Yohane 20

Yɔkɔ mi gu ɔ

(<x>470 28:1-8</x>; <x>480 16:1-8</x>; <x>490 24:1-12</x>)

1 Otsi ɔ we kekleekle ligbi ɔ makɛ mla, benɛ je mi tsɔ we lolo ɔ, Maria Magdalena ba yɔkɔ ɔ he, nɛ e na kaa a je tɛ ɔ kɛ je yɔkɔ ɔ nya.

2 Kɛkɛ nɛ e wo fo kɛ ya na Simon Petro, kɛ kaselɔ kpa a nɛ Yesu suɔ lɛ ɔ ngɛ he nɛ a ngɛ ɔ. E de mɛ ke, “A wo Nyɔmtsɛ ɔ gbogboe kɛ je yɔkɔ ɔ mi, nɛ wa li he nɛ a kɛ lɛ ya fɔ.”

3 Petro kɛ kaselɔ kpa a pue nɔ kɛ ho yɔkɔ ɔ he ya.

4 Mɛ ni enyɔ ɔmɛ tsuo a kɛ fo wo mi, se nɔ kake ɔ be Petro he, nɛ lɛ kekle e su yɔkɔ ɔ he.

5 E ya kɔkɔ e yi si, nɛ e na kploba amɛ nɛ a kɛ bla Yesu gbogboe ɔ, se e sɛ we yɔkɔ ɔ mi.

6 Simon Petro nyɛɛ e se kɛ ba lejɛ ɔ, nɛ lɛɛ e nyɛɛ tɛɛ kɛ ya sɛ yɔkɔ ɔ mi. Lɛ hu e na kploba amɛ nɛ a kɛ bla Yesu gbogboe ɔ nɛ pueɔ si ngɛ lejɛ ɔ,

7 kɛ duku nɛ a kɛ fi e yi ɔ hulɔ. Duku ɔ be kploba amɛ a kasa nya; se mohu a ku mi kɛ fɔ si ngɛ he ko banee.

8 Jehanɛ ɔ, kaselɔ kaketsɛ ɔ nɛ su lejɛ ɔ kekle ɔ hu sɛ yɔkɔ ɔ mi; nɛ benɛ e na ní nɛ ɔmɛ ɔ, e he ye.

9 Pohu ngmami ɔ nɛ de ke e sa nɛ e te si kɛ je gbeje ɔ, a nui sisi kɛ mwɔɔ.

10 Kɛkɛ nɛ kaseli ɔmɛ kpale a se kɛ ho we mi ya.

Yesu je e he kpo tsɔɔ Maria Magdalena

(<x>470 28:9-10</x>; <x>480 16:9-11</x>)

11 Se Maria daa si ngɛ yɔkɔ ɔ he kɛ mwɔɔ, nɛ e ngɛ ya foe. Benɛ e ngɛ ya foe ɔ, e kɔkɔ e yi si, nɛ e hyɛ yɔkɔ ɔ mi,

12 nɛ e na hiɔwe bɔfohi enyɔ ngɛ lejɛ ɔ. A wo ní hiɔ, nɛ a hii si ngɛ he nɛ a kɛ Yesu gbogboe ɔ fɔ si ngɛ ɔ; nɔ kake ngɛ e yi je, kɛ nɔ kake hu ngɛ e nane si je.

13 A bi Maria ke, “Maa, mɛni he je nɛ o ngɛ ya foe ɔ?” E de mɛ ke, “A wo ye Nyɔmtsɛ ɔ kɛ je, nɛ i li he nɛ a kɛ lɛ ya fɔ.”

14 Jehanɛ ɔ, e plɛ e he, nɛ e na Yesu nɛ daa si, se e yo we lɛ.

15 Yesu bi lɛ ke, “Maa, mɛni he je nɛ o ngɛ ya foe ɔ? Mɛnɔ o ngɛ hlae?” Maria susu kaa eko ɔ, abɔɔ ɔ mi dlalɔ ji lɛ, lɔ ɔ he ɔ, e de Yesu ke, “Nyɔmtsɛ, ke mo nɛ o ba wo lɛ kɛ je hiɛ ɔ, lɛɛ tsɔɔ mi he nɛ o kɛ lɛ ya fɔ nɛ ma ya wo lɛ.”

16 Yesu tsɛ lɛ, “Maria!” Kɛkɛ nɛ Maria plɛ e he, nɛ e de lɛ ngɛ Hebri mi ke, “Rabuni” (E sisi ji “Tsɔɔlɔ”).

17 Yesu de lɛ ke, “Koo ta ye he, ejakaa i na we ma ya hiɔwe ngɛ Tsɛ ɔ ngɔ lolo. Se yaa ye nyɛmimɛ ɔmɛ a ngɔ, nɛ o ya de mɛ ke, ‘I yaa hiɔwe ngɛ Tsaatsɛ, kɛ nyɛ hu nyɛ Tsɛ; ye Mawu, kɛ nyɛ hu nyɛ Mawu ɔ ngɔ.’ ”

18 Maria Magdalena ya nɛ e ya sɛɛ ha kaseli ɔmɛ ke e na Nyɔmtsɛ ɔ, nɛ e bɔ mɛ níhi tsuo nɛ Yesu de lɛ ɔ.

Yesu je e he kpo tsɔɔ e kaseli ɔmɛ

(<x>470 28:16-20</x>; <x>480 16:14-18</x>; <x>490 24:36-49</x>)

19 Jamɛ a ligbi ɔ nɛ ji otsi ɔ kekleekle ligbi ɔ gbɔkuɛ ɔ, Yuda ma nimeli ɔmɛ a he gbeye nya a, kaseli ɔmɛ ya bua a he nya ngɛ he ko, nɛ a nga sinya amɛ. Tlukaa a, Yesu ba da si ngɛ a kpɛti. E de mɛ ke, “Nyɛ he manye!”

20 Kɛkɛ nɛ e ngɔ e dɛ mi ɔ, kɛ e kasa mi ɔ ngɔ tsɔɔ mɛ. Kaseli ɔmɛ ná bua jɔmi babauu kaa a na Nyɔmtsɛ ɔ.

21 Jehanɛ ɔ, Yesu kpale de mɛ ekohu ke, “Nyɛ he manye! Bɔ nɛ Tsɛ ɔ tsɔ mi ɔ, ja nɔuu imi hu i ngɛ nyɛ tsɔe.”

22 Kɛkɛ nɛ e mu ngɔ pue a nɔ, nɛ e de mɛ ke, “Nyɛ he Mumi Klɔuklɔu ɔ.

23 ⓡ Ke nyɛ ngɔ nɔ ko he yayami kɛ pa lɛ ɔ, a kɛ pa; nɛ ke nyɛ ngɔ nɔ ko he yayami kɛ to ɔ, a ngɔ to.”

Yesu je e he kpo tsɔɔ Toma

24 Benɛ Yesu ba je e he kpo ɔ, Toma, ni nyɔngma kɛ enyɔ ɔmɛ a ti nɔ kake nɛ a tsɛɛ lɛ Hayo hulɔ ɔ be lejɛ ɔ.

25 Lɔ ɔ he ɔ, kaseli kpa amɛ de lɛ pee se ke, “Wa na Nyɔmtsɛ ɔ!” Se Toma de mɛ ke, “Ja i na e dɛ mi plɛɛko pa amɛ nɛ i kɛ ye nine nguɛ slaa a nya, nɛ i ngɔ ye nine hɔ e kasa mi ɔ hulɔ loko ma he ye.”

26 Ligbi kpaanyɔ se ɔ, kaseli ɔmɛ bua a he nya ekohu ngɛ tsu mi, nɛ Toma piɛ a he. A nga sinya amɛ, se Yesu ba nɛ e ba da si ngɛ a kpɛti, nɛ e de ke, “Nyɛ he manye!”

27 Jehanɛ, e de Toma ke, “Ngɔɔ o nine nguɛ ba slaa ye dɛ mi nɛ o hyɛ; nɛ o kɛ o nine ba hɔ ye kasa mi. Kpa nɔ jemi, nɛ o he ye!”

28 Toma he nɔ ke, “Ye Nyɔmtsɛ! Ye Mawu!”

29 Kɛkɛ nɛ Yesu bi lɛ ke, “Toma, nɛ o na mi ɔ, tse o he ye? A gbaa nihi nɛ nɛ́, se kɛ̃ ɔ, a heɔ yeɔ!”

Nɔ nɛ he nɛ a ngma womi nɛ ɔ

30 Yesu pee okadi kpahi fuu ngɛ e kaseli ɔmɛ a hɛ mi nɛ a ngmɛ́ ngɛ womi nɛ ɔ mi.

31 Se enɛ ɔmɛ lɛɛ a ngma, konɛ nyɛ he ye kaa Yesu ji Kristo, Mawu Bi ɔ. Nɛ ke nyɛ he lɛ ye ɔ, nyɛ yi ma na wami.