Ni Tsumi 20

Paulo ya Makedonia kɛ Akaya

1 Benɛ basabasa a se po ɔ, Paulo tsɔ ya tsɛ nyɛmimɛ ɔmɛ kɛ ba. E kɛ mɛ tu munyu, nɛ e wo mɛ he wami. Lɔ ɔ se ɔ, e sɛ mɛ, nɛ e pue nɔ kɛ ho Makedonia ya.

2 E kpa si kɛ gu lejɛ ɔ kpokpa amɛ a nɔ, nɛ e tu munyuhi saminya kɛ wo ni ɔmɛ he wami. Jehanɛ ɔ, e ba su Akaya,

3 nɛ e ye nyɔhiɔ etɛ ngɛ lejɛ ɔ. Se benɛ e ngɛ e he dlae nɛ e maa ya Siria a, e na le kaa Yuda bi ɔmɛ ngɛ e yi nɔ soe; Lɔ ɔ he ɔ, e to e yi mi kaa e maa kpale e se kɛ ya gu Makedonia ekohu.

4 E kɛ Piro nɛ je Beroya a e bi Sopater ho. Nihi hu nɛ piɛ e he ji Aristarko, kɛ Sekundo nɛ a je Tesalonika a, Gayo nɛ je Derbe ɔ, Tihiko kɛ Trofimo nɛ a je Asia a, kɛ Timoteo.

5 Ni nɛ ɔmɛ sɛ hlami, nɛ a ya mlɛ wɔ ngɛ Troya.

6 Abolokplolo nyami be ɔ se ɔ, wa wó lɛ kɛ je Filipi, nɛ ligbi enuɔ se ɔ, wa ya na mɛ ngɛ Troya, nɛ waa kɛ mɛ hi lejɛ ɔ otsi.

Paulo kɛ Troya asafo ɔ ye sɛ

7 Otsi ɔ mi kekleekle ligbi ɔ, wa bua wa he nya, konɛ waa ye suɔmi niye ní ɔ. Paulo tu munyu tsɔɔ ni ɔmɛ, nɛ e tsa fiɛmi ɔ nɔ kɛ ya su nyɔ mi kɔ̃kɔ̃ɔ̃kɔ̃; ejakaa e nɔ jena nɔuu e maa je.

8 A su kane fuu ngɛ hiɔwe tsu mi he nɛ a kpe ngɛ ɔ.

9 Jamɛ a be ɔ mi ɔ, niheyo ko nɛ a tsɛɛ lɛ Yutiko hii si ngɛ saflɛ ɔ nya. E bɔni mahe hwɔmi kɛ ya su be nɛ e sɛ mi vii, ejakaa Paulo munyu ɔ se kɛ. Tlukaa a, Yutiko tsɔ kɛ je siaudo etɛ ɔ nɔ kɛ ba nɔ zugba tim! Benɛ a ke a yaa wo e nɔ ɔ, e gbo momo.

10 Se Paulo kple si, nɛ e ya bu e nɔ, nɛ e fua lɛ. E de ni ɔmɛ ke, “Nyɛ ko jé ngmlaa; wami ngɛ e mi kɛ mwɔɔ!”

11 Benɛ Paulo kpale e se kɛ ya mɔ ɔ nɔ ɔ, e ku abolo, nɛ e ye. Lɔ ɔ se ɔ, e kɛ ni ɔmɛ sɛɛ ní hluu kɛ ya si je mi tsɔ wɛsɛɛ; kɛkɛ nɛ e si mɛ.

12 A kɛ niheyo ɔ ho we mi ya hɛ ngmengmle; nɛ a bua jɔ a he saminya.

Paulo je Troya kɛ ya Mileto

13 Wɔɔ lɛɛ wa sɛ hlami ya wó lɛ kɛ yaa Aso, nɛ́ wa ya ngɔ Paulo ngɛ lejɛ ɔ; ejakaa e kɛ wɔ ye sɛ momo kaa e maa gu nane blɔ.

14 Benɛ e ba ná wɔ ngɛ Aso ɔ, e ba sɛ lɛ ɔ mi, nɛ waa kɛ lɛ tsuo wa tsa nɔ kɛ ho Mitilene ya.

15 Wa hia kɛ je lejɛ ɔ, nɛ e nɔ jena a, wa ba su Kio hanɔ. E nɔ jena ekohu ɔ, wa ba su Samo, nɛ jena nɔ ekohu ɔ, wa ba Mileto.

16 Paulo pee e yi mi kaa e maa tsɔ Efeso he, konɛ e ko ya Asia. E ngɛ esɔ yee, konɛ ke e ma nyɛ ɔ, e ya ye Pentekoste ligbi ɔ ngɛ Yerusalem.

Paulo kɛ Efeso nikɔtɔma amɛ ye sɛ

17 Paulo tsɔ kɛ je Mileto nɛ a ya tsɛ asafo nikɔtɔma amɛ nɛ ngɛ Efeso ɔ kɛ ba.

18 Benɛ a ba a, e de mɛ ke, “Nyɛ nitsɛmɛ nyɛ le bɔ nɛ i kɛ nyɛ hi si be nɛ be ɔ tsuo, kɛ je kekleekle ligbi nɛ i ba Asia a.

19 I ba ye he si saminya kɛ sɔmɔ Nyɔmtsɛ ɔ. Jamɛ a be ɔ mi tsuo ɔ, Yuda bi ɔmɛ soɔ ye yi nɔ, nɛ a haa nɛ i naa nɔ́ wawɛɛ, nɛ i foɔ ya tete po.

20 Nyɛ le hu kaa níhi nɛ a he ngɛ se nami ha nyɛ ɔ, i laa we nyɛ ekoeko nɔ; se mohu i fiɛ, nɛ i tsɔɔ nyɛ ní faii ngɛ ma nɔ, kɛ nyɛ we ɔmɛ a mi tsuo.

21 I tu munyu kɛ tsɔɔ Yuda bi, kɛ ma je li tsuo ke a kpa yayami peemi, nɛ a ba Mawu ngɔ, nɛ a he wa Nyɔmtsɛ Yesu Kristo nɛ a ye.

22 Jehanɛ, kaa bɔ nɛ Mumi Klɔuklɔu ɔ de mi ke ma pee ɔ, i yaa Yerusalem, nɛ i li nɔ́ nɛ ma ya ba ye nɔ ngɛ lejɛ ɔ.

23 Nɔ́ nɛ i le kɛkɛ ji kaa ma tsuaa ma mi ɔ, Mumi Klɔuklɔu ɔ jeɔ tsɔɔ mi kaa a maa wo mi tsu, nɛ ma na amanehlu babauu.

24 ⓢ Se imi lɛɛ ye wami tete he hia we mi. Nɔ́ nɛ he hia mohu ji kaa ní tsumi nɛ Nyɔmtsɛ Yesu ha mi ɔ, ma tsu kɛ gbe nya. Lɔ ɔ ji kaa ma fiɛ sane kpakpa a nɛ tsɔɔ kaa Mawu mi mi hi ha adesahi tsuo ɔ.

25 “I kpa nyɛ tsuo nyɛ nɔ, nɛ i fiɛ Mawu matsɛ yemi ɔ he sane ɔ tsɔɔ nyɛ. Amlɔ nɛ ɔ, i le kaa nyɛ ti nɔ ko be mi nae hu.

26 Lɔ ɔ he ɔ, mwɔnɛ ligbi nɛ ɔ, i ngɛ nyɛ kita kae ke, ke nyɛ ti nɔ ko hɛ mi kpata a, lɛ nitsɛ e musu tloo lɛ.

27 Ejakaa i jaje Mawu yi mi tomi ɔ tsuo pɛpɛɛpɛ ngɔ tsɔɔ nyɛ nɛ i laa we nyɛ ba.

28 Lɔ ɔ he ɔ, nyɛɛ hyɛ nyɛ nitsɛmɛ nyɛ he nɔ saminya. Asafo ɔ tsuo nɛ Mumi Klɔuklɔu ɔ tu ngɔ wo nyɛ dɛ mi ɔ, nyɛɛ hyɛ nɔ bɔ nɛ sa. Mawu ngɔ e Bi ɔ kɛ sã bɔ, nɛ e kɛ dani asafo ɔ kɛ pee lɛ nitsɛ e nɔ, lɔ ɔ he ɔ, nyɛɛ hyɛ nɔ saminya.

29 I le kaa ke i je ɔ, nihi ma ba sɛ nyɛ kpɛti, nɛ a maa pee a ní kaa ogbetee ní hali; a be asafo ɔ yi bae.

30 Nyɛ nitsɛmɛ nyɛ kpɛti hu nihi maa ye lakpa kɛ puɛ nyɛmimɛ ɔmɛ a tue kɛ ya nyɛɛ a se.

31 Lɔ ɔ he ɔ, nyɛ hɛ nɛ hi nyɛ he nɔ be tsuaa be, nɛ nyɛ kai kaa i nga vo nyu kɛ tsɔɔ nyɛ ní nyɔ kɛ pia jeha etɛ sɔuu.

32 “Nyagbe ɔ, i ngɛ nyɛ tue kɛ ngɛ Mawu kɛ e dloomi munyu ɔ dɛ mi woe. Munyu ɔ maa wo nyɛ he wami, nɛ nyɛ maa da si kpikpitii; nɛ gbaami nɛ Mawu to kɛ ha e we bi ɔ, nyɛ hu nyɛ nine maa su nɔ.

33 Ye hɛ kɔɛ nyɛ ti nɔ ko sika hiɔ, loo sika tsu, loo tade nɔ.

34 Nyɛ nitsɛmɛ nyɛ le kaa nɔ́ tsuaa nɔ́ nɛ hia mi ɔ, ye nine nguɛ nɛ ɔmɛ i kɛ tsu loko i na; ye nyɛmimɛ ɔmɛ a hiami níhi po, imi lɛ i ha mɛ.

35 I ngɔ ní nɛ ɔmɛ tsuo kɛ to nyɛ okadi kaa jã nɛ e sa kaa a tsu ní nɛ a kɛ ye bua nihi nɛ be he wami ɔ, konɛ nyɛ kai Nyɔmtsɛ Yesu munyu nɛ lɛ nitsɛ e tu ɔ. E de ke, ‘Gbaami ngɛ nɔ́ hami mi pe nɔ́ sɔlemi mi.’ ”

36 Benɛ Paulo gbe munyu ɔ nya a, e kɛ mɛ tsuo kplã si, nɛ a sɔle.

37 Mɛ tsuo a wo yana, benɛ a ngɛ Paulo fuae kɛ ngɛ e nya he fiɔe ɔ.

38 Nɔ́ nɛ dɔ mɛ pe kulaa ji munyu nɛ je e nya ke, “Nyɛ be ye hɛ mi nae gblegbleegble hu ɔ.” Jehanɛ a ya je lɛ blɔ kɛ ya su lɛ ɔ he tɔɔ.