Yohane 19

1 Kɛkɛ nɛ Pilato ngɔ Yesu, nɛ e ha a fia lɛ kpa;

2 nɛ ta buli ɔmɛ ngɔ mio kɛ pee jlasi, nɛ a kɛ fi e yi. A wo lɛ tade he jua wawɛ tsutsuutsu;

3 nɛ a kplã si ngɛ e hɛ mi, nɛ a ye e he fɛu ke, “Yuda bi a matsɛ, manye oo manye!” Nɛ a gba e hɛ mi ma.

4 Pilato kpale je kpo ekohu, nɛ e de ma kpekpemi ɔ ke, “I kɛ lɛ ngɛ kpo jee kɛ ma nyɛ ngɔ hiɛmɛ nɛ ɔ, konɛ nyɛ na nyɛɛ le kaa imi lɛɛ i nɛ sane yobu ko ngɛ e he nɛ ma da nɔ kɛ bu lɛ fɔ.”

5 Lɔ ɔ he ɔ, Yesu je kpo kɛ e yi jlasi nɛ a kɛ mio pee ɔ, kɛ e he tade he jua wawɛ tsutsuutsu ɔ. Pilato de mɛ ke, “Nyɛ nɛ nɔmlɔ ɔ!”

6 Benɛ osɔfo nikɔtɔma amɛ, kɛ tsɔli ɔmɛ na Yesu ɔ, a kpa ngmlaa ke, “Sɛu lɛ! Sɛu lɛ!” Pilato de mɛ ke, “Nyɛ nitsɛmɛ nyɛɛ ngɔ lɛ nɛ nyɛ ya sɛu mɔ; ejakaa imi lɛɛ i nɛ sane yobu ko ngɛ e he nɛ ma da nɔ kɛ bu lɛ fɔ.”

7 Yuda bi ɔmɛ he nɔ ke, “Wɔɔ lɛɛ wa ngɛ mlaa, nɛ wa mlaa a nya a, e sa gbenɔ, ejakaa e pee e he Mawu Bi.”

8 Benɛ Pilato nu munyu nɛ ɔ, e ye gbeye pe kekle ɔ po.

9 Lɔ ɔ he ɔ, e kpale sɛ mɔ ɔ mi, nɛ e bi Yesu ke, “Jije o je?” Se Yesu pui e nya mi.

10 Pilato de lɛ ke, “O be ye nya mi poe? O li kaa i ngɛ he blɔ kaa i sɛuɔ mo, nɛ i ngɛ he blɔ hulɔ kaa i ngmɛɛ o he lo?”

11 Yesu he nɔ ke, “Ke pi Mawu nɛ ha mo he wami ɔ, o be he wami ko ngɛ ye nɔ. Lɔ ɔ he ɔ, nɔ nɛ je mi kɛ wo o dɛ mi ɔ, e he yayami ɔ kle pe o nɔ́ ɔ.”

12 Kɛ je enɛ ɔ se ɔ, Pilato hla kaa e maa ngmɛɛ Yesu he. Se Yuda bi ɔmɛ kpa ngmlaa ke, “Ke o ngmɛɛ e he ɔ, o pi Kaisare ɔ huɛ. Nɔ tsuaa nɔ nɛ peeɔ e he matsɛ ɔ, Kaisare ɔ e te si ngɔ si ɔ nɛ.”

13 Benɛ Pilato nu kikɛmɛ a munyu nɛ ɔ, e kɛ Yesu je kpo, nɛ e ya hi kojomi sɛ ɔ nɔ ngɛ he nɛ a ka tɛ ngɛ, nɛ Hebri mi ɔ, a tsɛɛ “Gabata” a.

14 Jamɛ a ligbi ɔ nɛ a dlaa he kɛ toɔ Hetsɔmi ɔ nɛ; nɛ maa pee piani ngmlɛ nyɔngma kɛ enyɔ ɔ, Pilato de ma a ke, “Ne nyɛ matsɛ ɔ!”

15 Se mɛɛ lɛɛ a kpa ngmlaa ke, “O kɛ lɛ nɛ ya! O kɛ lɛ nɛ ya! Sɛu lɛ!” Pilato bi mɛ ke, “Nyɛ matsɛ ɔ, ma sɛu lɛ lo?” Osɔfo nikɔtɔma amɛ he nɔ ke, “Wa be matsɛ ko kaa ja Kaisare ɔ pɛ.”

16 Kɛkɛ nɛ Pilato ngɔ Yesu kɛ ha mɛ nɛ a ya sɛu lɛ. A ngɔ Yesu kɛ ho,

Ta buli ɔmɛ sɛu Yesu

(<x>470 27:32-44</x>; <x>480 15:21-32</x>; <x>490 23:26-43</x>)

17 nɛ lɛ nitsɛ e tloo e sɛumi tso ɔ kɛ je ma a mi kɛ ya he nɛ a tsɛɛ “Yikoklodonya”, nɛ Hebri mi ɔ a tsɛɛ lɛ “Golgata” a.

18 A sɛu Yesu ngɛ lejɛ ɔ, nɛ a sɛu ni kpahi enyɔ hulɔ; nɔ kake ngɛ e hiɛ, kɛ nɔ kake hu ngɛ e hiɛ; nɛ Yesu ngɛ a kpɛti.

19 Pilato ngma kɛ mɛtɛ Yesu sɛumi tso ɔ yi mi ke, “Yesu nɛ je Nazaret, Yuda bi ɔmɛ a matsɛ ɔ.”

20 Yuda bi ɔmɛ a ti nihi babauu kane nɔ nɛ a ngma a, ejakaa he nɛ a sɛu Yesu ngɛ ɔ kɛ ma a mi kɛ we; nɛ a ngma nɔ́ ɔ ngɛ Hebri, kɛ Roma, kɛ Hela gbi mi.

21 Osɔfo nikɔtɔma amɛ ba de Pilato ke, “Koo ngma ke, ‘Yuda bi ɔmɛ a matsɛ ɔ.’ Se mohu ngmaa ke, ‘Nɔmlɔ nɛ ɔ de ke lɛ ji Yuda bi ɔmɛ a matsɛ ɔ nɛ.’ ”

22 Se Pilato he nɔ ke, “Nɔ nɛ i ngma a, i ngma.”

23 Benɛ ta buli ɔmɛ sɛu Yesu se ɔ, a ngɔ e tade ɔmɛ, nɛ a dla mi eywiɛ ngɔ ha a he kakaaka. A ngɔ tade klɔii ɔ hulɔ; se tade klɔii ɔ lɛɛ a lo kɛ je hiɔwe ba ma si, nɛ e be tsami he.

24 ⓜ Lɔ ɔ he ɔ, ta buli ɔmɛ de a he ke, “Wa ko gba enɛ ɔ; mohu nyɛ ha waa fɔ̃ nɔ sɔ, konɛ waa na nɔ nɛ nɔ́ nɛ e maa pee.” Kɛkɛ ɔ, ngmami ɔ nɛ deɔ ke, “A dla ye tade ɔmɛ ngɔ ha a he; nɛ ye tade klɔii ɔ, a fɔ̃ nɔ sɔ” ɔ maa ba mi. Nɔ́ nɛ ta buli ɔmɛ pee ɔ ji nɛ ɔ nɛ.

25 Yesu nyɛ, kɛ e nyɛ ɔ nyɛmiyo Maria, Klopa yo ɔ, kɛ Maria Magdalena daa si ngɛ Yesu sɛumi tso ɔ kasa nya.

26 Benɛ Yesu na e nyɛ ɔ, kɛ kaselɔ ɔ nɛ e suɔ lɛ ɔ daa si ɔ, e de e nyɛ ɔ ke, “Maa, o bi ji nɛ ɔ nɛ!”

27 Pee se ɔ, e de kaselɔ ɔ ke, “O nyɛ ji nɛ ɔ nɛ!” Kɛ je jamɛ a ligbi ɔ, kaselɔ ɔ ngɔ lɛ kɛ ho lɛ nitsɛ e we mi ya.

Yesu gbo

(<x>470 27:45-56</x>; <x>480 15:33-41</x>; <x>490 23:44-49</x>)

28 ⓝ Benɛ Yesu na kaa a gbe nɔ́ tsuaa nɔ́ nya a, bɔ nɛ pee nɛ ngmami ɔ nɛ ba mi ɔ, e de ke, “Kuma ngɛ mi yee!”

29 Kplu ko maa si ngɛ lejɛ ɔ kɛ e mi dã tɔtɔɔtɔ nɛ kuã. Lɔ ɔ he ɔ, a ngɔ wo mi kutsa ngɔ sɔ dã a mi, nɛ a ngɔ ma tso nya, nɛ a kɛ to e nya he.

30 Benɛ Yesu he dã nɛ kuã a, e de ke, “A gbe nya!” Kɛkɛ nɛ e ma e yi si, nɛ e ngɔ e nya.

A gbɔ Yesu kasa mi nɔ́

31 Enɛ ɔ se ɔ, Yuda ma nimeli ɔmɛ ya na Pilato kaa e ngmɛ mɛ blɔ nɛ a ku nihi nɛ a gbe ɔ a nanehi, nɛ a je mɛ kɛ je sɛumi tso ɔ nɔ. Jamɛ a ligbi ɔ nɛ a dlaa he kɛ haa Hetsɔmi ɔ, lɔ ɔ he ɔ, a sume nɛ gbogboe ɔmɛ nɛ a hi sɛumi tso nɔ kɛ yaa si Hejɔɔmi ligbi ɔ, ejakaa Hejɔɔmi ligbi nguaa nitsɛ lɛ ngɛ a hɛ mi.

32 Enɛ ɔ he ɔ, ta buli ɔmɛ ho nɛ a ya ku nihi nɛ a sɛu kɛ piɛ Yesu he ɔ a nanehi, kekle nɔ ɔ, kɛ nɔ enyɔne ɔ hulɔ.

33 Se benɛ a su Yesu nɔ ɔ, a na kaa e gbo momo, lɔ ɔ he ɔ, a ku we e nane.

34 Mohu ta buli ɔmɛ a ti nɔ kake kɛ e we akplɔ ɔ gbɔ Yesu kasa mi; nɛ amlɔ ɔ, muɔ kɛ nyu je mi kɛ be.

35 Nɔ nɛ na nɔ́ nɛ ɔ lɛ ye odase nɛ ɔ, konɛ nyɛ hu nyɛ he ye; ejakaa lɛ nitsɛ e le kaa anɔkuale nɛ e tu.

36 ⓞ A pee enɛ ɔ, konɛ nɔ nɛ a ngma ke, “A be e wu ko kue” ɔ, nɛ ba mi.

37 ⓟ Nɛ jehanɛ ɔ, ngmami kpa hu deɔ ke, “A maa hyɛ nɔ nɛ a gbɔ lɛ nɔ́ ɔ.”

Yesu pumi

(<x>470 27:57-61</x>; <x>480 15:42-47</x>; <x>490 23:50-56</x>)

38 Pee se ɔ, Yosef nɛ je Arimatia ya bi Pilato nɛ́ e ha lɛ blɔ, nɛ e ya ngɔ Yesu gbogboe ɔ. Yosef ɔ, Yesu se nyɛɛlɔ ji lɛ, se Yuda bi ɔmɛ a he gbeye he je ɔ, e je we e he si paa. Pilato ha lɛ blɔ; lɔ ɔ he ɔ, Yosef ho nɛ e ya je gbogboe ɔ.

39 ⓠ Nikodemo, nɔ nɛ be ko e ya Yesu ngɔ nyɔ mi ɔ, lɛ hu e ngɔ tsopa kɛ e he via, nɛ ji mire kɛ aloe nɛ a futu, nɛ jiimi maa pee kilo nyingmi etɛ kɛ ba, nɛ e piɛ Yosef he kɛ ho.

40 Mɛ ni enyɔ ɔmɛ a ya ngɔ Yesu gbogboe ɔ, nɛ a wo lɛ tsopa kɛ e he via a, nɛ a kɛ kploba bla lɛ kaa bɔ nɛ Yuda bi peeɔ kɛ puɔ nɔ ɔ.

41 He nɛ a sɛu Yesu ngɛ ɔ, abɔɔ ko ngɛ lejɛ ɔ kɛ e mi yɔkɔ he nɛ a to we nɔ ngɛ mi hyɛ.

42 Lɔ ɔ he ɔ, a ya to Yesu gbogboe ɔ ngɛ lejɛ ɔ, ejakaa yɔkɔ ɔ he kɛ we, nɛ jehanɛ ɔ hu, jamɛ a ligbi ɔ nɛ a dlaa he kɛ haa Hejɔɔmi ligbi ɔ nɛ.