Ni Tsumi 14

Paulo kɛ Barnaba ngɛ Ikoniom

1 Kikɛmɛ a nɔ́ nɛ ɔ ya nɔ ngɛ Ikoniom hulɔ. Paulo kɛ Barnaba ya Yuda bi ɔmɛ a kpe he ɔ, nɛ bɔ nɛ a tu munyu tsɔɔ ni ɔmɛ ɔ ha Yuda bi ɔmɛ, kɛ ma je li ɔmɛ a ti nihi babauu he Nyɔmtsɛ ɔ ye.

2 Se Yuda bi nɛ he we Yesu yi ɔ puɛ ma je li ɔmɛ a tue, nɛ a sú mɛ ngɔ wo nyɛmimɛ ɔmɛ nɛ he ye ɔ a he.

3 Se kɛ̃ ɔ, bɔfo ɔmɛ a se kɛ ngɛ lejɛ ɔ; nɛ a kɛ kã fiɛ Nyɔmtsɛ Yesu he munyu ɔ. Nyɔmtsɛ ɔ hu piɛ bɔfo ɔmɛ a he, nɛ a pee nyakpɛ níhi, kɛ okadihi babauu kɛ tsɔɔ kaa a munyu ɔ ngɛ mi niinɛ.

4 Ma a mi bi ɔmɛ a mi gba enyɔ; ni fa ngɛ Yuda bi ɔmɛ a se, nɛ fa hu ngɛ bɔfo ɔmɛ a se.

5 Jehanɛ ma je li ɔmɛ, kɛ Yuda bi ɔmɛ, kɛ a nikɔtɔma amɛ to a yi mi kaa a maa pee bɔfo ɔmɛ soisoi, nɛ a fia mɛ tɛ.

6 Se bɔfo ɔmɛ nu he, nɛ a tu fo kɛ ho Listra kɛ Derbe ya, ngɛ Likaonia zugba a nɔ, kɛ lejɛ ɔ kpokpa amɛ a nɔ.

7 Lejɛ ɔ hu a fiɛ sane kpakpa a ha ni ɔmɛ.

Paulo kɛ Barnaba ngɛ Listra kɛ Derbe

8 Nyumu ko ngɛ Listra nɛ a fɔ lɛ libɔɔ; e nyɛɛ we gblee.

9 Benɛ Paulo ngɛ munyu tue ɔ, nyumu ɔ bu lɛ tue saminya. Paulo hyɛ lɛ too, nɛ e na kaa nyumu ɔ ngɛ hemi kɛ yemi kaa a ma tsa lɛ.

10 Kɛkɛ nɛ Paulo kpa ngmlaa de lɛ ke, “Tee si nɛ o da o nane nɔ tlɔmɔɔ!” Amlɔ nɔuu ɔ, libɔɔ ɔ hlu ma si glɛ, nɛ e bɔni nyɛɛmi kɛ ngɛ si bɔlee ngɛ lejɛ ɔ.

11 Benɛ ni ɔmɛ na nɔ́ nɛ Paulo pee ɔ, a kpa ngmlaa ngɛ Likaonia gbi mi ke, “Mawu ɔmɛ plɛ a he nimli, nɛ a kple si kɛ ba wa ngɔ.”

12 A wo Barnaba biɛ ke Zeus, nɛ Paulo lɛɛ a tsɛ lɛ Herme; ejakaa lɛ titli lɛ e ngɛ munyu ɔ tue. Hela bi a jemɛ a wɔ nguaa ji Zeus; nɛ jemɛ a wɔ ɔmɛ a tsɔlɔ ji Herme.

13 Zeus osɔfo ɔ nɛ e jami he ngɛ a ma a we agbo ɔ nya a, ngɔ nakuhi, kɛ nyinyla kɛ ba agbo ɔ nya nɛ e kɛ maa sã bɔ ha bɔfo ɔmɛ.

14 Benɛ Barnaba kɛ Paulo nu he ɔ, a hía a tade ngɛ a he, nɛ a sa fo kɛ ya sɛ ni kpekpemi a kpɛti kɛ ngmlaa ke,

15 ⓘ “Tsaatsɛmɛ, mɛni nyɛ ngɛ pee nɛ ɔ? Wɔ hu nimli adesahi kɛkɛ ji wɔ kaa nyɛ nɔuu. Wa ngɛ sane kpakpa a fiɛe kɛ ngɛ nyɛ tsɔɔe, konɛ nyɛɛ kpale nyɛ se kɛ je kikɛmɛ a ní nɛ ɔmɛ nɛ a he be se nami ɔ a he kɛ ba Mawu hɛ kalɔ ɔ ngɔ. Lɛ nɛ e bɔ hiɔwe, kɛ zugba, kɛ wo, kɛ níhi tsuo nɛ ngɛ a mi ɔ.

16 Blema be ɔ mi ɔ, Mawu ngmɛ je ma amɛ blɔ nɛ a nyɛɛ bɔ nɛ mɛ nitsɛmɛ a suɔ.

17 Se kɛ̃ ɔ, e peeɔ kpakpa nɛ e kɛ tsɔɔ kaa lɛ ji Mawu niinɛ; e haa hiɔmi nɛɛ kɛ jee hiɔwe kɛ haa nyɛ, nɛ nyɛ kpaa ní babauu ngɛ be nɛ sa mi. E haa nyɛ niye ní, nɛ nyɛ bua jɔɔ saminya.”

18 Dengme kpakpa nɛ bɔfo ɔmɛ gbo loko a nyɛ nɛ a kɛ kikɛmɛ a munyu nɛ ɔmɛ tsi bɔ ɔ nɛ jinɛ ni ɔmɛ maa sã ha mɛ ɔ nya.

19 Yuda bi komɛ je Antiokia ngɛ Pisidia, kɛ Ikoniom kɛ ba lejɛ ɔ ba wo ni ɔmɛ a yi mi, nɛ a fia Paulo tɛ; a sã lɛ si kɛ je ma a mi, nɛ a susu kaa e gbo.

20 Se benɛ nihi nɛ he Nyɔmtsɛ ɔ ye ɔ ba bɔle lɛ kɛ kpe ɔ, e te si, nɛ e ho ma a mi ya. E nɔ jena a, e kɛ Barnaba pue nɔ kɛ ho Derbe ya.

Paulo kɛ Barnaba kpale kɛ ba Antiokia ngɛ Siria

21 Paulo kɛ Barnaba fiɛ sane kpakpa a ngɛ Derbe ma a mi, nɛ nihi babauu ba he Yesu ye. Lɔ ɔ se ɔ, Paulo kɛ Barnaba kpale kɛ ho Listra, kɛ Ikoniom, kɛ Antiokia ngɛ Pisidia ya.

22 A wo nihi nɛ he ye ɔ he wami, konɛ a hemi kɛ yemi mi nɛ wa. A tsɔɔ mɛ hulɔ kaa, “E sa kaa waa gblee amanehlu babauu mi kɛ sɛ Mawu matsɛ yemi ɔ mi.”

23 A ha hwɔ, nɛ a sɔle kɛ hla nikɔtɔmahi, nɛ a tu mɛ ngɔ wo Nyɔmtsɛ ɔ nɛ a he ye ɔ dɛ mi.

24 A po mi ngɛ Pisidia, nɛ a ya Pamfilia.

25 A fiɛ sane kpakpa a ngɛ Perga, kɛkɛ nɛ a pue nɔ kɛ ba Atalia.

26 Kɛ je Atalia a, a wó lɛ kɛ kpale a se kɛ ba Antiokia ngɛ Siria. Ní tsumi nɛ a gbe nya nɛ ɔ, hiɛ ɔ ji he nɛ a tu mɛ ngɔ wo Mawu dɛ mi ngɛ loko a je sisi.

27 Benɛ a ba su Antiokia a, a bua asafo ɔ nya, nɛ a sɛɛ mɛ níhi tsuo nɛ Mawu kɛ mɛ ya tsu ɔ, kɛ bɔ nɛ e bli blɔ ngɔ ha ma je li ɔmɛ, nɛ mɛ hu a he ye.

28 Bɔfo ɔmɛ, kɛ nihi nɛ he ye ɔ hi si be saii.