Mose V, 3

Israel ye Matsɛ Og nɔ

(<x>40 21:31-35</x>)

1 “Jehanɛ, wa dɔ wa yi kɛ gu Bashan blɔ, nɛ Bashan matsɛ, Og kɛ e ma a tsuo je kpo konɛ a kɛ wɔ ba hwu ta ngɛ Edrei.

2 Kɛkɛ nɛ Yawɛ de mi ke, ‘Koo ye lɛ gbeye, ejakaa i ngɔ e kɛ e ma a, kɛ e zugba a tsuo ngɔ wo o dɛ nɛ o pee lɛ kaa bɔ nɛ o pee Amor bi ɔmɛ a matsɛ, Sihon nɛ hi Heshbon ɔ.’

3 “Lɔ ɔ he ɔ, Yawɛ ngɔ Bashan matsɛ, Og hu kɛ e ma a mi bi ɔmɛ tsuo ngɔ wo wa dɛ; wa gbe mɛ tsuo kulaa; nɔ ko nɔ ko píɛ.

4 Wa kpɔ a ma amɛ tsuo ngɛ be kake nɔuu mi; e píɛ ekoeko nɛ wa kpɔ we. Mahi tsuo nɛ wa kpɔ ngɛ lejɛ ɔ ji nyingmi ekpa, nɛ ji Argob zugba a tsuo, he nɛ Matsɛ Og nɛ je Bashan ɔ yeɔ tsɛ ngɛ ɔ.

5 Ma nɛ ɔmɛ tsuo ji mahi nɛ a fia gbogbo gojogojoo ngɔ wo a he, kɛ a nya agbohi kɛ a se lami dade níhi. E slo kɔpehi babauu nɛ a fiɛ gbogbo ngɔ wui a he.

6 Wa kpata mɛ tsuo pɛpɛɛpɛ a hɛ mi. Bɔ nɛ wa pee Heshbon matsɛ, Sihon ɔ, ja nɔuu wa pee ma tsuaa ma kɛ e mi nyumu ɔmɛ, yi ɔmɛ, kɛ jokuɛwi ɔmɛ.

7 Se lohwe ɔmɛ tsuo lɛɛ wa ngɔ, nɛ wa ha níhi ngɛ ma amɛ a mi.

8 “Jamɛ a be ɔ mi kɛ̃ ɔ, wa kpɔ zugba a nɛ ngɛ Yordan pa a beleku je ɔ kɛ je matsɛmɛ enyɔ nɛ ɔmɛ a dɛ, kɛ je Arnon pa a nya kɛ ya si Hermon yo ɔ he.

9 (Sidon bi ɔmɛ tsɛɔ Hermon yo ɔ ke Sirion, se Amor bi ɔmɛ tsɛɔ lɛ Senir.)

10 Wa ngɔ Matsɛ Og nɛ je Bashan ɔ e zugba a tsuo, mahi nɛ ngɛ yo nɔ zugba kpataa a, kɛ Gilead, kɛ Bashan zugba amɛ a nɔ ɔ, hluu kɛ ya su Saleka kɛ Edrei nɛ ji mahi nɛ ngɛ beleku je ɔ.”

11 Bashan matsɛ, Og pɛ ji oblaihi nɛ a tsɛɛ mɛ Refaim ɔ a ti nɔ nɛ piɛ. E dade sa tso[1] ngɛ Amon bi ɔmɛ a ma nɛ a tsɛɔ Raba a kɛ mwɔɔ. Sa tso ɔ kami ji gugue enyɔ kɛ nine mi blimi enyɔ, nɛ e blimi ji gugue kake kaa bɔ nɛ níhi a susumi mlaa a ngɛ ɔ.

Wɛtsohi nɛ hi Yordan pa a beleku je

(<x>40 32:1-42</x>)

12 “Benɛ wa ngɔ zugba a, i ha Ruben kɛ Gad wɛtso ɔmɛ zugba nɛ ngɛ Aroer ma a omleyi je ngɛ Arnon pa a kasa nya, kɛ Gilead yo zugba a fa, kɛ e nɔ ma amɛ.

13 Manase wɛtso fa a hu, i ha mɛ Gilead zugba nɛ piɛ ɔ, kɛ Bashan tsuo, he nɛ Og ye tsɛ ngɛ ɔ; lɔ ɔ ji Argob zugba a tsuo.” Sa a, a tsɛɛ Bashan ke oblaihi a zugba.

14 Yair nɛ je Manase wɛtso ɔ mi ɔ ngɔ Argob zugba nɛ a tsɛɛ Bashan ɔ tsuo kɛ ya su Geshur bi ɔmɛ, kɛ Maaka bi ɔmɛ a huzu ɔ nya. E ngɔ e biɛ ngɔ wo kɔpe ɔmɛ; nɛ kɛ ba si mwɔnɛ ɔ, a tsɛɛ mɛ ke Yair kɔpehi.

15 “I ngɔ Gilead ngɔ ha Makir nɛ je Manase wɛtso ɔ mi ɔ.

16 I ngɔ zugba a nɛ ngɛ kɛ je Gilead kɛ ya na Arnon pa a ngɔ ha Ruben kɛ Gad wɛtso ɔmɛ. Pa a kpɛti pee a huzu ngɛ leneyi je; nɛ a huzu nɛ ngɛ omleyi je ji Yabok pa a nɛ e fa peeɔ Amon bi ɔmɛ a huzu ɔ.

17 Jehanɛ, ngɛ beleku je ɔ, a zugba a huzu ya su Yordan pa a nya. E je Galilea wo ɔ nya ngɛ omleyi je kɛ ya na Ngo wo ɔ ngɛ leneyi je, ngɛ Pisga yo ɔ he ngɛ beleku je.

18 ⓚ “Jamɛ a be ɔ mi nɔuu ɔ, i fa nyɛ ke, ‘Yawɛ, nyɛ Mawu ɔ ngɔ zugba nɛ ɔ ngɔ ha nyɛ kaa nyɛ weto ní. Nyɛ nihi nɛ nyɛ su ta yami ɔ, nyɛɛ mia kɛ ta hwumi ní kɛ nyɛɛ nyɛ nyɛmimɛ Israel wɛtso kpa amɛ a hɛ mi kɛ ya po Yordan pa a, nɛ nyɛɛ piɛ a he nɛ ngɔ a zugba a.

19 Nyɛ yi ɔmɛ, nyɛ bimɛ tsɔwi ɔmɛ, kɛ nyɛ na amɛ lɛɛ a hi ma amɛ nɛ i ngɔ ha nyɛ ɔ a mi. I le kaa nyɛ ngɛ lohwehi babauu.

20 Nyɛɛ piɛ nyɛ nyɛmimɛ Israel bi ɔmɛ a he kɛ ya si a maa ngɔ zugba a nɛ Yawɛ ngɛ mɛ hae ngɛ Yordan pa a bonyoku je ɔ; nɛ Yawɛ ma ha mɛ hu a maa hi nɔ kaa bɔ nɛ e pee ha nyɛ ɔ. Lɔ ɔ se loko nyɛɛ kpale kɛ ba zugba nɛ i ngɔ ha nyɛ ɔ nɔ.’

21 “Lɔ ɔ se ɔ, i fa Yoshua ke, ‘Nyɛ nitsɛmɛ nyɛ na nɔ́ nɛ Yawɛ, nyɛ Mawu ɔ pee matsɛmɛ enyɔ nɛ ɔmɛ; jã kɛ̃ Yawɛ maa pee matsɛmɛ kpa amɛ nɛ nyɛ ma ya gu a zugba amɛ a nɔ ɔ.

22 Nyɛ ko ye mɛ gbeye, ejakaa Yawɛ, nyɛ Mawu ɔ maa hwu ha nyɛ.’ ”

A ngmɛ́ Mose blɔ nɛ e ya Kanaan

23 ⓛ Mose tsa nɔ ke, “I kpa Yawɛ pɛɛ kɛ hɛdɔ jamɛ a be ɔ mi ke,

24 ‘Nyɔmtsɛ Yawɛ lee, i le kaa ní nguanguahi, kɛ nyakpɛ níhi nɛ o maa pee ɔ a sisije kɛkɛ ji nɛ ɔ nɛ; ejakaa mawu ko mawu ko be hiɔwe, loo zugba a nɔ nɛ ma nyɛ ní nguanguahi nɛ o tsu nɛ ɔ ma tsu!

25 Yawɛ, i kpa mo pɛɛ, ha nɛ ma po Yordan pa a, nɛ ma ya na zugba kpakpa nɛ ngɛ pa a se ɔ, yo zugba nɛ ngɛ fɛu ɔ, kɛ Lebanon yo ɔmɛ!’

26 “Nyɛ he ɔ, Yawɛ mi mi fu mi, nɛ e bui mi tue. Yawɛ de mi ke, ‘E hiɛ! Koo wo nɔ́ nɛ ɔ nɔ ta hu!

27 Kuɔ ɔ kɛ ya Pisga yo ɔ yi mi, konɛ o hyɛ kɛ o hɛngmɛ kɛkɛ, kɛ je beleku je kɛ ya bonyoku je, jehanɛ kɛ je omleyi je kɛ ya leneyi je. Hyɛ he tsuaa he saminya; ejakaa o be Yordan pa nɛ ɔ poe kɔkɔɔkɔ.

28 Wo Yoshua mlaa, nɛ o wo lɛ kã kɛ he wami; ejakaa lɛ ji nɔ nɛ maa nyɛɛ ma a hɛ mi kɛ po pa a kɛ ya ngɔ zugba a nɛ o ngɛ hyɛe ɔ.’

29 “Lɔ ɔ he ɔ, wa tlɔ kɔ̃ nɛ ngɛ Betpeor ma a hanɔ ɔ mi.”