Mose V, 17

1 “Nyɛ ko ngɔ na, loo to nɛ kpa, loo nɔ́ ko yayami ngɛ e he kɛ sã bɔ ha Yawɛ, nyɛ Mawu ɔ; Yawɛ hiɔ jamɛ a bɔ.

2 “Alini, nyɛ maa nu ngɛ nyɛ ma amɛ nɛ Yawɛ, nyɛ Mawu ɔ ngɔ kɛ ngɛ nyɛ hae ɔ ekomɛ a mi kaa nyumu ko, loo yo ko pee yayami kɛ si Yawɛ, nyɛ Mawu ɔ; e ya yi Yawɛ somi ɔ nɔ, nɛ e tɔ̃;

3 ⓘ lɔ ɔ ji kaa e ya ja mawu kpahi, pu, nyɔhiɔ kɛ dodoehi, nɛ e sɔmɔ mɛ, nɛ e kɛ tɔ̃ Yawɛ mlaa a nɔ.

4 Ke nɔ ko ba sɛɛ ha nyɛ ɔ, nyɛ bi nɛ nyɛ hla mi fitsofitso kaa sane ɔ ngɛ mi niinɛ lo. Ke e ngɛ mi niinɛ kaa a tsu nɔ́ yayami nɛ ɔ ngɛ Israel ɔ,

5 lɛɛ nyɛɛ ngɔ nɔ ɔ kɛ je ma a mi, nɛ nyɛ ya fiaa lɛ tɛ, nɛ e gbo, nyumu jio, yo jio.

6 ⓙ Se kɛ̃ ɔ, odase yeli enyɔ, loo nihi nɛ hiɛ pe jã a we odase nɔ a maa da kɛ bu lɛ fɔ, loko a gbe lɛ; a ko nu odase yelɔ kake pɛ nya mi munyu.

7 ⓚ Odase yeli ɔmɛ nɛ a fiaa lɛ tɛ ɔ kekle, konɛ ma a tsuo nɛ fiaa nɔ ɔ tɛ ɔ; nyɛɛ pee ja kɛ je nɔ́ yayami nɛ ɔ kɛ je nyɛ kpɛti.

8 “E ma nyɛ maa ba mi kaa sane komɛ a yemi kɛ he buámi nya maa wa tsɔ ha ma amɛ eko mi kojoli, kaa weto ní blɔ nya he pleemi sane komɛ kikɛ, loo kaa a plaa nɔ ko, loo sane komɛ nɛ a ngɛ mi hlae, konɛ a na kaa pe a je blɔ gbe nɔ ko nɛ e gbo ɔ, loo a li be nɛ a fia lɛ nɔ́ nɛ e gbo. Ke e ba lɛ ja a, nyɛɛ ya he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ.

9 Nyɛɛ ngɔ nyɛ sane ɔ kɛ ya pue osɔfo ɔmɛ nɛ ji Levi bi ɔmɛ, kɛ kojolɔ nɛ ngɛ ní tsue jamɛ a be ɔ mi ɔ a hɛ mi, konɛ a buá he.

10 Mɛ ji ni nɛmɛ nɛ maa ma munyu ɔ nya si. Nyɛɛ pee bɔ nɛ a ma de nyɛ ɔ pɛpɛɛpɛ.

11 Nyɛɛ kplɛɛ bɔ nɛ a maa ma munyu ɔ nya si ɔ; nɛ nyɛɛ ye blɔ nya tomi ɔmɛ nɛ a maa tsɔɔ nyɛ ɔ a nɔ fitsofitso.

12 Se nɔ nɛ ma tsɔ atuã kɛ si kojolɔ, loo osɔfo ɔ nɛ ngɛ sɔmɔe jamɛ a be ɔ mi ɔ, nyɛɛ gbe lɛ; kikɛmɛ a blɔ nɛ ɔ nɔ nyɛɛ gu kɛ je yayami kɛ je Israel ma a mi.

13 Enɛ ɔ ma ha ma a tsuo maa nu sane nɛ ɔ he, nɛ a maa ye gbeye; kɛkɛ ɔ, nɔ ko nɔ ko be nlae kaa e maa pee ja hu.

Blɔ nya tomi nɛ kɔɔ matsɛ he

14 ⓛ “Ke nyɛ ya ngɔ zugba a nɛ Yawɛ, nyɛ Mawu ɔ ngɛ nyɛ hae ɔ, nɛ e ba pee nyɛ nɔ ɔ, nyɛ ma de ke nyɛ maa wo matsɛ kaa bɔ nɛ ma amɛ nɛ bɔle nyɛ ɔ tsuo pee ɔ.

15 Nyɛɛ hyɛ saminya, konɛ nɔ nɛ nyɛ ngɛ hlae kaa e ye matsɛ ɔ, e pee nɔ nɛ Yawɛ hla. E pee nyɛ ma mi no; nyɛ ko ngɔ nubwɔ kɛ to matsɛ nɛ e ye nyɛ nɔ.

16 ⓜ Matsɛ ɔ ko hi ta okpɔngɔhi babauu; nɛ e ko tsɔ kɛ ya he okpɔngɔhi ngɛ Egipt; ejakaa Yawɛ de ke e ma a ko kpale kɛ ya lejɛ ɔ gblegbleegble.

17 ⓝ Matsɛ ɔ ko ngɔ yihi fuu; ejakaa ke e pee ja a, e tsui maa je Yawɛ he. E ko bua sika hiɔ kɛ sika tsu babauu nya ha e he.

18 Ke matsɛ ɔ ba hi sɛ ɔ nɔ ɔ, nɔ́ nɛ é pee mohu ji e ha nɛ a ngma Mawu mlaa amɛ, kɛ tsɔɔmi ɔmɛ kɛ je mlaa womi ɔ nitsɛ mi kɛ wo womi mi. Mlaa womi ɔ nitsɛ ɔ, Levi bi ɔmɛ nɛ ji osɔfo ɔmɛ a dɛ e hii.

19 Womi nɛ ɔ nɛ hi matsɛ ɔ kasa nya. E kane be tsuaa be e wami be tsuo, konɛ e ye Yawɛ gbeye, nɛ e ye mlaa amɛ tsuo pɛpɛɛpɛ nɛ a ngma ngɛ womi ɔ mi ɔ a nɔ.

20 Enɛ ɔ ma ha nɛ e be susue kaa e hi pe e nyɛmimɛ Israel fɔfɔɛ ɔmɛ; nɛ e maa ye Yawɛ mlaa amɛ a nɔ pɛpɛɛpɛ. Lɔ ɔ loko e matsɛ yemi ɔ se maa kɛ, nɛ e bimɛ, kɛ e nina maa ye Israel nɔ be babauu.