Mose V, 2

1 ⓕ “Nyagbe ɔ, wa kpale hia kɛ gu Wo Tsu ɔ nya blɔ kɛ ho nga a nɔ ya kaa bɔ nɛ Yawɛ fa wɔ ɔ. Wa wo lalaalo be babauu ngɛ Edom yo zugba a nɔ.

2 “Lɔ ɔ se ɔ, Yawɛ de mi ke,

3 ‘Bɔ nɛ nyɛ wo lalaalo ngɛ yo zugba a nɔ ɔ, e hiɛ; nyɛ plɛ kɛ ya omleyi je.

4 ⓖ De ma a tsuo ke nyɛ yaa be ngɛ nyɛ nyɛmimɛ Esau bi ɔmɛ a zugba a nɔ kɛ ho. Mɛɛ lɛɛ Edom yo ɔ he a hii. A maa ye nyɛ gbeye.

5 Se nyɛɛ hyɛ saminya nɛ nyɛɛ kɛ mɛ ko hwu ta. I be nyɛ a zugba a ekoeko hae; nane mami he kake po be nyɛ nɔ́ pee; ejakaa i ngɔ Edom yo ɔ ngɔ ha Esau nina kaa a weto ní.

6 Nyɛ ma he niye ní nɛ nyɛ maa wo he hiɔ kɛ nyu ngɛ a dɛ.’

7 “Nyɛ na bɔ nɛ Yawɛ, nyɛ Mawu ɔ gbaa nyɛ ngɛ nɔ́ tsuaa nɔ́ mi, nɛ e baa nyɛ yi ngɛ nga kplanaa tilaa nɛ ɔ nɔ. Jeha nyingmi eywiɛ sɔuu ji nɛ ɔ nɛ Yawɛ, nyɛ Mawu ɔ hyɛ nyɛ nɔ, nɛ nɔ́ ko nɔ́ ko hia we nyɛ.

8 “Kɛkɛ nɛ wa pue nɔ; wa si blɔ nɛ yaa Elat kɛ Eziongeber ma amɛ a mi ɔ, nɛ wa gu Ngo wo ɔ nya blɔ. Jehanɛ, wa plɛ kɛ gu omleyi je, kɛ beleku je a kpɛti blɔ kɛ yaa Moab nga a nɔ.

9 ⓗ Yawɛ de mi ke, ‘Koo hao Moab bi ɔmɛ nɛ ji Lot nina a. I ngɔ Ar ma a ngɔ ha mɛ. I be mo a zugba a eko hae.’ ”

10 Oblai komɛ nɛ a tsɛɛ mɛ Emim bi hu hi Ar sa a; nɛ e mi nihi hiɛ. Oblai nɛ ɔmɛ ka kaa Anak bi ɔmɛ.

11 A tsɛɛ mɛ ke Refaim hulɔ; se Moab bi ɔmɛ tsɛɛ mɛ Emim bi.

12 Hor bi ɔmɛ hu hi Edom sa a; se Esau nina a ba fie mɛ, nɛ a kpata a hɛ mi, nɛ mɛ nitsɛmɛ a hi lejɛ ɔ, kaa bɔ nɛ Israel bi ɔmɛ hu ba fie a he nyɛli ɔmɛ kɛ je zugba nɛ ji weto ní nɛ Yawɛ ngɔ ha mɛ ɔ nɔ ɔ.

13 “Jehanɛ, wa ya po Zered pa a kaa bɔ nɛ Yawɛ fa wɔ ɔ.

14 ⓘ Be nɛ e ngɔ wɔ kɛ nyɛɛ kɛ je Kadesh Barnea kɛ ba su be nɛ wa po Zered pa a pee jeha nyingmi etɛ kɛ kpaanyɔ. Jamɛ a yi nɔ bi ta buli ɔmɛ tsuo pɛpɛɛpɛ gbo kaa bɔ nɛ Yawɛ ka mɛ kita a.

15 Anɔkuale mi ɔ, Yawɛ kɛ mɛ to ní kɛ ya si mɛ tsuo a hɛ mi kpata.

16 “Benɛ ta buli ɔmɛ tsuo a hɛ mi kpata se ɔ,

17 Yawɛ de wɔ ke,

18 ‘Mwɔnɛ ɔ, nyɛ yaa gu Moab huzu nya ngɛ Ar kasa nya.

19 ⓙ Ke nyɛ ya su Amon bi ɔmɛ nɛ ji Lot nina a a zugba a huzu nya a, nyɛ ko hao mɛ, nɛ nyɛɛ kɛ mɛ ko hwu ta hulɔ; ejakaa i be nyɛ a zugba a ekoeko hae.’ ”

20 (A buu zugba nɛ ɔ hu kaa oblaihi nɛ a tsɛɛ mɛ Refaim ɔ a zugba; mɛ lɛ a hi lejɛ ɔ sa a; se Amon bi ɔmɛ tsɛɛ mɛ Zamzum bi.

21 Ma nɛ ɔ kle, nɛ e he wa; e mi ni ɔmɛ ka gagaaga kaa Anak bi. A hiɛ babauu, se Yawɛ kpata a hɛ mi. Amon bi ɔmɛ ya ngɔ a zugba a, nɛ a hi lejɛ ɔ.

22 Yawɛ pee Edom bi ɔmɛ nɛ ji Esau nina a jã nɔuu. E kpata Hor bi ɔmɛ a hɛ mi, nɛ Edom bi ɔmɛ ya ngɔ a zugba a, nɛ a hi lejɛ ɔ. A ngɛ lejɛ ɔ kɛ mwɔɔ.

23 Nihi nɛ je pa kpɔ Kreta nɔ ɔ, hi Mediterenia wo nya zugba a nɔ be ko. Mɛ lɛ a gbe Avim bi ɔmɛ nɛ hi lejɛ ɔ sa a, nɛ a ngɔ a zugba a tsuo nɛ ngɛ leneyi je ɔ kɛ ya su Gaza tɔɔ.)

24 “Benɛ wa nyɛɛ Moab zugba a nɔ kɛ be se ɔ, Yawɛ de mi ke, ‘Nyɛ pue blɔ nɛ nyɛ ya po Arnon pa a. I ngɔ Amor matsɛ, Sihon nɛ je Heshbon kɛ e zugba a ngɔ wo nyɛ dɛ. Nyɛ ya tua lɛ, nɛ nyɛɛ ngɔ e zugba a.

25 Kɛ je mwɔnɛ nɛ ɔ kɛ yaa a, ma ha nihi nɛ ngɛ je ɔ mi tsuo maa ye nyɛ gbeye. Ke a wo nyɛ ta a, sawale maa nu nɔ tsuaa nɔ.’

Israel ye Matsɛ Sihon nɔ

(<x>40 21:21-30</x>)

26 “Jehanɛ, i tsɔ nihi kɛ je Kedemot nga kplanaa a nɔ kɛ ho Heshbon matsɛ, Sihon ngɔ ya kɛ he jɔmi munyu ke,

27 ‘Mo ha nɛ waa gu o huzu ɔ nya kɛ be; wa maa nyɛɛ blɔ tɛɛ kɛ ho. Wa be blɔ ɔ nɔ jee.

28 Niye ní nɛ wa maa ye, kɛ nyu hu nɛ wa maa nu ɔ, wa ma he kɛ sika. Ha nɛ waa nyɛɛ kɛ be kɛkɛ.

29 Kaa bɔ nɛ Esau nina a nɛ ngɛ Edom yo ɔ nɔ, kɛ Moab bi ɔmɛ hu nɛ ngɛ Ar ɔ pee ha wɔ ɔ, mo hu ngmɛɛ wɔ blɔ kɛ ya si wa ma ya po Yordan pa a, kɛ ya zugba nɛ Yawɛ, wa Mawu ɔ ha wɔ ɔ nɔ.’

30 “Se Heshbon matsɛ, Sihon kplɛɛ we nɛ waa gu e zugba a mi kɛ be. Yawɛ, nyɛ Mawu ɔ kplii e tsui, bɔ nɛ pee nɛ waa ye e nɔ, nɛ́ wa kpɔ e zugba a ngɛ e dɛ. Jamɛ a zugba a nɔ wa ngɛ kɛ sá.

31 “Jehanɛ, Yawɛ de mi ke, ‘Hyɛ, i jɔɔ Matsɛ Sihon kɛ e zugba a he ha nyɛ. Nyɛ ya ngɔ e zugba a, nɛ nyɛɛ hi nɔ.’

32 Kɛkɛ nɛ Matsɛ Sihon kɛ e ma a tsuo je kpo nɛ a kɛ wɔ ba hwu ta ngɛ Yahaz.

33 Yawɛ, wa Mawu ɔ ngɔ lɛ wo wa dɛ, nɛ wa gbe e kɛ e binyumu ɔmɛ, kɛ e we bi ɔmɛ tsuo.

34 Jamɛ a be ɔ mi nɔuu nɛ wa ngɔ e ma amɛ tsuo, nɛ wa kpata mɛ tsuo pɛpɛɛpɛ a hɛ mi. Wa gbe nɔ tsuaa nɔ, nyumuhi, yihi, kɛ jokuɛwi tsuo; wa si we nɔ kake po.

35 Wa ngɔ we mi lohwe ɔmɛ, nɛ wa ha níhi ngɛ ma amɛ a mi.

36 Kɛ je Aroer nɛ ngɛ Arnon kɔ̃ ɔ nya kɛ ya su Gilead ɔ, ma ko ma ko be nɛ wa nyɛ we lɛ; Yawɛ, wa Mawu ɔ ngɔ mɛ tsuo wo wa dɛ.

37 Hehi nɛ Yawɛ, wa Mawu ɔ fa wɔ ke wa ko ya a pɛ nɛ wa yɛ; mɛ ji Amon bi ɔmɛ a zugba a, Yabok pa a nya hiɛ kɛ hiɛ, kɛ a ma amɛ nɛ ngɛ yo nɔ ɔ, kɛ he kpa komɛ hulɔ.