Ni Tsumi 21

Paulo ya Yerusalem

1 Waa kɛ mɛ ye sɛ; kɛkɛ nɛ lɛ ɔ hia. Lɛ ɔ nyɛɛ tɛɛ kɛ ba Koo; nɛ e nɔ jena a, wa ba Rodo, nɛ wa tsa nɔ kɛ je lejɛ ɔ kɛ ba Patara.

2 Wa na lɛ ko ngɛ lejɛ ɔ nɛ yaa Foinike, lɔ ɔ he ɔ, wa ya sɛ mi, nɛ wa pue nɔ.

3 Wa ba su he ko nɛ wa na Kipro jee ngɛ wa hɛ mi, se wa ya gu e leneyi je, nɛ wa ba Siria. Wa ba kple ngɛ Tiro, ejakaa lejɛ ɔ nɛ a ma je lɛ ɔ mi ní ngɛ.

4 Wa ya na nyɛmimɛ ɔmɛ ekomɛ ngɛ lejɛ ɔ, nɛ waa kɛ mɛ hi si otsi. Mawu Mumi ɔ ha nyɛmimɛ ɔmɛ de Paulo ke e ko tsa e blɔ hiami ɔ nɔ kɛ ya Yerusalem.

5 Se nɛ be nɛ wa to nɛ wa maa ye ngɛ a ngɔ ɔ nya ta a, wa si mɛ, nɛ wa pue blɔ. Nyumu ɔmɛ tsuo, kɛ a yi ɔmɛ, kɛ a bimɛ ɔmɛ ba je wɔ blɔ kɛ je ma a mi kɛ ya su wo ɔ nya. Wa kpla si ngɛ zia a nɔ ngɛ lejɛ ɔ, nɛ wa sɔle.

6 Lɔ ɔ se ɔ, waa kɛ mɛ ye sɛ; kɛkɛ nɛ wa ya sɛ lɛ ɔ mi, nɛ mɛ hu a kpale a se kɛ ho we mi ya.

7 Wa kpale wó lɛ kɛ tsa wa blɔ hiami ɔ nɔ kɛ je Tiro kɛ ba Pitolemai. Wa ya nga nyɛmimɛ ɔmɛ ngɛ lejɛ ɔ, nɛ waa kɛ mɛ hi si ligbi kake.

8 ⓣ E nɔ jena a, wa pue nɔ kɛ ho Kaisarea ya. Sɔmɔli kpaago ɔmɛ nɛ a hla ngɛ Yerusalem ɔ a ti nɔ kake nɛ a tsɛɛ lɛ Filipo ɔ ji sane kpakpa fiɛlɔ ngɛ ma nɛ ɔ mi. E pee wɔ nibwɔ, nɛ wa hi e we ɔ mi.

9 E ngɛ biyiwi eywiɛ nɛ gba we lolo, nɛ a fiɛɔ Mawu munyu ɔ.

10 ⓤ Wa hi lejɛ ɔ be saii; kɛkɛ nɛ gbalɔ ko nɛ a tsɛɛ lɛ Agabo ɔ je Yudea kɛ ba.

11 E ba wa ngɔ, nɛ e ba ngɔ Paulo mlɛ mi fimi nɔ́ ɔ, nɛ e kɛ fi lɛ nitsɛ e nanehi, kɛ e ninehi; nɛ e de ke, “Bɔ nɛ Mumi Klɔuklɔu ɔ de ji nɛ ɔ nɛ: Nɔ nɛ nɔ́ ji mlɛ mi fimi nɔ́ nɛ ɔ, kikɛ nɛ ɔ Yuda bi ɔmɛ maa pee lɛ ngɛ Yerusalem, nɛ a maa ngɔ lɛ ngɔ wo ma je li ɔmɛ a dɛ mi.”

12 Benɛ wa nu nɔ́ nɛ ɔ, waa kɛ nihi nɛ ngɛ lejɛ ɔ tsuo kpa Paulo pɛɛ ke e ko ya Yerusalem.

13 Se e he nɔ ke, “Mɛni nyɛ ngɛ pee nɛ ɔ; nyɛ ngɛ ya foe kɛ ma tsɔ ye tsui kpa? Imi lɛɛ, pi fimi nɛ a maa fi mi ngɛ Yerusalem ɔ kɛkɛ nɛ i ngɛ blɔ hyɛe, se mohu i pee klaalo nɛ ma gbo ngɛ Nyɔmtsɛ Yesu he ngɛ lejɛ ɔ.”

14 Wa nyɛ we nɛ wa tsake e yi mi tomi ɔ; lɔ ɔ he ɔ, nɔ́ nɛ wa nyɛ de kɛkɛ ji, “A pee nɔ́ nɛ Nyɔmtsɛ ɔ suɔ.”

15 Wa ye be saii ngɛ lejɛ ɔ; nɛ lɔ ɔ se ɔ, wa bo tlomi, nɛ wa pue nɔ kɛ yaa Yerusalem.

16 Nyɛmimɛ ɔmɛ nɛ je Kaisarea a, a ti ni komɛ kɛ wɔ ho; nɛ a ha wa ya to Minason. Nyumu nɛ ɔ, Kipro no ji lɛ, nɛ e ba pee kaselɔ pi mwɔnɛ.

Paulo ya slaa Yakobo

17 Benɛ wa su Yerusalem ɔ, nyɛmimɛ ɔmɛ he wɔ hɛmuɔ.

18 E nɔ jena a, waa kɛ Paulo ya Yakobo ngɔ. Wa ya na asafo nikɔtɔma amɛ ngɛ lejɛ ɔ.

19 Paulo nga mɛ; nɛ bɔ mɛ níhi nɛ Mawu gu e nɔ tsu ngɛ ma je li ɔmɛ a kpɛti ɔ tsuo.

20 Benɛ a bu lɛ tue kɛ ya si nyagbe ɔ, mɛ tsuo a je Mawu yi. Kɛkɛ nɛ a de lɛ ke, “Wa nyɛmi Paulo, hyɛ, Yuda bi akpe abɔ nɛ he ye nɛ ɔ, o le bɔ nɛ a fiɛ we Mose mlaa a he ha.

21 A nu kaa Yuda bi tsuo nɛ ngɛ ma je li ɔmɛ a kpɛti ɔ, nɔ́ nɛ o ngɛ mɛ dee ji kaa a ko ye Mose mlaa a nɔ, a ko po a bimɛ ɔmɛ, nɛ a ko tsu Yuda bi a kusumi hulɔ.

22 Bɔ tsuaa bɔ nɛ pee ɔ, a maa nu kaa o ba. Lɔ ɔ he ɔ, kɛ wa maa pee kɛɛ?

23 ⓥ Ga nɛ wa ngɛ mo woe ji nɛ ɔ nɛ: Nyumuhi eywiɛ ngɛ wa kpɛti nɛ wo Mawu si.

24 O kɛ mɛ nɛ ya, nɛ kusumi nɛ a peeɔ kɛ tsukɔɔ nɔ he ɔ, nyɛ ya pee, nɛ o wo hiɔ ɔ ha mɛ, konɛ a sɛ a yi. Ke o pee ja a, nihi tsuo maa na kaa níhi nɛ a ba sɛɛ ngɛ o he ɔ be mi, se mohu mo nitsɛ po o yeɔ Mose mlaa a nɔ sisiisi.

25 ⓦ Ma je li nɛ ba he ye ɔ, mɛɛ lɛɛ wa ngma mɛ womi ke wa ma nya si kaa a ko ye wɔ nya ní, a ko ye lo nɛ muɔ ngɛ mi kɛ mwɔɔ, nɛ a ko ye lohwe nɛ a kika e kuɛ hulɔ. Jehanɛ hu, a hyɛ a he nɔ saminya, nɛ a ko fiɛ nyumu kɛ yo yakayaka fiɛmi.”

26 Lɔ ɔ he ɔ, e nɔ jena a, Paulo kɛ nyumu ɔmɛ ho nɛ a ya pee kusumi kɛ tsukɔ a he. Lɔ ɔ se ɔ, e ya sɔlemi we ɔ, nɛ a ya wo si kaa otsi se ɔ, a maa gbe kusumi ɔ nya, nɛ a ti nɔ tsuaa nɔ ma ba sã bɔ.

A nu Paulo ngɛ sɔlemi we ɔ

27 Benɛ e piɛ bɔɔ nɛ otsi ɔ maa su ɔ, Yuda bi komɛ nɛ je Asia zugba a nɔ ɔ na Paulo ngɛ sɔlemi we ɔ. Nimli nɛ ɔmɛ sú ma kpekpemi ɔ tsuo ngɔ wo Paulo he, nɛ a nu lɛ.

28 A kpa ngmlaa ke, “Tsaatsɛmɛ Israel bi, nyɛ ba piɛ wa he! Kikɛmɛ a nyumu nɛ ɔ yaa he tsuaa he ya tuɔ munyu yaya kɛ gbee Israel ma a he guɛ; e tuɔ munyu kɛ siɔ Mose mlaa a, kɛ wa sɔlemi we ɔ. Jehanɛ lɛɛ e ngɔ ma je li tete kɛ ba sɔlemi we ɔ ba ble he klɔuklɔu nɛ ɔ hulɔ!”

29 ⓧ A de jã, ejakaa a na Paulo kɛ Trofimo nɛ je Efeso ɔ ngɛ ma a mi momo, nɛ a susu kaa Paulo kɛ lɛ ba sɔlemi we ɔ.

30 Ma a mi tsuo pee gidigidi; ni ɔmɛ tu kɛ ba kɛ fo, nɛ a ba nu Paulo; kɛkɛ nɛ a gbla lɛ kɛ je sɔlemi we ɔ kɛ je kpo. Amlɔ nɔuu ɔ, a nga sinya amɛ.

31 Benɛ basabasa peeli ɔmɛ ngɛ hlae nɛ a gbe Paulo ɔ, nɔ ko ya sɛɛ ha Roma asafoatsɛngua a ke Yerusalem tsuo pee gidigidi.

32 Amlɔ nɔuu ɔ, e ngɔ ta buli, kɛ asafoatsɛmɛ kɛ piɛ e he kɛ fo kɛ je mɔ ɔ mi kɛ ba na basabasa peeli ɔmɛ. Benɛ ni ɔmɛ na asafoatsɛngua a, kɛ ta buli ɔmɛ ɔ, a jɔɔ Paulo kongomi.

33 Jehanɛ asafoatsɛngua a hɛ lɛ kɛ su Paulo he, nɛ e pɛtɛ e he, nɛ e fa ke a wo lɛ kɔsɔkɔsɔ enyɔ. Kɛkɛ nɛ e bi ke, “Nyumu nɛ ɔ, mɛnɔ ji lɛ; nɛ mɛni e pee?”

34 Lejɛ ɔ tsuo pee hoo kɛ ngmlaa. Benɛ ni komɛ ngɛ nɔ́ kake dee ɔ, ni komɛ hu ngɛ nɔ́ kpa dee. Basabasa a nya ba wa bɔ nɛ asafoatsɛngua a nyɛ we nɛ e le nɔ́ tutuutu nɛ ngɛ nɔ yae. Lɔ ɔ he ɔ, e fa e we bi ɔmɛ ke a ngɔ Paulo kɛ ya mɔ ɔ mi.

35 Benɛ a su atlaakpe ɔ nya a, gidigidi ɔ nya ba wa tsɔ, nɛ e hia kaa ta buli ɔmɛ nɛ a hɛɛ Paulo ngɛ kɔɔhiɔ mi;

36 ejakaa ma kpekpemi ɔ tsuo nyɛɛ e se gidigidi kɛ ngmlaa ke, “A gbe lɛ!”

Paulo je e nya

37 Benɛ ta buli ɔmɛ miɔ nɛ a kɛ Paulo maa sɛ mɔ ɔ mi ɔ, e de asafoatsɛngua a ke, “Ma bi mo nɔ́ ko bɔɔ!” Asafoatsɛngua a bi lɛ ke, “O tuɔ Hela gbi lo?

38 Lɛɛ Egipt no ɔ nɛ tsɔ atuã, nɛ e ngɔ awi yeli akpe eywiɛ ngɔ pue e se kɛ ho nga a nɔ ya lingmi nɛ ɔ, pi mo?”

39 Paulo he nɔ ke, “Imi lɛɛ Yuda no ji mi. A fɔ mi ngɛ Tarso, Kilikia ma nɛ ngɛ biɛ saminya a. I kpa mo pɛɛ, ha nɛ i kɛ ma a nɛ tu munyu bɔɔ.”

40 Asafoatsɛngua a ngmɛ lɛ blɔ; kɛkɛ nɛ Paulo da atlaakpe ɔ nɔ, nɛ e fɔ ma a nine ke a pee dii. Benɛ lejɛ ɔ jɔ klanaa a, e tu munyu ngɛ Hebri gbi mi ke: