɛ puɛ lɛ ɔ ke, “Mɛni he je o puɛ mi kaa kikɛ nɛ ɔ?”

21 Wa le kaa buɛ puɛlɔ ngɛ he wami ngɛ zu nɛ e pɔtɔ ɔ nɔ, kaa e kɛ eko puɛɔ buɛ ko nɛ hi kɛ ha ní tsumi pɔtɛɛ ko, nɛ e puɛɔ buɛ kpa hu ngɛ mi kɛ ha ní tsumi gu ko kɛkɛ.

22 Anɛ kaa Mawu suɔ nɛ a le bɔ nɛ e mi mi la ngɛ, kɛ e he wami ɔ, jinɛ e ko kpata nihi nɛ woɔ e mi mi la a a hɛ mi pɛsɛpɛsɛ. Se e to e tsui si babauu ha mɛ.

23 E pee enɛ ɔ, konɛ nihi nɛ e na mɛ mɔbɔ ɔ nɛ a le bɔ nɛ e to momo kaa e maa wo a hɛ mi nyami babauu ha.

24 Wɔ hu ja e tsɛ wɔ, konɛ waa na kaa pi Yuda bi kɛkɛ nɛ e tsɛ, se e tsɛ ma je li ɔmɛ hulɔ.

25 ⓦ Bɔ nɛ Mawu de ngɛ Hosea womi ɔ mi ji nɛ ɔ nɛ: “Nihi nɛ a tsɛɔ mɛ ‘Piyemajinyɛ’ ɔ, ma de mɛ ke ‘Ye ma ji nyɛ.’ Nɛ nɔ́ nɛ a tsɛɔ lɛ ‘Asumemo’ ɔ ma je suɔmi kpo ha lɛ.”

26 ⓧ “Nɛ e maa ba mi kaa he nɛ a ma de mɛ ngɛ ke, ‘Pi ye ma ji nyɛ’ ɔ, lejɛ ɔ nɔuu a ma tsɛ mɛ ngɛ ke, ‘Mawu hɛ kalɔ ɔ bimɛ.’ ”

27 ⓨ Yesaya hu kpa ngmlaa kɛ de ngɛ Israel he ke, “Ke Israel bi hiɛ kaa wo nya zia tete po ɔ, nihi nɛ piɛ ɔ pɛ a yi wami a ma he.

28 Ejakaa Nyɔmtsɛ ɔ he maa sɔ kɛ kojo je ɔ tsuo.”

29 ⓩ Kaa bɔ nɛ Yesaya de to momo ɔ, “Ke pi kaa Nyɔmtsɛ Ope ɔ nɛ ha wa nina a eko piɛ ɔ, jinɛ wa ní ko pee kaa Sodom kɛ Gomora pɛ.”

Sane kpakpa a ngɛ kɛ ha Israel hulɔ

30 Lɛɛ kɛ wa ma de kɛɛ? Ma je li ɔmɛ nɛ jinɛ a, kaa a bu mɛ nihi nɛ da a, a bu mɛ ni nɛ da ejakaa a he Mawu ye.

31 Se Israel nɛ di mlaa nɛ ma ha a bu mɛ nihi nɛ da se ɔ, mɛ mohu a nine sui nɔ.

32 Kɛ ba kɛɛ? A nine sui nɔ, ejakaa a hla we lɛ kɛ hemi kɛ yemi. A susu kaa kɛ gu ní tsumihi a nɔ nɛ a ma na lɛ. Enɛ ɔ ha nɛ a pee kaa nihi nɛ a ngɔ tɛ ngɔ fɔ blɔ mi ha mɛ nɛ a tɛ.

33 ⓐ Ngmami ɔ deɔ ke, “Hyɛ, i ngɔ tɛ kɛ ngɛ si mae ngɛ Zion; e ma ha nihi ma tɛ si; e ji tɛ sa nɛ maa tsɛ̃ mɛ ngɔ fia si. Nɔ tsuaa nɔ nɛ heɔ tɛ nɛ ɔ yeɔ ɔ, zo be lɛ gbee kɔkɔɔkɔ.”