1 Paulo hyɛ kpe ngua a mi bi ɔmɛ tsuo a hɛ mi kɛ kpe, nɛ e de ke, “Ye nyɛmimɛ Israel bi, kɛ ba su mwɔnɛ ligbi nɛ ɔ, i ba ye je mi saminya, nɛ ye he nile bui mi fɔ ngɛ Mawu hɛ mi.”
2 Kɛkɛ nɛ Anania, osɔfo nɔkɔtɔma pe kulaa a fa nihi nɛ daa si ngɛ e kasa nya a ke a gba e nya ma.
3 ⓑ Paulo de lɛ ke, “Mo hu Mawu ma gba mo ma kokooko; mo nɛ o ngɛ kaa gli nɛ a sa he kalo! Mo nɛ o blɔ nya ji kaa o hyɛ nɛ a kojo mi ngɛ mlaa a nya a, hyɛ kaa mo mohu o je mlaa a se fa ke a gba mi ma!”
4 Nihi nɛ daa si ngɛ e kasa nya a de lɛ ke, “Hyɛ! Mawu we osɔfo nɔkɔtɔma pe kulaa a o ngɛ jɛe nɛ ɔ?”
5 ⓒ Paulo he nɔ ke, “Ye nyɛmimɛ Israel bi, i li kaa lɛ ji osɔfo nɔkɔtɔma pe kulaa a. Ngmami ɔ deɔ ke, ‘O ma mi nɔkɔtɔma a, koo tu e he munyu yaya!’ ”
6 ⓓ Benɛ Paulo kpa si kaa kpe ngua mi bi ɔmɛ fa kake ji Saduki bi, nɛ fa hu pee ɔ Farisi bi ɔ, e wo e gbi nɔ wawɛɛ, nɛ e de ke, “Ye nyɛmimɛ Israel bi, Farisi no ji mi, nɛ ye fɔli hu Farisi bi ji mɛ. A ngɛ mi kojoe ngɛ hiɛ ɔ, ejakaa i heɔ yeɔ kaa hwɔɔ se ɔ, ni gbogboehi maa te si kɛ ba wami mi ekohu.”
7 Benɛ e de kikɛ nɛ ɔ kɛkɛ nɛ pɛ sɛ Farisi bi ɔmɛ, kɛ Saduki bi ɔmɛ a kpɛti, nɛ kpe ɔ mi gba enyɔ.
8 ⓔ (Saduki bi deɔ ke ni gbogboehi be si tee kɛ ba wami mi ekohu. A deɔ hu ke hiɔwe bɔfo ko be ɔ, mumi ko hu be. Se Farisi bi lɛɛ a heɔ ni etɛ nɛ ɔmɛ tsuo yeɔ.)
9 Huhui ɔ nya ba wa, nɛ mlaa tsɔɔli ɔmɛ nɛ ngɛ Farisi bi ɔmɛ a se ɔ te si kɛ pɛ wawɛɛ, nɛ a de ke, “Wɔɔ lɛɛ wa nɛ nɔ́ yaya ko ngɛ nɔmlɔ nɛ ɔ he! Alini mumi ko, loo hiɔwe bɔfo ko kɛ lɛ tu munyu niinɛ!”
10 Benɛ pɛ ɔ mi ba wa a, asafoatsɛngua a ye gbeye kaa eko ɔ, a ma tsɔtslɔɔ Paulo mi. Lɔ ɔ he ɔ, e fa e ta buli ɔmɛ ke a kple si nɛ a ya ngɔ Paulo ngɛ a dɛ pani nya, nɛ a kɛ lɛ nɛ ba mɔ ɔ mi.
11 Jamɛ a nyɔ ɔ mi ɔ, Nyɔmtsɛ ɔ ba da Paulo kasa nya, nɛ e de lɛ ke, “Koo ye gbeye. Bɔ nɛ o ye ye he odase ngɛ Yerusalem nɛ ɔ, ja o ya ye odase jã nɔuu ngɛ Roma hulɔ.”
A so Paulo yi nɔ
12 Benɛ je na a, Yuda bi ɔmɛ a ti ni komɛ ya so. A ka a he kita kaa a be ní yee, nɛ a be nɔ́ ko nue kɛ yaa si a maa gbe Paulo.
13 Nihi nɛ ya so nɛ a ka a he kita nɛ ɔ pe nimli nyingmi eywiɛ.
14 A ya osɔfo nikɔtɔma amɛ a ngɔ ya de ke, “Wa ka wa he kita kaa wa be wa nya mi nɔ́ ko woe kɛ yaa si wa maa gbe Paulo.
15 Lɔ ɔ he ɔ, nyɛɛ kɛ kpe ngua a mi bi ɔmɛ tsuo nyɛ ha nyɛ gbi ya su Roma asafoatsɛngua a. Nyɛ de lɛ ke e ngɔ Paulo ngɔ mane nyɛ. Nyɛɛ buá de lɛ ke nyɛ ngɛ hlae nɛ nyɛɛ hyɛ e sane ɔ mi fitsofitso. Se wɔɔ lɛɛ wa maa pee klaalo, nɛ wa maa gbe lɛ loko e maa su nyɛ ngɔ.”
16 Se Paulo nyɛmiyo bi ko nu ga nɛ a to ɔ he; nɛ e pue nɔ kɛ ya mɔ ɔ mi, nɛ e ya de Paulo.
17 Kɛkɛ nɛ Paulo tsɛ asafoatsɛmɛ ɔmɛ a ti nɔ kake, nɛ e de lɛ ke, “Ngɔɔ niheyo nɛ ɔ kɛ ya asafoatsɛngua a ngɔ; e hɛɛ sɛ gbi ko kɛ ha lɛ.”
18 Asafoatsɛ ɔ ngɔ niheyo ɔ kɛ ya asafoatsɛngua a ngɔ, nɛ e ya de lɛ ke, “Paulo, nɔ nɛ a bɔ lɛ pã a tsɛ mi, nɛ e de mi ke ma ngɔ niheyo nɛ ɔ kɛ ba o ngɔ, ejakaa e hɛɛ sɛ gbi ko kɛ ha mo.”
19 Asafoatsɛngua a nu niheyo ɔ nine si, nɛ e kɛ lɛ ya se, nɛ e bi lɛ ke, “Mɛni sane o ngɛ nɛ o ma de mi?”
20 E de lɛ ke, “Yuda nikɔtɔma amɛ to kaa a ma ba de mo nɛ hwɔɔ ɔ, o ngɔ Paulo kɛ ba kpe ngua a hɛ mi. A maa buá ma de enɛ ɔ kaa nɔ́ nɛ e sane ɔ mi nɛ kpe ngua a mi bi ɔmɛ ngɛ hlae nɛ a hyɛ fitsofitso.
21 Se moo lɛɛ koo kplɛɛ; ejakaa a ti nihi maa pee nyingmi eywiɛ kɛ se maa wo lɛ ka. A ka kita kaa a be ní yee, nɛ a be nɔ́ ko nue, ja a gbe Paulo lolo. A dla a he, nɛ a ngɛ o nya tue bue.”
22 Asafoatsɛngua a de niheyo ɔ ke, “Ko de nɔ ko nɔ ko ke o wo sane nɛ ɔ nɔ ta ha mi.” Kɛkɛ nɛ e wo niheyo ɔ blɔ.
A kɛ Paulo ya ha amlaalo Felike
23 Jehanɛ asafoatsɛngua a tsɛ asafoatsɛmɛ ɔmɛ a ti ni enyɔ kɛ ba e ngɔ, nɛ e de mɛ ke, “Nyɛ hla ta buli lafa enyɔ, okpɔngɔ ta buli nyingmi kpaago, kɛ akplɔ hɛɛli hu lafa enyɔ, nɛ a pee klaalo. Mwɔnɛ ɔ gbɔkuɛ ngmlɛ nɛɛ mi ɔ, a maa je hiɛ ɔ kɛ ya Kaisarea.
24 Nyɛ hla okpɔngɔ komɛ hu ha Paulo nɛ e hi nɔ; nɛ nyɛɛ kɛ lɛ ya ha amlaalo Felike slɔkee.”
25 Asafoatsɛngua a ngma womi, nɛ e de ngɛ mi ke,
26 “Womi nɛ ɔ je imi Klaudio Lisia, ye ngɔ kɛ yaa ha amlaalo Felike. Mo he manye oo, mo he manye!
27 Yuda bi ɔmɛ nu kikɛmɛ a nyumu nɛ ɔ, nɛ jinɛ a maa gbe lɛ. Se benɛ i ná le kaa Roma no ji lɛ ɔ, i kɛ ye ta buli ɔmɛ ya kpɔ̃ lɛ.
28 I hla kaa ma le nɔ́ he je nɛ a ngɛ e nya poe ɔ. Lɔ ɔ he ɔ, i kɛ lɛ ya a kpe ngua a hɛ mi.
29 Nɔ́ nɛ i na ji, nyumu ɔ pee we nɔ́ ko nɛ sa kaa a gbe lɛ, loo a wo lɛ tsu tete; e nya nɛ a po ɔ kɔɔ mɛ nitsɛmɛ a mlaa he nɔ jemi sane komɛ a he.
30 Se benɛ i ná le kaa a so e yi nɔ nɛ a maa gbe lɛ ɔ, i pee ye yi mi kaa a ngɔ lɛ kɛ ba o ngɔ amlɔ nɔuu. I de e nya poli ɔmɛ hu ke sanehi nɛ a ngɛ kɛ si lɛ ɔ, a ba o ngɔ, konɛ a ba jaje.”
31 Kɛkɛ nɛ ta buli ɔmɛ pee kaa bɔ nɛ a fa mɛ ɔ. A ngɔ Paulo, nɛ jamɛ a nyɔ ɔ mi nɔuu a kɛ lɛ ba Antipatri.
32 E nɔ jena a, ta buli nane nyɛɛli ɔmɛ kpale a se kɛ ba mɔ ɔ mi ekohu, nɛ a si okpɔngɔ ta buli ɔmɛ, konɛ a kɛ lɛ nɛ ho.
33 Benɛ a su Kaisarea a, a kɛ womi ɔ ya ha amlaalo ɔ, nɛ a tu Paulo hu ngɔ wo e dɛ mi.
34 Amlaalo ɔ kane womi ɔ, nɛ e bi Paulo kpokpa nɔ he nɛ e je. Jehanɛ, benɛ e ná le kaa Paulo je Kilikia a,
35 e de lɛ ke, “Nihi nɛ kɛ mo na a, ke a ba su hiɛ ɔ konɛ ma bu mo tue.” Kɛkɛ nɛ e fa ke a ngɔ Paulo kɛ ya mɔ ɔ mi, nɛ a ya bu e he ngɛ lejɛ ɔ.