Mose V, 19

Wesa he ma amɛ kɛ nɔ gbemi he sane

(<x>40 35:9-28</x>; <x>60 20:1-9</x>)

1 “Ke Yawɛ, o Mawu ɔ kpata je ma amɛ a hɛ mi, nɛ e ngɔ a zugba a kɛ ha mo, nɛ o ba ye a nane mi ngɛ a ma amɛ, kɛ a we ɔmɛ a mi ɔ,

2 moo dla zugba a mi etɛ, eko fɛɛ eko kɛ e mi ma ngua ko nɛ blɔ kpiti ngɛ kɛ yaa mi. Kɛkɛ ɔ, ke nyɛmi ko nine ya kpa ngɛ nɔ ko nɔ ɔ, e ma nyɛ maa tu fo kɛ ya sa we ngɛ eko mi.

3

4 Ke nɔ ko gbe nɔ tlukaa nɛ pi e he nyɛlɔ ɔ, e ma nyɛ maa tu fo kɛ ya ma nɛ ɔmɛ eko mi nɛ e ya sa we.

5 Waa ngɔ lɛ kaa nihi enyɔ ho pu mi ya nɛ a ya po tso. Benɛ nɔ kake ngɛ tso ɔ poe ɔ, e gbiɛ nɛ e wo nɔ ɔ dade ɔ hia kɛ je tso ɔ nya ya fia e nyɛmi ɔ, nɛ e gbo. Ke e ba mi ja a, nɔ ɔ nɛ tu fo kɛ ya ma nɛ ɔmɛ eko mi nɛ e ya sa we ngɛ lejɛ ɔ.

6 Ke wesa he ma kake pɛ nɛ a to ɔ, eko ɔ, lejɛ ɔ maa kɛ tsɔ, nɛ lue yelɔ ɔ nine maa su nɔ ɔ nɔ; nɛ e kɛ mi mi la maa gbe nɔ ko nɛ pee we nɔ́ ko yaka gu. Nyumu nɛ ɔ, e nine nɛ ya kpa ngɛ e nyɛmi ɔ nɔ tlukaa, se pi kaa e to e yi mi kaa e maa pee lɛ yayami ko.

7 Enɛ ɔ he je nɛ i fa mo ke o to wesa he ma etɛ ɔ nɛ.

8 “Ke Yawɛ, o Mawu ɔ ha nɛ o zugba a ba kle kaa bɔ nɛ e de o nɛmɛ ɔmɛ ke e maa pee ɔ, nɛ e ngɔ zugba a tsuo ngɔ ha mo ɔ,

9 to wesa he ma etɛ kɛ piɛ kekle ní ɔmɛ a he. Niinɛ, ke o maa ye mlaa a tsuo nɛ i ngɛ mo woe mwɔnɛ ligbi nɛ ɔ nɔ, nɛ o maa suɔ Yawɛ, o Mawu ɔ, nɛ o maa ba o je mi ngɛ e tsɔɔmi ɔmɛ a nya a, e maa ngɔ zugba nɛ ɔ kɛ ha mo.

10 Pee bɔ nɛ i ngɛ mo tsɔɔe nɛ ɔ, konɛ a ko pue nihi a muɔ si yaka, nɛ́ a ko bu mo fɔ kaa o tane nihi a yi yaka ngɛ zugba nɛ Yawɛ ngɔ kɛ ngɛ mo hae ɔ nɔ.

11 “Se ke nɔ ko ngɛ e nyɛmi nyɛe, nɛ e ya wo lɛ ka, nɛ e fia lɛ nɔ nɛ e gbe, nɛ e tu fo kɛ ya sa we ngɛ wesa he ma nɛ ɔmɛ eko mi ɔ,

12 lɔ ɔ lɛɛ e ma a mi nimeli ɔmɛ nɛ a tsɔ nɛ a ya ngɔ lɛ kɛ ba ha e nyɛmi lue yelɔ ɔ nɛ e gbe lɛ.

13 Koo na lɛ mɔbɔ kulaa. Koo ngmɛ blɔ nɛ nɔ gbelɔ nɛ ɔ nɛ hi hɛ ngmengmle ngɛ Israel hu; kɛkɛ ɔ, níhi a mi maa hi ha mo.

Blema huzu ɔmɛ

14 ⓤ “Koo hia o nyɛmi e huzu nɛ nimeli wo blema a kɛ je he nɛ e ngɛ ɔ, ngɛ zugba a nɛ Yawɛ, o Mawu ɔ ngɔ ha mo ɔ nɔ.

Nɔ́ nɛ kɔɔ odase yeli a he

15 ⓥ “Nɔ kake pɛ ko ye odase kɛ si nɔ ko nɛ pee yayami ko. Loko a maa bu nɔ ko fɔ ɔ, a nu odase yeli enyɔ, loo nihi nɛ hiɛ pe ja a nya mi munyu.

16 Ke nɔ ko ya po nɔ ko nya yaka gu nɛ e kɛ puɛ nɔ ɔ,

17 mɛ ni enyɔ ɔmɛ tsuo nɛ a ngɔ a sane ɔ kɛ ya he nɛ a jaa Mawu ngɛ ɔ, kɛ ya ha osɔfo ɔmɛ kɛ kojoli ɔmɛ nɛ a ngɛ ní tsue jamɛ a be ɔ.

18 Kojoli ɔmɛ nɛ a hyɛ munyu ɔ mi fitsofitso. Ke a na kaa lakpa odase nɔ ɔ ba ye kɛ si e nyɛmi Israel fɔfɔɛ ɔ,

19 a gbla e tue sisiisi kaa bɔ nɛ e susu kaa a ko pee e nyɛmi ɔ pɛpɛɛpɛ. Nyɛɛ pee jã kɛ je nɔ́ yayami nɛ ɔ kɛ je nyɛ kpɛti.

20 Ha nɛ nɔ tsuaa nɔ nɛ nu sane ɔ, konɛ a ye gbeye, nɛ nɔ ko nɔ ko kó pee yayami nɛ ɔ eko hu gblegbleegble.

21 ⓦ Koo na mɔbɔ kulaa ngɛ kikɛmɛ a sanehi a mi; to nane mi pɛpɛɛpɛ. Tue gblami ɔ ji kaa ke nɔ ko gbe nɔ ko ɔ, a gbe lɛ kɛ to nya; ke nɔ ko pɛ́ nɔ ko hɛngmɛ, loo e ku e lungu, loo e po nɔ ɔ nine, loo e nane ɔ, a pee lɛ jã nɔuu kɛ to nane mi.