Ni Tsumi 28

Paulo ngɛ Melita

1 Benɛ wa su kpo slɔkee ɔ, wa ná le kaa zugba kpɔ nɛ wo bɔle lɛ nɛ ɔ biɛ ji Melita.

2 Ma mi lejɛ ɔ bi ɔmɛ pee wɔ kpakpa saminya. Jamɛ a be ɔ mi ɔ, hiɔmi bɔni nɛmi, nɛ fĩɛ ɔ nya wa; lɔ ɔ he ɔ, ni ɔmɛ slɛ la, nɛ a ha wɔ tsuo wa ya hlue la a.

3 Paulo ya bua lɛ tsɔwi nya, nɛ e kɛ ngɛ la a mi woe, kɛkɛ nɛ sinɔ ko je la glegle ɔ mi ba mimlaa e nine.

4 Benɛ lejɛ ɔ bi ɔmɛ na lohwe ɔ nɛ kplaa si ngɛ Paulo nine he ɔ, a de a he ke, “Nyumu nɛ ɔ, nɔmlɔ gbelɔ ji lɛ. E ná je osla mi ngɛ wo ɔ mi lɛɛ, se loloolo ɔ, e sɛsɛɛ ngmɛ́ lɛ blɔ kaa e hi je mi.”

5 Se Paulo huanya sinɔ ɔ ngɔ wo la a mi, nɛ lohwe ɔ yi lɛ awi ko.

6 Ni ɔmɛ ngɛ blɔ hyɛe kaa Paulo maa fuu, loo e ma tsɔ fia si nɛ e gbo tlukaa. Se benɛ a hyɛ blɔ hluu nɛ a nɛ́ kaa nɔ́ ko pee lɛ ɔ, a tsake a juɛmi, nɛ a de ke, “Mawu ko ji lɛ!”

7 Zugba kpɔ nɛ ɔ nɔ nɔkɔtɔma a, a tsɛɛ lɛ Publio. E ngɛ ngmɔ nɛ kɛ he nɛ sane nɛ ɔ ba ngɛ ɔ kɛ́ we kulaa. Nyumu nɛ ɔ he wɔ hɛmuɔ, nɛ e pee wɔ nibwɔ saminya ligbi etɛ sɔuu.

8 Publio tsɛ hwɔɔ si kpotoo kɛ asla yaya kɛ mi mi pa. Paulo ya sɛ tsu mi he nɛ e ngɛ ɔ, nɛ e sɔle. E ngɔ e nine ngɔ pue hiɔtsɛ ɔ nɔ, nɛ e tsa lɛ.

9 Benɛ a tsa hiɔtsɛ nɛ ɔ se ɔ, hiɔtsɛmɛ kpahi nɛ ngɛ zugba nɛ wo bɔle lɛ ɔ nɔ ɔ hu ba, nɛ Paulo tsa mɛ.

10 Ni ɔmɛ ke wɔ ní babauu, nɛ pee se benɛ wa sɛ lɛ nɛ wa maa ho hiami ya a, a ngɔ níhi nɛ maa hia wɔ ba wo lɛ ɔ mi ha wɔ.

Paulo je Melita kɛ ya Roma

11 Hlami etɛ se ɔ, wa je Melita. Wa wó lɛ ko nɛ je Aleksandria. Lɛ ɔ he so ji “Hawi ɔmɛ”, nɛ e ba ye fĩɛ be ɔ ngɛ zugba kpɔ nɛ wo bɔle lɛ ɔ nɔ.

12 Wa ba su Sirakusa, nɛ wa ye ligbi etɛ ngɛ lejɛ ɔ.

13 Wa je lejɛ ɔ kɛ ba ma ko nɛ a tsɛɛ Regio ɔ. E nɔ jena a, kɔɔhiɔ bɔni fiami kɛ je leneyi je nɛ wa ye ligbi enyɔ kɛ ba su Puteoli ma a mi.

14 Wa ba na nyɛmimɛ ɔmɛ ekomɛ ngɛ lejɛ ɔ, nɛ a kpa wɔ pɛɛ ke waa ye otsi ngɛ a ngɔ. Kɛkɛ nɛ wa ba su Roma.

15 Benɛ nyɛmimɛ ɔmɛ nɛ ngɛ Roma a nu wa he ɔ, a ba kpee wɔ ngɛ he ko nɛ a tsɛɛ “Apio Jua nɔ” kɛ “Nibwɔhi a to he Etɛ” ɔ tɔɔ. Benɛ Paulo na mɛ ɔ, e na Mawu si, nɛ e tsui nɔ e mi fuaa.

Paulo ngɛ Roma

16 Benɛ wa ba su Roma a, a ngmɛ Paulo blɔ nɛ lɛ nitsɛ e hi e dɛ he, kɛ ta bulɔ kake nɛ ngɛ e he bue.

17 Ligbi etɛ se ɔ, Paulo tsɛ lejɛ ɔ Yuda bi ɔmɛ a nikɔtɔma amɛ kpe. Benɛ a nya ba bua a, e de mɛ ke, “Ye nyɛmimɛ Israel bi, i pee we wa ma a yayami ko, nɛ wa nɛmɛ ɔmɛ a kusumihi nɛ a si ha wɔ ɔ hu i tɔ we ekoeko nɔ; se kɛ̃ ɔ, a nu mi ngɛ Yerusalem, nɛ a ngɔ mi ngɔ wo Roma bi ɔmɛ a dɛ mi kaa pã mi no.

18 Benɛ Roma nɔ yeli ɔmɛ ta ye nya mi kɛ hla sane ɔ mi gbe nya a, jinɛ mɛɛ a hla kaa a maa ngmɛɛ ye he kaa i pee we nɔ́ ko nɛ sa kaa a gbe mi.

19 ⓛ Se benɛ Yuda bi ɔmɛ kplɛɛ we kaa a ngmɛɛ ye he ɔ, e hia doo kaa ma ngɔ ye sane ɔ kɛ ha Kaisare ɔ nɛ e ye, pohu pi kaa i ngɛ nɔ́ ko nɛ i kɛ maa po imi nitsɛ ye ma mi bi ɔmɛ a nya.

20 Ní nɛ ɔmɛ a he je nɛ i tsɛ nyɛ kɛ ba, konɛ i kɛ nyɛ nɛ sɛɛ ní. Anɔkuale mi ɔ, kɔsɔkɔsɔ nɛ ngɛ ye he nɛ ɔ, nɔ nɛ Israel bi ngɔ a hɛ kɛ fɔ e nɔ ɔ he a wo mi ngɛ.”

21 A de lɛ ke, “Wɔɔ lɛɛ wa na we womi ko kɛ ji Yudea ngɛ o he; nɛ jehanɛ hu, nyɛmimɛ ɔmɛ a ti nɔ ko bɛ hiɛ ɔ ba sɛɛ we o he sane ko, aloo o he munyu yaya ko.

22 Se wa suɔ kaa wa maa bu mo tue nɛ waa le o juɛmi; ejakaa kuu nɛ o ngɛ mi nɛ ɔ, wa le kaa ngɛ he tsuaa he ɔ, a tuɔ e he munyu yaya.”

23 Lɔ ɔ he ɔ, a to Paulo be kpa; nɛ jamɛ a ligbi ɔ, nihi babauu ba e ngɔ ngɛ he nɛ e ba to ɔ. E gbá níhi a mi tsɔɔ mɛ kɛ je mɔtu kɛ ya si gbɔkuɛ. E tsɔɔ mɛ sɛ gbi nɛ kɔɔ Mawu matsɛ yemi ɔ he ɔ, nɛ e kɛ níhi nɛ a ngma ngɛ Mose mlaa, kɛ gbali ɔmɛ a womi ɔmɛ a mi ɔ fi e munyu ɔ se, konɛ a na anɔkuale ɔ nɛ kɔɔ Yesu he ɔ.

24 A ti ni komɛ he ye, nɛ ni komɛ hu he we yi.

25 Se nɔ́ kake too nɛ Paulo de, nɛ lɔ ɔ kɛ nya sami wawɛɛ ba ni ɔmɛ a kpɛti, nɛ́ kpe ɔ kɛ gbɛ ji, “Nɔ́ nɛ Mumi Klɔuklɔu ɔ de nyɛ nɛmɛ ɔmɛ kɛ gu gbalɔ Yesaya nɔ ɔ ngɛ mi jã niinɛ!

26 ⓜ Mumi ɔ de gbalɔ ɔ ke, ‘Yaa, nɛ o ya de ma nɛ ɔ ke Nyɛ maa nu, se nyɛ be sisi nue. Nyɛ maa na, se nyɛ be se kɔe.

27 Ejakaa ma nɛ ɔ nui nɔ́ sisi kulaa; nɔ́ ko nɔ́ ko sɛ we a tue mi. Ke pi jã a, a maa hyɛ nɔ́, nɛ a maa nu nɔ́, nɛ a juɛmi ma kɔ nɔ́ se. Kɛkɛ ɔ, a maa kpale kɛ ba imi Mawu, ye ngɔ, nɛ ma he a yi wami.’ ”

28 Nyagbe ɔ, Paulo de Yuda bi ɔmɛ ke, “Nyɛ na na nyɛɛ le kaa Mawu ngɔ yi wami hemi munyu ɔ ya ha ma je li ɔmɛ. Mɛɛ lɛɛ a maa bu tue!” [

29 Benɛ Paulo de kikɛ nɛ ɔ, Yuda bi ɔmɛ je lejɛ ɔ. Nɛ́ a yaa a tsuo, a ngɛ nya sãe wawɛɛ ngɛ mɛ nitsɛmɛ a kpɛti.]

30 Paulo hi we ko mi jeha enyɔ, nɛ e wo he hiɔ. Nihi tsuo nɛ ba slaa lɛ ɔ, lejɛ ɔ nɛ e kɛ mɛ kpee ngɛ.

31 E fiɛɛ Mawu matsɛ yemi ɔ he sane, nɛ e tsɔɔ mɛ Nyɔmtsɛ Yesu Kristo he sane. E tu munyu kɛ kã nɛ gbeye yemi ko be e mi; nɛ nɔ ko nɔ ko hu tsi we lɛ blɔ.