Mose V, 20

Níhi nɛ kɔɔ ta hwumi he

1 “Ke o hia ta, nɛ o kɛ o he nyɛli yaa hwu, nɛ o na kaa he nyɛli ɔmɛ ngɛ zugba ta lɛhi, okpɔngɔhi, kɛ ta buli babauu pe mo ɔ, koo ye mɛ gbeye. Yawɛ, o Mawu ɔ nɛ kpɔ mo kɛ je Egipt zugba a nɔ ɔ kɛ mo ngɛ.

2 Loko o ma bɔni ta a hwumi ɔ, osɔfo nɛ ba da ma a hɛ mi, nɛ e de tabo ɔ ke,

3 ‘Nyɛɛ bu tue, Israel bi! Mwɔnɛ ɔ, nyɛ su ta nya. Nyɛ ko ye nyɛ he nyɛli ɔmɛ gbeye, nyɛ kã nɛ ko ta, nɛ nyɛ ko nu sawale.

4 Yawɛ, nyɛ Mawu ɔ nitsɛ kɛ nyɛ yaa, nɛ e ma ha nyɛ maa ye kunimi.’

5 “Lɔ ɔ se ɔ, asafoatsɛmɛ ɔmɛ nɛ a de ta buli ɔmɛ ke, ‘Anɛ nɔ ko ngɛ hiɛmɛ nɛ ɔ nɛ po we he, se e gbaa we nɔ lolo kɛ ha Yawɛ lo? Ke nɔ ko kaa ja ngɛ hiɛ ɔ, e kpale kɛ ho we mi ya. Ke pi ja a, ke e ba mi kaa e ya nɔ ta a, nɔ kpa ma ba gbaa we ɔ nɔ.

6 Anɛ nɔ ko ngɛ hiɛmɛ nɛ ɔ nɛ pee wai ngmɔ he, se e na we nɛ e kpa wai yiblii ɔ lolo lo? Ke nɔ ko kaa ja ngɛ hiɛ ɔ, e kpale kɛ ho we mi ya. Ke pi ja a, ke e ba mi kaa e ya nɔ ta a, nɔ kpa ma ba ye ngmɔ ɔ mi wai yiblii ɔ.

7 Anɛ nɔ ko ngɛ hiɛmɛ nɛ ɔ nɛ ya bi yo si, se e na we nɛ ngɔ lɛ lolo lo? Ke nɔ ko kaa ja ngɛ hiɛ ɔ, e kpale kɛ ho we mi ya. Ke pi ja a, ke e ba mi kaa e ya nɔ ta a, nɔ kpa maa ngɔ yo nɛ e ya bi si ɔ.’

8 “Jehanɛ asafoatsɛmɛ ɔmɛ nɛ a de ta buli ɔmɛ ke, ‘Anɛ nɔ ko ngɛ hiɛmɛ nɛ ɔ nɛ sawale nu lɛ, nɛ e ngɛ gbeye yee lo? Ke nɔ ko kaa ja ngɛ hiɛ ɔ, e kpale kɛ ho we mi ya. Ke pi ja a, e ma ha fɔ̃ maa sɛ e nyɛmimɛ ɔmɛ a mi.’

9 Ke asafoatsɛmɛ ɔmɛ tu munyu nɛ ɔmɛ gbe nya a, á to tatsɛmɛ nɛ maa da kuu tsuaa kuu nya.

10 “Ke o yaa tua ma ko ɔ, moo ngmɛ jamɛ a ma a mi bi ɔmɛ blɔ nɛ a ha yi.

11 Ke ni ɔmɛ bli ma agbo ɔmɛ, nɛ a ha yi ɔ, mɛ tsuo pɛpɛɛpɛ a ma ba pee o nyɔguɛhi nɛ o maa nyɛ a nɔ nɛ a ma tsu ní kpakpataa ha mo.

12 Ke jamɛ a ma a mi bi ɔmɛ sume nɛ a ha yi, se a suɔ ta mohu ɔ, ha nɛ o tabo ɔ nɛ sa a yi.

13 Kɛkɛ ɔ, Yawɛ, o Mawu ɔ ma ha o maa ngɔ ma a, nɛ o maa gbe nyumu tsuaa nyumu nɛ ngɛ lejɛ ɔ.

14 Yi ɔmɛ, jokuɛwi ɔmɛ, we mi lohwe ɔmɛ, kɛ níhi tsuo nɛ ngɛ ma a mi ɔ, o ma nyɛ maa ngɔ kɛ pee o nɔ. O he nyɛli ɔmɛ a tabo ɔ mi ní ɔmɛ tsuo maa pee o nɔ́. Yawɛ, o Mawu ɔ nɛ ngɔ ha mo.

15 Ma amɛ nɛ a kɛ zugba a, he nɛ o yaa hi ɔ a kpɛti kɛ saminya a, jã ji bɔ nɛ o maa pee mɛ.

16 “Se ke o ngɔ ma amɛ nɛ Yawɛ, o Mawu ɔ ngɔ kɛ ngɛ mo hae ngɛ zugba a nɔ ɔ, gbee a mi nimli ɔmɛ tsuo.

17 Mo kpata ni ɔmɛ tsuo a hɛ mi pɛsɛpɛsɛ kaa bɔ nɛ Yawɛ, o Mawu ɔ fa mo ke o pee ɔ; mɛ ji Hit bi, Amor bi, Kanaan bi, Periz bi, Hiv bi, kɛ Yebus bi.

18 Gbee mɛ, konɛ a ko ba tsɔɔ mo a musu ní ɔmɛ nɛ a peeɔ nɛ a kɛ jaa mawu kpahi ɔ, nɛ o kɛ enɛ ɔ ba pee yayami kɛ si Yawɛ, o Mawu ɔ.

19 “Ke o hɛ dɔ kɛ ngɛ ma ko tuae ɔ, koo poo tsohi nɛ woɔ yiblii nɛ a yeɔ nɛ ngɛ lejɛ ɔ ngɔ pue he. Ke be nɛ o kɛ sá ma a yi kɛ kaa mɛni po, koo pee ja. Moo ye tso yiblii ɔmɛ, se o ko kpata tso ɔmɛ a hɛ mi. Tsa pi tso ɔmɛ ji o he nyɛli ɔmɛ nɛ o kɛ ná a.

20 Se tsohi nɛ o le kaa a yi a yiblii ɔ, o ma nyɛ ma kɛ pee níhi nɛ a maa da nɔ kɛ sá ma a yi kɛ ya si be nɛ o maa ngɔ ma a.