Mose V, 16

Hetsɔmi ɔ

(<x>20 12:1-20</x>)

1 ⓒ “Nyɛɛ ye Hetsɔmi nyami be ɔ ngɛ nyɔhiɔ nɛ a tsɛɛ Abib ɔ mi kɛ wo Yawɛ, nyɛ Mawu ɔ hɛ mi nyami. Nyɔ ko mi ngɛ jamɛ a nyɔhiɔ ɔ mi nɛ e kpɔ̃ nyɛ kɛ je Egipt ɔ nɛ.

2 Nyɛɛ ya he nɛ Yawɛ, nyɛ Mawu ɔ to nɛ a ja lɛ Mawu ngɛ ɔ, nɛ nyɛ ya gbe nyɛ to, loo na amɛ eko kɛ ye Hetsɔmi ɔ kɛ wo Yawɛ, nyɛ Mawu ɔ hɛ mi nyami.

3 Nyɛ ko ye masa nɔ́ ko ligbi kpaago, se mohu nyɛɛ ye abolo kplolo, nɛ ji nɔ́ nami niye ní nɛ nyɛ ye benɛ nyɛɛ kɛ he hiami tu fo kɛ je Egipt ɔ. Nyɛɛ ye abolo kplolo nɛ ɔ, konɛ nyɛ wami be mi tsuo ɔ, nyɛ kɛ kai bɔ nɛ nyɛ je Egipt, he nɛ nyɛ na nɔ́ ngɛ ɔ.

4 Ligbi kpaago nɛ ɔmɛ a mi ɔ, a ko na masa nɔ́ ko ngɛ we ko we ko mi ngɛ nyɛ zugba a nɔ. Lohwe nɛ a gbe kekleekle ligbi ɔ gbɔkuɛ nya si hu, á ye lo ɔ tsuo ligbi ɔ kɛ̃; je ko na yi.

5 “Nyɛɛ gbe lohwe nɛ a kɛ maa ye Hetsɔmi ɔ ngɛ he nɛ Yawɛ, nyɛ Mawu ɔ to nɛ a ja lɛ ngɛ ɔ pɛ; nyɛ ko gbe ngɛ he saisaa ngɛ zugba a nɛ Yawɛ, nyɛ Mawu ɔ ngɔ ha nyɛ kaa nyɛɛ hi nɔ ɔ nɔ. Nyɛ tsu nɔ́ nɛ ɔ gbɔkuɛ nya si be nɛ pu yaa nɔ si ejakaa jamɛ a be mi nɛ nyɛ je Egipt ɔ nɛ.

6

7 Nyɛɛ hoo lo ɔ, nɛ nyɛɛ ye ngɛ he nɛ Yawɛ, nyɛ Mawu ɔ to nɛ a ja lɛ ngɛ ɔ; e nɔ jena mɔtu loko nyɛɛ kpale kɛ ya we mi.

8 Nyɛɛ ye abolo kplolo ligbi ekpa, nɛ ligbi nɛ ji kpaago ɔ, nyɛ bua nyɛ he nya kɛ ja Yawɛ, nyɛ Mawu ɔ; nyɛ ko tsu ní tsumi ko jamɛ a ligbi ɔ.

Ngmakpami nyami be ɔ

(<x>20 34:22</x>; <x>30 23:15-21</x>)

9 ⓓ “Nyɛɛ kane otsi kpaago kɛ je be nɛ nyɛ ma bɔni ngma kpami,

10 nɛ nyɛɛ ye Ngmakpami nyami be ɔ kɛ wo Yawɛ, nyɛ Mawu ɔ hɛ mi nyami. Nyɛɛ ngɔ nyɛ suɔmi nya nike ní, ngɛ bɔ nɛ Mawu gbaa nyɛ nɛ nyɛ na a nya kɛ ba sã bɔ ha Yawɛ, nyɛ Mawu ɔ.

11 Nyɛɛ kɛ nyɛ bimɛ ɔmɛ, nyɛ mawa amɛ, Levi bi ɔmɛ, kɛ yalɔyi ɔmɛ nɛ ngɛ nyɛ ma amɛ a mi ɔ nyɛ bua nɛ jɔ, nɛ nyɛ nya ngɛ Yawɛ, nyɛ Mawu ɔ hɛ mi. Nyɛɛ pee enɛ ɔ ngɛ he kake nɛ Yawɛ, nyɛ Mawu ɔ to nɛ a ja lɛ ngɛ ɔ.

12 Nyɛɛ hyɛ saminya nɛ nyɛɛ ye mlaa nɛ ɔmɛ a nɔ; nyɛ hɛ ko je nɔ kaa nyɛ hu nyɛ ye nyɔguɛ ngɛ Egipt.

Gbasisihimi nyami be

(<x>30 23:33-43</x>)

13 ⓔ “Ke nyɛ hluɛ nyɛ blɛfo tsuo ta, nɛ nyɛ nga nyɛ wai yiblii tsuo gbe nya a, nyɛɛ ye Gbasisihimi nyami be ɔ ligbi kpaago.

14 Nyɛɛ kɛ nyɛ bimɛ ɔmɛ, nyɛ sɔmɔli ɔmɛ, Levi bi ɔmɛ, nibwɔ ɔmɛ, awusa amɛ, kɛ yalɔyi ɔmɛ nɛ ngɛ nyɛ ma amɛ a mi ɔ tsuo nyɛɛ ye nyami be nɛ ɔ.

15 Nyɛ bua nɛ jɔ kɛ wo Yawɛ hɛ mi nyami ligbi kpaago ngɛ he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ. Nyɛ bua nɛ jɔ saminya, ejakaa Yawɛ, nyɛ Mawu ɔ gbaa nyɛ ngmɔ niba ní, kɛ nyɛ nine nya ní tsumi tsuo pɛpɛɛpɛ nɔ.

16 “Israel ma a mi nyumu ɔmɛ tsuo kulaa nɛ a bua a he nya si etɛ ngɛ jeha mi ngɛ he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ. Be ɔmɛ ji Hetsɔmi nyami be, Ngmakpami nyami be, kɛ Gbasisihimi nyami be. Nɔ ko nɔ ko nɛ ko ba nyami nɛ ɔ kɛ e dɛ gu.

17 Nɔ tsuaa nɔ nɛ ha bɔ nɛ e ma nyɛ, kaa bɔ nɛ Yawɛ, nyɛ Mawu ɔ gbaa lɛ ɔ.

Dami sane yemi

18 “Nyɛɛ wo kojoli kɛ tsɔli ngɛ nyɛ wɛtso ɔmɛ a mi ngɛ ma amɛ tsuo nɛ Yawɛ, nyɛ Mawu ɔ ngɛ nyɛ hae ɔ a mi. Mɛɛ a ní tsumi ji kaa a maa hyɛ nɛ dami sane yemi nɛ ma si.

19 ⓕ A ko ye tue kpɛkpɛɛ sane; nɛ a ko hyɛ nɔ hɛ mi. A ko he nyɔ mi ní; ejakaa nyɔ mi ní hemi yuɔ ní leli po a hɛngmɛ, nɛ e haa a plɛɔ munyu hɛ mi buɔ si.

20 Nyɛɛ pee nɔ nɛ sa, nɛ nyɛɛ ye dami sane daa. Ke nyɛ pee ja a, nyɛ maa su zugba nɛ Yawɛ, nyɛ Mawu ɔ ngɛ nyɛ hae ɔ nɔ, nɛ nyɛ maa hi lejɛ ɔ daa.

21 ⓖ “Ke nyɛ ma bɔ sami la tɛ ha Yawɛ, nyɛ Mawu ɔ, nyɛ ko ngɔ yo Ashera a mawu we amaga nɛ a kɛ tso kpɛ kɛ ma e kasa nya.

22 ⓗ Jehanɛ hu, nyɛ ko ngɔ tɛ kɛ ma si nɛ nyɛ ja; Yawɛ, nyɛ Mawu ɔ hiɔ ní nɛ ɔmɛ.