Ni Tsumi 26

Paulo je e nya ngɛ Agripa hɛ mi

1 Jehanɛ Agripa de Paulo ke, “A ngmɛ mo blɔ, mo je o nya!” Kɛkɛ nɛ Paulo fɔ e nine, nɛ e fa e he ke,

2 “Matsɛ Agripa, e ngɔ ye nya kaa ma je ye nya mwɔnɛ ɔ ngɛ o hɛ mi, ngɛ níhi tsuo nɛ Yuda bi ɔmɛ kɛ ngɛ ye nya poe ɔ a he.

3 Moo lɛɛ o le Yuda bi ɔmɛ a kusumihi tsuo, kɛ slɔɔto nɛ ngɛ a kpɛti ɔ pɛpɛɛpɛ. Lɔ ɔ he ɔ, i kpa mo pɛɛ nɛ o to tsui si, nɛ o bu mi tue.

4 “Yuda bi tsuo le bɔ nɛ i ba ye je mi kɛ je sisije. A le bɔ nɛ i ba ye je mi ha ngɛ imi nitsɛ ye ma a mi, kɛ Yerusalem tsuo.

5 ⓗ Ke a maa ye odase anɔkuale mi ɔ, a maa na kaa kɛ je sisije ɔ, i hi si kaa Farisi no. Wa Farisi kuu ɔ ji nihi nɛ peeɔ veveeve pe kulaa ngɛ Mawu jami mi.

6 Amlɔ nɛ ɔ, i daa si ngɛ hiɛ ɔ nɛ a ngɛ mi kojoe kaa si ko nɛ Mawu wo wa nɛmɛ ɔmɛ be ko ɔ, i heɔ yeɔ.

7 Wa wɛtso nyɔngma kɛ enyɔ ɔmɛ a hɛ ngɛ siwo nɛ ɔ nɔ. Enɛ ɔ he je nɛ a jaa Mawu saminya nyɔ kɛ pia, konɛ a nine nɛ su Mawu siwo ɔ nɔ. Nɛnɛ, kikɛmɛ a hɛ kɛ nɔ fɔmi nɛ ɔ he je nɛ Yuda bi ɔmɛ ngɛ ye nya poe nɛ ɔ nɛ!

8 Jehanɛ, nyɛ Yuda bi nɛ nyɛ ngɛ hiɛ ɔ, mɛni he je nyɛ he we yi kaa Mawu ma nyɛ ma tle ni gbogboehi si ɔ?

9 ⓘ “Imi nitsɛ hu jinɛ i susu kaa ma bɔ mɔde kɛ puɛ Yesu, Nazaret no ɔ ní tsumi ɔ.

10 I na pee jã hulɔ ngɛ Yerusalem. Osɔfo nikɔtɔma amɛ nitsɛmɛ ngmɛ mi blɔ nɛ i wa nihi nɛ ji Mawu bimɛ ɔ yi mi. I wo a ti nihi babauu tsu, nɛ ke a bu mɛ gbenɔ fɔ ɔ, imi hu ye nya ngɛ mi.

11 I ha nɛ a wa mɛ yi mi si abɔ ngɛ kpe he ɔmɛ tsuo; nɛ i bɔ mɔde kaa a ngmɛɛ a hemi kɛ yemi ɔ he. Ye hɛ dɔ wo mɛ, nɛ i tiu mɛ kɛ ya ma se zugbahi a nɔ tɔɔ ya wa mɛ yi mi.

Paulo sɛɛ e tsui tsakemi he ní

(<x>510 9:1-19</x>; <x>510 22:6-16</x>)

12 “Enɛ ɔ he je nɛ i pue nɔ kɛ ho Damasko ya kɛ ye dɛ mi womi nɛ osɔfo nikɔtɔma amɛ ha mi kɛ tsɔɔ kaa mɛ lɛ a ha mi he wami.

13 Nɛnɛ, piani katakata, benɛ i nyɛɛ blɔ kɛ yaa a, i na la ko nɛ kpɛ nylamnylam pe pu po kɛ je hiɔwe ba bɔle mi, kɛ nihi nɛ kɛ mi nyɛɛ ɔ.

14 Wɔ tsuo wa ya nɔ si, nɛ i nu gbi ko nɛ kɛ mi tu munyu ngɛ Hebri mi ke, ‘Saulo, Saulo! Mɛni he je nɛ o ngɛ mi yi mi wae? Ke o ke o kɛ mi ná a, o he awi kɛkɛ o ngɛ yee, kaa na nɛ ngɛ e tsɔ̃lɔ tso koli hɛɛe.’

15 Kɛkɛ nɛ i bi ke, ‘Nyɔmtsɛ, mo mɛnɔ?’ Nyɔmtsɛ ɔ he nɔ ke, ‘Imi ji Yesu nɛ o ngɛ lɛ yi mi wae ɔ.

16 Se, tee si ngɛ zugba, nɛ o da si. I je ye he kpo kɛ tsɔɔ mo, konɛ ma tsɔ mo, nɛ o ya ye ye he odase. Bɔ nɛ i je ye he kpo kɛ tsɔɔ mo mwɔnɛ ɔ, kɛ bɔ nɛ ma tsɔɔ mo hwɔɔ se ɔ, o ma ya fiɛ kɛ ha nihi tsuo.

17 Ma je mo kɛ je yayami nɛ Israel ma a maa pee mo ɔ mi, nɛ ma je li ɔmɛ nɛ ma tsɔ mo a ngɔ ɔ hu a be mo awi ko nyɛe maa ye.

18 O ma ya bli a hɛngmɛ, konɛ a je diblii mi kɛ ba la he; o ma ya je mɛ kɛ je Abosiami ɔ he wami sisi kɛ ba Mawu ngɔ. Kɛkɛ ɔ, a ma he imi Yesu nɛ a ye, nɛ Mawu maa ngɔ a he yayami kɛ pa mɛ, nɛ a maa ba a hi he ngɛ nihi nɛ Mawu hla kɛ pee e ma a a kpɛti.’

Paulo sɛɛ bɔ nɛ e fiɛ he ní

19 “Matsɛ Agripa, lɔ ɔ he ɔ, nina nɛ a je tsɔɔ mi kɛ je hiɔwe ɔ, i ye nɔ saminya.

20 ⓙ I fiɛ ha ni ɔmɛ tsuo ke a tsake a tsui, nɛ a kpale kɛ ba Mawu ngɔ, nɛ a pee níhi nɛ tsɔɔ kaa a tsake a tsui niinɛ. I je fiɛmi nɛ ɔ sisi kɛ je Damasko kɛ ya gu Yerusalem kɛ ya muɔ Yudea zugba a, kɛ ya su ma je li ɔmɛ a ngɔ.

21 Enɛ ɔ he nɛ Yuda bi ɔmɛ ba nu mi ngɛ sɔlemi we ɔ, nɛ a ka kaa a maa gbe mi ɔ nɛ.

22 Se Mawu piɛ ye he kɛ ba su mwɔnɛ ligbi nɛ ɔ, nɛ i daa si ngɛ nyɛ hɛ mi kɛ ngɛ odase yee kɛ ngɛ nimli tsuo tsɔɔe, nimli wawi kɛ nimli nguahi tsuo. Nɔ́ nɛ Mose kɛ gbali ɔmɛ de to kaa e maa ba mi ɔ, lɔ ɔ nɔuu nɛ i ngɛ dee.

23 ⓚ Lɔ ɔ ji kaa Kristo ɔ maa na amanehlu, nɛ e ba pee kekleekle nɔ nɛ maa te si kɛ je gbeje. E ma ba fiɛ ha Yuda bi, kɛ ma je li tsuo ke a ma nyɛ ma he a yi wami, nɛ enɛ ɔ maa pee kaa la kɛ ha mɛ.”

24 Benɛ Paulo je e nya kikɛ nɛ ɔ, Festo de kɛ ngmlaa kɛ wo lɛ ke, “Paulo, o yi mi ngɛ puɛe pɛ! Womi kasemi sɔuu lɛ wo mo godo nɛ ɔ nɛ!”

25 Paulo he nɔ ke, “Nɛnɛ Festo, i nui godo; anɔkuale ɔ i ngɛ tue ɔ nɛ.

26 Matsɛ Agripa, i ngɛ munyu tue kɛ kã kɛ ngɛ mo tsɔɔe, ejakaa o le sane nɛ ɔmɛ a mi. I he we yi kaa ní nɛ ɔmɛ eko ngɛ nɛ a kɛ laa mo; ejakaa a pee we ekoeko ngɛ kɔkɔɔmi.

27 Matsɛ Agripa, níhi nɛ gbali ɔmɛ ngma a, tse o heɔ yeɔ? I le kaa o heɔ yeɔ!”

28 Agripa de Paulo ke, “Be kpiti nɛ ɔ mi ɔ, anɛ o susu kaa o ma nyɛ plɛ ye yi mi nɛ ma pee Kristo se nyɛɛlɔ lo?”

29 Paulo he nɔ ke, “Be ɔ kɛ jio, e kɛ́ we jio; i na nɛ jinɛ Mawu ha e ba mi kaa pi mo nɔ kake kɛkɛ, se mohu nihi tsuo nɛ ngɛ mi tue bue mwɔnɛ nɛ ɔ hu ko pee kaa bɔ nɛ i ngɛ nɛ ɔ; kɔsɔkɔsɔ nɛ ɔmɛ pɛ lɛ a ko wo mɛ!”

30 Kɛkɛ nɛ matsɛ ɔ wo e he nɔ, nɛ amlaalo ɔ, kɛ Bernike, kɛ ni kpa amɛ hu te si ja nɔuu.

31 Benɛ a gbla a he si bɔɔ ɔ, a de ke, “Nyumu nɛ ɔ pee we nɔ́ ko nɛ sa kaa a gbe lɛ, loo a wo lɛ tsu.”

32 Agripa de Festo ke, “Nyumu nɛ ɔ ngɔɛ e sane ɔ kɛ ha we Kaisare ɔ ke e ye jinɛ a ko ngmɛɛ e he.”