Roma Bi 11

Mawu na Israel ma a mɔbɔ

1 ⓛ Jehanɛ lɛɛ i ngɛ bie ke anɛ Mawu kua lɛ nitsɛ e ma a lo? Dɛbi! Mawu kua we e ma a. Imi nitsɛ hu Israel no ji mi; Abraham nina ji mi, nɛ i je Benyamin wɛtso ɔ mi.

2 Mawu kua we e ma nɛ e hla blema lokoo ɔ. Tse nyɛ le nɔ́ nɛ ngmami ɔ deɔ ngɛ Eliya yi nɔ benɛ Eliya po Israel nya ha Mawu ke,

3 ⓜ “Nyɔmtsɛ, a gbe o gbali ɔmɛ tsuo, nɛ a ywia o bɔ sami la tɛ ɔmɛ; nɛ imi nɔ kake nɛ piɛ, nɛ a ngɛ imi hu hlae nɛ a gbe” ɔ.

4 ⓝ Mɛni heto Mawu ha lɛ? E de lɛ ke, “I si gbali akpe kpaago hɛ ngmengmle ngɛ Israel nɛ mɛɛ a kpla we si ha Baal.”

5 Ja nɔuu, amlɔ nɛ ɔ, nihi bɔɔ piɛ nɛ Mawu hla mɛ ngɛ dloomi nya.

6 Nɛ ke dloomi nya a, lɛɛ pi ní tsumi ko nɛ a tsu he hu. Kaa ní tsumi ko nɛ a tsu he ɔ, jinɛ dloomi ɔ pi dloomi hu.

7 Lɛɛ kɛ ji lɛ kɛɛ? Israel nine sui nɔ́ nɛ a ngɛ hlae ɔ nɔ. Nihi nɛ Mawu hla a, mɛɛ lɛɛ a nine su nɔ. Ni nɛmɛ nɛ piɛ ɔ lɛɛ a wa tue.

8 ⓞ Kaa bɔ nɛ ngmami ɔ deɔ ɔ, “Mawu ha nɛ a pee kaa nihi nɛ lu; kɛ ba su mwɔnɛ nɛ ɔ, a ngɛ hɛngmɛ ji nɛ, se a hyɛ we nɔ́; nɛ a ngɛ tue hulɔ, se a kɛ nui nɔ́.”

9 ⓟ David hu de ke, “Ke a tsɛ ní yemi ɔ, ha nɛ e pee klama nɛ du mɛ; a nɔɔ si nɛ a gbla a tue.

10 A hɛngmɛ nɛ ma, nɛ a ko hyɛ nɔ́; a se tso nɛ kpɛ daa.”

11 Jehanɛ, i ngɛ bie ke, nɛ a tɛ nɔ́ nɛ a nɔ si ɔ, a nɔ gbidii nɛ a ti hu lo? Dɛbi! A si gbeemi ɔ bli blɔ ha ma je li ɔmɛ, nɛ a he a yi wami. Enɛ ɔ ha Israel bi ɔmɛ je mɛ hunga.

12 Ke Yuda bi a si gbeemi ɔ plɛ pee gbaami ha je ɔ tsuo, nɛ a ní nɛ bɔ mɛ ɔ ba pee gbaami ha ma je li ɔmɛ ɔ, lɛɛ ke Yuda bi ɔmɛ tsuo tsake ɔ, gbaami nɛ a maa gbaa je ɔ, kɛ e hiɛmi maa hi kɛɛ?

Mawu he ma je li ɔmɛ a yi wami

13 Ma je li, jehanɛ i kɛ nyɛ maa tu munyu. Be abɔ nɛ i ngɛ ní tsue kaa bɔfo ngɛ nyɛ kpɛti ɔ, ma tsu kɛ gɛjɛmi.

14 Eko ɔ, gɛjɛmi nɛ i kɛ ngɛ nyɛ he ní tsue ɔ ma ha ye nyɛmimɛ Yuda bi ɔmɛ maa je hunga, nɛ ye he ɔ, Mawu ma he a ti ni komɛ a yi wami.

15 Ejakaa ke Mawu kua Yuda bi ɔmɛ, nɛ lɔ ɔ he a dla Mawu kɛ je ɔ a kpɛti ɔ, lɛɛ ke e kpale he mɛ ekohu ɔ, kɛ níhi maa hi kɛɛ? E maa pee kaa nɔ nɛ gbo, nɛ a kpale tle lɛ si kɛ ba wami mi ekohu.

16 Ke má bɔbɔyoo nɛ a ti kɛ sã bɔ ha Mawu ɔ ngɛ klɔuklɔu ɔ, lɛɛ má a tsuo ngɛ klɔuklɔu. Jã kɛ̃ ke tso sipoku ɔ ngɛ klɔuklɔu ɔ, tso kɔni ɔmɛ hu peeɔ klɔuklɔu.

17 Oliv tso nɛ a je blɔ du ɔ, ke a kplɔ e kɔni ɔmɛ ekomɛ, nɛ a ya ngɔ mo oliv tso nɛ mo nitsɛ lo puɛ ngɛ nga mi ba ta tso ɔ he, nɛ o naa oliv tso sipoku ɔ mi niye ní ɔ eko ɔ,

18 koo fĩa kaa o pe jamɛ a kɔni ɔmɛ nɛ a kplɔɔ ɔ. Ke o maa fĩa a, o hɛ nɛ hi o he nɔ kaa pi mo nɛ o hɛɛ sipoku ɔ, se mohu sipoku ɔ nɛ hɛɛ mo.

19 Jehanɛ eko ɔ, o ma de ke, “A kplɔ kɔnihi, konɛ a ngɔ mi ngɔ ta tso ɔ he.”

20 Saminya! Hemi nɛ a he we yi he je nɛ a po mɛ; nɛ moo lɛɛ hemi kɛ yemi o kɛ daa si ɔ nɛ. O yi ko fu, se mohu o hɛ nɛ hi o he nɔ.

21 Ejakaa ke Mawu baa we tso ɔ nitsɛ kɔni ɔmɛ a yi ɔ, eko ɔ, mohu e be o yi baae.

22 Enɛ ɔ tsɔɔ wɔ kaa Mawu mi mi hi, se e sane wa hulɔ. Nihi nɛ gbee si ɔ, e kɛ mɛ to ní; se nyɛɛ lɛɛ e mi mi jɔ ha nyɛ, nɛ e sa kaa nyɛɛ ya nɔ kikɛ nɛ ɔ. Ke pi jaa, a ma kplɔ nyɛ kɛ pue si ja nɔuu.

23 Yuda bi ɔmɛ hu, ke a tsake nɛ a ba he ye jehanɛ ɔ, a maa kpale mɛ kɛ ta tso ɔ he ekohu, ejakaa Mawu ma nyɛ pee enɛ ɔ hluu tsɔ.

24 Nɛ pohu hyɛ kaa oliv tso nɛ lɛ nitsɛ e puɛ ngɛ nga nɔ, nɛ a po mo ngɛ he, nɛ a kɛ ba ta oliv tso nɛ a je blɔ du ɔ he ɔ, e pee pɛ. Kikɛmɛ a nɔ́ nɛ ɔ pɔɛ he. Lɛɛ oliv tso ɔ nɛ a je blɔ du ɔ nitsɛ e kɔnihi nɛ a kplɔ ɔ, e be wae kulaa kaa a maa kpale ngɔ mɛ kɛ ta tso ɔ he ekohu.

Mawu naa nihi tsuo mɔbɔ

25 Ye nyɛmimɛ, anɔkuale laami sane ko ngɛ nɛ i suɔ kaa nyɛɛ le, bɔ nɛ pee nɛ nyɛ ko susu kaa nyɛ hɛ mi lɛ tɛ̃. Sane ɔ ji kaa Israel bi ɔmɛ ɔ, pe a ha a wa tue be kuku kɛkɛ kɛ yaa si ma je li ɔmɛ tsuo ma ba le Mawu.

26 ⓠ Lɔ ɔ he ɔ, a ma he Israel tsuo yi wami kaa bɔ nɛ a ngma a ke, “Yi wami helɔ ɔ maa je Zion kɛ ba; e ma ha Yakob nina a ma kpa musu bɔmi.

27 ⓡ Nɛ somi nɛ i kɛ mɛ maa so ji kaa a ma kpa yayami tsuo peemi.”

28 Ngɛ sane kpakpa a blɔ fa mi ɔ, nyɛ he ɔ, Yuda bi ɔmɛ peeɔ Mawu he nyɛli. Se akɛnɛ e hla a nɛmɛ ɔmɛ momo he je ɔ, Mawu suɔ mɛ.

29 Ejakaa ke Mawu tsɛ nɔ ko nɛ e gbaa lɛ ɔ, e tsakee we e yi mi hu.

30 Nyɛ ma je li, sa a, nyɛ bui Mawu, se jehanɛ lɛɛ Mawu na nyɛ mɔbɔ, ejakaa Yuda bi ɔmɛ hu ba gbo tue.

31 Amlɔ nɛ ɔ lɛɛ Yuda bi ji tue gboli ngɛ Mawu hɛ mi. Se mɔbɔ nɛ Mawu na nyɛ ɔ he je ɔ, mɛ hu Mawu ma ba na mɛ mɔbɔ.

32 Mawu ha nɛ nihi tsuo pee kaa nɔ́ nɛ a wo mɛ tsu ngɛ tue gbomi he, bɔ nɛ pee nɛ e na mɛ tsuo mɔbɔ.

Nyɛ ha wa je Mawu yi

33 ⓢ Niatsɛ mi niatsɛ ji Mawu! Hyɛ bɔ nɛ e nile, kɛ juɛmi hiɛ ha! Mɛnɔ le bɔ nɛ e toɔ e yi mi ha? Blɔ nɔ nɛ e guu kɛ tsuɔ ní ɔ, mɛnɔ le?

34 ⓣ Kaa bɔ nɛ ngmami ɔ deɔ ɔ, “Mɛnɔ lɛ le Nyɔmtsɛ ɔ juɛmi, aloo mɛnɔ lɛ wo lɛ ga hyɛ?

35 ⓤ Mɛnɔ ha lɛ nɔ ko hyɛ, nɛ e hia kaa e to lɛ nane mi?”

36 ⓥ Ejakaa Mawu lɛ bɔ níhi tsuo; lɛ nɛ ngɛ he wami ngɛ nɔ́ tsuaa nɔ́ nɔ; nɛ mɛ tsuo a woɔ e hɛ mi nyami kɛ yaa neneene! Amen!