Mose V, 4

Mose de Israel ma a ke a ye mlaa amɛ a nɔ pɛpɛɛpɛ

1 Jehanɛ Mose de Israel ma a ke, “Nyɛɛ bu mlaa amɛ nɛ ma tsɔɔ nyɛ ɔ tue, nɛ nyɛɛ ye a nɔ, konɛ nyɛ yi nɛ na wami, nɛ́ nyɛ ya ngɔ zugba a nɛ Yawɛ, nyɛ nɛmɛ a Mawu ɔ kɛ ngɛ nyɛ hae ɔ.

2 ⓜ Nyɛ ko ngɔ nɔ́ ko kɛ piɛ mlaa nɛ i ngɛ nyɛ woe nɛ ɔ he; nɛ nyɛ ko je nɔ́ ko kɛ je mi; nyɛɛ ye Yawɛ, nyɛ Mawu ɔ mlaa amɛ nɛ i ngɛ nyɛ woe nɛ ɔ a nɔ pɛpɛɛpɛ.

3 ⓝ Nyɛ nitsɛmɛ nyɛ na nɔ́ nɛ Yawɛ pee ngɛ Peor yo ɔ he. Nɔ tsuaa nɔ nɛ ya nyɛɛ Baal se ngɛ lejɛ ɔ, Yawɛ, nyɛ Mawu ɔ kpata e hɛ mi.

4 Se nyɛ nihi tsuo pɛpɛɛpɛ nɛ nyɛ mɛtɛ Yawɛ, nyɛ Mawu ɔ he ɔ, nyɛ ngɛ wami mi kɛ mwɔɔ.

5 “I tsɔɔ nyɛ mlaa amɛ tsuo kaa bɔ nɛ Yawɛ, ye Mawu ɔ fa mi ke ma pee ɔ; nyɛɛ ye a nɔ ngɛ zugba nɛ nyɛ yaa ngɔ ɔ nɔ.

6 Nyɛɛ ye a nɔ pɛpɛɛpɛ, konɛ ma amɛ tsuo nɛ maa nu blɔ nya tomi nɛ ɔmɛ tsuo a he ɔ, a de ke, ‘Niinɛ, ma kpetekpleenyɛ nɛ le ní, nɛ ngɛ juɛmi saminya ji nɛ ɔ nɛ!’

7 “Ma kpetekpleenyɛ te nɛ ngɛ nɛ e mawuhi baa e kasa nya kikɛ nɛ ɔ, kaa bɔ nɛ Yawɛ, wa Mawu ɔ baa wa ngɔ be tsuaa be nɛ wa tsɛ lɛ ɔ?

8 Jehanɛ hu, ma kpetekpleenyɛ te nɛ ngɛ nɛ e mlaahi da kaa ní nɛmɛ tsuo nɛ i ngɛ nyɛ tsɔɔe mwɔnɛ nɛ ɔ?

9 Nyɛɛ hyɛ saminya! Nyɛ hɛ nɛ hi nyɛ he nɔ ngɛ níhi nɛ nyɛ na kɛ nyɛ nitsɛmɛ nyɛ hɛngmɛ ɔ a he. Nyɛ hɛ ko je nɔ ligbi ko ligbi ko nyɛ wami be tsuo. Nyɛɛ tsɔɔ nyɛ bimɛ, kɛ nyɛ bibimɛ nɛ a le,

10 kaa ligbi ɔ nɛ nyɛ da si ngɛ Sinai yo ɔ he ngɛ Yawɛ, nyɛ Mawu ɔ hɛ mi ɔ, Yawɛ de mi ke, ‘Bua ma a nya. Ha nɛ a bu nɔ́ nɛ ma de mɛ ɔ tue, konɛ a ye mi gbeye a wami be tsuo; nɛ a tsɔɔ a bimɛ, nɛ mɛ hu a ye mi gbeye.’

11 ⓞ “Nyɛ de nyɛ bimɛ bɔ nɛ nyɛ ba da si ngɛ yo ɔ sisi, kɛ bɔ nɛ yo ɔ ngɛ tsoe, nɛ la a ya hiɔwe ploplooplo, nɛ bɔku wo diblii kpii kɛ bɔle yo ɔ.

12 Jehanɛ, nyɛ de mɛ bɔ nɛ Yawɛ kɛ nyɛ tu munyu kɛ je la a mi. Nyɛ nu munyu ɔmɛ, se nyɛ nɛ́ lɛ nitsɛ e su ko kulaa; gbi ɔ kɛkɛ nɛ nyɛ nu nɛ ngɛ munyu ɔmɛ tue.

13 ⓟ E tsɔɔ nyɛ bɔ nɛ nyɛ maa pee kɛ ye somi nɛ e kɛ nyɛ so ɔ nɔ; lɔ ɔ ji kaa nyɛ maa ye mlaa nyɔngma amɛ nɛ e ngma ngɛ tɛ tɛtlɛɛ enyɔ ɔmɛ a nɔ ɔ a nɔ.

14 ⓠ Yawɛ de mi jamɛ a be ɔ mi ke ma tsɔɔ nyɛ mlaa amɛ tsuo nɛ nyɛ maa ye a nɔ ngɛ zugba a nɛ nyɛ yaa ngɔ ɔ nɔ ɔ.

A bɔ ma a kɔkɔ ngɛ amaga jami he

15 “Benɛ Yawɛ kɛ nyɛ tu munyu kɛ je la a mi ngɛ Sinai yo ɔ nɔ ɔ, nyɛ nɛ́ su ko su ko. Lɔ ɔ he ɔ, nyɛɛ hyɛ nyɛ he nɔ saminya,

16 ⓡ konɛ nyɛ ko ya ye sane yaya, nɛ nyɛ ya pee amaga ko ha nyɛ he, nɛ ngɛ kaa nyumu, loo yo,

17 ⓢ loo lohwe ko nɛ ngɛ zugba a nɔ, loo lohwe pɛlitsɛ nɛ tee ngɛ kɔɔhiɔ mi,

18 loo nɔ́ ko nɛ waa, loo lo. Nyɛ ko pee ekoeko henɔ ko kulaa.

19 Nyɛ ko ha níhi nɛ nyɛ ngɛ hyɛe ngɛ hiɔwe ɔ, pu, nyɔhiɔ, kɛ dodoehi babauu nɛ ha si ngɛ hiɔwe nɛ ɔ nɛ gbla nyɛ juɛmi kɛ ya ja mɛ, nɛ nyɛ sɔmɔ mɛ. Ejakaa Yawɛ, nyɛ Mawu ɔ ngɔ mɛ ngɔ ha ma amɛ tsuo nɛ ngɛ je ɔ mi ɔ.

20 ⓣ Se nyɛɛ lɛɛ, Yawɛ kpɔ̃ nyɛ kɛ je Egipt yi mi wami wawɛɛ ɔ sisi. E je nyɛ konɛ e pee nyɛ lɛ nitsɛ e ma kulaa, kaa bɔ nɛ nyɛ ji mwɔnɛ nɛ ɔ.

21 ⓤ Nyɛ he ɔ, Yawɛ, nyɛ Mawu ɔ mi mi fu mi, nɛ e ka kita ke i be Yordan pa a poe kɛ ya zugba kpakpa a nɛ e ngɔ kɛ ngɛ nyɛ hae ɔ nɔ.

22 Imi lɛɛ ma gbo ngɛ hiɛ ɔ, ngɛ zugba nɛ ɔ nɔ, nɛ i be Yordan pa a poe; se nyɛɛ lɛɛ nyɛ maa po pa a kɛ ya ngɔ zugba kpakpa a.

23 Nyɛɛ hyɛ nɛ hi, konɛ nyɛ hɛ ko je somi nɛ Yawɛ, nyɛ Mawu ɔ kɛ nyɛ so ɔ nɔ. Mlaa nɛ e wo nyɛ ke nyɛ ko pee amaga ko ɔ, nyɛɛ ye nɔ.

24 ⓥ Ejakaa Yawɛ, nyɛ Mawu ɔ ngɛ kaa la nɛ ngɛ tsoe plamplam; a kɛ lɛ plee we nɔ́ he.

25 “Ke nyɛ se kɛ ngɛ zugba a nɔ, nɛ nyɛ ná bimɛ, kɛ bibimɛ ɔ, nyɛ ko pee yayami kaa nyɛ maa puɛ amaga ko nɛ ngɛ su ko kulaa ha nyɛ he. E ji yayami agbo ngɛ Yawɛ hɛ mi nɛ ma ha e mi mi maa wo la.

26 I tsɛ hiɔwe kɛ zugba odase kaa ke nyɛ bui mi tue ɔ, nyɛ hɛ mi ma kpata ngɛ zugba a nɔ. Lɛɛ zugba a nɛ nyɛ yaa ngɔ ngɛ Yordan pa a se ɔ, nyɛ se be kɛe ngɛ nɔ. A ma kpata nyɛ hɛ mi pɛsɛpɛsɛ.

27 ⓦ Yawɛ maa gbɛ nyɛ ngɔ fĩa je ma kpa amɛ a mi, nɛ nyɛ ti nihi bɔɔ pɛ nɛ a yi ma na wami.

28 Nyɛ ma ya sɔmɔ mawuhi nɛ a kɛ nɔmlɔ adesa nine pee ngɛ lejɛ ɔ, mawuhi nɛ a kɛ tso pee, mawuhi nɛ a kɛ tɛ pee, mawuhi nɛ hyɛ we nɔ́, nɛ a nui nɔ́, kɛ mawuhi nɛ a yi ní, nɛ a nui nɔ́ he fu.

29 ⓧ Nyɛ ma hla Yawɛ, nyɛ Mawu ɔ ngɛ lejɛ ɔ. Ke nyɛ hla lɛ kɛ nyɛ tsui tsuo ɔ, nyɛ maa na lɛ.

30 Ke nyɛ ngɛ amanehlu mi, nɛ ní nɛ ɔmɛ tsuo ba nyɛ nɔ ɔ, lɔ ɔ loko nyɛ maa kpale kɛ ba Yawɛ, nyɛ Mawu ɔ ngɔ, nɛ nyɛ maa bu lɛ tue.

31 Akɛnɛ Yawɛ, nyɛ Mawu ɔ, mɔbɔ nalɔ ji lɛ he je ɔ, e be nyɛ kuae, nɛ e be nyɛ hɛ mi kpatae; e hɛ be somi nɛ e kɛ nyɛ nɛmɛ ɔmɛ so ɔ nɔ jee.

32 “Jehanɛ, nyɛ bi ngɛ je ɔ mi tsuo kulaa kaa kɛ je blema lokoo loko a fɔ nyɛ, kɛ je be nɛ Mawu bɔ nɔmlɔ ngɛ zugba a nɔ ɔ, anɛ sane nguaa ko kaa enɛ ɔ eko ba hyɛ, loo a nu eko hyɛ lo?

33 Anɛ ma ko nu mawu ko gbi hyɛ nɛ e kɛ mɛ tu munyu kɛ je la mi nɛ a gbo we, se a ngɛ hɛ ngmengmle kaa bɔ nɛ nyɛ ngɛ nɛ ɔ lo?

34 Anɛ mawu ko ka hyɛ kaa e ma ya je je ma ko kɛ je je ma kpa ko mi kɛ pee lɛ nitsɛ e ma, kaa bɔ nɛ Yawɛ, nyɛ Mawu ɔ pee ha nyɛ ngɛ Egipt ɔ lo? Nyɛ nitsɛmɛ nyɛ na kɛ nyɛ hɛngmɛ, bɔ nɛ e je e he wami, kɛ e nyɛmi kpetekpleenyɛ ɔ kpo; e kɛ gbenɔ hiɔhi, kɛ ta ba; e pee okadihi, kɛ nyakpɛ níhi; nɛ e ha gbeye ní nguanguahi ba.

35 ⓨ Nyɛɛ lɛɛ Yawɛ ha nyɛ na ní nɛ ɔmɛ kɛ tsɔɔ nyɛ kaa Yawɛ ɔ, lɛ nɔ kake pɛ ji Mawu; nɛ nɔ ko nɔ ko be hu, ja lɛ pɛ.

36 E ha nyɛ nu e gbi kɛ je hiɔwe, konɛ e kɛ tsɔse nyɛ; nyɛ na e la klɔuklɔu ɔ ngɛ zugba a nɔ, nɛ e kɛ nyɛ tu munyu kɛ je mi.

37 Akɛnɛ e suɔ nyɛ nɛmɛ ɔmɛ he je ɔ, e hla nyɛ, nɛ lɛ nitsɛ e kɛ e he wami kpetekpleenyɛ ɔ je nyɛ kɛ je Egipt.

38 E fie je mahi nɛ a he wa kɛ je nyɛ blɔ ɔ nɔ, nɛ e ngɔ a zugba a ngɔ ha nyɛ. Lejɛ ɔ nyɛ ngɛ kɛ mwɔɔ.

39 Lɔ ɔ he ɔ, mwɔnɛ ɔ, nyɛ na nyɛɛ le, nɛ nyɛ hɛ ko je nɔ gblegbleegble kaa Yawɛ ji Mawu ngɛ hiɔwe kɛ zugba; e se ɔ, nɔ ko be.

40 Nyɛɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ, konɛ e hi ha nyɛɛ kɛ nyɛ nina. Ke nyɛ ye a nɔ ɔ, nyɛ maa hi zugba nɛ Yawɛ, nyɛ Mawu ɔ kɛ ngɛ nyɛ hae ɔ nɔ daa.”

A to wesa he mahi ngɛ Yordan pa a beleku je

41 ⓩ Enɛ ɔ se ɔ, Mose hla ma etɛ ngɛ Yordan pa a beleku je ngɔ to,

42 konɛ ke nɔ ko li e he be nɛ e nine ya kpa ngɛ e nyɛmi nɔ tlukaa nɛ pi ninyɛ nya a, e tu fo kɛ ya sa we ngɛ lejɛ ɔ. Ke e tu fo kɛ ho ma nɛ ɔmɛ eko mi ya a, e yi ma na wami; nɛ a be lɛ gbee.

43 E hla Bezer nɛ ngɛ nga a nɔ ngɛ zugba kpataa a nɔ ha Ruben wɛtso ɔ, Ramot ngɛ Gilead ha Gad wɛtso ɔ, kɛ Golan nɛ ngɛ Bashan ɔ ha Manase wɛtso ɔ.

Munyuhi nɛ sɛ mlaa hami ɔ hɛ mi

44 Mawu mlaa amɛ nɛ Mose ngɔ ha Israel bi ɔmɛ ji nɛ ɔmɛ nɛ.

45 Benɛ Israel bi ɔmɛ je Egipt, nɛ a ba su kɔ̃ ɔ nɛ ngɛ Yordan pa a beleku je ngɛ Betpeor hanɔ ɔ, nɛ e ha mɛ mlaa nɛ ɔmɛ ɔ nɛ. Sa a, Amor bi ɔmɛ a matsɛ, Sihon nɛ je Heshbon ɔ nɛ ye zugba nɛ ɔ nɔ. Se Mose kɛ Israel bi ɔmɛ ba ye e nɔ, benɛ a je Egipt kɛ ma a.

46

47 A ngɔ e zugba a, kɛ Amor matsɛ kpa ko nɛ a tsɛɛ lɛ Og nɛ hi Bashan nɛ ngɛ Yordan pa a beleku je ɔ hu e zugba a.

48 Zugba nɛ ɔ huzu ji kɛ je Aroer ma a mi kɛ ya su Arnon pa a nya, kɛ ya na Sirion yo ɔ ngɛ leneyi je; lɔ ɔ ji Hermon yo ɔ nɛ.

49 Zugba tsuo nɛ ngɛ Yordan pa a beleku je kɛ ya su Ngo wo ɔ nya, kɛ Pisga yo ɔ sisi hu piɛ he.