1 Ye nyɛmimɛ, pɛɛ nɛ i kpaa Mawu daa kɛ jeɔ ye tsui mi kɛ haa Israel bi ji kaa a he a yi wami.
2 Ejakaa i ngɛ odase ngɛ he kaa a hɛ dɔɔ wawɛɛ ngɛ Mawu he, se blɔ nɔ nɛ a kɛ ma ja lɛ ɔ nɛ a li.
3 Blɔ nɔ nɛ Mawu guu kɛ buu nɔ nɔ nɛ da a, a li, nɛ a hlaa kaa a ma wo mɛ nitsɛmɛ a blɔ. Lɔ ɔ he ɔ, a ngɔɛ a he ngɔ ha we Mawu, konɛ e bu mɛ nihi nɛ da.
4 Ejakaa Kristo po mlaa a mi, nɛ nɔ tsuaa nɔ nɛ heɔ yeɔ ɔ, Mawu wo lɛ nguɔ.
Yi wami hemi ngɛ kɛ ha nɔ tsuaa nɔ
5 ⓑ Nɔ nɛ Mose ngma ngɛ nɔmlɔ nɛ a buu lɛ nɔ nɛ da ngɛ mlaa a nɔ nɛ e yeɔ ɔ he ji nɛ ɔ nɛ: “Nɔ tsuaa nɔ nɛ yeɔ mlaa a nɔ fitsofitso ɔ, e yi ma na wami.”
6 ⓒ Se kaa nɔmlɔ adesa ma he Mawu ye nɛ lɔ ɔ he ɔ, Mawu buu lɛ nɔ nɛ da a, nɔ́ nɛ ngmami ɔ deɔ ngɛ he ji, “Ko de ngɛ o tsui mi ke, Mɛnɔ maa kuɔ kɛ ya hiɔwe?” (lɔ ɔ ji kaa e ma ya ngɔ Kristo kɛ kple si;)
7 aloo “Mɛnɔ maa ya muɔ voo ɔ mi?” (lɔ ɔ ji konɛ e ya ngɔ Kristo kɛ je gbeje kɛ ba.)
8 Se kɛ e deɔ kɛɛ? “Munyu nɛ Mawu tu ɔ ngɛ o ngɔ hiɛmɛ nɛ ɔ; o le, nɛ e ngɛ o tsui mi.” Jamɛ a hemi kɛ yemi ɔ wa ngɛ fiɛe ɔ nɛ.
9 Ke o kɛ o nya jaje ke “Yesu Kristo ji Nyɔmtsɛ,” nɛ o he ye ngɛ o tsui mi kaa Mawu tle lɛ si kɛ je gbeje ɔ, a ma he o yi wami.
10 Ejakaa tsui a kɛ heɔ yeɔ loko Mawu woɔ nɔ nguɔ; nɛ ke waa kɛ wa nya jaje ɔ, a ma he wa yi wami.
11 ⓓ Ngmami ɔ deɔ ke, “Nɔ tsuaa nɔ nɛ heɔ yeɔ ɔ, zo be lɛ gbee.”
12 Slɔɔto ko be Yuda no kɛ ma je no a kpɛti, ejakaa a ngɛ Nyɔmtsɛ kake, nɛ e mi hi saminya ha nihi tsuo nɛ kpaa ngmlaa kɛ tsɛɔ lɛ ɔ.
13 ⓔ Kaa bɔ nɛ ngmami ɔ deɔ ɔ, “Nɔ tsuaa nɔ nɛ ma kpa ngmlaa kɛ tsɛ Nyɔmtsɛ ɔ biɛ ɔ, a ma he e yi wami.”
14 Se kɛ maa pee kɛɛ nɛ a ma kpa ngmlaa kɛ tsɛ nɔ nɛ a he we lɛ yi ɔ? Nɛ kɛ maa pee kɛɛ nɛ a ma he nɔ nɛ a nui e he sane ɔ ye? Jehanɛ hu kɛ maa pee kɛɛ nɛ a maa nu, ke nɔ ko fiɛ we ha mɛ?
15 ⓕ Nɛ kɛ maa pee kɛɛ nɛ nihi maa fiɛ, ke a tsɔ we mɛ? Kaa bɔ nɛ a ngma a, “Hyɛ bɔ nɛ he jɔmi sane kpakpa a fiɛli a nanehi ngɛ fɛu ha.”
16 ⓖ Se kɛ̃ ɔ, pi Israel bi ɔmɛ tsuo nɛ he sane kpakpa a. Ejakaa Yesaya de ke, “Nyɔmtsɛ, wa sane ɔ, mɛnɔ he ye?”
17 Lɔ ɔ ji kaa ja a fiɛ Kristo he sane ɔ loko nɔ ko maa nu. Nɛ ja nɔ ko nu sane ɔ loko e ma he ye.
18 ⓗ Se i ngɛ bie ke, Anɛ a nui sɛ gbi ɔ lo? Anɔkuale, a nu, ejakaa ngmami ɔ deɔ ke, “A gbi jije kɛ ho zugba a tsuo nɔ ya; Nɛ a sɛ gbi ɔ ya su je ɔ nyagbe he ɔmɛ.”
19 ⓘ I ngɛ bie ekohu ke anɛ Israel li lo? Mose ji kekleekle nɔ nɛ he nɔ ke, “Ma ha nyɛ maa je je ma ko nɛ a bui lɛ kulaa he hunga; Nɛ i kɛ ma kɛ e mi kuasiahi sɔuu maa wo nyɛ mi mi la.”
20 ⓙ Yesaya hu kɛ kã de ke, “I ha nihi nɛ hla we mi ɔ na mi, Nɛ nihi nɛ bi we ye si ɔ, i je ye he kpo tsɔɔ mɛ.”
21 ⓚ Se Israel lɛɛ Yesaya de ngɛ e he ke, “Daa nɛ ɔ, i gbɛ ye gugue mi nɛ ma he nyɛ atuu; Ma tue gboli nɛ a tsui kplii!”