Mose V, 18

Osɔfo ɔmɛ a blɔ nya ní

1 “Osɔfo ɔmɛ a weku, nɛ ji Levi weku ɔ, a ko ná zugba nɛ a dla kɛ ha Israel ma a eko. Mɛɛ lɛɛ nɔ́ nɛ a kɛ maa lɛ a he ji nike níhi, kɛ bɔhi nɛ a sãã ha Yawɛ ɔ.

2 ⓞ A be zugba nae kaa a weto ní kaa bɔ nɛ wɛtso kpa amɛ na a; a blɔ nya ji kaa a pee Yawɛ we osɔfohi kaa bɔ nɛ Yawɛ wo si ɔ.

3 “Be tsuaa be nɛ a maa gbe na, loo to kɛ sã bɔ ɔ, a je lohwe ɔ gugue, e tsitsa, kɛ e mi mi kotoku ɔ kɛ ha osɔfo ɔmɛ.

4 Jehanɛ hu, ke ní nɛ ɔmɛ bɔni bami ɔ, kekleekle ní ɔmɛ maa pee osɔfo ɔmɛ a nɔ́: blɛfo, wai, oliv nu, kɛ to he bwɔmi.

5 Levi bi ɔmɛ a wɛtso ɔ lɛ Yawɛ hla ngɛ wɛtso ɔmɛ tsuo a mi nɛ a sɔmɔ lɛ daa kaa osɔfohi.

6 “Levi no saisaa ma nyɛ maa je Israel ma amɛ eko fɛɛ eko mi kɛ ba he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ.

7 E ma nyɛ ma ba ja nɛ e sɔmɔ Yawɛ, e Mawu ɔ ngɛ lejɛ ɔ kaa bɔ nɛ Levi bi kpa amɛ nɛ ngɛ lejɛ ɔ peeɔ ɔ pɛpɛɛpɛ.

8 E kɛ osɔfo kpa amɛ nɛ ngɛ lejɛ ɔ nɛ a na niye ní blɔ nya sɔsɔɛ; se nɔ́ nɛ e weku li maa mane lɛ ɔ lɛɛ e pee lɛ nɔ kake e nɔ́.

Wɔ jami kusumi he kɔkɔ bɔmi

9 “Ke o ya su zugba a nɛ Yawɛ, o Mawu ɔ ngɛ mo hae ɔ nɔ ɔ, mo ko pee je ma amɛ nɛ ngɛ lejɛ ɔ a ní hiɔmi ní ɔmɛ.

10 ⓟ Mo ko sã o bimɛ ngɛ o bɔ sami la tɛ nɔ; jehanɛ hu, nyɛ ti nɔ ko kó klaa, e ko pee nyakpɛ ní, e ko nu wɔ, e ko tsu kunya,

11 ⓠ e ko fi kablɛ, e ko tsɛ kpade, nɛ e ko bi ní hulɔ.

12 Yawɛ, o Mawu ɔ sume nihi nɛ tsuɔ níhi nɛ a hiɔ nɛ ɔ; lɔ ɔ he nɛ e ngɛ je ma amɛ fiee kɛ je zugba a nɔ ngɛ o blɔ nɔ ɔ nɛ.

13 ⓡ Moo ye Yawɛ, o Mawu ɔ anɔkuale kɛ pi si.”

A wo si kaa gbalɔ ko maa ba

14 Jehanɛ, Mose de ke, “Je ma amɛ nɛ o yaa ngɔ a zugba a buɔ nihi nɛ klaa, kɛ kunya tsuli tue; nyɛɛ lɛɛ Yawɛ, nyɛ Mawu ɔ kplɛɛ we nɛ nyɛɛ pee ja.

15 ⓢ Se mohu, Yawɛ nyɛ Mawu ɔ ma je gbalɔ ko nɛ ngɛ kaa imi kɛ je nyɛ nyɛmimɛ ɔmɛ a kpɛti ha nyɛ, nɛ lɛ tue nyɛɛ bu.

16 “Ligbi ɔ nɛ nyɛ tsuo pɛpɛɛpɛ nyɛ bua nyɛ he nya ngɛ Sinai yo ɔ he ɔ, nyɛ kpa pɛɛ ke ma ko ha nɛ nyɛɛ nu Yawɛ munyu nɛ e ngɛ tue ɔ hu, loo nɛ nyɛɛ na bɔ nɛ e je e he kpo ngɛ la hleei ɔ mi ɔ; ejakaa nyɛ ye gbeye kaa nyɛ ma gbo.

17 Lejɛ ɔ nɛ Yawɛ de mi ke, ‘Nɔ́ nɛ a bi ɔ da saminya.

18 Ma je gbalɔ ko nɛ ngɛ kaa mo kɛ je mɛ nitsɛmɛ a kpɛti; ma tsɔɔ lɛ nɔ́ nɛ e de, nɛ lɛɛ e ma de ma a nɔ́ tsuaa nɔ́ nɛ i fa lɛ ɔ.

19 ⓣ E maa tu munyu ngɛ ye biɛ mi, nɛ ke nɔ ko bui lɛ ɔ, imi nitsɛ ma gbla nɔ ɔ tue.

20 Se ke gbalɔ ko te si nɛ e gba ngɛ ye biɛ mi, nɛ pi imi nɛ i fa lɛ ɔ, á gbe lɛ; á gbe gbalɔ saisaa nɛ gbaa ngɛ mawu kpahi a biɛ mi ɔ jã kɛ̃.’

21 “O ma bi o he ke, ‘Kɛ ma pee kɛ le kaa gbalɔ ko sɛ gbi ji Yawɛ ngɔ kɛɛ?’

22 Ke gbalɔ ko gba ngɛ Yawɛ biɛ mi, nɛ nɔ́ nɛ e de ɔ bɛ mi ɔ, sɛ gbi ɔ ji Yawɛ ngɔ. Jamɛ a gbalɔ ɔ nitsɛ e nya mi munyu ji lɔ ɔ nɛ; koo ye lɛ gbeye.