Ni Tsumi 22

1 “Ye nyɛmimɛ Israel bi, i kpa nyɛ pɛɛ, nyɛɛ bu mi tue nɛ ma je ye nya!”

2 Benɛ ni ɔmɛ nu kaa Hebri gbi e kɛ mɛ ngɛ tue ɔ, a pee dii pe kekle ɔ. Kɛkɛ nɛ e tsa nɔ ke,

3 ⓨ “Yuda no ji mi; nɛ a fɔ mi ngɛ Tarso ngɛ Kilikia mohu, se Yerusalem hiɛmɛ nɛ ɔ nɛ a lɛ mi ngɛ. Gamaliel lɛ tsɔɔ mi ní. A tsɔse mi bɔ nɛ sa ngɛ wa nɛmɛ ɔmɛ a mlaa a nya. I kplɛɛ we nɔ́ ngɛ Mawu he kaa bɔ nɛ nyɛ tsuo nyɛ ngɛ pee mwɔnɛ nɛ ɔ.

4 ⓩ Nihi nɛ hɛɛ kikɛmɛ a tsɔɔmi nɛ ɔ mi ɔ, i wa mɛ yi mi, nɛ ni komɛ po gbo ngɛ mi. I nuɔ nyumuhi kɛ yihi tete kɛ ya woɔ tsu.

5 Osɔfo nɔkɔtɔma pe kulaa a, kɛ kpe ngua a tsuo ma nyɛ maa ye mi odase. Mɛ nɔuu lɛ a ha mi womi nɛ ma kɛ ya ha wa nyɛmimɛ Yuda bi nɛ ngɛ Damasko ɔ. Lɔ ɔ he ɔ, jinɛ i yaa lejɛ ɔ, nɛ ma ya nuu nihi nɛ hɛɛ kikɛmɛ a tsɔɔmi nɛ ɔ mi kɛ ba Yerusalem, konɛ a gbla a tue.”

Paulo sɛɛ nɔ́ nɛ ba loko e tsake e tsui

(<x>510 9:1-19</x>; <x>510 26:12-18</x>)

6 “Benɛ i nyɛɛ blɔ kɛ yaa Damasko, nɛ e piɛ bɔɔ pɛ nɛ ma su maa pee piani pu dadɛ be mi ɔ, tlukaa a, la nɛ nya wa ko kpɛ nylam kɛ je hiɔwe ba bɔle mi.

7 I tsɔ fia si, nɛ i nu gbi ko nɛ bi mi ke, ‘Saulo, Saulo! Mɛni he je nɛ o ngɛ mi yi mi wae ɔ?’

8 I he nɔ ke, ‘Mo mɛnɔ, Nyɔmtsɛ?’ E de mi ke, ‘Imi ji Yesu, Nazaret no ɔ nɛ o ngɛ lɛ yi mi wae ɔ!’

9 Nihi nɛ kɛ mi nyɛɛ ɔ na la a, se gbi ɔ nɛ kɛ mi tu munyu ɔ lɛɛ a nui.

10 I bi ke, ‘Nyɔmtsɛ, kɛ ma pee kɛɛ?’ Nyɔmtsɛ ɔ de mi ke, ‘Tee si nɛ o ya Damasko, nɛ lejɛ ɔ a maa tsɔɔ mo níhi tsuo nɛ Mawu to ha mo kaa o pee ɔ.’

11 La nɛ kpɛ ɔ ha nɛ i hyɛ we nɔ́ hu; lɔ ɔ he ɔ, nihi nɛ kɛ mi nyɛɛ ɔ ta ye dɛ mi, nɛ a kɛ mi ya su Damasko.

12 “Nyumu ko ngɛ jamɛ a ma a mi nɛ a tsɛɛ lɛ Anania. E jaa Mawu anɔkuale mi; nɛ e yeɔ Mose mlaa a nɔ pɛpɛɛpɛ. Yuda bi tsuo nɛ ngɛ Damasko ɔ tuɔ e he munyu kpakpa.

13 Lɛ nɛ e ba ye ngɔ, nɛ e ba da ye kasa nya, nɛ e de mi ke, ‘Ye nyɛminyumu Saulo, hyɛ nɔ́!’ Jamɛ a ngmlɛfia a nɔuu ɔ, i bɔni nɔ́ hyɛmi ekohu, nɛ i na lɛ.

14 E de mi ke, ‘Wa nɛmɛ ɔmɛ a Mawu ɔ hla mo ngɔ to, konɛ o le e suɔmi nya ní, nɛ o na e Tsɔlɔ nɛ peeɔ nɔ nɛ da a, konɛ o nu lɛ nitsɛ e nya mi gbi.

15 Ejakaa o ma ba ye e he odase; nɛ níhi tsuo nɛ o nu nɛ o na a, o maa fiɛ ha nɔ tsuaa nɔ.

16 Mɛni he je nɛ o ngɛ tsle toe? Tee si nɛ o ha a sɔle mo ngɛ Nyɔmtsɛ ɔ biɛ mi, nɛ o kpa Mawu pɛɛ nɛ e ngɔ o he yayami kɛ pa mo.’

Nyɔmtsɛ ɔ de Paulo ke e ya fiɛ ha ma je li ɔmɛ

17 “I kpale ye se kɛ ba Yerusalem ekohu; nɛ benɛ i ya ngɛ sɔlee ngɛ sɔlemi we, nɔ́ nɔ ye nɔ.

18 Nɛ i na Nyɔmtsɛ ɔ nɛ ngɛ mi dee ke, ‘Pee esɔ nɛ o je Yeruslem mlamlaamla, ejakaa nihi nɛ ngɛ hiɛ ɔ, ye he odase nɛ o ngɛ yee ɔ, a be tue bue.’

19 I he nɔ ke, ‘Nyɔmtsɛ, mɛ nitsɛmɛ a le kaa sa a, imi nɔuu lɛ i yaa kpe he ɔmɛ, nɛ nihi nɛ he mo ye ɔ, i ya nuɔ mɛ, nɛ i fiaa mɛ ní.

20 ⓐ Benɛ a gbe Stefano, nɔ nɛ ye o he odase ɔ, imi hu i ngɛ lejɛ ɔ. Ye bua jɔ e gbenɔ ɔ he, nɛ nihi nɛ gbe lɛ ɔ, imi lɛ i bu a tade ɔmɛ a he.’

21 Kɛkɛ nɛ Nyɔmtsɛ ɔ de mi ke, ‘Yaa, ejakaa ma tsɔ mo ma je li ɔmɛ a ngɔ ngɛ tsitsaa lokoo!’ ”

22 Ni ɔmɛ bu Paulo tue hluu kɛ ba si e wo munyu nɛ ɔ ta, kɛkɛ nɛ a bɔni ngmlaa kpami wawɛɛ ke, “A kɛ lɛ nɛ ho! A gbe lɛ! E sɛ kaa e hii je mi!”

23 Benɛ ngmlaa ngɛ pɛe ɔ, a ngɛ a tade ɔmɛ fɔ̃e kɛ ngɛ hiɔwe yae kɛ a nɔ bunyuku kpii.

24 Kɛkɛ nɛ Roma asafoatsɛngua a fa e we bi ɔmɛ ke a kɛ Paulo nɛ ya mɔ ɔ mi. E de kɛ piɛ he hu ke a fia lɛ kpa kɛ hla e yi mi, konɛ a le nɔ́ he je nɛ a ngɛ ngmlaa kpae kɛ ngɛ lɛ woe kikɛ nɛ ɔ.

25 Se benɛ a fi lɛ nɛ a maa fia lɛ kpa a, Paulo bi asafoatsɛ nɛ daa si ngɛ lejɛ ɔ ke, “Roma no nɛ a kojo we lɛ, nɛ a bui lɛ fɔ ɔ, nyɛ ngɛ he blɔ kaa nyɛ fiaa lɛ kpa?”

26 Benɛ asafoatsɛ ɔ nu enɛ ɔ, e ya asafoatsɛngua a ngɔ, nɛ e ya de lɛ ke, “Mɛni o maa ho peemi ya nɛ ɔ? Nyumu ɔ, Roma no ji lɛ!”

27 Lɔ ɔ he ɔ, asafoatsɛngua a ba Paulo ngɔ, nɛ e ba bi lɛ ke, “Anɛ Roma no ji mo? De mi!” Paulo he nɔ ke, “Ee!”

28 Asafoatsɛngua a de lɛ ke, “Sika babauu i ha loko i ba pee Roma no.” Se Paulo he nɔ ke, “Imi lɛɛ a fɔ mi Roma no.”

29 Benɛ nihi nɛ kɛ lɛ yaa a nu enɛ ɔ, a laa ngɛ lejɛ ɔ amlɔ. Asafoatsɛngua a hu e tsui po; ejakaa e na kaa Paulo ɔ, mamoo Roma no ji lɛ, nɛ e wo lɛ kɔsɔkɔsɔ.

A kɛ Paulo ba kpe ngua a hɛ mi

30 Asafoatsɛngua a suɔ kaa e le nɔ́ tutuutu he je nɛ Yuda bi ɔmɛ po Paulo nya a. Lɔ ɔ he ɔ, e nɔ jena a, e je lɛ, nɛ e fa ke osɔfo nikɔtɔma amɛ, kɛ kpe ngua a mi bi ɔmɛ tsuo nɛ a ba bua a he nya. Kɛkɛ nɛ e ngɔ Paulo ba da a hɛ mi.