Mose V, 15

Jeha kpaagone ɔ

(<x>30 25:1-7</x>)

1 “Jeha kpaagone tsuaa jeha kpaagone se ɔ, ke nɔ ko hɛɛ mo hiɔ ɔ, kɛ ke lɛ.

2 Bɔ nɛ o maa pee ji nɛ ɔ nɛ: nɔ tsuaa nɔ nɛ pa Israel fɔfɔɛ ko sika a, e kɛ ke lɛ; e ko je hiɔ ɔ hu. Yawɛ nitsɛ nɛ de ke a kɛ hiɔ ɔ nɛ ke.

3 Ke nubwɔ ɔ, lɛɛ jee lɛ hiɔ; se mo nitsɛ o ma mi no lɛɛ koo je lɛ hiɔ ɔ.

4 Ohiatsɛ be nyɛ kpɛti hie; ejakaa Yawɛ, o Mawu ɔ maa gbaa mo ngɛ zugba a nɛ e ngɔ kɛ ngɛ mo hae kaa o weto ní ɔ nɔ.

5 Ke o maa bu Yawɛ, o Mawu ɔ gbi tue, nɛ o maa ye nɔ́ tsuaa nɔ́ nɛ i ngɛ mo he mlaa woe mwɔnɛ ɔ nɔ pɛpɛɛpɛ ɔ, o be ohia yee.

6 Yawɛ maa gbaa mo kaa bɔ nɛ e wo si ɔ. O maa pa sika kɛ ha mahi babauu, se moo lɛɛ o be sika pae ngɛ nɔ ko nɔ ko dɛ; o maa ye je mahi babauu a nɔ, se moo lɛɛ je ma ko je ma ko be o nɔ yee.

7 ⓧ “Ke Israel fɔfɔɛ ko dɛ mi ba ta ngɛ ma amɛ a mi ngɛ zugba a nɛ Yawɛ, o Mawu ɔ ngɔ kɛ ngɛ mo hae ɔ nɔ ɔ, koo pee kpɛle nɛ o nyɛ lɛ nɔ́ he.

8 Bli o dɛ mi ha nɔ nɛ e fi lɛ ɔ, nɛ o pa lɛ bɔ nɛ maa su lɛ.

9 Ke jeha nɛ a kɛ hiɔ kee nɔ ɔ su ta po, ko kua kaa o maa pa lɛ nɔ́ ko. Ko ha susumi yaya kaa kikɛ nɛ ɔ nɛ ba o yi mi. Ke o kua lɛ nɔ́ nɛ hia lɛ ɔ hami, nɛ e fa kue ha Yawɛ kɛ si mo ɔ, a maa bu mo fɔ.

10 Ha lɛ nɔ́ nɛ ngɛ lɛ hiae ɔ faa nɛ kpɛle peemi be mi. Ke o pee ja a, Yawɛ maa gbaa mo ngɛ nɔ́ tsuaa nɔ́ nɛ o ngɛ tsue ɔ mi.

11 ⓨ Be tsuaa be ɔ, ohiatsɛmɛ komɛ maa hi nyɛ nyɛmimɛ Israel fɔfɔɛ ɔmɛ a kpɛti nɛ e fi mɛ kɛ̃; lɔ ɔ he ɔ, i ngɛ mo fae ke o bli o dɛ mi ha mɛ.

Bɔ nɛ á hɛɛ nyɔguɛhi ha

(<x>20 21:1-11</x>)

12 ⓩ “Ke o nyɛmi Hebri no, nyumu jio, yo jio, jua e he kɛ ha mo kaa nyɔguɛ ɔ, ha nɛ e sɔmɔ mo jeha ekpa; nɛ jeha kpaagone ɔ, é ye e he.

13 Se ke o ngmɛɛ e he ɔ, ko ha nɛ e ya dɛ gu.

14 Ngɔɔ níhi nɛ Yawɛ, o Mawu ɔ kɛ gbaa mo ɔ, to, blɛfo, kɛ wai ɔ eko kɛ ha lɛ faa, nɛ o kɛ wo lɛ blɔ.

15 Kai kaa nyɛ hu nyɛ ya ye nyɔguɛ hyɛ ngɛ Egipt zugba a nɔ, nɛ Yawɛ, nyɛ Mawu ɔ ha nyɛ ye nyɛ he; lɔ ɔ he nɛ i ngɛ nyɛ mlaa nɛ ɔ woe mwɔnɛ ɔ nɛ.

16 “Se ke nyɔguɛ ɔ sume nɛ e si mo, akɛnɛ e suɔ o kɛ o we ɔ nyɛ sane ngɛ bɔ nɛ o kɛ lɛ hi si saminya a he je ɔ,

17 lɛɛ ngɔɔ tue gbumi nɔ́ kɛ gbu e tue ngɛ o we ɔ sinya a he; kɛkɛ ɔ, e maa pee o nyɔguɛ e wami be tsuo. Ke yo ji lɛ hu, o pee lɛ jã kɛ̃.

18 E ko wa ha mo kaa o maa ngmɛɛ nyɔguɛ ko he nɛ e ye e he. Ke o maa bu nya a, e sɔmɔ mo jeha ekpa sɔuu, nɛ apaatsɛ hiɔwo fa pɛ o puɛ ngɛ e he. Pee bɔ nɛ i ngɛ mo dee nɛ ɔ, nɛ Yawɛ, o Mawu ɔ maa gbaa o nine nya ní tsumi tsuo nɔ.

Na, loo to kekleekle bi

19 ⓐ “Moo hla o na amɛ, kɛ o to ɔmɛ a kekleekle bi ku ɔmɛ nɛ a ma fɔ ɔ ngɔ to ha Yawɛ, o Mawu ɔ; koo ngɔ na nɛ ɔmɛ kɛ tsu nɔ́ ko, nɛ jijɔ bi ɔmɛ hu ko sã a he bwɔmi.

20 Daa jeha a, o kɛ o weku li nɛ ye mɛ ngɛ Yawɛ hɛ mi ngɛ he nɛ e to nɛ a ja lɛ ngɛ ɔ.

21 Ke lohwe ɔmɛ a nane kplɔ ngɛ a sisi, loo a hɛngmɛ yu, loo sakpa ko ngɛ a he ɔ, koo ngɔ mɛ kɛ sã bɔ ha Yawɛ, o Mawu ɔ.

22 O ma nyɛ maa ye mɛ ngɛ we mi. Nyɛ tsuo, ni nɛmɛ nɛ a he tsɔ, kɛ ni nɛmɛ nɛ a he tsɔ we ma nyɛ maa ye kaa bɔ nɛ a yeɔ batslɔɔ, loo nga mi gbe ɔ.

23 ⓑ Se a muɔ lɛɛ nyɛ ko ye; nyɛɛ tsɛ̃ ngɔ pue si kaa nyu.