Ni Tsumi 19

Paulo ngɛ Efeso

1 Benɛ Apolo ngɛ Korinto ɔ, Paulo ya kpa ni ɔmɛ a nɔ kɛ ba su Efeso. E ba na nihi nɛ he Yesu ye ɔ a ti ni komɛ ngɛ lejɛ ɔ,

2 nɛ e bi mɛ ke, “Benɛ nyɛ he ye ɔ, anɛ nyɛ na Mumi Klɔuklɔu ɔ lo?” A de lɛ ke, “Wa nui hyɛ tete kaa Mumi Klɔuklɔu ko ngɛ.”

3 Paulo bi mɛ ekohu ke, “Lɛɛ kɛ a pee kɛ sɔle nyɛ kɛɛ?” A he nɔ ke, “Kaa bɔ nɛ Yohane tsɔɔ ɔ.”

4 ⓡ Paulo ya nɔ ke, “Yohane tsɔɔ kaa nihi nɛ tsake a tsui loko a sɔle mɛ. Nɛ e de Israel ma a ke, ‘Nyɛ he nɔ nɛ ma ngɛ ye se ɔ nyɛɛ ye. Lɛ ji Yesu ɔ nɛ.’ ”

5 Benɛ a nu enɛ ɔ, a sɔle mɛ ngɛ Nyɔmtsɛ Yesu biɛ mi.

6 Paulo kɛ e nine pue a nɔ, kɛkɛ nɛ a na Mumi Klɔuklɔu ɔ. A tu munyu ngɛ gbihi nɛ a nui mi, nɛ a fiɛ Mawu sɛ gbi ɔ.

7 Nyumuhi tsuo nɛ ngɛ lejɛ ɔ a yibɔ maa su nyɔngma kɛ enyɔ.

8 Paulo ye nyɔhiɔ etɛ sɔuu ngɛ lejɛ ɔ, nɛ e kɛ kã tu munyu kɛ tsɔɔ mɛ ní ngɛ kpe he ɔ. E bɔ mɔde kaa e ma ha nɛ a le Mawu matsɛ yemi ɔ he sane ɔ.

9 Se ni komɛ wa tue, nɛ a he we yi; nɛ ngɛ ni ɔmɛ tsuo a hɛ mi ɔ, a tu munyu yaya kɛ si Nyɔmtsɛ ɔ blɔ ɔ. Lɔ ɔ he ɔ, Paulo je a he nɛ e je kaseli ɔmɛ kɛ je a kpɛti; nɛ daa nɛ ɔ, e kɛ nihi ya hlaa níhi a mi ngɛ nɔ ko nɛ a tsɛɛ lɛ Tirano ɔ ni kasemi he.

10 Nɔ́ nɛ ɔ ya nɔ jeha enyɔ sɔuu, nɛ Yuda bi, kɛ ma je li tsuo nɛ a ngɛ Asia a nu Nyɔmtsɛ ɔ munyu ɔ.

Skeva bimɛ ɔmɛ

11 Mawu tsu nyakpɛ ní nguanguahi nɛ nɔ be kɛ gu Paulo nine nɔ.

12 A ngɔɔ dukuhi, kɛ tade hɛ mi hami bohi tete nɛ Paulo he sa he kɛ ya haa hiɔtsɛmɛ a nɔ, kɛkɛ ɔ, hiɔ taa; nɛ mumi yayami ɔmɛ jee a mi.

13 Yuda bi klaali komɛ nɛ ngɛ si kpae hu ka kaa a kɛ Yesu biɛ ma tsa nihi nɛ mumi yayami ngɛ a mi. A deɔ mumi yayami ɔmɛ ke, “Ngɛ Yesu nɛ Paulo ngɛ fiɛe ɔ biɛ mi ɔ, i ngɛ mo fae ke jee kpo kɛ je nɔmlɔ nɛ ɔ mi.”

14 Osɔfo nɔkɔtɔma pe kulaa nɛ a tsɛɛ lɛ Skeva, nɛ e ji Yuda no hulɔ ɔ binyumuhi kpaago ji nihi nɛ ngɛ kikɛmɛ a sane nɛ ɔ yee.

15 Se mumi yayami ɔ he nɔ, nɛ e de mɛ ke, “Yesu ɔ, i le lɛ, nɛ Paulo hu i le lɛ; se nyɛɛ lɛɛ mɛnɔmɛ ji nyɛ?”

16 Nyumu ɔ nɛ mumi yayami ɔ ngɛ e mi ɔ sá fɔ̃ a nɔ kitikiti, nɛ e plaa mɛ tsuo; nɛ a tu fo kɛ je jamɛ a we ɔ mi kɛ a he pahi, kɛ tadehi nɛ hía.

17 Benɛ Yuda bi, kɛ ma je li tsuo nɛ ngɛ Efeso nu nɔ́ nɛ ɔ, gbeye nu mɛ, nɛ a wo Nyɔmtsɛ Yesu hɛ mi nyami wawɛɛ nitsɛ.

18 Nihi nɛ he ye ɔ, a ti nihi babauu hu ba, nɛ ní yayamihi nɛ a pee ɔ, a ba jaje paa ngɛ ma a hɛ mi.

19 Kunya tsuli ɔmɛ hu a ti nihi babauu ngɔ a womi ɔmɛ kɛ ba pue si ngɛ ni ɔmɛ tsuo a hɛ mi nɛ a sã. Womihi nɛ a sã a tsuo a jua nɛ a bua nya a peeɔ sika hiɔ akpe nyingmi enuɔ sɔuu.

20 Nyakpɛ ní nguanguahi nɛ a tsu nɛ ɔ ha nihi babauu ngɛ hehi fuu ba nu Nyɔmtsɛ ɔ munyu ɔ, nɛ a he ye.

A pee basabasa ngɛ Efeso

21 Ní nɛ ɔmɛ a se ɔ, Mumi Klɔuklɔu ɔ ha Paulo to e yi mi kaa e ma ya gu Makedonia, kɛ Akaya kɛ ya su Yerusalem. E de ke, “Ke i su lejɛ ɔ, ma ya slaa Roma hulɔ.”

22 Lɔ ɔ he ɔ, e tsɔ e he piɛli enyɔ Makedonia. Mɛ ji Timoteo, kɛ Erasto; se lɛ nitsɛ lɛɛ e hi Asia be bɔɔ.

23 Be nɛ ɔ mi nɔuu ɔ, basabasa peemi wawɛɛ ko ba te si ngɛ Efeso ngɛ Nyɔmtsɛ ɔ blɔ ɔ he.

24 Sika hiɔ galɔ ko nɛ a tsɛɛ lɛ Demetrio ɔ kɛ sika hiɔ pee yo mawu nɛ a tsɛɛ lɛ Artemi ɔ jami he ɔ henɔhi. Enɛ ɔ ha nɛ e ní tsuli ɔmɛ na ní kpɔtɔɔ.

25 Lɔ ɔ he ɔ, e tsɛ e ní tsuli ɔmɛ, kɛ ni kpahi nɛ tsuɔ jamɛ a ní ɔ, nɛ e de mɛ ke, “Tsaatsɛmɛ, nyɛ le kaa kikɛmɛ a ga ní tsumi nɛ ɔ mi wa naa ní ngɛ.

26 Jehanɛ ɔ, nyɛ nitsɛmɛ nyɛ nu, nɛ nyɛ na níhi nɛ kikɛmɛ a Paulo nɛ ɔ ngɛ pee. E deɔ ke mawuhi nɛ nɔmlɔ adesa kɛ e nine pee ɔ pi mawu. Amlɔ nɛ ɔ, e plɛ nihi babauu a yi mi ngɛ Efeso hiɛmɛ nɛ ɔ, kɛ Asia kpokpa tsuo nɔ.

27 Nɔ́ nɛ fɔɔ si paa ji, wa ní tsumi ɔ he guɛ ma gbo. Pi lɔ ɔ kɛkɛ, se mohu a maa ye yo mawu Artemi jami he ɔ he fɛu, nɛ bɔ nɛ a nyaa e he ngɛ Asia, kɛ je ɔ mi tsuo ɔ se maa po!”

28 Benɛ ni kpekpemi ɔ nu munyu nɛ ɔ, a mi mi wo la wawɛɛ nitsɛ, nɛ a bɔni ngmlaa kpami ke, “Efeso bi a we Artemi ɔ ngɛ he wami saminya!”

29 Ma a mi tsuo pee hoo kɛ ngmlaa. Kɛkɛ nɛ basabasa peeli ɔmɛ ya nu Gayo kɛ Aristarko, Makedonia bi nɛ piɛ Paulo he kɛ hia blɔ ɔ, nɛ a tsɛ̃ a yi se kɛ fo kɛ ho he nɛ ma a kpee ngɛ ɔ ya.

30 Jinɛ Paulo nitsɛ hla kaa e maa ya lejɛ ɔ, se nyɛmimɛ ɔmɛ kplɛɛ we.

31 Asia ma ní tsuli komɛ nɛ ji Paulo huɛmɛ tsɔ ba wo lɛ ga ke e ko ka kaa e ma ya je e hɛ mi kpo ngɛ lejɛ ɔ.

32 Jehanɛ ɔ, benɛ ni komɛ ngɛ ngmlaa kpae kikɛ ɔ, ni komɛ hu ngɛ nɔ́ kpa dee; ejakaa ni ɔmɛ kulaa ngɛ gidigidi pee, se a ti nihi fuu li nɔ́ nɛ he je nɛ a ba kpe ɔ tete.

33 Akɛnɛ Yuda bi ɔmɛ ha Aleksandro ba da ni ɔmɛ a hɛ mi he je ɔ, ni komɛ susu kaa Aleksandro le basabasa nɛ ba a he nɔ́ ko. Aleksandro suɔ kaa e ma je e nya kɛ tsɔɔ ni ɔmɛ, lɔ ɔ he ɔ, e wo e nine nɔ ha ma a kaa a pee dii.

34 Se benɛ a kpa si kaa Yuda no ji lɛ ɔ, mɛ tsuo a kpa ngmlaa maa pee ngmlɛfia enyɔ sɔuu ke, “Efeso bi a we Artemi ɔ ngɛ he wami saminya!”

35 Nyagbe ɔ, ma womi ngmalɔ ɔ ha ni ɔmɛ pee dii, nɛ e de mɛ ke, “Ye nyɛmimɛ Efeso bi, nɔ tsuaa nɔ le kaa yo mawu Artemi nguaa a jami he, kɛ tɛ nɛ kple si kɛ je hiɔwe ɔ, Efeso ma nɛ ɔ mi ji he nɛ a ngɛ.

36 Nɔ ko nɔ ko be nyɛe maa je he nɔ́; lɔ ɔ he ɔ, e sa kaa nyɛɛ pee dii, nɛ nyɛ ko pee gidigidi ko kulaa.

37 Nyɛɛ kɛ nimli nɛ ɔmɛ ba hiɛ ɔ, pohu pi kaa a ya ju ní ngɛ sɔlemi we ɔ, loo a bɔ wa yo mawu ɔ ahlua ko.

38 Lɔ ɔ he ɔ, ke Demetrio, kɛ e huɛmɛ gali ɔmɛ kɛ nɔ ko ngɛ sane ko ɔ, ligbihi ngɛ nɛ a kɛ hyɛɛ sanehi a mi, nɛ amlaalo ɔ ní tsuli ɔmɛ hu ngɛ; nyɛ ha a kɛ sane ɔ nɛ ya a hɛ mi.

39 Se ke nɔ́ kpa ko pa ngɛ enɛ ɔ se nɛ nyɛ ngɛ hlae ɔ, lɛɛ a kɛ ya ma kpe ɔ hɛ mi nɛ a hla nya.

40 Ejakaa nɔ nɛ ba mwɔnɛ ligbi nɛ ɔ, gbeye ngɛ he kaa a ma nyɛ maa po wa nya ke wa ngɛ ma a mi hliihlii woe. Ke e ba ja a, mɛni nya jemi wa ngɛ?”

41 Benɛ e de enɛ ɔ, kɛkɛ nɛ e kpa kpe ɔ.