Roma Bi 8

Nɔ́ nɛ ye juɛmi deɔ mi ke e da a, Mawu mumi ɔ ke e dɛ

1 Amlɔ nɛ ɔ, nihi nɛ ngɛ Kristo Yesu mi ɔ, fɔ bumi ko be ha mɛ hu.

2 Ejakaa wa ngɛ Kristo mi, lɔ ɔ he ɔ, Mawu mumi ɔ nɛ haa nɔ wami ɔ, haa wa yeɔ wa he; nɛ yayami, kɛ gbenɔ be wa nɔ he wami hu.

3 Yayami nɛ adesa peeɔ ɔ, Mawu sume kulaa, se nɔmlɔ adesa gbɔjɔmi ɔ he je ɔ, mlaa a nyɛ we nɛ e pee he nɔ ko. Enɛ ɔ he ɔ, Mawu tsɔ lɛ nitsɛ e Bi ɔ kɛ ba ngɛ he lo su nɛ haa nɔ peeɔ yayami ɔ mi, konɛ e ba je wɔ kɛ je yayami dɛ mi.

4 Mawu pee enɛ ɔ, bɔ nɛ pee nɛ wɔ nihi nɛ wa bɛ wa je mi ngɛ he lo mi ní yayami ɔmɛ a nya, se mohu wa nyɛɛɔ ngɛ mumi ɔ blɔ tsɔɔmi nya a, wa nyɛ waa ye mlaa a nɔ sisiisi.

5 Nihi nɛ baa a je mi ngɛ he lo nya a, he lo mi níhi a he a susuu. Se nihi nɛ baa a je mi ngɛ mumi ɔ blɔ tsɔɔmi nya a, mumi mi níhi a he a susuu.

6 He lo nya níhi a he juɛmi ɔ kɛ gbenɔ baa, se mumi mi níhi a he juɛmi ɔ haa nɔ wami, kɛ he jɔmi.

7 Nɔ nɛ susuɔ he lo mi níhi a he ɔ, e ngɛ Mawu nyɛe, ejakaa e bui Mawu mlaa a; pohu e be nɔ nyɛe maa ye tete.

8 Nihi nɛ peeɔ he lo nya ní ɔ, a be nyɛe maa sa Mawu hɛ mi.

9 Ke Mawu mumi ɔ ngɛ nyɛ mi ɔ, he lo ɔ be nyɛ nɔ he wami; mumi ɔ mohu lɛ tsɔɔ nyɛ blɔ. Ke nɔ ko be Kristo mumi ɔ, pi Kristo nɔ ji lɛ.

10 Se ke Kristo ngɛ nyɛ mi ɔ, yayami nɛ nyɛ peeɔ he ɔ, nyɛ gbo ngɛ nɔmlɔ tso mi, se mumi mi lɛɛ nyɛ hɛ ngɛ, ejakaa Mawu buu nyɛ nihi nɛ da.

11 ⓘ Ke Mawu nɛ tle Yesu si kɛ je gbeje ɔ mumi ɔ ngɛ nyɛ mi ɔ, lɛɛ mumi ɔ nɛ e kɛ tle Kristo si ɔ ma ha nyɛ nɔmlɔ tso nɛ gboɔ ɔ ma na wami.

12 Lɔ ɔ he ɔ, ye nyɛmimɛ, sane tloo wɔ, se pi he lo nya nɔ́ ko nɛ wa maa hi si ja.

13 Ejakaa ke nyɛ peeɔ he lo nya níhi ɔ, nyɛ ma gbo; se ke Mawu mumi ɔ ha nyɛ kpa níhi nɛ nɔmlɔ tso ɔ suɔ ɔ tsumi ɔ, nyɛ yi ma na wami.

14 Ejakaa nihi abɔ nɛ Mawu mumi ɔ tsɔɔ mɛ blɔ ɔ, mɛ ji Mawu bimɛ.

15 ⓙ Mawu ha we nyɛ mumi nɛ peeɔ nɔ nyɔguɛ, nɛ nyɛ ma pa hi gbeye yee; se mohu e peeɔ nyɛ Mawu bimɛ. Mumi ɔ lɛ woɔ wɔ he wami, nɛ wa nyɛɔ faa kue kɛ ngmlaa ke, “Tsaatsɛ! Tsaatsɛ!” ⓚ

16 Mawu mumi ɔ nitsɛ kɛ wɔ hu wa mumi ɔ yeɔ odase kaa Mawu bimɛ ji wɔ.

17 Akɛnɛ Mawu bimɛ ji wɔ ɔ, wa peeɔ Mawu we ní yeli hulɔ, nihi nɛ a kɛ Kristo maa dla ní. Ee, ke waa kɛ Kristo na nɔ́ ɔ, a maa wo waa kɛ lɛ tsuo wa hɛ mi nyami.

Hɛ mi nyami nɛ maa ba hwɔɔ se

18 I le anɔkuale mi kaa nɔ́ nɛ wa ngɛ nae amlɔ nɛ ɔ pi nɔ́ ko kulaa nɛ a kɛ maa to wa hɛ mi nyami nɛ Mawu maa wo hwɔɔ se ɔ he.

19 Adebɔ níhi tsuo to a tsui si kɛ ngɛ blɔ hyɛe wawɛɛ kaa Mawu ma ha nɛ a na e bimɛ nitsɛnitsɛmɛ ɔmɛ.

20 ⓛ Yi mi pɔtɛɛ nɛ Mawu to ha níhi nɛ e bɔ ɔ, e ya bɛ mi ja pɛpɛɛpɛ. Pi adebɔ ní ɔmɛ nɛ pee; Mawu nitsɛ blɔ nya tomi ji ja. Se kɛ̃ ɔ, hɛ kɛ nɔ fɔmi ngɛ ha mɛ

21 kaa be ko ma nɛ adebɔ níhi tsuo maa ye a he, nɛ gbenɔ be he wami nae ngɛ a nɔ hu; nɛ a kɛ Mawu bimɛ ɔmɛ maa hi si ngɛ he jɔmi mi, nɛ a maa wo a hɛ mi nyami.

22 Wa le kaa kɛ ba su mwɔnɛ nɛ ɔ, adebɔ ní ɔmɛ tsuo ngɛ kɛmɛmi nɔ kaa yo nɛ ngɛ kɔ̃ɔ̃e nɛ e ma fɔ.

23 ⓜ Se pi mɛ kɛkɛ, mohu wɔ nitsɛmɛ tete nɛ wa ná mumi ɔ yiblii ɔ, wɔ hu ja nɔuu wa hii kɛmɛmi nɔ wawɛɛ ngɛ wa mi, be mi nɛ wa ngɛ Mawu blɔ hyɛe kaa e pee wɔ e bimɛ kɛ pi si, konɛ wa nɔmlɔ tso ɔ nɛ ye e he kulaa.

24 Wa ngɔ wa hɛ ngɔ fɔ Mawu nɔ, lɔ ɔ he nɛ a he wa yi wami ɔ nɛ. Se ke nɔ́ nɛ wa ngɔ wa hɛ kɛ fɔ nɔ ɔ su wa dɛ momo ɔ, lɛɛ lɔ ɔ pi hɛ kɛ nɔ fɔmi nitsɛ. Nɔ́ nɛ wa nine su nɔ momo ɔ, anɛ wa hyɛɔ blɔ ekohu lo?

25 Se ke wa ngɛ nɔ́ ko blɔ hyɛe, nɛ wa ngɔ wa hɛ kɛ fɔ nɔ kaa wa nine maa su nɔ ɔ, wa toɔ wa tsui si.

26 Ja nɔuu, ke wa gbede ɔ, mumi ɔ piɛɔ wa he. Ejakaa ke wa ngɛ sɔlee ɔ, wa li nɔ́ tutuutu nɛ sa kaa wa deɔ. Mumi ɔ nitsɛ daa mi ha wɔ kɛ kɔmɔ yemi nɛ a be nyɛe maa kale.

27 Mawu nɛ le adesahi tsuo a yi mi ɔ lɛ le nɔ́ nɛ mumi ɔ deɔ, ejakaa pɛɛ nɛ mumi ɔ kpaa ha ní klɔuklɔu ɔmɛ ɔ saa Mawu hɛ mi.

28 Wa le kaa nɔ́ tsuaa nɔ́ mi ɔ, Mawu piɛɔ nihi nɛ suɔ lɛ ɔ a he, konɛ e hi ha mɛ. Nimli nɛ ɔmɛ ɔ, Mawu nitsɛ nɛ to e yi mi, nɛ e tsɛ mɛ.

29 Nihi nɛ Mawu hla ngɔ to momo ɔ, e pee mɛ klɔuklɔu, konɛ a subai nɛ hi kaa Bi ɔ nɔ. Kɛkɛ ɔ, Bi ɔ maa pee nɔkɔtɔma ngɛ e nyɛmimɛ babauu a kpɛti.

30 Lɔ ɔ he ɔ, nihi nɛ Mawu hla a, mɛ nɔuu e tsɛ, nihi nɛ e tsɛ ɔ, mɛ nɔuu e wo nguɔ, nɛ nihi nɛ e wo nguɔ ɔ, e wo mɛ nɔuu a hɛ mi nyami.

Yesu Kristo tsɔɔ bɔ nɛ Mawu suɔ wɔ ha

31 Lɛɛ kɛ wa ma de kɛɛ ngɛ ní nɛ ɔmɛ a he mɔ? Ke Mawu ngɛ wa se ɔ, mɛnɔ maa te si ngɔ wo wɔ?

32 Mawu nɛ klɔɛ e Bi ɔ he, se mohu e ngɔ lɛ kɛ sã bɔ ngɛ wɔ nimli adesahi tsuo wa he ɔ, anɛ e be níhi tsuo ngɔe kɛ piɛ he ha wɔ lo?

33 Nihi nɛ Mawu hla a, mɛnɔ maa po a nya? Mawu nitsɛ lɛ woɔ nɔ nguɔ.

34 Lɛ mɛnɔ lɛ buɔ nɔ fɔ mɔ? Yesu Kristo loo? Yesu Kristo lɛɛ e gbo; se nɔ́ nɛ pe lɔ ɔ, Mawu tle lɛ si kɛ je gbeje kɛ ba wami mi; nɛ amlɔ nɛ ɔ, e ngɛ Mawu hiɔ nɔ, nɛ e ngɛ mi dae ha wɔ ngɛ Tsɛ ɔ hɛ mi.

35 Mɛnɔ ma gba wɔ kɛ maa je suɔmi nɛ Kristo ngɛ kɛ ha wɔ ɔ mi? Haomi loo, nɔ nami loo, yi mi wami loo, hwɔ loo, oslã loo, aloo klaate?

36 ⓝ Kaa bɔ nɛ ngmami ɔ deɔ ɔ, “O he ɔ, be tsuaa be nɛ ɔ, wa ngɛ gbenɔ nya mi; a buɔ wɔ kaa tohi nɛ a yaa gbe.”

37 Dɛbi! Ngɛ enɛ ɔmɛ tsuo a mi ɔ, nɔ nɛ suɔ wɔ ɔ haa wa yeɔ kunimi babauu.

38 Ejakaa i ngɛ nɔ mi mami kaa gbenɔ jio, wami jio, hiɔwe bɔfohi jio, nɔ yeli kpa komɛ nɛ ngɛ hiɔwe jio, níhi nɛ ngɛ jio, níhi nɛ maa ba jio, he wami kpa ko jio,

39 hiɔwe lokoo jio, zugba sisi jio, níhi nɛ a bɔ ɔ a mi eko jio, Mawu suɔmi nɛ wa na ngɛ Kristo Yesu, wa Nyɔmtsɛ ɔ mi ɔ, ní nɛ ɔmɛ ekoeko be nyɛe ma gba wɔ kɛ maa je mi.