Yohane 18

Yuda ma nimeli ɔmɛ nu Yesu

(<x>470 26:47-56</x>; <x>480 14:43-50</x>; <x>490 22:47-53</x>)

1 Benɛ Yesu sɔle kikɛ nɛ ɔ, e kɛ e kaseli ɔmɛ je kpo, nɛ a pue nɔ kɛ ho ya po Kedron pa a, kɛ ya sɛ abɔɔ ko mi ngɛ lejɛ ɔ.

2 Yuda, nɔ nɛ ya tsɔɔ Yesu se blɔ ɔ le lejɛ ɔ, ejakaa Yesu kɛ mɛ pɔɔ kpemi ngɛ lejɛ ɔ.

3 Lɔ ɔ he ɔ, osɔfo nikɔtɔma amɛ, kɛ Farisi bi ɔmɛ tsɔ Roma ta buli komɛ, kɛ sɔlemi we ɔ tsɔli komɛ abɔɔ ɔ mi, nɛ Yuda nyɛɛ a hɛ mi. A dla a he kaa nihi nɛ yaa ta, nɛ a hɛɛ kanehi, kɛ jatɛhi.

4 Yesu le nɔ́ tsuaa nɔ́ nɛ a maa pee lɛ ɔ momo; lɔ ɔ he ɔ, e hɛ lɛ kɛ ba hɛ mi nɛ e bi mɛ ke, “Mɛnɔ nyɛ ngɛ hlae?”

5 A he nɔ ke, “Yesu nɛ je Nazaret ɔ.” Yesu de mɛ ke, “Imi ji nɛ ɔ nɛ!” Yuda, nɔ nɛ tsɔɔ Yesu se blɔ ɔ hu kɛ mɛ daa si ngɛ lejɛ ɔ.

6 Benɛ Yesu de mɛ ke, “Imi ji nɛ ɔ nɛ” ɔ, a gbee senyasenya, nɛ a ya nɔ si ngɛ zugba.

7 Yesu kpale bi mɛ ekohu ke, “Mɛnɔ nyɛ ngɛ hlae?” A he nɔ ke, “Yesu nɛ je Nazaret ɔ.”

8 Yesu kpale de mɛ ke, “Tse i de nyɛ momo ke, ‘Imi ji nɛ ɔ nɛ.’ Lɔ ɔ he ɔ, ke imi nyɛ ngɛ hlae ɔ, lɛɛ nyɛɛ ngmɛ ye se nyɛɛli nɛ ɔmɛ blɔ nɛ a ya.”

9 E de enɛ ɔ, konɛ munyu ɔ nɛ e tu ke, “Tsaatsɛ, nihi nɛ o tu ngɔ wo ye dɛ mi ɔ, i ha we nɛ a ti nɔ kake ngmelu po hɛ mi nɛ kpata” a, nɛ ba mi.

10 Kɛkɛ nɛ Simon Petro nyla klaate nɛ e hɛɛ ɔ, nɛ e kɛ po osɔfo nɔkɔtɔma pe kulaa a nyɔguɛ ɔ hiɔ nɔ tue. Nyɔguɛ ɔ biɛ ji Malko.

11 ⓙ Yesu de Petro ke, “Ngɔɔ o klaate ɔ kɛ wo e kpo ɔ mi. Amanehlu kplu nɛ Tsaatsɛ to kaa ma nu ɔ, ma ko nu lo?”

A ngɔ Yesu kɛ ya Hana hɛ mi

12 Kɛkɛ nɛ Roma asafoatsɛ nɔkɔtama a, kɛ e ta buli ɔmɛ, kɛ Yuda ta buli ɔmɛ nu Yesu, nɛ a fi lɛ,

13 nɛ a kɛ lɛ ya ha Hana kekle. Hana a, Kayafa nɛ ngɛ osɔfo nɔkɔtɔma pe kulaa yee jamɛ a jeha a ngatsɛ ji lɛ.

14 ⓚ Kayafa nɛ wo Yuda ma nimeli ɔmɛ ga be ko kaa e sa nɛ nɔ kake mohu nɛ gbo ngɛ ma a tsuo nane mi ɔ nɛ.

Petro de ke e li Yesu

(<x>470 26:69-70</x>; <x>480 14:66-68</x>; <x>490 22:55-57</x>)

15 Simon Petro kɛ kaselɔ kpa hu nyɛɛ Yesu se. Osɔfo nɔkɔtɔma pe kulaa a le jamɛ a kaselɔ ɔ saminya, lɔ ɔ he ɔ, kaselɔ ɔ nyɛɛ Yesu se kɛ sɛ osɔfo nɔkɔtɔma pe kulaa a we ɔ mi;

16 se Petro lɛɛ e tlɔ sinya a nya. Pee se ɔ, jamɛ a kaselɔ kpa a kpale je kpo, nɛ e kɛ yiheyo ɔ nɛ ngɛ sinya a nya bue ɔ ya tu munyu, kɛkɛ nɛ e ngɔ Petro kɛ sɛ we ɔ mi.

17 Yiheyo ɔ nɛ ngɛ sinya a nya bue ɔ de Petro ke, “Tse mo hu jamɛ a nyumu ɔ kaselɔ ji mo?” Petro he nɔ ke, “Dɛbi.”

18 Jamɛ a be ɔ, fĩɛ ngɛ yee, nɛ nyɔguɛ ɔmɛ, kɛ tsɔli ɔmɛ ngɔ hã kɛ slɛ la, nɛ a daa si ngɛ la a hlue. Kɛkɛ nɛ Petro hu ya piɛ a he nɛ e kɛ mɛ ngɛ la a hlue.

Osɔfo nɔkɔtɔma pe kulaa ta Yesu nya mi

(<x>470 26:59-66</x>; <x>480 14:55-64</x>; <x>490 22:66-71</x>)

19 Jehanɛ osɔfo nɔkɔtɔma pe kulaa a bi Yesu e kaseli ɔmɛ, kɛ e tsɔɔmi ɔ he sane.

20 Yesu he nɔ ke, “I tuɔ munyu paa kɛ haa nɔ tsuaa nɔ. Daa nɛ ɔ, i tsɔɔ ní ngɛ kpe he ɔmɛ, kɛ sɔlemi we ɔ he nɛ Yuda bi kulaa kpee ngɛ ɔ, nɛ i de we nɔ́ ko nɔ́ ko ngɛ laami mi gblee.

21 Mɛni he je o ngɛ imi mohu munyu bie ɔ Ni nɛmɛ nɛ ba buɔ mi tue ɔ, bi mɛ nɔ́ nɛ i deɔ mɛ. Ni nɛ ɔmɛ le níhi nɛ i de ɔ.”

22 Benɛ Yesu de enɛ ɔ, tsɔli ɔmɛ nɛ ngɛ lejɛ ɔ a ti nɔ kake gba lɛ ma, nɛ e de lɛ ke, “Heto nɛ o ha osɔfo nɔkɔtɔma pe kulaa a ji nɛ ɔ?”

23 Yesu he nɔ ke, “Ke i de nɔ yaya ko ɔ, de ngɛ hiɛ ɔ nɛ ni nɛ ɔmɛ tsuo nɛ a nu. Se ke kpakpa a, lɛɛ mɛni he je o ngɛ mi gbee ɔ?”

24 Jehanɛ ɔ, Yesu ngɛ pã a mi, nɛ Hana ha a kɛ lɛ ya ha Kayafa, osɔfo nɔkɔtɔma pe kulaa a.

Petro de ekohu ke e li Yesu

(<x>470 26:71-75</x>; <x>480 14:69-72</x>; <x>490 22:58-62</x>)

25 Petro daa si ngɛ lejɛ ɔ nɛ e ngɛ la a hlue kɛ mwɔɔ. Kɛkɛ nɛ nihi nɛ daa si ngɛ lejɛ ɔ, a ti ni komɛ de ke, “Tse mohu jamɛ a nyumu ɔ kaselɔ ji mo.” Se Petro kplɛɛ we, nɛ e ke, “Dɛbi, pi e kaselɔ ji mi.”

26 Jehanɛ ɔ, osɔfo nɔkɔtɔma pe kulaa a nyɔguɛ ɔmɛ a ti nɔ kake, nɔ nɛ Petro po e tue ɔ weku no bi Petro ke, “Anɛ i nɛ o kɛ lɛ ngɛ abɔɔ ɔ mi lo?”

27 Se loloolo ɔ, Petro kplɛɛ we, kɛkɛ nɛ amlɔ nɔuu kungwɔ kpa nɔ.

A kɛ Yesu ba Pilato hɛ mi

(<x>470 27:1-2</x>, <x>470 27:11-14</x>; <x>480 15:1-5</x>; <x>490 23:1-5</x>)

28 Jena mɔtu mla a, a ngɔ Yesu kɛ je Kayafa ngɔ, nɛ a kɛ lɛ ya amlaalo ɔ mɔ ɔ mi. Yuda ma nimeli ɔmɛ nitsɛmɛ lɛɛ a sɛ we mi, ejakaa a sume nɛ a ble a he, bɔ nɛ pee nɛ a nyɛ nɛ a ye Hetsɔmi ɔ.

29 Lɔ ɔ he ɔ, Pilato je kpo kɛ ba a ngɔ, nɛ e bi mɛ ke, “Mɛni sane nyɛ kɛ ba ngɛ nyumu nɛ ɔ nya poe ɔ?”

30 A he nɔ ke, “E pee we yayami ko jinɛ waa kɛ lɛ ba be mo hae.”

31 Pilato de mɛ ke, “Lɛɛ nyɛ nitsɛmɛ nyɛɛ ngɔ lɛ nɛ nyɛ ya kojo lɛ ngɛ nyɛ nitsɛmɛ nyɛ mlaa nya mɔ.” A he nɔ ke, “Wɔɔ lɛɛ wa be he blɔ nɛ wa gbeɔ nɔ.”

32 ⓛ A de enɛ ɔ, konɛ Yesu munyu nɛ e tu kɛ tsɔɔ gbenɔ nɛ e ma gbo ɔ nɛ ba mi.

33 Kɛkɛ nɛ Pilato kpale e se kɛ sɛ mɔ ɔ mi, nɛ e tsɛ Yesu, nɛ e bi lɛ ke, “Mo ji Yuda bi ɔmɛ a matsɛ ɔ?”

34 Yesu he nɔ ke, “Mo nitsɛ o yi mi nɛ o to kɛ ngɛ enɛ ɔ dee, aloo ni komɛ lɛ a de mo ja ngɛ ye he?”

35 Pilato bi lɛ ke, “Anɛ Yuda no ji mi? Mo nitsɛ o ma mi bi, kɛ osɔfo nikɔtɔma amɛ nɛ a ngɔ mo ba ha mi. Mɛni o pee?”

36 Yesu he nɔ ke, “Ye matsɛ yemi ɔ, pi je nɛ ɔ mi nɔ́. Kaa je nɛ ɔ mi nɔ́ ɔ, jinɛ ye se nyɛɛli ɔmɛ maa plee ye he, konɛ a ko ngɔ mi ngɔ ha Yuda ma nimeli ɔmɛ. Se enɛ ɔ, ye matsɛ yemi ɔ, pi je nɛ ɔ mi nɔ́.”

37 Lɔ ɔ he ɔ, Pilato bi lɛ ke, “Se matsɛ ji mo kɛ̃?” Yesu he nɔ ke, “O ngɛ dee ke matsɛ ji mi. Imi lɛɛ enɛ ɔ he nɛ a fɔ mi kɛ ba je ɔ mi, konɛ ma tsɔɔ anɔkuale ɔ. Nɔ tsuaa nɔ nɛ le anɔkuale ɔ buɔ mi tue.”

38 Pilato bi lɛ ke, “Mɛni ji anɔkuale?” Enɛ ɔ se ɔ, Pilato kpale je kpo ekohu kɛ ya Yuda bi ɔmɛ a ngɔ, nɛ e ya de mɛ ke, “Imi lɛɛ i nɛ sane yobu ko kulaa ngɛ e he nɛ ma da nɔ kɛ bu lɛ fɔ.

Pilato bu Yesu gbenɔ fɔ

(<x>470 27:15-31</x>; <x>480 15:6-20</x>; <x>490 23:13-25</x>)

39 Se ngɛ kusumi nya a, daa Hetsɔmi nyami be ɔ, i ngmɛɛ pã mi no kake he haa nyɛ. Anɛ nyɛ suɔ nɛ ma ngmɛɛ Yuda bi ɔmɛ a matsɛ ɔ he ha nyɛ lo?”

40 A he nɔ kɛ ngmlaa ke, “Dɛbi! Pi nɔ nɛ ɔ; ngmɛɛ Baraba mohu he ha wɔ.” Kpahu Baraba a, ojo fialɔ ji lɛ.