Ni Tsumi 25

Paulo ngɔ e sane ɔ kɛ ha Roma matsɛ ɔ

1 Festo ba bɔni amlaalo yemi ligbi etɛ se pɛ kɛkɛ nɛ e je Kaisarea kɛ ho Yerusalem ya.

2 Kɛkɛ nɛ osɔfo nikɔtɔma amɛ, kɛ Yuda ma nimeli ɔmɛ ba po Paulo nya ha lɛ. A kpa Festo pɛɛ

3 ke e hyɛ a hɛ mi, nɛ e tsɔ nɛ a ya ngɔ Paulo kɛ ba Yerusalem; mɛɛ lɛɛ a so e yi nɔ nɛ a maa gbe lɛ ngɛ blɔ ɔ nɔ.

4 Se Festo he nɔ ke, “A wo Paulo tsu ngɛ Kaisarea, nɛ imi nitsɛ hu e be kɛe nɛ ma ya lejɛ ɔ.

5 Nyɛ ha nyɛ nya dali ɔmɛ nɛ a kɛ mi nɛ ya Kaisarea, nɛ ke sane yaya ko ngɛ nyumu ɔ he ɔ, a de ngɛ lejɛ ɔ.”

6 Festo ye maa pee ligbi kpaanyɔ, loo nyɔngma ngɛ a ngɔ, kɛkɛ nɛ e pue nɔ kɛ ho Kaisarea ya. E nɔ jena a, e ya hi kojomi sɛ ɔ nɔ, nɛ e fa ke a kɛ Paulo nɛ ba.

7 Benɛ Paulo ba lejɛ ɔ, Yuda bi nɛ je Yerusalem kɛ ba a ba bɔle lɛ kɛ kpe, nɛ a kɛ sanehi babauu nɛ nya wa ba po e nya. Se níhi nɛ a de kɛ si Paulo ɔ, a nyɛ we nɛ a tsɔɔ kaa ní ɔmɛ ngɛ mi niinɛ.

8 Paulo je e nya, nɛ e de ke, “I tɔ we Yuda bi ɔmɛ a mlaa ko; i pee we nɔ́ ko kɛ ble we sɔlemi we ɔ, nɛ Kaisare ɔ hu i tɔ we e nɔ.”

9 Se akɛnɛ Festo hla kaa e maa sa Yuda bi ɔmɛ a hɛ mi he je ɔ, e bi Paulo ke, “O suɔ kaa o maa ya Yerusalem nɛ ma ya kojo mo ngɛ lejɛ ɔ ngɛ kikɛmɛ a sane nɛ ɔmɛ a he lo?”

10 Paulo de lɛ ke, “Kaisare ɔ nitsɛ kojomi sɛ ɔ hɛ mi, he nɛ sa kaa a kojo mi ngɛ ɔ, lejɛ ɔ i daa si ngɛ nɛ ɔ nɛ. I tɔ we Yuda bi a nɔ kaa bɔ nɛ mo nitsɛ o le ɔ.

11 Ke i ye sane yaya ko, nɛ i pee nɔ́ nɛ sa gbenɔ ɔ, i de we ke a ngmɛɛ ye he. Se ke sanehi nɛ ni nɛ ɔmɛ ngɔ kɛ ngɛ ye nya poe nɛ ɔ be mi ɔ, nɔ ko be nyɛe maa ngɔ mi ngɔ wo a dɛ mi. I suɔ kaa Kaisare ɔ nitsɛ nɛ ye ye sane ɔ.”

12 Kɛkɛ nɛ Festo kɛ e ga woli ɔmɛ hla munyu ɔ mi; nɛ lɔ ɔ se ɔ, e de ke, “Nɛ o ngɔ o sane ɔ kɛ ha Kaisare ɔ nitsɛ ke e ye ha mo ɔ, ma ha nɛ o ya Kaisare ɔ ngɔ.”

Paulo ngɛ Agripa kɛ Bernike a hɛ mi

13 Be bɔɔ ko se ɔ, Matsɛ Agripa kɛ Bernike ba Kaisarea nɛ a ba nga Festo kɛ pee lɛ baba hee.

14 Benɛ e ye be saii ngɛ lejɛ ɔ, Festo bɔ matsɛ ɔ Paulo he sane ɔ. E de lɛ ke, “Felike je pã mi no ko he ngɛ tsu mi ngɛ hiɛ ɔ.

15 Benɛ i ya Yerusalem ɔ, Yuda osɔfo nikɔtɔma amɛ, kɛ ma nimeli ɔmɛ ba ye ngɔ ba po e nya, nɛ a kpa mi pɛɛ ke ma bu lɛ fɔ.

16 Se i de mɛ ke, e be Roma bi a mlaa a mi kaa a buu nɔ ko fɔ ke a gbe lɛ, ja nɔ nɛ a po e nya a, kɛ e nya poli ɔmɛ kpe hɛ mi kɛ hɛ mi nɛ nɔ ɔ ná he blɔ je e nya ngɛ sane nɛ a ngɔ fɔ e nɔ ɔ he lolo.

17 Lɔ ɔ he ɔ, benɛ a nya ba bua ngɛ hiɛ ɔ, i tui tsle, se e nɔ jena a, i ya hi kojomi sɛ ɔ nɔ, nɛ i fa ke a ngɔ nyumu ɔ kɛ ba.

18 E nya poli ɔmɛ ba da si; se sane yayahi nɛ i susu kaa a kɛ ma ba po e nya a, a kɛ kake ngmelu po bɛ.

19 Nɔ́ nɛ a ngɔ kɛ ba ji mɛ nitsɛmɛ a Mawu jami he nɔ́ jemi sane komɛ, kɛ Yesu ko nɛ gbo, nɛ Paulo lɛɛ e ke e ngɛ je mi kɛ mwɔɔ he sanehi.

20 I li bɔ nɛ ma pee kɛ hla kikɛmɛ a sane nɛ ɔmɛ a mi. Lɔ ɔ he ɔ, i bi Paulo ke e suɔ nɛ e ya Yerusalem nɛ a ya ye e sane ɔ ngɛ lejɛ ɔ lo?

21 Se Paulo de ke e ngɔ e sane ɔ kɛ ha Kaisare ɔ nɛ e ye ha lɛ. E suɔ kaa a bu e he kɛ yaa si Kaisare ɔ nitsɛ maa hyɛ e sane ɔ mi. Lɔ ɔ he ɔ, i fa ke a ngɔ lɛ ngɔ to, nɛ́ a bu e he kɛ yaa su be nɛ ma ha nɛ a ngɔ lɛ kɛ ya Kaisare ɔ ngɔ.”

22 Agripa de Festo ke, “I suɔ kaa imi nitsɛ ma bu nyumu nɛ ɔ tue.” Festo he nɔ ke, “Hwɔɔ ɔ, ma ha nɛ o ba bu lɛ tue.”

23 E nɔ jena a, Agripa kɛ Bernike mia saminya kɛ ba, nɛ a kɛ asafoatsɛmɛ ɔmɛ, kɛ ma nimeli ɔmɛ tsuo sɛ tsu mi he nɛ a kpee ngɛ ɔ. Festo fa nɛ a kɛ Paulo ba tsu ɔ mi.

24 Kɛkɛ nɛ Festo de ke, “Matsɛ Agripa, kɛ nyɛ nihi tsuo nɛ nyɛɛ kɛ wɔ ngɛ hiɛ ɔ, nyɛ ngɛ nyumu nɛ ɔ hyɛe. Yuda bi tsuo nɛ ngɛ Yerusalem, kɛ hiɛmɛ nɛ ɔ hulɔ ɔ ba po e nya wawɛɛ. A kpa ngmlaa wo mi ke e sɛ kaa e hii je mi hu.

25 Se imi lɛɛ i na kaa e pee we nɔ́ ko nɛ sa gbenɔ. Akɛnɛ lɛ nitsɛ e ngɔ e sane ɔ kɛ ha Roma matsɛ ɔ he je ɔ, i ma nya si kaa a ngɔ lɛ kɛ ya ha Roma matsɛ ɔ.

26 Se i be sane tutuutu ko nɛ ma ngma ya ha Roma matsɛ ɔ. Enɛ ɔ he nɛ i kɛ lɛ ba nyɛ hɛ mi, titli ɔ, mo Matsɛ Agripa o hɛ mi, konɛ ke o hla sane ɔ mi ɔ, ma na nɔ́ ko nɛ ma ngma.

27 E peeɔ mi kaa e dɛ kaa a ngɔɔ pã mi no ko kɛ maneɔ, nɛ a tsɔɔ we nɔ́ pɔtɛɛ nɛ e pee.”