Ni Tsumi 18

Paulo ngɛ Korinto

1 Enɛ ɔ se ɔ, Paulo je Atene, nɛ e pue nɔ kɛ ho Korinto ya.

2 E ya na Yuda no ko nɛ a tsɛɛ lɛ Akuila ngɛ lejɛ ɔ. A fɔ Akuila ngɛ Ponto. Nyumu nɛ ɔ, kɛ e yo Priskila je Italia kɛ ba we; ejakaa Kaisare Klaudio fa Yuda bi ɔmɛ tsuo ke a je Roma. Paulo ya a ngɔ,

3 nɛ e kɛ mɛ ya hi si kɛ tsu ní; ejakaa bo tsu peemi ji a ní tsumi.

4 Daa Hejɔɔmi ligbi ɔ, e ya fiɛɔ Mawu munyu ngɔ tsɔɔ nihi ngɛ kpe he ɔ, nɛ e bɔɔ mɔde kaa e ma tsake Yuda bi, kɛ Hela bi tsuo.

5 Benɛ Sila kɛ Timoteo je Makedonia kɛ ba a, jehanɛ Paulo tsu we nɔ kpa ko hu pe munyu ɔ fiɛmi kɛkɛ; nɛ e yeɔ odase veveeve ngɔ tsɔɔ Yuda bi ɔmɛ kaa Yesu ji Kristo ɔ nɛ.

6 Enɛ ɔ he ɔ, a te si wo lɛ, nɛ a tu musu bɔmi munyuhi kɛ si lɛ. Lɔ ɔ he ɔ, e huanya e tade mi mu kɛ pue a nɔ, nɛ e de mɛ ke, “Nyɛ musu tloo nyɛ! Imi lɛɛ ye nya be mi. Kɛ je be nɛ ɔ kɛ yaa a, ma je li ɔmɛ a ngɔ ma ya.”

7 Lɔ ɔ he ɔ, e si lejɛ ɔ, nɛ e ho ya to ma je no Mawu jalɔ ko nɛ a tsɛɛ lɛ Titio Yusto ɔ we mi, nɛ e kɛ lɛ hi si. E we ɔ tsa kpe he ɔ nɔ.

8 Kpe he ɔ nɔkɔtɔma nɛ a tsɛɛ lɛ Krispo ɔ, kɛ e we tsuo he Nyɔmtsɛ ɔ ye. Nihi babauu hu nɛ ngɛ Korinto ɔ nu sɛ gbi ɔ, nɛ a he ye; nɛ a sɔle mɛ.

9 Ligbi ko nyɔ mi ɔ, Nyɔmtsɛ ɔ de Paulo ngɛ nina mi ke, “Koo ye gbeye, se mohu fiɛ munyu ɔ. Ko ma o nya,

10 ejakaa i kɛ mo ngɛ. Nɔ ko nɔ ko be nyɛe maa pee mo yayami ko; ejakaa i ngɛ we bi babauu ngɛ ma nɛ ɔ mi.”

11 Lɔ ɔ he ɔ, Paulo ye jeha, kɛ nyɔhiɔ ekpa ngɛ lejɛ ɔ, nɛ e kɛ tsɔɔ ni ɔmɛ Mawu munyu ɔ.

12 Benɛ Roma nɔ yemi ɔ wo Galio amlaalo ngɛ Akaya a, Yuda bi ɔmɛ pee a nya kake nɛ a te si wo Paulo, nɛ a nu lɛ kɛ ho kojomi he ɔ ya.

13 A ya po e nya ke, “Nyumu nɛ ɔ ngɛ ma a yi mi woe nɛ a ja Mawu ngɛ blɔ ko nɔ nɛ kɛ wa mlaa a yɛ!”

14 Benɛ Paulo miɔ nɛ e ma je e nya a, kɛkɛ nɛ Galio po e nya nɔ, nɛ e de Yuda bi ɔmɛ ke, “Yuda bi, ju kɛ fɔ̃ sane ko nyɛ kɛ ba jinɛ ma na tsui kɛ bu nyɛ tue.

15 Se akɛnɛ munyunguhi, kɛ biɛhi, kɛ nyɛ mlaa a he nyɛ ngɛ sane yee ngɛ nɛ ɔ, nyɛ nitsɛmɛ nyɛ ya hyɛ mi. Sanehi nɛ ngɛ kaa kikɛ nɛ ɔ, i be kojoe.”

16 Kɛkɛ nɛ e fie mɛ kɛ je kojomi he ɔ.

17 Mɛ tsuo a ya nu kpe he ɔ nɔkɔtɔma nɛ a tsɛɛ lɛ Sostene ɔ ngɛ kojomi he ɔ hɛ mi, nɛ a fia lɛ ní. Se nɔ́ nɛ a pee nɛ ɔ si we Galio kpu.

Paulo kpale kɛ ba Antiokia

18 ⓠ Paulo kɛ nyɛmimɛ ɔmɛ hi si ngɛ Korinto be saii. Lɔ ɔ se ɔ, e kɛ mɛ ye sɛ, nɛ e ngɔ Priskila, kɛ Akuila kɛ piɛ e he, nɛ a ya wó lɛ kɛ ba Siria. Loko lɛ ɔ maa hia ngɛ Kenkrea a, Paulo ha a sɛ e yi ha lɛ, ejakaa be ko ɔ, e wo Mawu si ko.

19 Benɛ a ba su Efeso ɔ, Paulo si Priskila kɛ Akuila ngɛ lejɛ ɔ; se loko e je ɔ, lɛ nitsɛ lɛɛ e ya kpe he ɔ, nɛ e kɛ Yuda bi ɔmɛ ya hla ní a nya.

20 A kpa lɛ pɛɛ ke e ye be bɔɔ ngɛ a ngɔ, se e kplɛɛ we.

21 Benɛ a ngɛ sɛ yee ɔ, e de mɛ ke, “Ke Mawu suɔ ɔ, ma kpale kɛ ba nyɛ ngɔ ekohu.” Kɛkɛ nɛ e wó lɛ, nɛ e je Efeso.

22 Benɛ e ya kple ngɛ Kaisarea a, e ya Yerusalem, nɛ e ya nga asafo ɔ; kɛkɛ nɛ e pue nɔ kɛ ho Antiokia ya.

23 E hi lejɛ ɔ be bɔɔ ko; lɔ ɔ se ɔ, e pue nɔ ekohu, nɛ e ya kpa Galatia, kɛ Frigia ní ɔmɛ a mi, nɛ e wo nihi nɛ he ye ɔ tsuo he wami.

Apolo ngɛ Efeso kɛ Korinto

24 Jamɛ a be ɔ mi ɔ, Yuda no ko nɛ a tsɛɛ lɛ Apolo, nɛ e se je Aleksandria a ba Efeso. Nyumu nɛ ɔ nya mi tsɔ saminya, nɛ e le ngmami ɔmɛ a mi fitsofitso.

25 A tsɔɔ nyumu nɛ ɔ Nyɔmtsɛ ɔ blɔ ɔ, nɛ e kɛ kã, kɛ mumi nɛ nya wa fiɛ Mawu munyu ɔ; nɛ e tsɔɔ Yesu he ní fitsofitso. Pohu Yohane nɔ sɔlemi ɔ pɛ nɛ e le.

26 E kɛ kã bɔni munyu tumi ngɛ kpe he ɔ. Benɛ Priskila kɛ Akuila nu nɛ e ngɛ fiɛe ɔ, a ngɔ lɛ kɛ ba a ngɔ, nɛ a tsɔɔ lɛ Nyɔmtsɛ ɔ blɔ ɔ fitsofitso.

27 Jehanɛ, Apolo to e yi mi kaa e maa po mi kɛ ya Akaya, lɔ ɔ he ɔ, nyɛmimɛ ɔmɛ nɛ ngɛ Efeso ɔ susu he, nɛ a ngma womi ya ha nyɛmimɛ ɔmɛ nɛ ngɛ Akaya a kɛ wo mɛ ga ke a he lɛ hɛmuɔ. Benɛ e ba su lejɛ ɔ, nihi nɛ Mawu dloomi nya a, a ba he Kristo ye ɔ na e he se saminya.

28 Ejakaa e tu munyu kɛ he wami kɛ ku Yuda bi ɔmɛ a nya la; nɛ e je ngmami ɔmɛ a mi kɛ tsɔɔ mɛ faii kaa Yesu ji Kristo ɔ nɛ.