Ni Tsumi 15

A kpe ngɛ Yerusalem

1 ⓙ Ni komɛ je Yudea kɛ ba Antiokia, nɛ a ba bɔni nihi nɛ he Yesu ye ɔ ní tsɔɔmi ke, “Ke a pui nyɛ kaa bɔ nɛ Mose mlaa a tsɔɔ ɔ, a be nyɛe ma he nyɛ yi wami.”

2 Paulo, kɛ Barnaba kɛ mɛ sã nya wawɛɛ; nɛ a kɛ mɛ je nɔ́ hluu ngɛ tsɔɔmi nɛ ɔ he. Lɔ ɔ he ɔ, a to kaa Paulo, kɛ Barnaba, kɛ a ti ni komɛ hu nɛ a ya bɔfo ɔmɛ, kɛ nikɔtɔma amɛ a ngɔ ngɛ Yerusalem ngɛ kikɛmɛ a munyu nɛ ɔ he.

3 Asafo ɔ wo mɛ blɔ kɛ ho. Benɛ a gu Foinike kɛ Samaria kɛ yaa a, a sɛɛ ha nihi ngɛ blɔ ɔ nɔ bɔ nɛ ma je li ɔmɛ hu tsake a tsui. Enɛ ɔ ha nɛ nyɛmimɛ ɔmɛ tsuo na bua jɔmi babauu.

4 Benɛ a su Yerusalem ɔ, asafo ɔ, kɛ bɔfo ɔmɛ, kɛ nikɔtɔma amɛ tsuo he mɛ kɛ hɛmuɔ, nɛ mɛ hu a bɔ mɛ níhi tsuo nɛ Mawu ngɔ mɛ kɛ tsu ɔ.

5 Se Farisi bi komɛ nɛ he ye ɔ, a ti ni komɛ te si nɛ a de ke, “Ja a po ma je li ɔmɛ, nɛ a ha a ye Mose mlaa a nɔ.”

6 Bɔfo ɔmɛ, kɛ nikɔtɔma amɛ ba bua a he nya, konɛ a hla kikɛmɛ a sane nɛ ɔ mi.

7 ⓚ Benɛ a sã nya hluu ɔ, Petro te da si, nɛ e de mɛ ke, “Ye nyɛmimɛ, nyɛ nitsɛmɛ nyɛ le kaa be saii ji nɛ ɔ nɛ Mawu hla mi ngɛ nyɛ kpɛti kaa ma fiɛ sane kpakpa a ngɔ tsɔɔ ma je li ɔmɛ, konɛ mɛ hu a he ye.

8 ⓛ Mawu nɛ le adesahi tsuo a juɛmi ɔ kplɛɛ nɔ kaa a fiɛ sane kpakpa a ha ma je li ɔmɛ hulɔ; lɔ ɔ he ɔ, e ha mɛ Mumi Klɔuklɔu ɔ kaa bɔ nɛ e ha wɔ ɔ.

9 E tsɔɔ we slɔɔto ko ngɛ waa kɛ mɛ wa kpɛti; akɛnɛ a he ye ɔ, e ngɔ a he yayami ɔmɛ ngɔ pa mɛ.

10 Lɛɛ jehanɛ mɛni he je nyɛ ngɛ Mawu kae, nɛ tlomi nɛ wa nɛmɛ ɔmɛ, kɛ wɔ nitsɛmɛ po wa nyɛ we waa tloo ɔ, nyɛɛ kɛ ngɛ ni nɛmɛ nɛ he ye ɔ tlooe mɔ?

11 Dɛbi! Wɔɔ lɛɛ wa heɔ yeɔ kaa Nyɔmtsɛ Yesu Kristo dloomi ɔ mohu nɔ a maa gu kɛ he waa kɛ mɛ tsuo wa yi wami.”

12 Jehanɛ kpe ɔ tsuo pee dii, konɛ a bu Barnaba kɛ Paulo tue. A bɔ kpe ɔ bɔ nɛ Mawu gu a nɔ kɛ tsu nyakpɛ níhi babauu ngɛ ma je li ɔmɛ a kpɛti.

13 Benɛ a bɔ amaniɛ ɔ ta a, Yakobo wo e nya nɔ nɛ e de ke, “Nyɛmimɛ, nyɛɛ bu mi tue!

14 Simon sɛɛ bɔ nɛ kekle ɔ, Mawu ba slaa ma je li ɔmɛ, nɛ e hla a kpɛti ma ko ngɔ ha e he.

15 Amaniɛ nɛ ɔ maa gbali ɔmɛ a munyu ɔ nɔ mi ke,

16 ⓜ ‘Nyɔmtsɛ ɔ ke, pee se ɔ, ma kpale kɛ ba; nɛ ma ngɔ David matsɛ yemi ɔ ngɔ ma si kaa sá a. Ma dla e ma doku ɔmɛ, nɛ e tsɛ yemi ɔ maa ma si kpɛii ekohu.

17 Kɛkɛ ɔ, adesahi nɛ piɛ ɔ tsuo maa ba ye ngɔ; nɛ ma je li ɔmɛ tsuo nɛ i tsɛ ɔ maa ba ma ba pee ye ma.

18 Nyɔmtsɛ ɔ, nɔ nɛ ha nɛ a le enɛ ɔmɛ tsuo kɛ je blema lokoo ɔ lɛ de.’ ”

19 Yakobo tsa e munyu ɔ nɔ ke, “Lɔ ɔ he ɔ, nɔ́ nɛ i ngɛ dee ji, ma je li nɛ ba he Mawu ye ɔ, wa ko doo a nya.

20 ⓝ Mohu ɔ, waa ngma mɛ womi ke a ko ye niye ní nɛ he tsɔ we, a ko ye wɔ nya lo, a hyɛ a he nɔ saminya, nɛ a ko fiɛ nyumu kɛ yo yakayaka fiɛmi. A nyɛ lohwehi nɛ a kika a kuɛ kɛ gbe mɛ, nɛ a ko ye lo nɛ muɔ ngɛ mi kɛ mwɔɔ.

21 Ejakaa kɛ je blema lokoo ɔ, daa Hejɔɔmi ligbi ɔ, a kaneɔ Mose mlaa a, nɛ a fiɛɔ e munyu ɔ ngɛ kpe he ɔ ngɛ ma tsuaa ma mi.”

Womi nɛ a ngma mane ma je li nɛ he ye ɔ

22 Kɛkɛ nɛ bɔfo ɔmɛ, nikɔtɔma amɛ, kɛ asafo mluku ɔ tsuo ma nya si kaa a hia mɛ nitsɛmɛ a kpɛti ni komɛ kɛ piɛ Paulo kɛ Barnaba a he, nɛ a tsɔ mɛ Antiokia. A hla Yuda, nɔ nɛ a tsɛɛ lɛ Barsaba hulɔ ɔ, kɛ Sila, ni enyɔ nɛ asafo ɔ tsuo buu mɛ saminya.

23 A ngma womi ngɔ ha mɛ ke, “Wɔ, nyɛ nyɛmimɛ bɔfo ɔmɛ, kɛ asafo nikɔtɔma amɛ, wa biɔ nyɛ wa nyɛmimɛ ma je li a fɔfɔɛhi nɛ ngɛ Antiokia, Siria, kɛ Kilikia a saminya.

24 Wa nu kaa wa ti ni komɛ ba nyɛ ngɔ ba doo nyɛ nya kɛ munyu komɛ, nɛ a kɛ puɛ nyɛ juɛmi, pohu wa ha we mɛ mlaa ko ke a ba wo nyɛ.

25 Lɔ ɔ he ɔ, wa pee kpe, nɛ wɔ tsuo wa ma nya si kaa waa hia ni komɛ pɔtɛɛ nɛ waa tsɔ mɛ nyɛ ngɔ. A maa piɛ Barnaba kɛ Paulo nɛ wa suɔ mɛ saminya a a he kɛ ba.

26 Barnaba kɛ Paulo ji nimli nɛ bui nɔ́ ko nɔ́ ko nɛ ma kpata a wami hɛ mi ngɛ wa Nyɔmtsɛ Yesu ní tsumi ɔ mi.

27 Lɔ ɔ he ɔ, wa tsɔ Yuda, kɛ Sila, konɛ mɛ hu a ba jaje ní nɛ ɔmɛ nɛ wa ngma a nɔuu ngɔ tsɔɔ nyɛ.

28 E sa Mumi Klɔuklɔu ɔ hɛ mi, nɛ wɔ hu wa kplɛɛ nɔ kaa wa ko ngɔ tlomi ko kɛ fɔ nyɛ nɔ hu, kaa ja níhi nɛ he hia nɛ ɔ mɛ nɔuu.

29 Nyɛɛ nyɛ wɔ nya lo; nyɛ ko ye lo nɛ muɔ ngɛ mi kɛ mwɔɔ, loo lohwe nɛ a kika e kuɛ; nɛ nyɛɛ hyɛ nyɛ he nɔ saminya, nɛ nyɛ ko fiɛ nyumu kɛ yo kayakaya fiɛmi. Nyɛɛ bɔ mɔde nɛ nyɛɛ yu nyɛ he kɛ je ní nɛ ɔmɛ a he. Nyɛɛ hi si saminya.”

30 A wo tsɔli ɔmɛ blɔ kɛ ho Antiokia ya; nɛ benɛ a ya su ɔ, a bua asafo ɔ nya, nɛ a je womi ɔ ngɔ ha mɛ.

31 Benɛ a kane ɔ, a bua jɔ womi ɔ mi munyu ɔ he.

32 Yuda, kɛ Sila nɛ a nya mi tsɔ kɛ Mawu munyu fiɛmi ɔ, tu munyu babauu kɛ wo nyɛmimɛ ɔmɛ bua kɛ he wami.

33 Benɛ a kɛ mɛ hi si be bɔɔ se ɔ, nyɛmimɛ ɔmɛ wo mɛ blɔ ngɛ he jɔmi mi kɛ ho nihi nɛ tsɔ mɛ ɔ a ngɔ ya. [

34 Se Sila lɛɛ e pee e juɛmi kaa e maa tlɔ lejɛ ɔ.]

35 Paulo kɛ Barnaba hi Antiokia, nɛ a kɛ ni kpahi babauu tsɔɔ ní, nɛ a fiɛ Nyɔmtsɛ ɔ munyu ɔ.

Paulo kɛ Barnaba a mi gba

36 Pee se ɔ, Paulo de Barnaba ke, “Ha waa kpale wa se kɛ ya mahi tsuo nɛ wa fiɛ Nyɔmtsɛ ɔ sɛ gbi ɔ ngɛ a mi ɔ. Wa ya slaa nyɛmimɛ ɔmɛ nɛ ngɛ lejɛ ɔmɛ, nɛ waa hyɛ bɔ nɛ a ngɛ nɔ yae ha.”

37 Barnaba hɛ ngɛ nɔ kaa a maa ngɔ Yohane nɛ a tsɛɛ lɛ Marko hulɔ ɔ ngɔ piɛ a he.

38 ⓞ Se Paulo lɛɛ e susu kaa e dɛ kaa a ngɔɔ lɛ kɛ yaa. Ejakaa blɔ ko nɛ a hia be ko ɔ, e kɛ mɛ gbi nya, se mohu benɛ a su Pamfilia a, e kpale ngɛ a se.

39 Enɛ ɔ pee mɛ nya sami babauu, nɛ a mi gba; Barnaba ngɔ Marko ngɔ piɛ e he, nɛ a ya wo lɛ kɛ ho Kipro ya.

40 Paulo lɛɛ, e hla Sila ngɔ piɛ e he, nɛ benɛ nyɛmimɛ ɔmɛ tu mɛ ngɔ wo Nyɔmtsɛ ɔ dɛ mi nɛ́ e bu a he ɔ, a pue nɔ kɛ ho.

41 A gu Siria, kɛ Kilikia; nɛ benɛ a yaa a tsuo ɔ, a ngɛ asafo ɔmɛ he wami woe.