Ni Tsumi 24

Yuda bi ɔmɛ po Paulo nya

1 Ligbi enuɔ se ɔ, Anania, osɔfo nɔkɔtɔma pe kulaa a, kɛ ma nikɔtɔma komɛ, kɛ otsiamɛ ko nɛ a tsɛɛ lɛ Tertulo ɔ ba Kaisarea. A ba Felike ngɔ, nɛ a ba po Paulo nya ha lɛ.

2 A tsɛ Paulo kɛ ba; kɛkɛ nɛ Tertulo bɔni e nya pomi ke, “Wa nɔmo Felike, o ngɛ wa nɔ hyɛe saminya kɛ juɛmi nɛ mi kuɔ, nɛ enɛ ɔ ha wa tue mi jɔ wɔ be babauu. A to blɔ nya kɛ ngɛ ní komɛ tsakee kɛ ha ma a nɔ yami.

3 Be tsuaa be ɔ, wa ngɛ ní nɛ ɔmɛ a he nyae ngɛ he tsuaa he; enɛ ɔ he je ɔ, wa naa mo si.

4 I sume kaa ma tu munyu fuu kɛ puɛ o be. I kpa mo pɛɛ, naa wɔ mɔbɔ, nɛ o bu wɔ tue kpiti.

5 Wa na nyumu nɛ ɔ kaa ma ywialɔ. E woɔ Yuda bi a yi mi ngɛ he tsuaa he ke a tsɔ atuã. Jehanɛ hu, kuu nɛ a tsɛɛ Nazaree ɔ a nyatsɛ kpanaku ji lɛ.

6 E ka tete po kaa e ma ble sɔlemi we ɔ, se wa nu lɛ. [Jinɛ wa to kaa wa maa kojo lɛ ngɛ wa mlaa a nya.

7 Se asafoatsɛngua Lisia ba kpɔ lɛ ngɛ wa dɛ kã nya, nɛ e kɛ lɛ ho.]

8 E fa nihi nɛ ngɛ Paulo nya poe ɔ ke a ba mo nitsɛ o ngɔ. Ke o ta e nya mi ɔ, mo nitsɛ o maa nu níhi tsuo nɛ waa kɛ ngɛ e nya poe ɔ.”

9 Yuda bi ɔmɛ hu fia Tertulo nɔ́ ɔ se pɛpɛɛpɛ kaa bɔ nɛ e de ɔ.

Paulo je e nya ngɛ Felike hɛ mi

10 Jehanɛ ɔ, amlaalo ɔ fɔ Paulo nine ke e tu munyu. Kɛkɛ nɛ Paulo wo e nya nɔ nɛ e de ke, “I le kaa pi mwɔnɛ nɛ ɔ nɛ o bɔni kojomi ngɛ zugba nɛ ɔ nɔ, lɔ ɔ he ɔ, i ná bua jɔmi saminya kaa ma je ye nya ngɛ o hɛ mi.

11 Ke mo nitsɛ o bu ɔ, o maa na kaa ligbi nyɔngma kɛ enyɔ pɛ ji nɛ ɔ nɛ i ba be kɛ ho Yerusalem ya nɛ ma ya ja Mawu.

12 Yuda bi ɔmɛ nɛ́ kaa i kɛ nɔ ko ngɛ nya sãe ngɛ sɔlemi we ɔ mi a nɛ́ hu kaa i ngɛ ma a yi mi woe ngɛ kpe he ɔ, aloo he kpa ko ngɛ ma a mi.

13 Jehanɛ hu, sanehi nɛ a kɛ fɔ ye nɔ nɛ ɔ, a be nya nyɛe maa tsɔɔ kaa a ngɛ mi.

14 Niinɛ ɔ, wa nɛmɛ a Mawu ɔ i jaa ngɛ tsɔɔmi ɔ nɛ mɛɛ a deɔ ke e pi blɔ kpakpa a mi. Imi hu níhi nɛ a ngma ngɛ Mose mlaa a, kɛ gbali ɔmɛ a womi ɔmɛ a mi ɔ, i heɔ lɛ tsuo yeɔ.

15 I heɔ Mawu yeɔ kaa adesahi tsuo maa te si kɛ je gbeje hwɔɔ se, ni kpakpahi jio, yayami peeli jio; nimli nɛ ɔmɛ heɔ enɛ ɔ yeɔ ja nɔuu.

16 Lɔ ɔ he ɔ, i bɔɔ mɔde kaa daa nɛ ɔ ma pee nɔ́ nɛ maa sa Mawu, kɛ adesahi tsuo a hɛ mi, nɛ ye he nile be mi fɔ bue.

17 ⓕ “I hia blɔ kɛ je Yerusalem ya ye jeha babauu ngɛ ma se. Pee se ɔ, i kpale kɛ ba kɛ ye dɛ mi nike ní nɛ ma ba ha ye ma a mi bi komɛ, konɛ imi nitsɛ hu ma sã bɔ.

18 Benɛ i ngɛ kusumi ɔmɛ pee ɔ, a na mi ngɛ sɔlemi we ɔ. Jamɛ a be ɔ mi ɔ, i pee kusumi ɔ kɛ tsukɔ ye he gbe nya momo. Nɔ ko nɛ́ mi nɛ i kɛ nihi fuu daa si, jehanɛ hu, nɔ ko pee we basabasa ngɛ lejɛ ɔ.

19 Se Yuda bi komɛ nɛ je Asia a ngɛ lejɛ ɔ; mɛ mohu nɛ sa kaa a ba o hɛ mi, konɛ ke a ngɛ ye he sane ko ɔ, nɛ a ba jaje.

20 Nihi nɛ daa si ngɛ hiɛ ɔ amlɔ nɛ ɔ, mɛ nitsɛmɛ po, ke a na nɔ́ ko nɛ dɛ ngɛ ye he benɛ i daa si ngɛ kpe ngua a hɛ mi ɔ, a de.

21 ⓖ Nɔ́ pɛ nɛ a ko nyɛ de ji, benɛ i daa si ngɛ kpe ngua a hɛ mi ɔ, i wo ye gbi nɔ nɛ i de ke, ‘Mwɔnɛ ligbi nɛ ɔ, a ngɛ mi kojoe, ejakaa i heɔ yeɔ kaa ni gbogboehi maa te si kɛ ba wami mi ekohu.’ ”

22 Felike le Nyɔmtsɛ ɔ tsɔɔmi ɔ he sane saminya, lɔ ɔ he ɔ, e tsɛ̃ munyu ɔ ngɔ to, nɛ e de mɛ ke, “Ke asafoatsɛngua Lisia ba su kɛkɛ ma buá sane ɔ he.”

23 Lɔ ɔ se ɔ, e fa asafoatsɛ ɔ ke e ngɔ Paulo kɛ ho nɛ e ya bu e he, se e ha nɛ e na he jɔmi bɔɔ; nɛ ke e huɛmɛ ba nɛ a ba pee nɔ́ ko ha lɛ ɔ, e ko tsi mɛ blɔ.

Paulo ngɛ Felike kɛ Drusila a hɛ mi

24 Be saii se ɔ, Felike kɛ e yo Drusila ba. E yo ɔ, Yuda no ji lɛ. Felike ha a ya tsɛ Paulo kɛ ba. Benɛ Paulo ngɛ munyu tue ngɛ hemi kɛ yemi ngɛ Kristo Yesu mi he ɔ, e bu lɛ tue saminya.

25 Se benɛ Paulo ngɛ dami, he nɔ yemi, kɛ kojomi nɛ maa ba a he munyu tue ɔ, Felike ye gbeye wawɛɛ, nɛ e de lɛ ke, “Yaa lolo, ke i na deka a, ma tsɛ mo ekohu.”

26 Blɔɔ e hɛ ngɛ nɔ kaa Paulo ma ha lɛ sika, enɛ ɔ he je ɔ, ke pee ɔ, e tsɔɔ ya tsɛɔ Paulo, nɛ e kɛ lɛ ba sɛɛɔ ní.

27 Jeha enyɔ se ɔ, Porkio Festo ba ye Felike nane mi kaa amlaalo. Felike hla kaa e pee nɔ́ nɛ sa Yuda bi ɔmɛ a hɛ mi, lɔ ɔ he ɔ, e tsi Paulo nya ngɛ tsu ɔ mi.